មន្ត្រីធ្វើការផ្នែកឃ្លាំមើលសិទ្ធិមនុស្សនៅកម្ពុជា ស្នើឱ្យអាជ្ញាធរស៊ើបអង្កេតឱ្យស៊ីជម្រៅ ជុំវិញការស្លាប់របស់ទណ្ឌិតដោយសារពុលអាកុល កាលពីថ្ងៃទី២៧ ខែមិថុនា ។ ការលើកឡើងនេះបន្ទាប់ពីទណ្ឌិត នៅក្នុងពន្ធនាគារខេត្ដពោធិ៍សាត់ ១ស្លាប់ និង១៥នាក់ទៀត ធ្លាក់ខ្លួនឈឺ ដោយសារពុលអាកុល ដោយសារតែពួកគេលាយជាមួយនឹងភេសជ្ជៈផ្សេងៗ ដូចជាកូកាកូឡា និងខារ៉ាបាវ ដើម្បីផឹក។
អ្នកនាំពាក្យសមាគមអាដហុកលោក ស៊ឹង សែនករុណា ថា ទោះបីជាទណ្ឌិតក៏មានសិទ្ធិក្នុងការរស់រានមានជីវិត។ លោកសុំឱ្យអាជ្ញាធរស្វែងរកការពិតបន្ថែម ដើម្បីផ្ដល់ភាពយុត្តិធម៌យល់ជនរងគ្រោះ៖ «យើងចង់ឱ្យមានការស៊ើបអង្កេតឱ្យបានច្បាសលាស់ ពីព្រោះរឿងនេះជាធម្មតាអ្នកទោស នៅពេលដែលជាប់ឃុំ វាគ្រាន់តែបាត់បង់សេរីភាពទេ ប៉ុន្ដែគាត់មិនអាចបាត់បង់ការយកចិត្ដទុកដាក់ទៅលើសិទ្ធិរស់រានមានជីវិតរបស់ពួកគាត់ទេ។ ចង់មិនចង់គេរិះគន់ យើងត្រូវតែធ្វើការស៊ើបអង្កេតឱ្យបានច្បាស់លាស់»។
អ្នកនាំពាក្យអគ្គនាយកដ្ឋានពន្ធនាគារ លោក នុត សាវនា ប្រាប់អាស៊ីសេរីកាលពីថ្ងៃទី០៤ ខែកក្កដា ថា ជនរងគ្រោះដែលស្លាប់គឺជាអ្នកដែលផ្ដើមគំនិតលួចយក អាកុល ទៅលាយជាមួយនឹងភេសជ្ជៈផ្សេងៗ។ លោក នុត សាវនា ថា អាកុលដែលទណ្ឌិតលួចយកទៅលាយនោះ គឺមន្ដ្រីពន្ធនាគារបម្រុងទុកសម្រាប់លាងសម្អាតគុក ដើម្បីទប់ស្កាត់ការរាលដាលនៃជំងឺកូវីដ១៩។
លោកបន្តសមត្ថកិច្ចនឹងបិទការស្រាវជ្រាវករណី ដោយសារតែជនល្មើស ជាជនរងគ្រោះបានស្លាប់ហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments