សិស្សជាង ២ពាន់នាក់អវត្តមាន នៅថ្ងៃទី២ នៃការប្រឡងសញ្ញាប័ត្រមធ្យមសិក្សាទុតិយភូមិ ដែលមានរយៈពេលពីរថ្ងៃ ខណៈ សិស្សមួយចំនួនទៀត មានបញ្ហាសុខភាព និងជួបគ្រោះថ្នាក់ចរាចរណ៍ អំឡុងពេលធ្វើដំណើរមកមណ្ឌលប្រឡង។ អ្នកឃ្លាំមើលថា អត្រាសិស្សអវត្តមានប្រឡងច្រើនបែបនេះ អាចបណ្ដាលមកពីជីវភាពខ្វះខាត និងបញ្ហាសុខភាព។
ក្រសួងអប់រំ យុវជន និងកីឡា នៅថ្ងៃទី៩ ខែតុលា បានបង្ហោះសារលើទំព័រហ្វេសប៊ុក (Facebook) ថា ថ្ងៃទី២ នៃការប្រឡងសញ្ញាប័ត្រមធ្យមសិក្សាទុតិយភូមិមាន បេក្ខជនអវត្តមាន សរុបជាង២ពាន់ ( ២.៣៦៤ )នាក់ ស្ត្រី៩០៧នាក់ ហើយក្នុងចំណោមបេក្ខជនអវត្តមាននេះ មានសិស្ស ស្វៃរិន ជិត២ពាន់ (១.៩៥៥)នាក់។ រីឯ បេក្ខជនមានបញ្ហាសុខភាពចំនួន ៤៤នាក់ ក្នុងនោះ ៤នាក់ បោះបង់ការប្រឡង ៧នាក់ត្រូវបានបញ្ជូនទៅប្រឡងក្នុងបន្ទប់ដាច់ដោយឡែក និងរងគ្រោះថ្នាក់ចរាចរណ៍ ៤នាក់។
ក្រៅពីនោះ ក្រសួងក៏បានជំរុញឱ្យបេក្ខជនប្រឡងទាំងអស់ត្រូវថែរក្សាសុខភាពឱ្យបានល្អ សម្រាក និងបរិភោគអាហារឱ្យបានគ្រប់គ្រាន់ និងមានអនាម័យដើម្បីជៀសវាងបញ្ហាសុខភាព អំឡុងពេលប្រឡង។ ចំណែក តាមមណ្ឌលប្រឡងនីមួយៗ ក្រសួងឱ្យដឹងថា ពុំមានបញ្ហាមិន ប្រក្រតីណាមួយកើតឡើងនោះឡើយ គឺបានដំណើរការល្អ និងរបៀបមានរៀបរយ។
ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយាវី ប្រាប់វិទ្យុអាស៊ីសេរី នៅថ្ងៃទី៩ ខែតុលា ថា ជារឿងដែលគួរឱ្យព្រួយបារម្ភ នៅពេលអត្រា បេក្ខជនប្រឡង សញ្ញាប័ត្រមធ្យមសិក្សាទុតិយភូមិ នៅតែបន្តមានអវត្តមានច្រើនបែបនេះ។ អ្នកស្រីបន្តថា បញ្ហាអវត្តមាននេះ អាចមានបញ្ហាច្រើន ដូចជា បញ្ហាជីវភាពខ្វះខាត ទឹកជំនន់ និងបញ្ហា សុខភាព ព្រោះថា សិស្សខ្លះ ពួកគេធ្វើការផង និងរៀនផង ដែលធ្វើឱ្យមានសុខភាពពុំសូវល្អ។
បន្ថែមពីនោះ អ្នកស្រីក៏ស្នើឱ្យអាជ្ញាធរពាក់ព័ន្ធ ជាពិសេសក្រសួងអប់រំយុវជន និងកីឡា គួរតែស្វែងយល់ ឱ្យបានច្រើនថា តើហេតុអ្វីបានជាអត្រាសិស្សអវត្តមាន អំឡុងពេលប្រឡងនៅតែ បន្តកើតមាន ហើយប្រសិនបើ ពាក់ព័ន្ធនឹងជីវភាពខ្វះខាត រដ្ឋាភិបាលគួរតែជួយឧបត្ថម្ភការសិក្សា និងផ្ដល់មធ្យោបាយផ្សេងៗ ធ្វើយ៉ាងណា ឱ្យពួកគេមានឱកាសសិក្សាចប់ចុងចប់ដើម។
អ្នកស្រី អ៊ុក ឆាយាវី៖ «ប្រសិនបើមួយឆ្នាំជួបបញ្ហាសិស្សបោះបង់ការសិក្សាជាដដែលៗ គួរតែរកឱកាសណាមួយដែលពួកគាត់មានឱកាសច្រើនជាង ជាឱកាសដែល ពួកគាត់ មិនប៉ះពាល់ធ្វើការងារ ។ ដូចយើងឃើញហើយ សិស្សឥឡូវគាត់រៀនផង គាត់ធ្វើការងារផង នឹងចំពោះអ្នកក្រីក្រ ពេលខ្លះគាត់ធ្វើការយប់ ធ្វើឱ្យគាត់មានសុខភាពមិនល្អ»។
វិទ្យុអាស៊ីសេរីពុំអាចទាក់ទង អ្នកនាំពាក្យក្រសួងអប់រំ យុវជន និងកីឡា អ្នកស្រី ឃួន វិច្ឆិកា ដើម្បីឆ្លើយតបជុំវិញ រឿងនេះបានទេ នៅថ្ងៃទី៩ ខែតុលា។
កាលពីថ្ងៃទី១ នៃការប្រឡង ដែលត្រូវនឹងថ្ងៃទី៨ ខែតុលា មានបេក្ខជន មានបញ្ហាសុខភាព២៧នាក់ ក្នុងនោះ មាន២នាក់ត្រូវបញ្ចប់ការប្រឡង។ រីឯ បេក្ខជនអវត្តមានសរុប មានជាង២ពាន់ (២.៣១៨) នាក់ ក្នុងនោះបេក្ខជនស្វៃរិន អវត្តមានជិត២ពាន់ (១.៩១២) នាក់។
អាណាព្យាបាលម្នាក់រស់នៅ ខេត្តកំពង់ចាម ដែលបានមកឃ្លាំមើលកូនប្រឡង លោកស្រី ស៊ន ហៀប ប្រាប់វិទ្យុអាស៊ីសេរី នៅថ្ងៃទី៩ ខែតុលា លោកស្រី សប្បាយចិត្ត ដែលកូនប្រឹងប្រែងរៀនរហូតដល់ថ្ងៃប្រឡង ព្រោះថា លោកស្រី និងប្ដីពុំចេះអក្សរនោះទេ ដូច្នេះបានប្រឹងប្រែងរកស៊ី ទាំងយប់ថ្ងៃ ដើម្បីបានលុយផ្គត់ផ្គង់ ឱ្យកូនរៀន ដោយលោកស្រីរំពឹងថា នៅពេលកូនរៀនសូត្រច្រើន អាចមានការងារល្អធ្វើ ចិញ្ចឹមគ្រួសារនាពេលអនាគត។
លោកស្រី ស៊ន ហៀប៖ «អត់មានចំណេះដឹងពិបាកណាស់ គឺងងឹតសូន្យ។ អត់មានចំណេះដឹង គឺដើរធ្វើការឱ្យគេ ប្រើកម្លាំង១ថ្ងៃ៣ម៉ឺនរៀល។ ស៊ីឈ្នួលមួយថ្ងៃវិលល្ងាច ១ថ្ងៃបីម៉ឺនរៀល ដល់ម៉ោង៨យប់ បានមកដល់ផ្ទះ។ ខ្ញុំគិតឃើញអ៊ីចឹង បានខ្ញុំថា ខ្ញុំពិបាក មិនចង់ឱ្យកូនខ្ញុំពិបាកដូចខ្ញុំ ចង់ឱ្យកូនស្រួល បើទោះបីមិនច្រើន ក៏បានស្រួលជាងឪពុកម្ដាយ ព្រោះពុកម្ដាយ និងប្អូនលំបាកហើយ ចង់ឱ្យកូនមួយនឹងទៅឱ្យស្រួល។ កូនខ្ញុំពីរនាក់ទៀត ឈប់រៀនអស់ហើយ នៅតែកូនបងហ្នឹង ចង់ឱ្យកូនបង ទៅឱ្យរលូនបានក្ដីសុខជាងពួកខ្ញុំ»។
ក្រោយពីការប្រឡងមានសិស្ស ខ្លះបង្ហាញទឹកមុខក្រៀមក្រំ ដោយសារតែ ធ្វើពុំបានល្អ និងខ្លះទៀត បង្ហាញទឹកមុខសប្បាយ រត់មកអោបអាណាព្យាបាលនៅពេលប្រឡង រួច។
ការប្រឡងបាក់ឌុបឆ្នាំនេះ មានរយៈពេល ២ថ្ងៃ ចាប់ពីថ្ងៃទី៨ ដល់ទី៩ ខែតុលា ខណៈដំណើរការកំណែនឹងប្រព្រឹត្តទៅ ចាប់ពីថ្ងៃទី១១ ដល់ថ្ងៃទី១៧ ខែតុលា។ នៅឆ្នាំ២០២៤ នេះ មានបេក្ខជនចុះឈ្មោះ ប្រឡងសរុបជាង ១សែន ៣ម៉ឺន នាក់(១៣៧.០៤០) ក្នុងនោះមានសិស្សស្រីជាង ៧ម៉ឺននាក់ (៧៤.៨៨២)។ នៅឆ្នាំនេះ មានបេក្ខជន ប្រឡងថ្នាក់វិទ្យាសាស្ត្រសង្គម ច្រើនជាងឆ្នាំ មុនៗ ដោយមានចំនួនជាង ៩ម៉ឺន ៧ពាន់នាក់ (៩៧.៦៨២) ខណៈថ្នាក់ វិទ្យាសាស្ត្រ មានចំនួនជិត ៤ម៉ឺននាក់ (៣៩.៣៥៨)។
ក្រសួងអប់រំកំណត់យកថ្ងៃទី៣០ ខែតុលា ដើម្បីប្រកាសលទ្ធផលប្រឡងបាក់ឌុបនៅរាជធានីភ្នំពេញ និងខេត្តកណ្ដាល និងនៅថ្ងៃទី៣១ ខែតុលា សម្រាប់ខេត្តផ្សេងៗនៅទូទាំងប្រទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments