អ្នកប្រើប្រាស់បណ្តាញសង្គមមួយចំនួនមិនជឿថា កម្ពុជានឹងអាចទាក់ទាញអ្នកវិនិយោគធំៗពីអាមេរិកបានឡើយ បើកម្ពុជាមិនស្តារស្ថានភាពការគោរពសិទ្ធិមនុស្ស និងប្រជាធិបតេយ្យឲ្យរស់ឡើងវិញនោះទេ។
ពួកគាត់មើលឃើញទៀតថា បើសិនជាលំហសេរីភាពរបស់ពលរដ្ឋ សង្គមស៊ីវិល និងអ្នកនយោបាយកាន់តែមានសភាពតានតឹង និងកាន់តែរួមតូចទៅៗដូចសព្វថ្ងៃនេះ កុំថាឡើយមានអ្នកវិយោគមករកស៊ីនៅកម្ពុជាប្រទេសមហាអំណាចដូចជាសហរដ្ឋអាមេរិក និងសហគមន៍អឺរ៉ុប ជាដើម នឹងបង្កើនការទណ្ឌកម្មបន្ថែមទៀតទៅលើមន្ត្រីជាន់ខ្ពស់មួយចំនួនរបស់រដ្ឋាភិបាលក្រុមគ្រួសារត្រកូលហ៊ុន។
អ្នកប្រើប្រាស់បណ្ដាញសង្គមមួយចំនួនទាំងនៅលើហ្វេសប៊ុក និង យូធូប រិះគន់រដ្ឋាភិបាលឪ កូន គឺ លោក ហ៊ុន សែន និង លោក ហ៊ុន ម៉ាណែត ថា ចង់បានអ្នកវិយោគច្រើនមកប្រទេសកម្ពុជា ដើម្បីជួយពលរដ្ឋឲ្យការងារធ្វើ និងចម្រើនសេដ្ឋកិច្ចជាតិ មិនប្រឹងប្រែងគោរព្ធសិទ្ធិមនុស្ស និងប្រជាធិបតេយ្យទេ គឺបែរប្រឹងតែចាប់ពលរដ្ឋដាក់គុក។
ម្ចាស់គណនីយូធូប @phoungt hoeung សរសេរថា រដ្ឋាភិបាល ខំណាស់ ខំប្រឹងប្រែងចាប់ មនុស្សដាក់គុក។
បញ្ហានេះ អ្នកប្រើប្រាស់បណ្ដាញសង្គមយូធូប ដែលដាក់ឈ្មោះថា ទីប៉ា (@tipa5681)៖ បញ្ចេញមតិថា ឱ្យគេទៅវិនិយោគយ៉ាងម៉េចបើមិនបើកលំហសេរីភាពរបស់ប្រជាជនផង។
ចំណែក អ្នកប្រើប្រាស់បណ្ដាញសង្គមម្នាក់ទៀតដាក់ឈ្មោះថា វាសនា លឹម (@VeasnaLIM-ce2qe) សរសេររិះគន់ថា៖ «គ្មានក្រុមហ៊ុនប្រទេសសេរីណាមកវិនិយោគក្នុងប្រទេសពុករលួយ និងផ្ដាច់ការទេ...»។
រីឯអ្នកប្រើប្រាស់បណ្ដាញសង្គមផ្សេងទៀត ក៏បានបញ្ចេញមតិជុំវិញការដែលរដ្ឋាភិបាលប្រឹងដើរគោះទ្វារប្រទេសផ្សេងៗដូចជាសហរដ្ឋអាមេរិកជាដើមដើម្បីឲ្យគេមកវិនិយោគកម្ពុជា។
អ្នកប្រើប្រាស់បណ្ដាញសង្គមម្នាក់ផ្សេងទៀត មានឈ្មោះថា សៀក គង្គ (@SeakKong) បានផ្តល់ជាយោបល់ថា៖ «បញ្ហាដែលត្រូវដោះស្រាយ គឺបើកលំហប្រជាធិបតេយ្យ ហើយបំបាត់អំពើពុករលួយបាន នោះអ្វីៗនឹងដោះស្រាយបានទាំងអស់...»។
ការបញ្ចេញមតិរិះគន់បែបនេះ របស់អ្នកប្រើប្រាស់បណ្ដាញសង្គម បន្ទាប់ពីលោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១នៃក្រុមប្រឹក្សាអភិវឌ្ឍន៍កម្ពុជា (CDC) បានមកសហរដ្ឋអាមេរិកដើម្បីស្វែងរកអ្នកវិនិយោគឲ្យមកកម្ពុជាកាលពីពេលថ្មីនេះ។ លោកអះអាងថា ក្រុមហ៊ុនអាមេរិកាំងជាច្រើនចាប់អារម្មណ៍ចង់មកវិនិយោគនៅកម្ពុជា។
ជុំវិញបញ្ហាសិទិ្ធមនុស្សវិញ លោកក៏បានអះអាងដែរថា ជាទូទៅ នៅកម្ពុជា សេរីភាពនៃការបញ្ចេញមតិ គឺប្រសើរច្រើនឆ្ងាយជាងប្រទេសដទៃទៀតនៅក្នុងតំបន់។
ទោះបីជាលោក ស៊ុន ចាន់ថុល អះអាង បញ្ជាក់យ៉ាងដូច្នេះហើយក៏ដោយ ក៏អ្នកប្រើប្រាស់បណ្ដាញសង្គមមួយចំនួនមិនជឿឡើយ ហើយថា ការលើកឡើងនេះ ផ្ទុយពីការពិត។
អ្នកប្រើប្រាស់បណ្ដាញសង្គមម្នាក់ផ្សេងទៀត ឈ្មោះ ណែរ៉ូ ហៀ (@nerohea4094) ហាក់មិនជឿលើការអះអាងរបស់លោក ស៊ុន ចាន់ថុល ឡើយ ដោយសរសេរថា៖ «និយាយធ្វើដូចសម័យគ្មានអ៊ីនធឺណិត។ ក្មេងៗថ្នាក់ទី១២ លឺ ដឹងគ្នាសើចម៉េចទេ!»។
អ្នកប្រើប្រាស់បណ្ដាញសង្គមម្នាក់ទៀត ឈ្មោះ អាបប៉ូអេ...(@OppoA-jq6ow) ហាក់មិនជឿថាក្រុមហ៊ុនអាមេរិកាំងជាច្រើនចាប់អារម្មណ៍ចង់មកវិនិយោគនៅកម្ពុជាដូចក្នុងស្ថានភាពសព្វថ្ងៃនេះទេ។ គាត់សរសេរថា៖ «ឮតែមានអ្នកវិនិយោគចូលមករហូត ប៉ុន្តែប្រជាជនចេះតែលំបាកទៅៗ ខ្ញុំចង់មិនបានអ្នកវិនិយោគច្រើនអីទេ បើប្រជាជននៅតែវេទនាបែបនេះនោះ សូមជួយឲ្យតែចំណូលប្រជាជនបានប្រសើរឡើងប៉ុណ្ណោះ បើប្រាក់ខែឡើងតែបន្តិចទំនិញឡើងកប់ពពក»។
ទាក់ទងនឹងការអួតអាងរបស់ លោក ស៊ុន ចាន់ថុល នេះដែរម្ចាស់គណនី បណ្ដាញសង្គមម្នាក់ទៀត ឈ្នោះ ប្រូជី (@BroG-p9t) សរសេរថា៖ «និយាយមកអត់អន់បន្តិចនិយាយអួតវិញលេខ១ ប្រជាជនខ្លះរកតែលុយធនាគារមិនចង់បានផងរីឯរោងចក្រវិញបិទបណ្តើរៗហើយ និយាយពីអួតនោះអួត…»។
អ្នកប្រើប្រាស់បណ្ដាញសង្គមម្នាក់ទៀត ក៏ហាក់មិនជឿដូចគ្នាដែរ។ ម្ចាស់គណនីបណ្តាញសង្គមម្នាក់ទៀត ឈ្នោះ អ៊ិច សូឡា (@xsola1489) សរសេរថា៖ «លោក ស៊ុន ចាន់ថុល និយាយ ខ្ញុំចង់សើច ប្រូ! ពូកែមែន លោក ប៉ុន្តែ ជាក់ស្ដែង ដូចជាមិនអ៊ីចឹង»។
ទាក់ទងនឹងរឿងនេះដែរ អ្នកជំនាញច្បាប់ និងអភិបាលកិច្ចបែបប្រជាធិបតេយ្យលោក វ៉ន ចាន់ឡូត (Vorn Chanlout): ក៏បានសរសេរនៅលើទំព័រហ្វេសប៊ុករបស់លោកដែរ ដោយហាក់ហួសចិត្តថា៖ ទៅឡង់សេក្រុមហ៊ុនអាមេរិកឲ្យមកវិនិយោគ ស្រាប់តែចាប់មនុស្សដែលអាមេរិកធ្លាប់ផ្តល់ពានផ្នែកសិទ្ធិមនុស្សដាក់គុក «អញ្ចឹងបានថា មិនច្រឡំគេមែន..!!»។
ដោយឡែកអ្នកប្រើប្រាស់បណ្ដាញសង្គមម្នាក់ទៀត ឈ្នោះ រិទ្ធី តា (@rithytar8766)៖ គាត់បានចោទសួរថា៖ «មកវិនិយោគខាងវិស័យអ្វីខាងដីឡូខ្យល់ផ្ទះល្វែងខ្យល់បុរីខ្យល់ ឬខាងវិស័យកសិកម្មឧស្សាហកម្ម...?»។
ចំណែកអ្នកប្រើប្រាស់បណ្ដាញសង្គមម្នាក់ទៀត (@valeriepivert6713) សរសេររិះគន់ថា រាស្ត្រទឹកភ្នែកគ្រប់ទីកន្លែងដែលអភិវឌ្ឍលោកបំភ្លៃការពិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments