ក្រុមអ្នកឃ្លាំមើល និងមន្ត្រីបក្សប្រឆាំង ជំរុញអាជ្ញាធរឱ្យបង្ហាញព័ត៌មានអំពីការចាត់វិធានការច្បាប់ លើមនុស្សជំនិតរបស់លោក ហ៊ុន សែន ២នាក់ គឺលោក លី សាម៉េត និងលោក ដួងតារា ដើម្បីជម្រះមន្ទិលសង្ស័យរបស់មហាជន អំពីការអនុវត្តច្បាប់ដែលអាចមានស្តង់ដារពីរ។ ការលើកឡើងបែបនេះ បន្ទាប់ពីលោក ហ៊ុន សែន បញ្ជាឱ្យចាប់ឃាត់ខ្លួនលោក លី សាម៉េត អស់រយៈពេលជាច្រើនថ្ងៃមកហើយ ប៉ុន្តែអាជ្ញាធរ មិនបានផ្សព្វផ្សាយពីបច្ចុប្បន្នភាព ដែលខុសពីការចាប់ខ្លួនសកម្មជនសិទ្ធិមនុស្ស និងនយោបាយកន្លងមក។
គិតត្រឹមថ្ងៃទី១២ ខែតុលា នេះ អាជ្ញាធរនៅមិនទាន់បង្ហាញពីបច្ចុប្បន្នភាព ក្នុងសំណុំរឿងតាមចាប់ខ្លួនទីប្រឹក្សាលោក ហ៊ុន សែន គឺលោក លី សាម៉េត នៅឡើយ។
ទីប្រឹក្សាគណបក្សកម្លាំងជាតិ លោក រ៉ុង ឈុន ប្រាប់វិទ្យុអាស៊ីសេរីនៅថ្ងៃទី១២ ខែតុលា ថា ទោះបីនីតិវិធីរបស់នគរបាលក្នុងអំឡុងពេលស៊ើបអង្កេតត្រូវរក្សាការសម្ងាត់ តែព័ត៌មានមួយចំនួន គួរតែត្រូវបានផ្សព្វផ្សាយ ដើម្បីឱ្យពលរដ្ឋតាមដានដោយស្ងប់ចិត្ត ចៀសវាងការសង្ស័យពីការអនុវត្តច្បាប់មានស្តង់ដារពីរ។
លោក រ៉ុង ឈុន៖ «ហើយយើងឃើញថា អាជ្ញាធរអនុវត្តមកលើសកម្មជនសង្គម ក៏ដូចជា អ្នកនយោបាយ ឃើញថា ហាក់បីដូចជាមានការយកចិត្តទុកដាក់ខ្លាំង ហើយមិនត្រូវចំណាយពេលវេលាច្រើន ហើយក៏បង្ហាញព័ត៌មានបានទូលំទូលាយ។ យើងចង់ឃើញការអនុវត្តឱ្យមានភាពស្មើមុខគ្នា នៅចំពោះមុខច្បាប់ ដូចដែលអ្វីបានកំណត់នៅក្នុងច្បាប់»។
កាលពីថ្ងៃទី៧ ខែតុលា លោក ហ៊ុន សែន បានបង្ហោះសារនៅលើហ្វេសប៊ុក ដោយអះអាងថា លោក លី សាម៉េត តែងប្រើឈ្មោះរបស់លោក ដើម្បីឆបោកលុយគេ ដោយក្នុងនោះ មានការបោកលុយពីឈ្មោះ សុខ ឡេង ចំនួន ១០លានដុល្លារ កាលពីឆ្នាំ២០២២ និងក្រោយមក ពីអនុប្រធានក្រុមការងារថ្នាក់កណ្ដាលរបស់គណបក្សប្រជាជនកម្ពុជា ចុះមូលដ្ឋានខេត្តព្រះវិហារ លោក មួង ឃីម ចំនួន ២៣ម៉ឺនដុល្លារ។
លោក ហ៊ុន សែន អះអាងទៀតថា លោកបានទទួលវីដេអូពីអភិបាលស្រុកល្វាឯម លោក កន សុខកាយ ដោយប្រាប់ថា លោក លី សាម៉េត បានយកប្រាក់ពីលោកចំនួន ៣០ម៉ឺនដុល្លារ ដើម្បីរត់ការឱ្យបានតំណែងជាអភិបាលក្រុងអរិយក្សត្រ។ ក៏ប៉ុន្តែ មួយថ្ងៃក្រោយមក លោក កន សុខកាយ ត្រូវបានលោកនាយករដ្ឋមន្ត្រី ហ៊ុន ម៉ាណែត បញ្ចប់តំណែងពីអភិបាលស្រុកល្វាឯម ក្រោមហេតុផលថា “ប្រព្រឹត្តកំហុសក្រុមសីលធម៌ និងវិជ្ជាជីវៈធ្ងន់ធ្ងរ”។
កាលពីថ្ងៃទី៨ ខែតុលា សមត្ថកិច្ចបានឆ្មក់ចូលត្រួតពិនិត្យគេហដ្ឋានរបស់លោក លី សាម៉េត នៅក្នុងខណ្ឌឫស្សីកែវ កាលពីថ្ងៃទី៨ ខែតុលា ប៉ុន្តែមិនឃើញលោក លី សាម៉េត នៅក្នុងផ្ទះឡើយ។ ចាប់តាំងពីពេលនោះមក មិនមានការចុះផ្សាយអំពីបច្ចុប្បន្នភាព ក្នុងការតាមចាប់ខ្លួនលោក លី សាម៉េត ឡើយ រហូតសមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន និងជាដៃគូជិតស្និទ្ធជាមួយលោក លី សាម៉េត គឺលោក ដួង តារា ដើម្បីយកទៅសាកសួរ តាមបណ្ដឹងរបស់ប្រជាពលរដ្ឋ កាលពីថ្ងៃទី១០ ខែតុលា។
ទោះជាយ៉ាងណាក្ដី មិនខុសពីករណីលោក លី សាម៉េត ឡើយ ការចាប់ខ្លួនរបស់លោក ដួង តារា ក្រោយមកនេះ អាជ្ញាធរបានអនុវត្តច្បាប់យ៉ាងស្ងប់ស្ងាត់ ដោយមិនបញ្ចេញព័ត៌មានពីករណីបទចោទ ឬដំណើរការនីតិវិធីនោះឡើយ។
ទាក់ទិនរឿងនេះ អ្នកនាំពាក្យរងក្រសួងមហាផ្ទៃ លោក ទូច សុឃៈ បានរុញឱ្យវិទ្យុអាស៊ីសេរី ទាក់ទងទៅកាន់ស្ថាប័នប៉ូលិស និងតុលាការ។
វិទ្យុអាស៊ីសេរី មិនអាចទាក់ទងអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សំ វិច្ឆិកា និងអ្នកនាំពាក្យសាលាដំបូង លោក អ៊ី រិន្ទ ដើម្បីសុំការបកស្រាយជុំវិញបញ្ហានេះបានទេ នៅថ្ងៃទី១២ ខែតុលា ដោយទូរស័ព្ទហៅចូលជាច្រើនដង តែគ្មានអ្នកទទួល។
ជុំវិញរឿងនេះ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ យល់ឃើញថា ក្នុងការអនុវត្តច្បាប់លើលោក លី សាម៉េត និងលោក ដួង តារា អាជ្ញាធរហាក់មានការប្រយ័ត្នប្រយែង និងមិនហ៊ានផ្សព្វផ្សាយលើសពីដែនរបស់ខ្លួននោះទេ បើគ្មានបញ្ជាពីថ្នាក់ដឹកនាំកំពូល។ ទោះយ៉ាងណា លោក សេក សុជាតិ លើកឡើងថា អាជ្ញាធរ គួរតែរកវិធីផ្សព្វផ្សាយព័ត៌មានណាមួយ ដែលមិនប៉ះពាល់ដល់ការងារស៊ើបអង្កេតរបស់សមត្ថកិច្ច ដើម្បីឱ្យសាធារណជនបាត់ការសង្ស័យ។
លោក សេក សុជាតិ៖ «ដូច្នេះការផ្ដល់ព័ត៌មានទៅលើបុគ្គលសំខាន់ៗ ទាំងពីររូបនេះ គួរតែមានច្រកណាមួយដើម្បីឱ្យប្រជាពលរដ្ឋបានដឹងឮជាសាធារណៈ ហើយក៏ជាមេរៀន និងជាបទពិសោធន៍មួយដែលចែករំលែកទៅដល់ភាគីផ្សេងៗទៀត ទោះបីជាមានឥទ្ធិពលនិងអំណាចប៉ុណ្ណាក៏ដោយ ក៏ត្រូវបានអនុវត្តច្បាប់ឱ្យស្មើភាពគ្នាដែរ»។
មន្ត្រីបក្សប្រឆាំង ទទូចដល់អាជ្ញាធរ និងស្ថាប័នពាក់ព័ន្ធ ឱ្យបង្ហាញព័ត៌មានពីបច្ចុប្បន្ន នៃចំណាត់ការលើបុគ្គលជំនិតលោក ហ៊ុន សែន ទាំងពីររូបនេះ ដើម្បីឱ្យពលរដ្ឋជឿជាក់ថា អាជ្ញាធរពិតជាបានអនុវត្តវិធានការច្បាប់ទៅលើបុគ្គលទាំងនោះ ដូចការធ្វើដាក់ទៅលើពលរដ្ឋសាមញ្ញ ជាពិសេស សកម្មជនសង្គម និងនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments