ទីវត្តអារាមក្នុងខេត្តក្រុងមួយចំនួន បានរៀបចំពិធីបុណ្យមាឃបូជា ដែលប្រព្រឹត្តទៅចំថ្ងៃសៅរ៍ ទី១១ ខែកុម្ភៈ ត្រូវជាថ្ងៃ ១៥កើតពេញបូណ៌មី។ ព្រះសង្ឃ និងពុទ្ធបរិស័ទខេត្តក្រុងបានប្រារព្ធពិធីបុណ្យនេះយ៉ាងអធិកអធម មានជាអាទិ នៅភ្នំអដ្ឋរស្ស ឬហៅថា ភ្នំឧត្ដុង្គ មាននៅខេត្តសៀមរាប និងខេត្តបន្ទាយមានជ័យ ជាដើម ដើម្បីរំឭកដល់ព្រះសម្មាសម្ពុទ្ធដែលជាព្រះបរមគ្រូ។
ព្រះសង្ឃ និងពុទ្ធបរិស័ទរាប់ពាន់នាក់ បានចូលរួមដង្ហែក្បួនមាឃបូជាដ៏អធិកអធមមួយនៅភ្នំអដ្ឋរស្ស ឬភ្នំឧត្ដុង្គ ខេត្តកំពង់ស្ពឺ នៅរសៀលថ្ងៃសៅរ៍ ទី១១ ខែកុម្ភៈ។
អ្នកនាំពាក្យក្រសួងធម្មការ និងសាសនា លោក សេង សុមុនី មានប្រសាសន៍ថា ពិធីបុណ្យមាឃបូជាដែលជាពិធីថ្នាក់ជាតិនាឆ្នាំ២០១៧ នេះក្រសួងបានរៀបចំឲ្យមានព្រឹត្តិការណ៍នេះឡើងនៅភ្នំអដ្ឋរស្ស ឬភ្នំឧត្ដុង្គ ខេត្តកំពង់ស្ពឺ ដែលមានមនុស្សម្នាចូលរួមរាប់ពាន់នាក់ ដោយមានមន្ត្រីនៅតាមក្រសួងស្ថាប័នរដ្ឋ និងពុទ្ធបរិស័ទមកពីគ្រប់ទិសទីចូលរួម៖ «»។
ទាក់ទងនឹងព្រឹត្តិការណ៍នេះដែរ នៅឯវត្តដំណាក់ ខេត្តសៀមរាប ព្រះសង្ឃ ព្រមទាំងពុទ្ធបរិស័ទមកពីច្រើនខេត្ត រួមទាំងទីក្រុងភ្នំពេញផង បាននាំគ្នារាប់បាត្រព្រះសង្ឃចំនួន ៥០០អង្គ។
ភិក្ខុខេមាន្ទោ ឈន់ ឈឿន គ្រូសូត្រស្ដាំវត្តដំណាក់ ខេត្តសៀមរាប មានថេរដីកាថា ការប្រារព្ធពិធីបុណ្យមាឃបូជានៅឆ្នាំនេះ ប្រហាក់ប្រហែលឆ្នាំមុនៗដែរ។ ព្រះតេជព្រះគុណមានថេរដីកាថា ក្បួនដង្ហែដែលមានរថយន្តតុបតែងលំអដោយក្រណាត់ និងផ្កាភ្ញី ហើយដឹករូបព្រះពុទ្ធបដិមាដែលតុបតែងដោយផ្កាស្រស់ បានចាប់ផ្ដើមចេញដំណើរពីវត្តដំណាក់ ឆ្ពោះទៅកាន់ដងផ្លូវសំខាន់ៗ ដោយមានភ្លេងប្រគំលាយឡំជាមួយសំឡេងធម៌ បន្ទាប់មកមានបាញ់កាំជ្រួចបន្លឺសញ្ញាចំនួន ៣ដង។
ព្រះភិក្ខុ ឈន់ ឈឿន បញ្ជាក់ថា ព្យុហយាត្រាមានក្បូនដង្ហែចែកចេញជា ៦ផែន។ ផែនទី១ គឺមានរថយន្តភ្លេងពិណពាទ្យ អ្នកកាន់បដាអបអរសាទរបុណ្យមាឃបូជា សិស្សានុសិស្សអ្នកកាន់ទង់ពុទ្ធសាសនា ផែនទី២ រថយន្តព្រះអង្គត្រាស់ដឹងដែលតុបតែងដោយផ្កាស្រស់ ព្រះសង្ឃកាន់ទង់សាសនា អ្នកកាន់បដាមាឃបូជា ផែនទី៣ គឺរថយន្តព្រះអគ្គសាវ័ក ឆ្វេងស្ដាំ មានអ្នកកាន់បដា មានគរុសិស្សចំនួន ២០០នាក់ ផែនទី៤ រថយន្តតម្កល់ព្រះចង្កូមកែវសិប្បនិមិត្ត អ្នកស្លៀកពាក់ក្បិនបែបប្រពៃណី ផែនទី៥ មានរថយន្តតម្កល់ព្រះពោធិ៍ព្រឹក្ស និងព្រះត្រៃបិដក និងផែនទី៦ រថយន្តតម្កល់ព្រះសារីរិកធាតុ៖ «»។
រីឯនៅខេត្តបន្ទាយមានជ័យវិញ ចៅអធិការវត្តប្រាសាទស្រះកណ្ដាលចាស់ ព្រះមហាធម្មាលង្ការោ ព្រះតេជព្រះគុណ ចាន់ សុជន មានថេរដីកាថា ដើម្បីអបអរសាទរពិធីបុណ្យនេះគឺមានរាប់បាត្រព្រះសង្ឃ ១០២អង្គ និងពិធីហែក្បួនរថយន្ត និងគោយន្ត ពីវត្តទៅស្រុកព្រះនេត្រព្រះ ឆ្ពោះទៅស្រុកមង្គលបុរី រួចទៅទីរួមខេត្តបន្ទាយមានជ័យ ដែលមានចម្ងាយប្រមាណ ១០០គីឡូម៉ែត្រ និងមានសម្ដែងធម៌ទេសនានៅពេលយប់។ ព្រះតេជព្រះគុណក៏បានដាក់ផ្ទាំងប៉ាណូធំៗកាត់ថ្នល់ជាតិ ផ្សព្វផ្សាយពីអត្ថន័យមាឃបូជា៖ «»។
ក្រសួងធម្មការ និងសាសនា ក៏បានចេញសេចក្ដីប្រកាសថា នៅតាមទីវត្តអារាមនានា ក៏មានការរៀបចំពិធីបុណ្យមាឃបូជានេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments