ក្រុម Hackers របស់ក្រសួងសន្តិសុខជាតិកូរ៉េខាងជើង បង្កើតយុទ្ធនាការមេរោគមួយដើម្បីបង្កើតប្រព័ន្ធជ្រៀតជ្រែក ចូលទៅយកឯកសារព័ត៌មាន និងទិន្នន័យក្នុងកុំព្យូរទ័ររបស់អង្គការឬស្ថាប័នសំខាន់ៗ នៅក្នុងប្រទេសកម្ពុជា កាលពីឆ្នាំ២០២៣កន្លងទៅ។
អ្នកជំនាញសន្តិសុខអ៊ីនធឺណិតនៃក្រុមហ៊ុន Securonix ចុះផ្សាយរបាយការណ៍មួយមាន ២២ទំព័រ កាលពីថ្ងៃទី៣ ខែតុលា ឲ្យដឹងថា កម្ពុជាគឺជាប្រទេសគោលដៅរបស់រដ្ឋាភិបាលកូរ៉េខាងជើង ហើយក្រុម Hackers នេះ មានទិសដៅជ្រៀតជ្រែកទៅប្រទេសផ្សេងៗទៀតនៅក្នុងតំបន់អាស៊ាន។ ក៏ប៉ុន្តែក្រុមអ្នកជំនាញមិនបានដឹងអំពីមូលហេតុពិតប្រាកដ ដែលក្រុម Hackers នេះ កំពុងស្វែងរក ឬក៏អំពីមូលហេតុដែលក្រុមនេះ ផ្ដោតគោលដៅលើប្រទេសកម្ពុជានោះឡើយ។
ឯកសារដែលក្រុមអ្នកជំនាញពីក្រុមហ៊ុន Securonix រកឃើញ មានជាភាសាខ្មែរ ពាក់ព័ន្ធនឹងប្រាក់ចំណូលពីវិស័យសេដ្ឋកិច្ច និងហិរញ្ញវត្ថុ ជាដើម។ មានឯកសារខ្លះទៀត ជាភាសាអង់គ្លេស ដែលមានព័ត៌មានជាច្រើនទាក់ទងនឹងប្រទេសកម្ពុជា។ ក្រុមហ៊ុននេះបានជួយសង្គ្រោះ ដល់ក្រុមអង្គការខ្លះ ដែលជាជនរងគ្រោះ ដែលមិនចង់បង្ហាញឈ្មោះឲ្យដឹងថា នៅពេលក្រុម Hackers ទាំងនេះ ចូលទៅក្នុងប្រព័ន្ធកុំព្យូទ័រនោះបានហើយ គេអាចបញ្ជាពីចម្ងាយដើម្បីទាញយក និងបញ្ជូនឯកសារទាំងនោះ បានយ៉ាងងាយបញ្ជូនទៅកន្លែង ដែលពួកគេចង់ផ្ញើ។
វិទ្យុអាស៊ីសេរីមិនទាន់អាចទាក់ទង អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ដើម្បីសុំការឆ្លើយតបបញ្ហានេះបានទេ នៅថ្ងៃទី៥ ខែតុលា។
រដ្ឋាភិបាលកម្ពុជា និងកូរ៉េខាងជើង មានទំនាក់ទំនងជិតស្និទ្ធជាមួយគ្នាជាយូរឆ្នាំមកហើយ តាំងពីអតីតព្រះមហាក្សត្រខ្មែរ ព្រះបាទនរោត្តម សីហនុ ព្រះបរមរតនកោដ្ឋ ដែលពីមុនមានព្រះរាជដំណាក់ព្រះអង្គនៅកូរ៉េខាងជើង។ បន្ថែមពីនេះ ស្ថានទូតកូរ៉េខាងជើង ស្ថិតនៅផ្លូវម្ខាងទល់មុខ គេហដ្ឋានរបស់លោក ហ៊ុន សែន នៅរាជធានីភ្នំពេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments