អ្នកឃ្លាំមើលថា ការបន្តតែងតាំងកូនៗ និងសែស្រឡាយរបស់មន្ត្រីកំពូលៗ នៃបក្សកាន់អំណាចក្នុងជួរកងទ័ព និងស្ថាប័នរដ្ឋបង្ហាញពីការបែងចែកវណ្ណៈ និងជានយោបាយសន្តតិវង្ស។ ការលើកឡើងនេះ គឺបន្ទាប់ពីរដ្ឋាភិបាលលោក ហ៊ុន ម៉ាណែត បានតែងតាំងកូនប្រុសរបស់មន្ត្រីជាន់ខ្ពស់ពីររូបឱ្យឡើងឋានន្តរសក្ដិជាឧត្ដមសេនីយ៍ផ្កាយ៣ ក្នុងជួរកងទ័ព កាលពីថ្ងៃទី២៦ ខែកញ្ញា ឆ្នាំ២០២៤។
អ្នកឃ្លាំមើល និងមន្ត្រីបក្សប្រឆាំង លើកឡើងថា ការបន្តតែងតាំងសែស្រឡាយជាបក្ខពួក និងកូនៗមន្ត្រីចាស់ៗ នៅក្នុងជួរកងជួរទ័ព និងស្ថាប័នរដ្ឋ បង្កើតឱ្យមាន អំពើពុករលួយជាប្រព័ន្ធកាន់តែធំឡើង ការរំលោភអំណាច និងភាពច្របូកច្របល់ក្នុងសង្គម ដែលទាញឱ្យប្រទេសជាតិកាន់តែដុនដាបងើបមិនរួច។
អ្នកឃ្លាំមើលសិទ្ធិមនុស្ស និងសង្គម លោក ស៊ឹង សែនករុណា ប្រាប់វិទ្យុអាស៊ីសេរី នៅថ្ងៃទី៥ ខែតុលា ថា នេះជាការដឹកនាំសន្តតិវង្សបន្តពូជ ផ្ទុយពីប្រជាធិបតេយ្យដូចមានចែងក្នុងរដ្ឋធម្មនុញ្ញ។
លោកថា ក្នុងប្រព័ន្ធប្រជាធិបតេយ្យមេដឹកនាំជាតិ ត្រូវកើតចេញពីការបោះឆ្នោត យុត្តិធម៌ ស្របតាមឆន្ទៈរបស់ប្រជាពលរដ្ឋភាគច្រើន រីឯមន្ត្រីរាជការគ្រប់ឋានានុក្រមក្នុងស្ថាប័នរដ្ឋ ត្រូវតែងតាំងដោយផ្អែកលើសីលធម៌ និងសមត្ថភាពបុគ្គល គឺ មិនមែនចេះតែដាក់បញ្ចូលបក្ខពួកគ្រួសារ ក្រោមលេសការពារសន្តិភាពនោះទេ។
លោក ស៊ឹង សែនករុណា ថា រចនាសម្ព័ន្ធដឹកនាំសន្តតិវង្ស ឬតពូជបែបនេះ គឺជា ប្រព័ន្ធធ្វើបាបប្រជាពលរដ្ឋ ដើម្បីតែអំណាច និងផលប្រយោជន៍បុគ្គលមួយក្រុមតូច។
លោក ស៊ឹងសែនករុណា៖ «ពលរដ្ឋមិនមានភាពរីកចម្រើនទេ កាលណាប្រទេសដឹកនាំបែបហ្នឹង ពលរដ្ឋធ្លាក់ខ្លួនសភាពក្រទៅៗលំបាកទៅៗៗ ហើយគេប្រើអំណាចគាបសង្កត់ទៅលើពួកគាត់ ហើយពួកគាត់មិនមានសិទ្ធិគ្រប់គ្រាន់ក្នុងការអនុវត្តសិទ្ធិរបស់ខ្លួន ដើម្បីទាមទារតវ៉ា ក្នុងការរកទទួលទានសេដ្ឋកិច្ចគ្រួសារអីផ្សេងៗ ក្រោមសម្ពាធរបស់អាជ្ញាធរតាំងពីក្រោមដល់លើហ្នឹងឯង»។
កូនប្រុសរបស់លោក ឥត សារ៉ាត់ ដែលជាអគ្គមេបញ្ជាការរង និងជានាយសេនាធិការចម្រុះនៃកងយោធពលខេមរភូមិន្ទ គឺលោក រ៉ាត់ ដារ៉ារ័ត្ន ត្រូវបានដំឡើងឋានន្តរសក្ដិជាឧត្ដមសេនីយ៍ផ្កាយ៣ ក្នុងជួរកងទ័ព និងបច្ចុប្បន្នជារដ្ឋលេខាធិការនៃក្រសួងការពារជាតិ និងមានងារជាឧកញ៉ាមួយទៀត។
រីឯកូនប្រុសរបស់លោក មាស សុភា អតីតមេបញ្ជាការកងទ័ពជើងគោក និងបច្ចុប្បន្នជាឧត្ដមទីប្រឹក្សាផ្ទាល់ព្រះមហាក្សត្រ មានឋានៈស្មើឧបនាយករដ្ឋមន្ត្រី គឺ លោក មាស សុភារិទ្ធ ជានាយការិយាល័យទី២ នៃកងយោធពលខេមរភូមិន្ទ។
លោក មាស សុភា និងលោក ឥត សារ៉ាត់ សុទ្ធសឹងតែជាសមាជិកអចិន្ត្រៃយ៍នៃគណបក្សប្រជាជនកម្ពុជា។
វិទ្យុអាស៊ីសេរីមិនអាចសុំការអត្ថាធិប្បាយបញ្ហានេះ ពីប្រធានអង្គភាពអ្នកនាំពាក្យរដ្ឋាភិបាលលោក ប៉ែន បូណា និងអ្នកនាំពាក្យនាយករដ្ឋមន្ត្រីលោក មាស សុភ័ណ្ឌ បានទេ នៅថ្ងៃទី៥ ខែតុលា ដោយទូរស័ព្ទចូលតែគ្មានអ្នកទទួល។
ជុំវិញរឿងនេះ ទីប្រឹក្សាគណបក្សកម្លាំងជាតិលោក រ៉ុង ឈុន កត់សម្គាល់ថា ក្នុងសង្គមកម្ពុជាសព្វថ្ងៃ ការទទួលបានតំណែងធំៗ តាមរយៈសែស្រឡាយស្នងត្រកូលគ្រួសារ មានច្រើនលើសលប់ ប៉ុន្តែកូនចៅប្រជាពលរដ្ឋសាមញ្ញក្រីក្រ ដែល មានសមត្ថភាពកម្រទទួលបានតំណែងជាន់ខ្ពស់ ក្នុងជួររដ្ឋាភិបាល និងកងទ័ព។
លោក រ៉ុង ឈុន៖ «ចង់ឃើញឱ្យមានការកែទម្រង់ផ្ដល់ឋានៈតួនាទីហ្នឹង ត្រូវមានភាពស្មើគ្នារវាងកូនអ្នកធំ ហើយនឹងកូនចៅប្រជាពលរដ្ឋធម្មតា នៅពេលកូនចៅប្រជាពលរដ្ឋធម្មតា មានសមត្ថភាពពេញលេញគួរតែត្រូវបានតំណែងធំៗក្នុងស្ថាប័នរដ្ឋ»។
ក្រៅពីកូនលោក ឥត សារ៉ាត់ និងកូនលោក មាស សុភា នោះ កូនប្រុសរបស់លោក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ គឺលោក សៀ ទីន ត្រូវបានរដ្ឋាភិបាលលោក ហ៊ុន ម៉ាណែត តែងតាំង ជាមេបញ្ជាការបញ្ជាការដ្ឋានកងរាជអាវុធហត្ថខេត្តសៀមរាប។
ចំពោះកូនប្រុសរបស់លោក សេង ទៀង ជំនួយការរបស់ប្រធានព្រឹទ្ធសភា និងជាឪ នាយករដ្ឋមន្ត្រីលោក ហ៊ុន សែន គឺលោក សេង វណ្ណៈ ត្រូវបានតែងតាំងជាអភិបាលរងរាជធានីភ្នំពេញ ខណៈកូនប្រុសលោក ចៅ ភិរុណ គឺលោក ចៅ ភិរិទ្ធ ត្រូវបានតែងតាំងជាអគ្គនាយក នៃអគ្គនាយកដ្ឋានសម្ភារៈបច្ចេកទេសនៃក្រសួងការពារជាតិ ជំនួសតំណែងឪពុករបស់លោក ដែលត្រូវផ្ទេរតំណែងទៅជារដ្ឋលេខាធិការនៃក្រសួងការពារជាតិវិញ។
ការតែងតាំងកូនៗ និងសែស្រឡាយរបស់មន្ត្រីជាន់ខ្ពស់ក្នុងរដ្ឋាភិបាលក្រោយពីលោក ហ៊ុន សែន បានលើកបន្តុបកូនប្រុសរបស់លោក គឺលោក ហ៊ុន ម៉ាណែត ឱ្យធ្វើជានាយករដ្ឋមន្ត្រីបន្តពីលោក។
អ្នកប្រឹក្សាយោបល់ផ្នែកអភិវឌ្ឍផ្នត់គំនិត និងការស្រាវជ្រាវលោក សេក សុជាតិ ប្រាប់វិទ្យុអាស៊ីសេរីនៅថ្ងៃទី៥ ខែតុលា ថា ការតែងតាំងក្រោមឥទ្ធិពលអំណាចសែស្រឡាយ នៅក្នុងជួរកងជួរទ័ព និងក្រសួងស្ថាប័នរដ្ឋបន្តពីឪពុកម្ដាយ ដោយមិនមានគុណសម្បត្តិគ្រប់គ្រាន់ ហើយមិនទាន់មានស្នាដៃ គឺជាវប្បធម៌ដដែលៗ ដែលបានរៀបចំជាប្រព័ន្ធ។
លោកថា ការតែងតាំងជាបន្តបន្ទាប់របៀបនេះ ក៏ធ្វើឱ្យមានភាពរកាំរកូសនៅក្នុងស្ថាប័ននីមួយៗដែរ ដោយសារតែឥស្សរជន ដែលមានស្នាដៃ ហើយមិនមានទំនាក់ទំនងជិតស្និទ្ធជាមេដឹកនាំកំពូល គ្មានឱកាសត្រូវបានដំឡើងតំណែងនិងតួនាទី។
លោក សេក សុជាតិ ថា បញ្ហានេះ អាចឆ្លុះបញ្ចាំងពីការបែងចែកវណ្ណៈ នៅក្នុងការដឹកនាំស្ថាប័ន។
លោក សេក សុជាតិ៖ «អ្នកដែលមានសមត្ថភាពពិតប្រាកដមិនត្រូវបានផ្ដល់តម្លៃ ឬមិនត្រូវបានលើកទឹកចិត្តអីជាដើម ដែលជាហេតុផលមួយនឹងឱ្យមានការរង្គោះរង្គើបើសិនជានៅតែមានការតែងតាំង ឬក៏ផ្ដល់តួនាទី ដោយមិនឈរទៅគោលការណ៍តម្លាភាព យុត្តិធម៌ ហើយមិនឈរទៅសមត្ថភាព បទពិសោធន៍ទាក់ទងជាមួយនឹងការកាន់តួនាទីកំពូលនីមួយៗ»។
អ្នកឃ្លាំមើលស្ថានការណ៍កម្ពុជាធ្លាប់វាយតម្លៃថា នេះជារបៀបដែលលោក ហ៊ុន សែន បែងចែកអំណាចឱ្យទៅក្រុមបក្ខពួករបស់លោក ដើម្បីកុំឱ្យមានចលនាប្រឆាំងរូបលោក និងក្រុមគ្រួសារ នៅក្នុងជួរបក្សប្រជាជនកម្ពុជា និងរដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments