ស្ថានទូតបារាំងប្រចាំកម្ពុជាមានក្ដីព្រួយបារម្ភអំពីការចាប់ខ្លួន និងចំណាត់ការផ្លូវច្បាប់លើអ្នកសារព័ត៌មាន លោក ម៉ិច ដារ៉ា។
ស្ថានទូតបារាំងបានបង្ហោះសារពីក្ដីព្រួយបារម្ភនេះនៅលើបណ្ដាញសង្គមកាលពីព្រលប់ថ្ងៃទី៩ ខែតុលា ព្រមទាំងបញ្ជាក់ថា សារព័ត៌មានដើរតួនាទីសំខាន់ក្នុងតម្លាភាព និងការទទួលខុសត្រូវរបស់ស្ថាប័ននានា ហើយចូលរួមចំណែកក្នុងដំណើរការល្អប្រសើរនៃប្រជាធិបតេយ្យ។
ស្ថានទូតបារាំងអះអាងថាបានលើកឡើងពីក្ដីបារម្ភទាំងនេះក្នុងអំឡុងជំនួបពិភាក្សាការងាររវាងឯកអគ្គរដ្ឋទូតបារាំង លោក ហ្សាក់ ប៉ឺឡេ ជាមួយលោក ស សុខា រដ្ឋមន្ត្រីក្រសួងមហាផ្ទៃ កាលពីថ្ងៃទី៧ ខែតុលា។
ជាមួយគ្នានេះប្រទេសបារាំងអំពាវនាវឱ្យអាជ្ញាធរធានានូវសេរីភាពបញ្ចេញមតិរបស់ប្រជាពលរដ្ឋ និងអ្នកសារព័ត៌មាន ដោយពិនិត្យក្រមព្រហ្មទណ្ឌកម្ពុជាឡើងវិញ ដោយអនុលោមតាមអនុសាសន៍របស់ខ្លួនធ្វើឡើងក្នុងអំឡុងនៃការពិនិត្យឡើងវិញ ជាសាកលតាមកាលកំណត់លើកទី៤នូវកំណត់ត្រាសិទ្ធិមនុស្សរបស់កម្ពុជា ឬUPR។
បន្ថែមពីក្ដីបារម្ភនេះ លោក ហ្សាក់ ប៉ឺឡេ និងលោក ស សុខា បានពិភាក្សាផ្ដោតលើកិច្ចសហប្រតិបត្តិការ ដែលកំពុងប្រព្រឹត្តទៅរវាងប្រទេសទាំង២ ដោយគ្រោងនឹងបង្កើតឱ្យមានវគ្គបណ្ដុះបណ្ដាល ជាពិសេសក្នុងវិស័យប្រយុទ្ធប្រឆាំងនឹងឧក្រិដ្ឋកម្មព័ត៌មានវិទ្យា ការជួញដូរគ្រឿងញៀន និងសន្តិសុខ ដែលកម្ពុជានឹងទទួលស្វាគមន៍កិច្ចប្រជុំកំពូលហ្វ្រង់កូហ្វូនីឆ្នាំ២០២៦ខាងមុខ ព្រមទាំងការប្រយុទ្ធប្រឆាំងនឹងការជួញដូរមនុស្ស និងការឆបោកតាមប្រព័ន្ធអ៊ីនធឺណិត។
លោកឯកអគ្គរដ្ឋទូតបារាំងក៏លើកឡើងពីក្ដីបារម្ភអំពីការចាប់ខ្លួនសមាជិកអង្គការសង្គមស៊ីវិលកាលពីពេលថ្មីៗនេះ ក៏ដូចជាការដាក់សម្ពាធលើអង្គការក្រៅរដ្ឋាភិបាលជាច្រើនដែរ។
ស្ថានទូតបារាំងនៅតែអះអាងថា បារាំងគាំទ្រដល់អ្នកសារព័ត៌មាន ប្រព័ន្ធផ្សព្វផ្សាយឯករាជ្យ និង អង្គការនានា ដែលបំពេញការងារដើម្បីលើកកម្ពស់សេរីភាពបញ្ចេញមតិ និងសេរីភាពសារព័ត៌មាននៅកម្ពុជា។
តុលាការក្រុងភ្នំពេញបានឃុំខ្លួនអ្នកសារព័ត៌មានឯករាជ្យ លោក ម៉ិច ដារ៉ា នៅពន្ធនាគារខេត្តកណ្ដាល ដោយចោទប្រកាន់ពីបទ «ញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម» បន្ទាប់ពីចាប់ខ្លួនលោក កាលពីថ្ងៃទី៣០ ខែកញ្ញា ទាក់ទងនឹងការបង្ហោះរូបថតរមណីយដ្ឋានបាភ្នំ ដែលអាជ្ញាធរថា កាត់ត ឬព័ត៌មានក្លែងក្លាយ។ ក្រៅពីករណីនេះ សហគមន៍ជាតិ និងអន្តរជាតិថ្កោលទោសរដ្ឋាភិបាលកម្ពុជា និងទាមទារឱ្យអាជ្ញាធរដោះលែង អ្នកសារព័ត៌មានឯករាជ្យ លោក ម៉ិច ដារ៉ា ដោយគ្មានលក្ខខណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments