អ្នកភូមិចោទតំណាងក្រុមហ៊ុនក្រុមហ៊ុនស្ករអំពៅចិន ឈ្មោះ ហេង ហ្វូ (Hengfu Group Sugar Industry) នៅខេត្តព្រះវិហារថា បានឃុបឃិតជាមួយអាជ្ញាធរមូលដ្ឋាន និងទាហានប្រដាប់ដោយកាំភ្លើង ដើរគំរាម និងចាប់គោយន្តពលរដ្ឋធ្វើជាចំណាប់ខ្មាំង ដើម្បីជាថ្នូរឱ្យពលរដ្ឋព្រមផ្ដិតមេដៃ ប្រគល់ដីឱ្យទៅក្រុមហ៊ុន។ មន្ត្រីសង្គមស៊ីវិលថា ទង្វើរបស់ក្រុមហ៊ុនចិន ធ្វើមកលើ ជនជាតិដើមភាគតិចកួយ ដោយហិង្សា និងគំរាមកំហែង នេះគឺជាអំពើខុសច្បាប់ ហើយអាជ្ញាធរពាក់ព័ន្ធ គួរតែ កោះហៅភាគីទាំងពីរ មកដោះស្រាយដោយសន្តិវិធី។
ប្រជាសហគមន៍ជនជាតិដើមភាគតិចកួយ រស់នៅភូមិបុស្ស ឃុំម្លូព្រៃពីរ ស្រុកឆែប ចោទតំណាងក្រុមហ៊ុនចិន ម្នាក់ឈ្មោះ ឈៀង គង់នៅ ថា បានប្រើប្រាស់អំពើហិង្សាគំរាមកំហែងចាប់ចងពលរដ្ឋ មិនឱ្យអាស្រ័យផល លើដីពួកគាត់។
ជនជាតិភាគតិចកួយ រស់នៅភូមិបុស្ស ឃុំម្លូព្រៃពីរ ប្រាប់វិទ្យុអាស៊ីសេរី នៅថ្ងៃទី២០ ខែតុលា ថា នៅថ្ងៃទី១៩ ខែតុលា គោយន្ត របស់លោកចំនួន ១គ្រឿង និងគោយន្ត អ្នកភូមិ ២គ្រឿងទៀត ត្រូវបានបក្ខពួក លោក ឈៀង គង់នៅ ជាច្រើននាក់ សហការជាមួយកម្លាំងទាហាន២នាក់ ប្រដាប់ដោយកាំភ្លើង ចុះមកដកហូតគោយន្តពលរដ្ឋ យកទៅទុកនៅកសិដ្ឋានរបស់ក្រុមហ៊ុន អំឡុងពេលដែល ពួកគាត់កំពុងតែដកដំឡូងមី ស្ថិតនៅលើដីដែលកំពុងមានវិវាទ។
លោកបន្ថែមថា ការដកហូតគោយន្ត ពីសំណាក់បក្ខពួកលោក ឈៀង គង់នៅ នេះ ដោយសារតែ មានពលរដ្ឋជាច្រើនរស់នៅភូមិបុស្ស ឃុំម្លូព្រៃពីរ មិនព្រមធ្វើកិច្ចសន្យាប្រគល់ដីឱ្យទៅក្រុមហ៊ុន។ ក្រោយមក តំណាងក្រុមហ៊ុនបានប្រាប់តាមរយៈមេឃុំម្លូព្រៃ លោក កាន់ សុវណ្ណគា ឱ្យប្រាប់ម្ចាស់គោយន្តថា ប្រសិនបើចង់បានគោយន្តនោះមកវិញ ត្រូវធ្វើកិច្ចសន្យាប្រគល់ដីឱ្យទៅខាងក្រុមហ៊ុន ទើបអាចទទួលយកគោយន្តទៅវិញបាន។
លោកស្នើឱ្យរដ្ឋាភិបាល លោក ហ៊ុន ម៉ាណែត និងអាជ្ញាធរជួយរកដំណោះស្រាយ ដើម្បីឱ្យខាងក្រុមហ៊ុន ប្រគល់គោយន្ត និងបញ្ឈប់ ការរំខានមកលើពលរដ្ឋទៀត។ លោកថា ជាច្រើនឆ្នាំមកនេះ ក្រុមហ៊ុន បានរំលោភយកដីពួកគាត់អស់ ដែលធ្វើឱ្យពលរដ្ឋជួបលំបាកធ្លាក់ក្នុងជីវភាពភាពក្រីក្រ។ លោកបន្តថា មកដល់ពេលនេះ ក្រុមហ៊ុនបានក្ស័យធនជាង ៣ឆ្នាំមកហើយ គួរតែប្រគល់ដីទាំងនោះ ឱ្យពលរដ្ឋអាស្រ័យផលឡើងវិញ។
«ខ្ញុំស្មើសុំឱ្យជួយរកយុត្តិធម៌ដល់ខ្ញុំ។ បើមិនដោះស្រាយខ្ញុំជួបការលំបាក ព្រោះខ្ញុំ ខ្វះខាត ខ្ញុំក្រីក្រ ណាមួយជំពាក់ អង្គការ(ធនាគារ)។ ដីមួយហិកតារ ពីរហិកតារ ធ្វើដើម្បីចិញ្ចឹមគ្រួសារ»។
នៅថ្ងៃទី១៣ ខែតុលា អភិបាលរងខេត្ត លោក ឃឹម បញ្ញា បានដឹកនាំអាជ្ញាធរភូមិឃុំ និងតំណាងក្រុមហ៊ុន លោក ឈៀង គង់នៅ ចុះជួបពលរដ្ឋមកពីភូមិបុស្ស និងភូមិប្រើសក្អក ជាង១០០នាក់ នៅលើដីដែលមានជម្លោះ ស្ថិតនៅភូមិប្រើសក្អក នៅឃុំម្លូព្រៃពីរ ស្រុកឆែប។ ក្នុងជំនួបនោះ អភិបាលរងខេត្ត លោក ឃឹម បញ្ញា និងតំណាងក្រុមហ៊ុន លោក ឈៀង គង់នៅ បានគំរាមឱ្យពលរដ្ឋ ធ្វើកិច្ចសន្យា ឈប់អាស្រ័យផលលើដីនោះទៀត ដោយថា ដីនោះ គឺជាដីរបស់ក្រុមហ៊ុន។
ទោះជាយ៉ាងណា នៅក្នុងជំនួបនោះ មានពលរដ្ឋ ចំនួនតិចតូចប៉ុណ្ណោះ ព្រមធ្វើកិច្ចសន្យា។ ពលរដ្ឋឱ្យដឹងថា សម្រាប់អ្នកភូមិដែលមិនព្រមធ្វើកិច្ចសន្យានេះ ត្រូវបានអាជ្ញាធរមូលដ្ឋាន ដើរគំរាមកំហែងពលរដ្ឋនៅតាមផ្ទះ និងបិទសិទ្ធិ ពួកគាត់ មិនឱ្យទៅប្រមូលផលស្រូវ និងដំឡូងមី នៅលើដីដែលបានដាំដុះរួចហើយ។ ចំណែកពលរដ្ឋណាទៅប្រមូលផលនឹងត្រូវចាប់ខ្លួនបញ្ជូនទៅតុលាការ។
វិទ្យុអាស៊ីសេរី ពុំអាចទាក់ទងអភិបាលខេត្តព្រះវិហារ លោក គីម រិទ្ធី និងអភិបាលស្រុកឆែប លោក ឡង់ សុបិន ដើម្បីឆ្លើយតបជុំវិញរឿងនេះបានទេ នៅថ្ងៃទី២០ ខែតុលា។ ចំណែក មេឃុំម្លូព្រៃពីរ លោក កាន់ សុវណ្ណគា និងតំណាងក្រុមហ៊ុន លោក ឈៀង គង់នៅ ក៏មិនអាចទាក់ទងបាននៅថ្ងៃដដែល ដោយហៅទូរស័ព្ទចូលតែគ្មានអ្នកទទួល។
ជុំវិញរឿងនេះ មេភូមិបុស្ស ឃុំម្លូព្រៃពីរ លោក ណាម សិត ប្រាប់វិទ្យុអាស៊ីសេរីនៅថ្ងៃទី២០ ខែតុលាថា ករណីក្រុមហ៊ុនដកហូតគោយន្ត ពលរដ្ឋចំនួន៣គ្រឿង លោកពុំបានដឹងរឿងនោះទេ ហើយលោកក៏គ្មានលទ្ធភាពទៅដោះស្រាយបញ្ហានោះដែរ។ លោកបន្តថា កន្លងទៅអាជ្ញាធរពាក់ព័ន្ធ បានព្យាយាមដោះស្រាយបញ្ហានេះជាច្រើនដងហើយ ដើម្បីឱ្យពលរដ្ឋធ្វើកិច្ចសន្យា ប្រគល់ដីទៅក្រុមហ៊ុនវិញ ប៉ុន្តែ ពលរដ្ឋខ្លះនៅតែមិនព្រម ដែលជាហេតុធ្វើឱ្យកើតមានបញ្ហាជាបន្តបន្ទាប់។
លោក ណាម សិត៖ «ខ្ញុំក៏មិនដឹងថា ម៉េចទេ ធម្មតា យើងកូនអ្នកស្រុកស្រែ យើងតែងតែត្រូវការអាស្រ័យផល ដើម្បីដោះស្រាយជីវភាព ប៉ុន្តែបើឱ្យខ្ញុំនិយាយ ខ្ញុំមិនចេះ អារកាត់យ៉ាងម៉េចទេ។ បើតាមកិច្ចសន្យា យើងអាស្រ័យផលឆ្នាំនេះ យើងធ្វើបាន ហើយនៅឆ្នាំក្រោយគេមិនឱ្យធ្វើ ដូចថា មានក្រុមហ៊ុនគេជំនួសធ្វើ។ គេធ្វើកិច្ចសន្យា អ៊ីចឹងឯង»។
ទាក់ទិនរឿងនេះ ប្រធានអង្គការពន្លកខ្មែរ លោក ប៉ឹក សោភ័ណ សង្កេតឃើញថា វិវាទដីធ្លី រវាងក្រុមហ៊ុនចិន ហេង ហ្វូ និងជនជាតិ ដើមភាគតិចកួយ នៅខេត្តព្រះវិហារនេះ បានបង្កផលប៉ះពាល់ធ្ងន់ធ្ងរដល់ជីវភាពពលរដ្ឋ។ លោកថា ចាប់តាំងពីក្រុមហ៊ុនបានក្ស័យធនមក ឃើញមានបុគ្គលឈ្មោះ ឈាង គង់នៅ ចេញមុខអះអាងថា ជាតំណាងក្រុមហ៊ុន។ លោកបន្តថា បុគ្គលរូបនេះ តែងតែ គំរាមកំហែងពលរដ្ឋ និងប្រើអំពើហិង្សា រួមនឹងប្ដឹងពលរដ្ឋជាច្រើនរូប ទៅតុលាការជាហូរហែ។
លោកបន្តថា ករណីនេះ អភិបាលខេត្ត ព្រះវិហារ លោក គីម រិទ្ធី និងអាជ្ញាធរមូលដ្ឋាន ក៏បានដឹង ឮហើយដែរ ក៏ប៉ុន្តែ ការដោះស្រាយកន្លងទៅ ភាគីក្រុមហ៊ុនតែងតែឈ្នះ ចំណែកពលរដ្ឋជាអ្នកចាញ់។ រីឯក្រុមហ៊ុន និងអាជ្ញាធរ តែងតែបង្ខំ ឱ្យពលរដ្ឋធ្វើកិច្ចសន្យាឈប់អាស្រ័យផលលើដីនោះទៀត។ លោកបន្តថា បញ្ហានេះ អាជ្ញាធរពាក់ព័ន្ធគួរតែដោះស្រាយ ឈរលើភាពយុត្តិធម៌ បើពុំដូច្នោះ អំពើហិង្សា រឿងវិវាទដីធ្លីនេះ នៅតែបន្តកើតមាន ហើយអ្នកដែលរងគ្រោះគឺពលរដ្ឋ។
លោក ប៉ឹក សោភ័ណ៖ «ដាក់លក្ខខណ្ឌ ប្រគល់ដីឱ្យទៅបុគ្គល ឈៀង គង់នៅ ហើយ មួយចំណែកទៀត ស្រូវដែលច្រូតយកផលហ្នឹង ត្រូវបែងចែកទៅឱ្យពួកគេដែរ។ អ៊ីចឹងនេះគឺជាការសម្លុត គំរាមកំហែង ដោយគ្មានដំណោះស្រាយអ្វីទាំងអស់ ហើយទៅឆក់យក ផលប្រយោជន៍ពីពួកគាត់ ។ អ៊ីចឹងមានតែ អាជ្ញាធរ គួរតែទៅពិនិត្យមើល បញ្ហាទាំងអស់នឹង ដើម្បីកុំឱ្យបុគ្គលម្នាក់ហ្នឹង គាត់ធ្វើអីតាមតែអំពើចិត្តទៀត»។
ចាប់តាំងពីឆ្នាំ២០១៩ ក្រុមហ៊ុនស្ករអំពៅចិន ឈ្មោះ ហេង ហ្វូ បានផ្អាកដំណើរការដាំដើមអំពៅ ដោយទុកឱ្យដីទំនេរ ក្រោយមកជនជាតិភាគតិចកួយរស់នៅទីនោះបានចាប់ផ្ដើមអាស្រ័យផលធ្វើស្រូវនិងដាំដំឡូងឡើងវិញ បានជាង៣ឆ្នាំ ដោយគ្មានការរារាំងពីសំណាក់ក្រុមហ៊ុននោះទេ។
ប៉ុន្តែនៅឆ្នាំ២០២៤ ស្រាប់តែមាន បុគ្គល ឈ្មោះ ឈៀង គង់នៅ អះអាងថា ជាតំណាងក្រុមហ៊ុន ហើយបានឈូសឆាយ ដំណាំពលរដ្ឋ និងគំរាមប្ដឹងផ្ដល់ពលរដ្ឋទៅតុលាការ ដោយចោទពលរដ្ឋថា អាស្រ័យផលលើដីក្រុមហ៊ុនដោយខុសច្បាប់។ ចំណែក អាជ្ញាធរមូលដ្ឋានតែងតែចេញមុខការពារភាគីក្រុមហ៊ុន ហើយបណ្ដោយឱ្យបក្ខពួកលោក ឈៀង គង់នៅ ប្រើអំពើហិង្សា មកលើពលរដ្ឋជាញឹកញាប់។ ពលរដ្ឋទទូចឱ្យរដ្ឋាភិបាល លោក ហ៊ុន ម៉ាណែត ជួយអន្តរាគមន៍លើករណីនេះ ឱ្យបានឆាប់ បើពុំដូច្នេះទេ ពលរដ្ឋនឹងគ្មានដីអាស្រ័យនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments