ប្រធានបក្សភ្លើងទៀន លោក ទាវ វណ្ណុល ឆ្លើយបំភ្លឺទៅកាន់តុលាការថា លទ្ធិប្រជាធិបតេយ្យធ្លាក់ចុះក្រោមអាណត្តិដឹកនាំរបស់លោក ហ៊ុន ម៉ាណែត គឺជាការពិត ហើយថ្នាក់ដឹកនាំគណបក្សប្រឆាំងជាច្រើនរូបត្រូវបានគេដាក់កាមេរ៉ាតាមដាន។ មន្ត្រីសង្គមស៊ីវិលថា អ្នកនយោបាយគ្រប់រូប គួរប្រកាន់ជំហរយកផលប្រយោជន៍ជាតិជាធំ និងចូលរួមលើកកម្ពស់លទ្ធិប្រជាធិបតេយ្យ។
សាលាដំបូងរាជធានីភ្នំពេញ នៅថ្ងៃទី២៥ ខែមេសា កោះហៅប្រធានបក្សភ្លើងទៀន លោក ទាវ វណ្ណុល មកឆ្លើយបំភ្លឺតាមពាក្យបណ្ដឹងរបស់មេធាវីតំណាងរាជរដ្ឋាភិបាលលោក ជូ សុធាផល និងលោក ម៉ម ចាន់ណែភ ដែលបានចោទប្រធានបក្សប្រឆាំងរូបនេះថា បានធ្វើឱ្យប៉ះពាល់ដល់កិត្តិយសរដ្ឋាភិបាលតាមរយៈការផ្ដល់បទសម្ភាសន៍ទៅកាន់សារព័ត៌មានអន្តរជាតិកាលពីខែកុម្ភៈ។
ប្រធានគណបក្សភ្លើងទៀន លោក ទាវ វណ្ណុល ថ្លែងក្រោយឆ្លើយបំភ្លឺថា អ្វីដែលអត្ថបទកាសែតជប៉ុន នីកេ អេស៊ា (Nikkei Asia) បានចុះផ្សាយនោះ គឺជាការយល់ឃើញរបស់លោកស្ទើរតែទាំងស្រុង។ លោក ទាវ វណ្ណុល ថា នេះជាការពិតដែលអាជ្ញាធរបានដាក់កាមេរ៉ាសុវត្ថិភាពនៅខាងមុខផ្ទះថ្នាក់ដឹកនាំនិងអតីតថ្នាក់ដឹកនាំគណបក្សប្រឆាំងដូចជាអនុប្រធានគណបក្សភ្លើងទៀន លោក សុន ឆ័យ លោក ចេប គឹមអ៊ាង លោក រ៉ុង ឈុន និងរូបលោកផ្ទាល់ជាដើម។
លោក ទាវ វណ្ណុល បន្តថា នៅអំឡុងពេលនៃការសាកសួររបស់តំណាងអយ្យការ លោកនៅតែរក្សាជំហរថា លទ្ធិប្រជាធិបតេយ្យ និងការគោរពសិទ្ធិមនុស្សបន្តធ្លាក់ចុះនៅក្រោមអាណត្តិរដ្ឋាភិបាលថ្មីដែលដឹកនាំដោយនាយករដ្ឋមន្ត្រី លោក ហ៊ុន ម៉ាណែត។
លោក ទាវ វណ្ណុល៖ «ព្រោះជាការប្រៀបធៀបទៅកាលពីសម្ដេចតេជោសម័យសម្ដេចតេជោ និងសម័យឯកឧត្ដម ហ៊ុន ម៉ាណែត ហ្នឹងមានការខុសគ្នា ខ្ញុំថា មានការរឹតត្បិតខ្លាំងជាងជាងសម័យសម្ដេចតេជោ ឆ្លើយបញ្ជាក់ប្រាប់ប៉ុណ្ណឹង ខ្ញុំនិយាយការពិតនៅក្នុងសង្គមកម្ពុជាយើង»។
ចំណែកមេធាវីការពារក្ដីឱ្យលោក ទាវ វណ្ណុល គឺលោក ជូង ជូងី លើកឡើងថា តាមគោលការណ៍ច្បាប់ការលើកឡើងរបស់លោក ទាវ វណ្ណុល ជាមួយអ្នកសារព័ត៌មាននេះ មិនគួរត្រូវរងការចោទប្រកាន់នោះទេ បើទោះជាប៉ះពាល់កេរ្តិ៍ឈ្មោះរដ្ឋាភិបាល ឬក៏អត់។ លោក ជូង ជូងី ថា ការមិនមានកំហុសនេះ គឺដោយសារតែការលើកឡើងរបស់លោក ទាវ វណ្ណុល ផ្អែកលើការពិតប៉ុណ្ណោះ។
លោក ជូង ជូងី៖ «អ៊ីចឹងសម្រាប់ខ្ញុំជាមេធាវី ឬក៏ជាអ្នកច្បាប់ប្រជាពលរដ្ឋសាមញ្ញមិនអាចទៅដាក់កាមេរ៉ាបានទេ អាចជាអាជ្ញាធរដែនដីគេដាក់ អ៊ីចឹងប្រសិនបើជាដាក់ក្នុងគោលបំណងទូទៅ ឬនៅក្នុងទីសាធារណៈវាមិនជាបញ្ហាអីទេ។ ប៉ុន្តែ ប្រសិនបើក្នុងគោលដៅចាប់យកសកម្មភាពរបស់គាត់ផ្ទាល់ គឺប៉ះពាល់ទៅលើជីវិតឯកជនភាពរបស់គាត់។ អ៊ីចឹង ប្រសិនបើដាក់សម្រាប់សុវត្ថិភាពសាធារណៈ គួរតែដាក់ជាទូទៅកន្លែងណា ក៏ដាក់ដែរ។ ប៉ុន្តែ បើដាក់សម្រាប់តែមុខផ្ទះគាត់ទេ ហើយមកអះអាងថា សម្រាប់សុវត្ថិភាពសាធារណៈវាមិនសមស្របទេ»។
លោក ជូង ជូងី ថា ការសាកសួរទៅលើកូនក្ដីរបស់លោកត្រូវបានបិទបញ្ចប់ត្រឹមថ្ងៃទី២៥ ខែមេសា នេះ។
វិទ្យុអាស៊ីសេរីមិនទាន់អាចសុំការឆ្លើយតបរឿងនេះពីអ្នកនាំពាក្យអយ្យកាអមសាលាដំបូងរាជធានីភ្នំពេញ និងជាអ្នកចេញដីកាកោះ លោក ប្លង់ សុផល បានទេ នៅថ្ងៃទី២៥ ខែមីនា។
នាយកទទួលបន្ទុកកិច្ចការទូទៅ នៃអង្គការឃ្លាំមើលសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា ការលើកឡើងពីលទ្ធិប្រជាធិបតេយ្យធ្លាក់ចុះនេះមិនមែនតែអ្នកនយោបាយទេ សូម្បីតែក្រសួងការបរទេសអាមេរិក និងអ្នករាយការណ៍ពិសេសរបស់អង្គការសហប្រជាជាតិទទួលបន្ទុកផ្នែកសិទ្ធិមនុស្សប្រចាំនៅកម្ពុជា ក៏បានលើកឡើងដូចគ្នាផងដែរ។
លោក អំ សំអាត ថា ក្នុងនាមជាអង្គការសង្គមស៊ីវិលចង់ឃើញអ្នកនយោបាយគ្រប់រូបប្រកាន់ជំហរយកផលប្រយោជន៍ជាតិជាធំ និងចូលរួមលើកកម្ពស់លទ្ធិប្រជាធិបតេយ្យ។
លោក អំ សំអាត៖ «អ្នកនយោបាយទាំងអស់គួរតែតម្កល់ឧត្ដមប្រយោជន៍ជាតិ ឧត្ដមប្រយោជន៍ពលរដ្ឋជាធំ ប្រសិនបើមានបញ្ហាអី យើងគួរតែជជែកគ្នាដោយសន្តិវិធី ហើយស្វែងរកដំណោះស្រាយមួយដែលដើម្បីឧត្ដមប្រយោជន៍ជាតិ ឧត្ដមប្រយោជន៍ពលរដ្ឋជាធំ»។
លោក ទាវ វណ្ណុល បានប្រាប់ទៅកាន់អត្ថបទកាសែតជប៉ុន នីកេ អេស៊ា អំឡុងពេល ដែលលោកបំពេញទស្សនកិច្ចនៅប្រទេសជប៉ុនថា លទ្ធិប្រជាធិបតេយ្យ និងការគោរពសិទ្ធិមនុស្សនៅប្រទេសកម្ពុជានៅក្រោមការដឹកនាំរបស់លោក ហ៊ុន ម៉ាណែត កាន់តែធ្លាក់ចុះ និងអាក្រក់ជាងការដឹកនាំរបស់ឪពុកលោក គឺលោក ហ៊ុន សែន។ លោក ទាវ វណ្ណុល បន្តថា គណបក្សភ្លើងទៀតត្រូវបានដកសិទ្ធិមិនឱ្យបោះឆ្នោត ចំណែកមន្ត្រី និងថ្នាក់ដឹកនាំបក្សប្រឆាំងជាច្រើនរូបត្រូវបានគំរាមកំហែង ចាប់ខ្លួន និងដាក់កាមេរ៉ាឃ្លាំមើល។
ក្រសួងការបរទេសសហរដ្ឋអាមេរិក កាលពីថ្ងៃទី២២ មេសា បានចេញរបាយការណ៍ ឆ្នាំ២០២៣ ស្ដីពីការអនុវត្តសិទ្ធិមនុស្សនៅប្រទេសកម្ពុជា ដោយបានរកឃើញពីការរំលោភសិទ្ធិមនុស្សសំខាន់ៗ រួមមាន ការធ្វើទារុណកម្ម អំពើឃោរឃៅ អមនុស្សធម៌ ការព្យាបាទ និងការបង្ក្រាបរបស់រដ្ឋាភិបាលកម្ពុជាក្នុងពេលកន្លងមកនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments