ពលរដ្ឋមានវិវាទដីធ្លី ជាមួយក្រុមហ៊ុនវៀតណាម ជាង ១០០គ្រួសារ នៅស្រុកសំបូរ ខេត្តក្រចេះ បានប្រមូលផ្ដុំគ្នានៅមុខសាលាដំបូងខេត្តក្រចេះ ដើម្បីគាំទ្រតំណាងរបស់ខ្លួន ដែលចូលឆ្លើយបំភ្លឺតាមការកោះហៅរបស់តុលាការ។ មន្ត្រីសង្គមស៊ីវិល យល់ឃើញថា អាជ្ញាធរមិនគួរអូសបន្លាយដោះស្រាយបញ្ហារហូតដល់មានការប្ដឹងផ្ដល់គ្នាដល់តុលាការនោះឡើយ។
នៅព្រឹកថ្ងៃទី០៨ ខែតុលានេះ ប្រជាពលរដ្ឋរងគ្រោះដីធ្លី ១២០គ្រួសារមកពីឃុំកោះខ្ញែ ស្រុកសំបូរ ខេត្តក្រចេះ បាននាំគ្នាប្រមូលផ្ដុំគាំទ្រតំណាងរបស់ខ្លួន និងពលរដ្ឋចំនួន៦នាក់ ដែលបានចូលឆ្លើយបំភ្លឺតាមការកោះហៅរបស់តុលាការ ពាក់ព័ន្ធការចោទប្រកាន់រំលោភកាន់កាប់ទ្រព្យសម្បត្តិរដ្ឋដោយខុសច្បាប់ និងបានប្រើប្រាស់អំពើហិង្សាទៅលើអ្នកកាន់កាប់អចលវត្ថុដោយសុចរិត។ អ្នកភូមិថា តំណាងនិងប្រជាពលរដ្ឋទាំង៦នាក់ តែងតែចេញមុខតវ៉ា និងរារាំង ក្រុមហ៊ុនវៀតណាមឈ្មោះ កាម៉ាដេនូ វេនឈ័រ (ខេមបូឌា) (Kamdhenu Ventures Cambodia Limited (KVCL) co. ltd) និងក្រុមហ៊ុន កសិកម្ម យុវជន ស្វាយរៀង មិនឲ្យឈូសឆាយផលដំណាំ និងដុតផ្ទះសម្បែងរបស់ប្រជាពលរដ្ឋកន្លងមក។
ប្រជាពលរដ្ឋរងគ្រោះដីធ្លីម្នាក់ គឺលោក ភេ ឡៃ ប្រាប់វិទ្យុអាស៊ីសេរី នៅថ្ងៃទី៨ ខែតុលាថា ពលរដ្ឋ១២០គ្រួសារ ក្នុងចំណោមពលរដ្ឋជាង ២០០គ្រួសារ បាននាំគ្នាប្រមូលផ្ដុំនៅមុខសាលាដំបូងខេត្តក្រចេះ ដើម្បីគាំទ្រតំណាងរបស់ពួកគាត់ ដោយសារលោកចាត់ទុកការកោះហៅនេះ គឺជាការបំបាក់ស្មារតីគំរាមកុំឲ្យពលរដ្ឋហ៊ានចេញតវ៉ា រឿងវិវាទដីធ្លីជាមួយក្រុមហ៊ុនវៀតណាមតទៅទៀត។ លោកបន្ថែមថា ប្រជាពលរដ្ឋនឹងមិនឈប់តវ៉ាជាដាច់ខាត ដរាបណាអាជ្ញាធរមិនទាន់រកដំណោះស្រាយ និងកាត់ឆ្វៀលដីស្រែចម្ការរបស់ប្រជាពលរដ្ឋចេញពីបរិវេណក្រុមហ៊ុនទេនោះ។
លោក ភេ ឡៃ៖ «បើមិនមានដំណោះស្រាយទេពួកខ្ញុំមិនឈប់នោះទេ រកដំណោះស្រាយទាល់តែបាន ពីព្រោះពួកគាត់រស់នៅទីនេះតាំងពីមុនក្រុមហ៊ុន តាំងពីដូនតាគាត់កើតនៅទីនេះ បើអស់ប៉ុណ្ណឹងទៅអត់មានអ្វីទៀតទេ ទាំងខ្ញុំទាំងប្រជាពលរដ្ឋដូចគ្នាទាំងអស់ ប្រជាពលរដ្ឋគាត់នឹងឡើងទៅភ្នំពេញសួរខាងក្រសួងដែនដីម្ដងទៀត»។
តំណាងប្រជាពលរដ្ឋម្នាក់ដែលបានចូលឆ្លើយបំភ្លឺ គឺលោកស្រី អែល រ៉ូស្សា ឲ្យដឹងថា ខាងមន្ត្រីតុលាការបានសួរសំណួរថា តើពួកគាត់បានប្រព្រឹត្តដូចការចោទប្រកាន់ ឬអត់ តំណាងពលរដ្ឋចំនួន ៤នាក់ ដែលបានចូលឆ្លើយនៅថ្ងៃនេះ ហើយបានបដិសេធថា ពួកគាត់មិនបានប្រព្រឹត្តកំហុសដូចការចោទប្រកាន់នេះឡើយ ហើយ មន្ត្រីតុលាការសន្យាថា នឹងធ្វើការសម្របសម្រួលជាមួយតំណាងក្រុមហ៊ុនដើម្បីទម្លាក់ចោលបទចោទទៅលើតំណាងប្រជាពលរដ្ឋ។
លោកស្រី អែល រ៉ូស្សា៖ «ខ្ញុំសុំឲ្យខាងតុលាការកុំចោទប្រកាន់នាងខ្ញុំ។ ខ្ញុំអត់បានប្រើហិង្សាដូចពាក្យគាត់ចោទប្រកាន់នោះទេ។ សុំឲ្យលើកលែងអ៊ីចឹង ចម្លើយដែលខ្ញុំឆ្លើយតាមនឹងនោះថា ខ្ញុំមិនបានប្រព្រឹត្តដូចពាក្យចោទប្រកាន់នឹងនោះទេ ខ្ញុំបានប្រាប់គាត់អ៊ីចឹង គាត់បានវាយឯកសារតាមនឹង គាត់ថា ចាំមើលគាត់សម្របសម្រួលជាមួយគេ (ក្រុមហ៊ុន) តើគេអាចយល់ព្រមដូច ដែលយើងនិយាយមែនឬអត់អ៊ីចឹង»។
ជុំវិញរឿងនេះ វិទ្យុអាស៊ីសេរី មិនអាចទាក់ទង អ្នកនាំពាក្យសាលាដំបូងខេត្តក្រចេះ លោក ទីវ វុធធេន បានទេ នៅថ្ងៃទី៨ ខែតុលា។
ទោះជាយ៉ាងណាក្ដី នេះជាលើកទីពីរហើយ ដែលសាលាដំបូងខេត្តក្រចេះ កោះហៅតំណាង និងពលរដ្ឋចំនួន ៦នាក់ ក្នុងនោះមាន លោក អ៊ុន សុខុំ ប្រុក ភារម្យ ភេន ឡៃ ឌុច សាគី ស៊ឹង ករុណា និងលោកស្រី អែល រ៉ូស្សា ។
ចំណែកអនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក លោក យិន ម៉េងលី យល់ឃើញថា អាជ្ញាធរត្រូវតែចុះសិក្សាស្រាវជ្រាវឲ្យបានគ្រប់ជ្រុងជ្រោយ ហើយការប្ដឹងប្រជាពលរដ្ឋទៅតុលាការវាមិនមែនជាដំណោះស្រាយល្អនោះទេ។ លោកថា អាជ្ញាធរគួរងាកមកពន្លឿនក្នុងការស្វែងរកដំណោះស្រាយជូនប្រជាពលរដ្ឋវិញទើបជាការល្អប្រសើរ។
លោក យិន ម៉េងលី៖ «អាជ្ញាធរដកពាក្យបណ្ដឹងពីតុលាការវិញ មន្ទីរពាក់ព័ន្ធដកពាក្យបណ្ដឹងពីតុលាការវិញ តុលាការទម្លាក់បទចោទឬក៏តម្កល់រឿងអត់ចាត់ការទៅ ហើយងាកមកពន្លឿននូវនីតិវិធីធ្វើការសម្របសម្រួលដោះស្រាយល្អជាងការប្រើប្រាស់យន្តការរបស់តុលាការនេះ»។
បន្ទាប់ពីក្រុមហ៊ុន កាម៉ាដេនូ វេនឈ័រ (ខេមបូឌា) (Kamdhenu Ventures Cambodia Limited (KVCL) co. ltd) និងក្រុមហ៊ុន អិន ខេ អេហ្គ្រី (ខេមបូឌា) (NK Agri (cambodia) co. ltd) ក្ស័យធននៅឆ្នាំ២០១៧ អំឡុងឆ្នាំ២០២១ ក្រុមហ៊ុន កាម៉ាដេនូ វេនឈ័រ ក៏បានសហការជាមួយក្រុមហ៊ុន កសិកម្ម យុវជន ស្វាយរៀង ដើម្បីដំណើរការដាំដំណាំអំពៅឡើងវិញ សម្រាប់ផលិតជាស្ករស ផ្គត់ផ្គង់ទីផ្សារក្នុងប្រទេសកម្ពុជា និងវៀតណាម ទើបធ្វើឲ្យមានវិវាទដីធ្លីកើតឡើង ដោយក្រុមហ៊ុនបានឈូសឆាយបំផ្លាញផលដំណាំកសិកម្ម និងដុតផ្ទះសម្បែងរបស់ពលរដ្ឋ និងហ៊ុមព័ទ្ធយកដីព្រៃសហគមន៍ និងដីស្រែចម្ការពលរដ្ឋថែមទៀត។
ពលរដ្ឋមិនទាន់ត្រឡប់ទៅផ្ទះវិញនោះទេ ដោយសារតំណាងរបស់ពួកគាត់ចំនួន ២នាក់ទៀត មិនទាន់បានចូលឆ្លើយបំភ្លឺ ដូច្នេះពួកគាត់ស្នាក់នៅទីរួមខេត្តក្រចេះមួយយប់ ដើម្បីបន្តការគាំទ្រ និងឃ្លាំមើលតំណាងរបស់ខ្លួន ចូលឆ្លើយបំភ្លឺបន្ថែមទៀតនៅថ្ងៃទី៩ ខែតុលា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments