អ្នកឃ្លាំមើលថា ដើម្បីដោះស្រាយបញ្ហាគ្រឿងញៀន ដែលកំពុងរីករាលដាលនៅកម្ពុជា លុះត្រាតែរដ្ឋាភិបាលដាក់វិធានការម៉ឺងម៉ាត់លុបបំបាត់អំពើពុករលួយ និងស្វែងរកខ្នងបង្អែករបស់អ្នកជួញដូរគ្រឿងញៀនទាំងនោះ ។ ការលើកឡើងនេះ ធ្វើឡើងបន្ទាប់ពីកម្លាំងអាវុធហត្ថបង្ក្រាបបទល្មើសគ្រឿងញៀន និងចាប់យកគ្រឿងញៀនប្រមាណ១រយគីឡូក្រាមនៅរាជធានីភ្នំពេញ កាលពីពេលថ្មីៗនេះ ។
អ្នកសិក្សាច្បាប់ និងអភិបាលកិច្ចបែបប្រជាធិបតេយ្យ លោក វ៉ន ចាន់ឡូត ប្រាប់វិទ្យុអាស៊ីសេរីនៅថ្ងៃទី២០ ខែតុលា ថា បញ្ហាគ្រឿងញៀននៅកម្ពុជាបច្ចុប្បន្ន បានសាយភាយពីទីក្រុងរហូតដល់ជនបទ រួមទាំងវត្តអារាម និងពន្ធនាគារជាដើម។ លោកបារម្ភថា ជនល្មើសនឹងប្រើប្រាស់ទឹកដីកម្ពុជា ជាកន្លែងប្រព្រឹត្តបទល្មើស ដោយសារតែបញ្ហាអំពើពុករលួយ និងអំពើនិទ្ទណ្ឌភាព។
លោក វ៉ន ចាន់ឡូត៖ «រដ្ឋដែលទន់ខ្សោយ និងពោរពេញដោយអំពើពុករលួយដូចកម្ពុជា គឺអំណោយផលខ្លាំងណាស់ទៅដល់ឧក្រិដ្ឋជនក្នុងការប្រើប្រាស់ទឹកដីកម្ពុជា ក៏ដូចជាប្រើប្រាស់នូវការសូកប៉ាន់ទៅកាន់អ្នកមានអំណាចដើម្បីជួយការពារនូវទង្វើឧក្រិដ្ឋ ឬក៏បង្កើតឲ្យមាននូវអំពើនិទ្ទណ្ឌភាព»។
ការលើកឡើងនេះ ធ្វើឡើងបន្ទាប់ពីកម្លាំងកងរាជអាវុធហត្ថរាជធានីភ្នំពេញ កាលពីថ្ងៃទី១៩ ខែតុលា បានបង្ហាញពីលទ្ធផល នៃការបង្ក្រាបបទល្មើសគ្រឿងញៀនមួយករណីនៅរាជធានីភ្នំពេញ ថា សមត្ថកិច្ចបានឃាត់ខ្លួនជនបរទេស ជាជនជាតិចិនចំនួន ៤នាក់ និងចាប់យកវត្ថុតាងគ្រឿងញៀនប្រមាណ ១រយគីឡូក្រាម ព្រមទាំងសម្ភារៈសម្រាប់វេចខ្ចប់មួយចំនួនទៀត ក្នុងប្រតិបត្តិការឆែកឆេរទីតាំងចំនួន ៤ទីតាំងផ្សេងគ្នា និងបានកសាងសំណុំរឿង និងបញ្ជូនជនសង្ស័យ រួមទាំងវត្ថុតាង ទៅកាន់សាលាដំបូងរាជធានីភ្នំពេញដើម្បីបន្តនីតិវិធី។
អ្នកនាំពាក្យកងរាជអាវុធហត្ថលើផ្ទៃប្រទេសលោក អេង ហ៊ី បដិសេធមិនធ្វើអត្ថាធិប្បាយលើបញ្ហានេះឡើយ។ ទោះជាយ៉ាងណា លោក អះអាងប្រាប់វិទ្យុអាស៊ីសេរី នៅថ្ងៃទី ២០ ខែតុលាថា កងរាជអាវុធហត្ថប្ដេជ្ញាបង្ក្រាបបញ្ហាគ្រឿងញៀននេះ ប្រសិនជាមានពាក្យបណ្ដឹង និងមានបទល្មើសជាក់ស្ដែង។
ក្នុងរយៈពេលជិត ៦ខែ ដើមឆ្នាំ២០២៤ សមត្ថកិច្ចបានបើកប្រតិបត្តិការបង្ក្រាបគ្រឿងញៀនជាង ៣ពាន់ករណី (៣.០៧៨) ឃាត់ខ្លួនជនសង្ស័យបានជាង ៦ពាន់ ៦រយនាក់ (៧.៦៥២) និងរឹបអូសបានគ្រឿងញៀនជាង ៣តោន។
អ្នកសិក្សាច្បាប់ និងអភិបាលកិច្ចបែបប្រជាធិបតេយ្យ លោក វ៉ន ចាន់ឡូត លើកឡើងថា លុះត្រាតែរដ្ឋាភិបាល មានឆន្ទៈក្នុងការលុបបទល្មើសគ្រឿងញៀន និងអំពើពុករលួយ ព្រមទាំងផ្ដន្ទាទោសមេខ្លោងនៅពីក្រោយគ្រឿងញៀន ទើបអាចដោះស្រាយបញ្ហាគ្រឿងញៀន ប្រកបដោយប្រសិទ្ធភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments