ពលរដ្ឋនៅស្រុកថាឡាបរិវ៉ាត់ ខេត្តស្ទឹងត្រែង អះអាងថា ព្រៃឈើនៅក្នុងព្រៃសហគមន៍ព្រៃជម្រកសត្វ ត្រូវក្រុមជនល្មើសលួចកាប់និងដឹកយកទៅលក់ឲ្យក្រុមហ៊ុនថ្មម៉ាប់ ឈ្មោះលីម វត្តី អស់រយៈពេលជាច្រើនថ្ងៃមកហើយ មិនទាន់ឃើញអាជ្ញាធរពាក់ព័ន្ធចុះទប់ស្កាត់នោះទេ។ មន្ត្រីសង្គមស៊ីវិល យល់ថា អាជ្ញាធរថ្នាក់ជាតិត្រូវតែចុះសិក្សាស្រាវជ្រាវ និងបង្ក្រាបបទល្មើសទាំងនេះជាបន្ទាប់។
ក្រុមឈ្មួញ ខិលខូចកំពុងសម្រុកកាប់ឈើមានតម្លៃជាច្រើនប្រភេទនៅព្រៃសហគមន៍ព្រៃជម្រកសត្វ ស្ថិតនៅភូមិឆ្វាំង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង យ៉ាងអនាធិបតេយ្យ និងបានដឹកជញ្ជូនឈើទាំងនោះ យកទៅលក់ឲ្យក្រុមហ៊ុនថ្មម៉ាប់ ឈ្មោះលីមវត្តី អស់ជាច្រើនថ្ងៃមកហើយ ដោយមិនទាន់ឃើញមានអាជ្ញាធរ និងភាគីពាក់ព័ន្ធចុះទប់ស្កាត់នោះទេ។ សហគមន៍ថា ចំណែកប្រធានសហគមន៍ព្រៃជម្រកសត្វវិញបានឃុបឃិតគ្នាជាមួយក្រុមជនល្មើសបណ្ដែតបណ្ដោយឲ្យចូលកាប់ឈើក្នុងព្រៃសហគមន៍ដោយសេរី ហើយពលរដ្ឋដែលធ្លាប់ចូលរកអនុផលព្រៃឈើនៅក្នុងតំបន់នោះ ត្រូវបានហាមឃាត់ និងទារលុយ ៥ពាន់រៀល ទៅ ១ម៉ឺនរៀលដើម្បីជាថ្នូរចូលរកអនុផលព្រៃឈើនៅក្នុងព្រៃសហគមន៍មួយនេះ។
ពលរដ្ឋម្នាក់រស់នៅស្រុកថាឡាបរិវ៉ាត់ សុំមិនបញ្ចេញឈ្មោះ ព្រោះបារម្ភពីសុវត្ថិភាព អះអាងប្រាប់វិទ្យុអាស៊ីសេរី នៅថ្ងៃទី៩ ខែឧសភា ថា ចាប់តាំងពីការផ្លាស់ប្ដូរប្រធានសហគមន៍រួចមក ក្រុមជនល្មើសបានសម្រុកចូលទៅកាប់ឈើធ្វើអាជីវកម្មយ៉ាងអនាធិបតេយ្យ នៅក្នុងព្រៃសហគមន៍ព្រៃជម្រកសត្វ ដោយមិនខ្លាចញញើតអ្វីនោះទេ។ ចំណែកពលរដ្ឋដែលធ្លាប់ចេញចូលរកអនុផលព្រៃឈើក្នុងព្រៃសហគមន៍នេះ ត្រូវបានហាមឃាត់និងត្រូវបង់លុយជាមុនសិន ហើយតម្រូវមិនឲ្យផ្សព្វផ្សាយនិងថតរូបការកាប់ឈើក្នុងព្រៃសហគមន៍ទៅបង្ហាញជាសាធារណៈឡើយ។ លោកមានការសោកស្ដាយ ដែលដើមឈើកម្រជាច្រើនប្រភេទ ដែលសហគមន៍ខំប្រឹងការពារអស់ជាច្រើនឆ្នាំមកនេះ ត្រូវបានក្រុមឈ្មួញកាប់ និងដឹកជញ្ជូនទៅលក់ឲ្យក្រុមហ៊ុនថ្មម៉ាប់ លីមវត្តី ដោយសេរី ហើយសហគមន៍ត្រូវបានរឹតត្បិត និងគំរាមកំហែងទៅវិញ។
ពលរដ្ឋសុំមិនបញ្ចេញឈ្មោះ៖ «សោកស្ដាយចេះតែសោកស្ដាយហើយ មែនទែនទៅប្រជាជនមួយចំនួនគេក៏អន់ចិត្តដែរ ដូចជាការបោះឆ្នោតខុស គេថាបោះឆ្នោតខុសបានមេថ្មីមកវាលំបាកក្នុងការរស់នៅក្នុងសហគមន៍ពីព្រោះយើងមិនរស់នៅដើម្បីកាប់ចម្ការឯណា ដូចសព្វថ្ងៃគ្រាន់តែចូលបេះស្លឹងព្រេច ក៏ត្រូវបង់លុយឲ្យគេដែរ ខ្ញុំថាមិនដឹងទេពួកអ្នកឯងជាអ្នកបោះឆ្នោតជ្រើសរើស ព្រោះបង្កើតសហគមន៍មកសម្រាប់ប្រជាពលរដ្ឋអាស្រ័យផល»។
សហគមន៍ម្នាក់ទៀតនៅខេត្តស្ទឹងត្រែង លោក អ៊ុក ម៉ៅ ដែលកំពុងមានរឿងក្ដីក្ដាំនៅតុលាការដោយសារការពារព្រៃឈើ និងកំពុងតាមដានរឿងនេះ ឲ្យដឹងថា ក្រុមហ៊ុន លីមវត្តី ដែលមានលិខិតអនុញ្ញាតធ្វើអាជីវកម្មជីកយកថ្មម៉ាប គឺគ្រាន់តែជាលេសបិទបាំងសកម្មភាពធ្វើអាជីវកម្មឈើទ្រង់ទ្រាយធំតែប៉ុណ្ណោះ។ លោកបន្ថែមថា ការបណ្ដែតបណ្ដោយឲ្យមានការកាប់ឈើធ្វើអាជីវកម្មទ្រង់ទ្រាយធំកើតឡើងបានបែបនេះ ដោយសារអាជ្ញាធរនិងភាគីពាក់ព័ន្ធនៅតំបន់នោះឃុបឃិតគ្នាជាប្រព័ន្ធ ទើបមានការកាប់និងដឹកជញ្ជូនឈើដោយសេរី។
លោក អ៊ុក ម៉ៅ៖ «ស្នើសុំឲ្យប្រធានសហគមន៍ក៏ដូចជាមេព្រៃកុំគិតតែរឿងលុយខ្លាំងពេកសូមជួយទប់ស្កាត់ការពារព្រៃឈើខ្លះផង បើលោកសប្បាយតែជាមួយលុយ ចាយតែលុយមួយពេល ដល់កូនចៅជំនាន់ក្រោយរបស់អស់លោកវេទនាជាងនេះទៅទៀត ខ្ញុំគ្រាន់តែចង់ផ្ដាំប៉ុណ្ណឹង»។
ជុំវិញរឿងនេះ វិទ្យុអាស៊ីសេរី មិនអាចទាក់ទងនាយកផ្នែកខណ្ឌរដ្ឋបាលព្រៃឈើ ស្រុកថាឡាបរិវ៉ាត់ លោក ហ៊ុន សំអឿន និងអ្នកនាំពាក្យសាលាខេត្តស្ទឹងត្រែង លោក ម៉ែន គុង ដើម្បីសុំការអត្ថាធិប្បាយបានទេ នៅថ្ងៃទី៩ ខែឧសភា។
ចំណែកអ្នកស្រាវជ្រាវ និងឃ្លាំមើលធនធានធម្មជាតិនៅកម្ពុជា លោក សេង សុខហេង យល់ឃើញថា ការបណ្ដែតបណ្ដោយឲ្យមានធ្វើអាជីវកម្មឈើទ្រង់ទ្រាយធំបែបនេះ ដោយសារអាជ្ញាធរនៅតំបន់នោះ មានជាប់ពាក់ព័ន្ធនឹងអំពើពុករលួយ ហើយមានអ្នកមានអំណាចនៅពីក្រោយខ្នង។ លោកបន្ថែមថា អាជ្ញាធរថ្នាក់ជាតិត្រូវតែចុះបង្ក្រាប និងទប់ស្កាត់បទល្មើសទាំងអស់នោះឲ្យបានឆាប់ និងត្រូវយកជនល្មើសនិងអ្នកជាប់ពាក់ព័ន្ធយកមកអនុវត្តច្បាប់ ដើម្បីបង្ហាញពីឆន្ទៈពិតប្រាកដ ក្នុងការការពារព្រៃឈើដែលជាសម្បត្តិជាតិ ប្រសិនបើអាជ្ញាធរមិនអនុវត្តច្បាប់ឲ្យមានតម្លាភាពនោះទេ ការបង្ក្រាបកន្លងមកគ្រាន់តែជាការសម្ដែងតែប៉ុណ្ណោះ។
លោក សេង សុខហេង៖ «ព្រៃឈើនៅក្នុងតំបន់ការពារ តំបន់អភិរក្ស តំបន់ព្រៃសហគមន៍។ល។ធ្វើការការពារឲ្យបានតឹងរ៉ឹងមានការអនុវត្តច្បាប់ដាក់ទោសទណ្ឌទាំងអស់នេះវាជាចំណុចពិសេសបំផុត ដែលអាចធ្វើឲ្យកិច្ចការពារព្រៃឈើវាមានប្រសិទ្ធភាព»។
រីឯមន្ត្រីសម្របសម្រួលគម្រោងនៃសមាគមបណ្ដាញយុវជនកម្ពុជា (CYN) លោក អូត ឡាទីន មានប្រសាសន៍ថា អាជ្ញាធរថ្នាក់ជាតិត្រូវតែចុះសិក្សាស្រាវជ្រាវឲ្យបានច្បាស់លាស់ និងស្វែងរកអ្នកពាក់ព័ន្ធដើម្បីយកមកផ្ដន្ទាទោសទៅតាមច្បាប់។ ប្រសិនបើអាជ្ញាធរពាក់ព័ន្ធមិនបានអនុវត្តច្បាប់ទៅលើអ្នកប្រព្រឹត្តបទល្មើសទ្រង់ទ្រាយធំ និងអ្នកមានលុយមានអំណាចនៅពីក្រោយខ្នងនោះទេ ការចុះបង្ក្រាបរបស់អាជ្ញាធរថ្នាក់ជាតិមិនមានប្រសិទ្ធភាពឡើយ។
លោក អូត ឡាទីន៖ «យើងមើលឃើញថា ព្រៃឈើនៅក្នុងប្រទេសរបស់យើងវាមិននៅសល់ប៉ុន្មានទេ ដូច្នេះយើងអត់បានចាប់អារម្មណ៍អត់មានកិច្ចអន្តរាគមន៍ចាប់ពីពេលនេះតទៅឲ្យបានផុលផុសឲ្យបានគ្រប់ជ្រុងជ្រោយទេ ខ្ញុំជឿជាក់ថា ព្រៃឈើនឹងកាន់តែអន់ថយជាងនេះទៅទៀត ហើយយើងកាន់តែរងគ្រោះកាន់តែខ្លាំងជាងនេះទៀត»។
វិទ្យុអាស៊ីសេរី មិនទាន់អាចរកប្រភពទាក់ទងភាគីក្រុមហ៊ុនថ្មម៉ាប់ លីមវត្តី ដែលសហគមន៍ចោទប្រកាន់ថា មានពាក់ព័ន្ធនឹងបទល្មើសព្រៃឈើនេះបាននៅឡើយទេនៅថ្ងៃទី៩ ខែឧសភា ចំណែកសហគមន៍ក៏មិនដឹងច្បាស់ថា ក្រុមហ៊ុននេះជាកម្មសិទ្ធិរបស់នរណានោះដែរ។
ព្រៃសហគមន៍ព្រៃជម្រកសត្វ មានទីតាំងស្ថិតនៅភូមិឈ្វាំង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង ស្ថិតក្រោមការគ្រប់គ្រងរបស់ រដ្ឋបាលព្រៃឈើ។ ព្រៃសហគមន៍មួយនេះ មានផ្ទៃដីជាង៤ពាន់ (៤.១៥៣) ហិកតារសម្បូរទៅដោយ ជីវចម្រុះ និងដើមឈើគ្រប់ប្រភេទ មានដូចជា ដួងចែម កកោះ ផ្ចឹក ផ្ដៀក ស្រឡៅ ឈ្លីក និងដើមឈើទាល ឬហៅដើមជ័រច្បោះជាដើម។
សហគមន៍ និងមន្ត្រីសង្គមស៊ីវិល ស្នើយ៉ាងទទូចទៅអាជ្ញាធរពាក់ព័ន្ធ ត្រូវចុះទប់ស្កាត់ឲ្យបានទាន់ពេលវេលា និងស្វែងរកអ្នកជាប់ពាក់ព័ន្ធ ដែលបានបើកដៃឲ្យក្រុមជនល្មើសទាំងអស់នោះ យកទៅផ្ដន្ទាទោសតាមច្បាប់ បើពុំដូច្នោះទេ ព្រៃសហគមន៍ព្រៃជម្រកសត្វ និងវិនាសហិនហោចជាក់ជាមិនខាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕
From ព័ត៌មានថ្មីៗ | RFA
via_IFTTT
0 Comments