កម្មកររោងចក្រកាត់ដេរមួយចំនួនមានជីវភាពខ្វះខាត និងគ្មានប្រាក់ទៅលេងបុណ្យចូលឆ្នាំខ្មែរឡើយ។ ការខកខានទៅលេងស្រុកកំណើតនេះគឺដោយសារតែនៅបណ្ដារោងចក្រមួយចំនួនបានព្យួរកិច្ចសន្យាការងារ និងកាត់បន្ថយម៉ោងធ្វើការ ខណៈប្រាក់ឈ្នួលរបស់ពួកគាត់ទាបដែលធ្វើឱ្យប៉ះពាល់ដល់ជីវភាពរស់នៅ។
កម្មកររោងចក្រកាត់ដេរមួយចំនួនត្អូញត្អែរថា ស្ថានភាពជីវភាពរបស់ពួកគាត់កាន់តែលំបាកដោយសារប្រាក់ឈ្នួលទាប និងមិនអាចធ្វើការថែមម៉ោងបានដូចមុន ហើយរោងចក្រខ្លះទៀតប្រឈមនឹងការបិទទ្វារ ដែលធ្វើឱ្យពួកគាត់គ្មានប្រាក់ជូនឪពុកម្ដាយនៅស្រុកកំណើតនោះទេ។
ប្រធានសហជីពប្រជាធិបតេយ្យកម្មករនៃរោងចក្រកាត់ដេរដាប់ប៊ែលយូ អែនឌីខេមបូឌា (W&D Cambodia ) លោក សឿង ប្រុស ប្រាប់វិទ្យុអាស៊ីសេរីនៅថ្ងៃទី១០ ខែមេសា ថា ឆ្នាំនេះលោកមិនបានទៅលេងស្រុកកំណើតនៅខេត្តកំពតនោះទេ ដោយសារគ្មានប្រាក់ធ្វើដំណើរ និងទិញសម្ភារៈជូនឪពុកម្ដាយ។ លោកបន្តថា ប្រសិនបើការងារទទួលបានប្រាក់ឈ្នួលខ្ពស់លោកអាចមានលទ្ធភាពចំណាយ ក្នុង ការធ្វើដំណើរទៅស្រុកកំណើត។
លោក សឿង ប្រុស៖ «ពីព្រោះជាធម្មតាពេលទៅលេងស្រុកត្រូវការសោហ៊ុយធ្វើដំណើរត្រូវការជូនម៉ែជូនឪបងប្អូនកូនក្មួយឬមួយក៏ទិញម្ហូបទិញអីជូនពួកគាត់ ឬមួយក៏យើងត្រូវការហូបចុកអីបន្តិចបន្តួចតាមផ្លូវ។ មានការជប់លៀងអីជាមួយកូនក្មួយបន្តិចបន្តួចអ៊ីចឹងវាត្រូវការទិញផ្លែឈើទិញទឹកផ្លែឈើ ហើយអ៊ីចឹងទៅឥឡូវហ្នឹងវាអត់មានលុយមិនធ្វើម៉េច»។
ស្រដៀងគ្នានេះដែរ កម្មការិនីធ្វើការនៅរោងចក្រស្តារឡៃថ៍ (Starlight) ខេត្តកណ្ដាល លោកស្រី អ៊ីន គីមលាង ថ្លែងថាឆ្នាំនេះលោកស្រីគ្មានប្រាក់ជូនឪពុកម្ដាយសម្រាប់ធ្វើបុណ្យនោះទេ។ លោកស្រីបន្តថា ដោយសារតែនៅក្នុងរោងចក្របន្ថយម៉ោងធ្វើការដូច្នេះការចំណាយប្រចាំថ្ងៃក៏លោកស្រីត្រូវត្បិតត្បៀតដែរ។
លោកស្រី អ៊ីន គីមលាង៖ «ប្រសិនទទួលបានប្រាក់ខែខ្ពស់អីមិនថារូបខ្ញុំមិនថាបងប្អូនប្រជាពលរដ្ឋសប្បាយចិត្តហើយរីករាយពេលបានប្រាក់ខែច្រើន។ អ៊ីចឹងមួយចំណែកទុកបង់អង្គការខ្លះទៅមួយចំនួនទុកធ្វើបុណ្យខ្លះទៅមួយចំណែកទៅយើងឱ្យទៅក្រុមគ្រួសារទៅអ៊ីចឹងគ្មានអីសប្បាយចិត្តជាងពេលបានប្រាក់ខែខ្ពស់ទេពេលបានបែងចែកទៅបានគ្រប់គ្រាន់»។
ការត្អូញត្អែររបស់កម្មករនេះ គឺដោយសារប្រាក់ឈ្នួលរបស់ពួកគាត់ទទួលបានតែ២០៤ដុល្លារប៉ុណ្ណោះក្នុងមួយខែដែលមិនសមាមាត្រទៅនឹងការចំណាយស្របពេលដែលទំនិញនៅលើទីផ្សារឡើងថ្លៃស្ទើរគ្រប់មុខ។ ក្រៅពីប្រាក់ឈ្នួលទាបហើយនោះកម្មករមួយចំនួនក៏ប្រឈមនឹងការព្យួរកិច្ចសន្យាការងារ ការកាត់បន្ថយម៉ោងធ្វើការងារ និងរោងចក្រមួយចំនួនបានបិទទ្វារដោយមិនទូទាត់ប្រាក់សំណងឱ្យកម្មករ។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងការងារ លោក កត្តា អ៊ន ដើម្បីសុំការបកស្រាយជុំវិញបញ្ហានេះបានទេនៅថ្ងៃទី១០ ខែមេសា។
កន្លងទៅលោក ហ៊ុន ម៉ាណែត បានសន្យាជាមួយកម្មករថា រដ្ឋាភិបាលរបស់លោកនឹងដំឡើងប្រាក់ឈ្នួលគោលជូនកម្មករ ដើម្បីជួយលើកកម្ពស់ជីវភាពកម្មករ។ ទោះជាយ៉ាងណា កម្មករអះអាងថា ពួកគាត់នៅតែមានជីវភាពក្រក្រីដដែល ដោយអ្នកខ្លះធ្វើការនៅរោងចក្រជិត ១០ឆ្នាំ និងខ្លះទៀតរហូតដល់ជិត ២០ឆ្នាំ ប៉ុន្តែពួកគាត់គ្មានសល់លុយកាក់ ឬទ្រព្យសម្បត្តិអ្វីនោះទេ ក្រៅពីបំណុល និងជំងឺ ។
ទាក់ទិនរឿងនេះ ប្រធានសហភាពការងារកម្ពុជា លោក អាត់ ធន់ មានប្រសាសន៍ថា រដ្ឋាភិបាលគួរតែគិតគូរពីជីវភាពរបស់កម្មករជាពិសេសការដំឡើងប្រាក់ឈ្នួលសមរម្យជូនពួកគាត់ដើម្បីឱ្យពួកគាត់មានលទ្ធភាពទៅលេងបងប្អូននៅស្រុកកំណើត។
លោក អាត់ ធន់៖ «ខ្ញុំគិតថាទី១ រៀបចំការងារធ្វើម៉េចឱ្យមានគាត់មានការងារគ្រប់គ្នា ទី២ ការងារពួកគាត់ហ្នឹងមានប្រាក់ចំណូលខ្ពស់ ដែលអាចឱ្យពួកគាត់អាចដោះស្រាយបញ្ហាជីវភាព ហើយអាចលស់លុយខ្លះក្នុងការចូលរួមការងារសង្គម ឬក៏តម្រូវការផ្សេងៗ ដែលគាត់ចាំបាច់នៅក្នុងសង្គមហ្នឹង និងគ្រួសាររបស់គាត់ ហើយបើអាចទៅរួច គឺគ្រប់គ្រងបញ្ហាតម្លៃទំនិញទីផ្សារឱ្យវានៅកម្រិតដែលប៉ះពាល់ការចំណាយរបស់ពួកគាត់អាហ្នឹង គឺជារឿងសំខាន់បំផុត»។
ពិធីបុណ្យចូលឆ្នាំខ្មែរមានរយៈពេល ៣ថ្ងៃ គឺចាប់ផ្ដើមពីថ្ងៃទី១៣ ដល់ថ្ងៃទី១៦ ខែមេសា ។
កម្មករ និងមន្ត្រីសហជីពយល់ឃើញថា រដ្ឋាភិបាលគួរតែគិតគូរពីទុក្ខលំបាករបស់កម្មករដូចការអះអាងរបស់លោកនាយករដ្ឋមន្ត្រី ហ៊ុន ម៉ាណែត ដើម្បីឱ្យពួកគាត់រស់នៅក្នុងជីវភាពសមរម្យ ហើយអាចមានលទ្ធភាពទៅស្រុកកំណើតនៅរដូវបុណ្យទានម្តងៗ៕
From ព័ត៌មានថ្មីៗ | RFA
via_IFTTT
0 Comments