អ្នកនាំពាក្យរដ្ឋាភិបាល បញ្ជាក់ថា លោកនាយករដ្ឋមន្ត្រី ហ៊ុន ម៉ាណែត បានពន្យល់មេដឹកនាំប្រទេសវៀតណាម និងឡាវ អំពីមូលហេតុ នៃការដកខ្លួនចេញពីកិច្ចសហប្រតិបត្តិការតំបន់ត្រីកោណអភិវឌ្ឍន៍ CLV-DTA ក្នុងពេលលោក ហ៊ុន ម៉ាណែត បានចូលរួមកិច្ចប្រជុំអាស៊ាន លើកទី៤៤ និង៤៥ នៅទីក្រុងវៀងចន្ទន៍ (Vientiane) ប្រទេសឡាវ (Laos) កាលពីពេលថ្មីៗ នេះ។ មន្ត្រីបក្សប្រឆាំងថា រដ្ឋាភិបាលគួរតែពន្យល់ប្រជាពលរដ្ឋឲ្យបានច្បាស់លាស់ អំពីការបញ្ចប់កិច្ចសហប្រតិបត្តិការតំបន់ត្រីកោណអភិវឌ្ឍន៍ CLV និងដោះលែងអ្នកជាប់ឃុំ ដោយសារបញ្ហា CLV ឲ្យមានសេរីភាពឡើងវិញ។
រដ្ឋមន្ត្រីប្រតិភូអមនាយករដ្ឋមន្ត្រី លោក តាន់ ហ្សង់ហ្វ្រង់ស័រ ឆ្លើយតបនឹងសំណួររបស់អ្នកសារព័ត៌មាន ក្នុងសន្និសីទកាសែត ស្ដីពីលទ្ធផលនៃកិច្ចប្រជុំអាស៊ានលើកទី ៤៤ និង៤៥ នៅថ្ងៃទី ១១ ខែតុលាថា ក្នុងជំនួបទទួលទានអាហារត្រីភាគីរវាងកម្ពុជា ឡាវ និងវៀតណាម កាលពីថ្ងៃទី៩ ខែតុលា លោក ហ៊ុន ម៉ាណែត បានពន្យល់ភាគីវៀតណាម និងឡាវអំពីមូលហេតុ ដែលកម្ពុជាដកខ្លួនចេញពីកិច្ចសហប្រតិបត្តិការតំបន់ត្រីកោណអភិវឌ្ឍន៍ ហើយមេដឹកនាំប្រទេសទាំងពីរ ក៏យោគយល់ពីមូលហេតុនេះដែរ។ លោក ថា ជាធម្មតាក្នុងនាមអតីតភាគី នៃកិច្ចសហប្រតិបត្តិការ CLV កម្ពុជាត្រូវតែពន្យល់ដោយផ្ទាល់ពីមូលហេតុនៃការដកខ្លួន។
លោក តាន់ ហ្សង់ហ្វ្រង់ស័រ៖ «ទាំងភាគីវៀតណាម ទាំងភាគីឡាវសុទ្ធតែយល់ពីមូលហេតុ ដែលបានជំរុញឲ្យកម្ពុជា ដកខ្លួនចេញពី CLV-DTA ហើយមូលហេតុនោះ គឺសម្ដេចធិបតីបានរំលឹកឡើងវិញ ខ្ញុំមិនបាច់រំលឹកឡើងវិញទេ ហេតុអ្វីបានជាកម្ពុជាដកខ្លួនចេញពី CLV-DTA»។
នេះជាជំនួបរវាងមេដឹកនាំកម្ពុជា ឡាវ និងវៀតណាម លើកទី១ហើយ ក្រោយពីប្រធានព្រឹទ្ធសភា និងជាប្រធានគណបក្សប្រជាជនកម្ពុជាលោក ហ៊ុន សែន បានប្រកាសថា កម្ពុជាបញ្ចប់ការចូលរួមក្នុងតំបន់ត្រីកោណអភិវឌ្ឍន៍ CLVចាប់ពីថ្ងៃទី២០ ខែកញ្ញា ឆ្នាំ២០២៤ តទៅ។
ការបញ្ចប់កិច្ចសហប្រតិបត្តិការជាមួយប្រទេសទាំងពីរនៅក្នុងក្របខ័ណ្ឌ CLV នេះ គឺក្រោយពេលពលរដ្ឋខ្មែរនៅតាមប្រទេសជាច្រើន ដូចជាកូរ៉េខាងត្បូង (South Korea) ជប៉ុន (Japan) អូស្ត្រាលី (Australia) និងសហរដ្ឋអាមេរិក (United States) ជាដើម បាននាំគ្នាធ្វើបាតុកម្មជាបន្តបន្ទាប់ប្រឆាំងនឹងគម្រោង CLV នេះ ។
អតីតតំណាងរាស្ត្រគណបក្សសង្គ្រោះជាតិ លោក ម៉ែន សុថាវរិន្ទ្រ ប្រាប់វិទ្យុអាស៊ីសេរី នៅថ្ងៃទី១២ ខែតុលាថា រដ្ឋាភិបាលនៅមិនទាន់ពន្យល់អំពីការបញ្ចប់កិច្ចសហប្រតិបត្តិការតំបន់ត្រីកោណអភិវឌ្ឍន៍ ឲ្យពលរដ្ឋយល់ច្បាស់នៅឡើយទេ។ លោកថា បញ្ហានេះ នឹងធ្វើឲ្យពលរដ្ឋនៅតែបន្តការតវ៉ាទាមទាររដ្ឋាភិបាល ឱ្យដោះលែងអ្នកជាប់ឃុំដោយសារបញ្ហា CLV ឲ្យមានសេរីភាពឡើងវិញ។
លោក ម៉ែន សុថាវរិន្ទ្រ៖ «ចូលតាមសភាឲ្យចេញវិញតាមសភា អីចឹងហើយកន្លែង CLV ហ្នឹងទាំងអស់ហ្នឹង ត្រូវតែក្រុមហ៊ុនវៀតណាម ឬក្រុមហ៊ុនចិន ដែលនៅក្រោមការដឹកនាំរបស់រាជរដ្ឋាភិបាលត្រូវតែ មើលគម្រោងឲ្យមែនទែន ហើយដកឲ្យពិតប្រាកដកុំឲ្យប្រជាពលរដ្ឋអត់ដឹងច្បាស់លាស់ បើមិនអីចឹងទេ ធ្វើអ្វីមិនកើតទេ បានន័យថា កុហកគេ»។
អង្គការលីកាដូរកឃើញថា មានមនុស្សយ៉ាងតិច ១០០នាក់ ត្រូវបានចាប់ខ្លួន ក្នុងនោះជាង ៦០នាក់ ត្រូវបានចោទប្រកាន់ និងឃុំខ្លួនជាបណ្ដោះអាសន្ន ពាក់ព័ន្ធនឹងរឿង CLV នេះ។ អ្នកជាប់ឃុំទាំងនោះមានអាយុចន្លោះពី ១៦ឆ្នាំ ដល់ ៧០ឆ្នាំ ហើយពួកគេភាគច្រើនរងការចោទប្រកាន់ពីបទរួមគំនិតក្បត់ និងញុះញង់។
ទោះជាលោក ហ៊ុន សែន បានប្រកាសដកកម្ពុជាចេញពី CLV ក៏ដោយ ក៏អ្នកនិយមប្រជាធិបតេយ្យ នៅតែបន្តគម្រោងធ្វើបាតុកម្ម ឬសកម្មភាពនានា ប្រឆាំងនឹងរដ្ឋាភិបាលនៃក្រុមគ្រួសារត្រកូល ហ៊ុន ដដែល ដើម្បីទាមទារឱ្យមានការដោះលែងអ្នកជាប់ឃុំមនសិការទាំងឡាយ ព្រមទាំងទាមទារឱ្យរដ្ឋាភិបាលស្ដារលទ្ធិប្រជាធិបតេយ្យ និងគោរពសិទ្ធិមនុស្សឡើងវិញ។
ក្រុមយុវជនខ្មែរនៅប្រទេសកូរ៉េខាងត្បូងនឹងធ្វើបាតុកម្មជាលើកទី៣ នៅទីលានក្វាំងជូធំ នៅថ្ងៃទី១៣ ខែតុលា ស្របពេលដែលពលរដ្ឋខ្មែរនៅសហរដ្ឋអាមេរិកកំពុងធ្វើបាតុកម្មនៅរដ្ឋធានីវ៉ាស៊ីនតុន រយៈពេលបួនថ្ងៃចាប់ពីថ្ងៃទី១០ ដល់ថ្ងៃទី១៣ ខែតុលា ហើយនៅតំបន់អឺរ៉ុបវិញ នឹងធ្វើមហាបាតុកម្មរំលឹកខួប ៣៣ឆ្នាំ នៃកិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នាំ១៩៩១ នៅក្នុងទីក្រុងប៉ារីស ប្រទេសបារាំងនៅថ្ងៃទី២៦ ខែតុលាខាងមុខ៕
From ព័ត៌មានថ្មីៗ | RFA
via_IFTTT
0 Comments