មន្ត្រីសង្គមស៊ីវិលបារម្ភពីសុវត្ថិភាពរបស់ពលករខ្មែរធ្វើការនៅប្រទេសថៃជាង២០ម៉ឺននាក់ ដែលដល់ថ្ងៃផុតកំណត់ទិដ្ឋាការការងារ នៅថ្ងៃទី៣០ មេសា។ ពួកគេស្នើដល់ក្រសួងការងារឲ្យជួយទាក់ទងភាគីថៃ ដើម្បីសម្រួលដល់ការបន្តទិដ្ឋាការការងាររបស់ពលករខ្មែរ។
មន្ត្រីជំនាញផ្នែកការពារសិទ្ធិពលករចំណាកស្រុកនៃអង្គការសង់ត្រាល់(CENTRAL)ប្រចាំនៅប្រទេសថៃលោក លឹង សុផុន ប្រាប់វិទ្យុអាស៊ីសេរីនៅថ្ងៃទី៣០ មេសា ថា នៅពេលនេះពលករជាង២០ម៉ឺននាក់ដល់ថ្ងៃផុតកំណត់សុពលភាពទិដ្ឋាការការងារ ធ្វើឲ្យពលករទាំងនោះសម្រុកធ្វើដំណើរត្រឡប់ទៅកម្ពុជាវិញ ដើម្បីបន្តសុពលភាពទិដ្ឋាការការងារ ឬស្នើឲ្យក្រុមហ៊ុនបន្តទិដ្ឋាការការងារជំនួសពួកគេ។ លោកបន្តថា ពេលត្រឡប់ទៅកម្ពុជាវិញពលករប្រឈមនឹងការចំណាយថ្លៃសោហ៊ុយធ្វើដំណើរការកកស្ទះនៅច្រកចេញចូល និងបញ្ហាអាកាសធាតុក្ដៅខ្លាំងជាដើម។
លោក លឹង សុផុន៖ «ខ្ញុំឃើញតំបន់ច្រើនពេល ដែលមានបញ្ហាពលករអស់សុពលភាពវីសា (ទិដ្ឋាការ) ពួកគាត់ចុះឆែកដល់កន្លែងពួកគាត់ស្នាក់នៅ ជាពិសេសប៉ូលិសតាមតំបន់មួយៗចុះចាប់ពួកគាត់ ធ្វើឲ្យពួកគាត់ហ្នឹងជួនកាលអាចយកពួកគាត់ទៅឃុំឃាំងបណ្ដោះអាសន្ន ឬក៏ផាកពិន័យអីចឹងច្រើនសម្រាប់អ្នកដែលអស់សុពលភាពវីសា បែបហ្នឹងដែលធ្វើឲ្យពួកគាត់មានបញ្ហាប្រឈមក្នុងការរស់នៅផង ក្នុងការស្វែងរកការងារផង នៅពេលដែលដាច់ហើយគឺមានការលំបាកច្រើន»។
លោក លឹង សុផុន ឲ្យដឹងទៀតថា នៅពេលពលករផុតកំណត់សុពលភាពទិដ្ឋាការការងារ ពួកគេប្រឈមនឹងការផាកពិន័យ និងប្រឈមនឹងការឃាត់ខ្លួនពីអាជ្ញាធរថៃ នៅពេលអាជ្ញាធរចុះត្រួតពិនិត្យឯកសារផ្សេងៗ។ មន្ត្រីសង្គមស៊ីវិលរូបនេះ ទទូចដល់ក្រសួងពាក់ព័ន្ធស្វែងរកកិច្ចសហប្រតិបត្តិការជាមួយអាជ្ញាធរថៃដើម្បីសម្រួលដល់ការបន្តសុពលភាពទិដ្ឋាការការងារសម្រាប់ពលករ។
ពាក់ព័ន្ធនឹងបញ្ហានេះ អ្នកនាំពាក្យក្រសួងការងារលោក កត្តា អ៊ន សរសេរសារនៅលើហ្វេសប៊ុកផ្លូវការរបស់លោកថា ក្រសួងការងារបានប្រជុំជាមួយនាយកដ្ឋានការងារនៃក្រសួងការងារថៃ ហើយបានកែសម្រួលនីតិវិធីមួយចំនួនដើម្បីឲ្យពលករត្រឡប់ទៅធ្វើការនៅប្រទេសថៃបានលឿនជាងមុន។
អ្នកនាំពាក្យដដែលឲ្យដឹងទៀតថា ពលករដែលផុតកំណត់ទិដ្ឋាការការងារ ត្រូវត្រឡប់មកកម្ពុជាវិញ ដើម្បីបន្តសុពលភាពហើយពលករអាចត្រឡប់ចូលប្រទេសថៃវិញបានភ្លាមៗ ក្នុងករណីមានឯកសារគ្រប់គ្រាន់។
លោក កត្តា អ៊ន អំពាវនាវឲ្យពលករដែលផុតសុពលភាពទិដ្ឋាការការងារ សូមត្រឡប់មកកម្ពុជាវិញ និងបំពេញបែបបទឲ្យបានត្រឹមត្រូវក្នុងករណីចង់ត្រឡប់ទៅធ្វើការនៅប្រទេសថៃវិញ ជៀសវាងចូលធ្វើការដោយខុសច្បាប់ និងប្រឈមនឹងចំណាត់ការតាមផ្លូវច្បាប់ពីសមត្ថកិច្ចថៃ។
ចំណែកស្ថានទូតខ្មែរប្រចាំប្រទេសថៃបញ្ជាក់នៅលើគេហទំព័រស្ថានទូតថា នៅពេលពលករចំណាកស្រុកដោយគ្មានទិដ្ឋាការការងារ ឬប័ណ្ណអនុញ្ញាតការងារគឺត្រូវប្រឈមនឹងការផាកពិន័យជាទឹកប្រាក់ចាប់ពី៥ពាន់បាត ឬជាង១រយដុល្លារអាមេរិក ដល់៥ម៉ឺនបាត ឬជាង១ពាន់២រយដុល្លារអាមេរិកការបញ្ជូនចេញពីប្រទេសថៃ និងការបាត់បង់សិទ្ធិធ្វើជាពលករនៅប្រទេសថៃរយៈពេល២ឆ្នាំ។
ជុំវិញរឿងនេះដែរ អនុប្រធានអ្នកនាំពាក្យរដ្ឋាភិបាលថៃលោក ខារ៉ុម ផលផនក្លាង (Kharom Polpornklang) បានព្រមានថា ពលករមកពីប្រទេសចំនួន៣ រួមមានឡាវ (Laos) ភូមា ឬមីយ៉ាន់ម៉ា (Myanmar) និងកម្ពុជាត្រូវតែចាកចេញពីប្រទេសថៃនៅមុនពេលទិដ្ឋាការការងាររបស់ពួកគេ ផុតកំណត់នៅថ្ងៃទី៣០ មេសា ឬត្រូវប្រឈមនឹងវិធានការច្បាប់នៅពេលផុតកំណត់សុពលភាពទិដ្ឋាការការងារ។ អនុប្រធានអ្នកនាំពាក្យរដ្ឋាភិបាលថៃរូបនេះឲ្យដឹងដែរថា អនុស្សរណៈយោគយល់គ្នា (MoU) បានពន្យារពេលផុតកំណត់នៃទិដ្ឋាការការងាររយៈពេល៤ឆ្នាំ តាំងពីខែមករា ដើមឆ្នាំ២០២៤ មកផុតកំណត់នៅថ្ងៃទី៣០ ខែមេសា ហើយបើនិយោជក ឬថៅកែចង់នាំពលករទាំងនោះត្រឡប់មកវិញ ត្រូវតែរៀបចំឯកសារឡើងវិញ ដើម្បីកាត់បន្ថយពេលធ្វើដំណើរត្រឡប់ទៅប្រទេសកំណើតរបស់ពលករ។ អ្នកនាំពាក្យរូបនេះ បញ្ជាក់ថា នាយកដ្ឋានមុខរបរ នៃក្រសួងការងារថៃបានសហការជាមួយប្រទេសទាំងបី ដើម្បីអនុញ្ញាត និងកាត់បន្ថយពេលវេលាឲ្យពលករបានមកធ្វើការនៅប្រទេសថៃវិញឆាប់រហ័ស។ នេះបើតាមការចុះផ្សាយរបស់សារព័ត៌មាន ឌឹ ណេសិន (The Nation) របស់ថៃកាលពីថ្ងៃទី២១ មេសា។
របាយការណ៍របស់ក្រសួងការងារកម្ពុជាឱ្យដឹងថា បច្ចុប្បន្នមានពលករខ្មែរជាង ១លាន២សែននាក់កំពុង ធ្វើការនៅប្រទេសថៃ។ ប៉ុន្តែរបាយការណ៍របស់អង្គការសង់ត្រាល់បង្ហាញថា មានពលករខ្មែរកំពុងធ្វើការដោយស្របច្បាប់ និងមិនស្របច្បាប់នៅប្រទេសថៃជាង ២លាននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments