ស្នងការនគរបាលខេត្តព្រះសីហនុ ឃាត់ខ្លួនជនជាតិចិន ចំនួន ៣៦នាក់យកទៅសាកសួរ និងដើម្បីស្រាវជ្រាវបន្ត ទាក់ទងករណីប្រើអំពើហិង្សានៅចំកណ្ដាលក្រុងទេសចរណ៍មួយនេះ បណ្ដាលឲ្យមនុស្សមួយចំនួនរងរបួស។ មន្ត្រីសង្គមស៊ីវិល ស្នើឲ្យសមត្ថកិច្ចត្រូវអនុវត្តច្បាប់ឲ្យបានត្រឹមត្រូវ ដើម្បីជៀសវាងការឃុបឃិតដោះលែងជនប្រព្រឹត្តល្មើសឲ្យរួចខ្លួនពីការផ្ដន្ទាទោស។
ស្នងការនគរបាលខេត្តព្រះសីហនុ លោក ជួន ណារិន្ទ បានឲ្យអាស៊ីសេរីដឹងតាមទូរស័ព្ទថា កម្លាំងជំនាញកំពុងសួរនាំជនជាតិចិន ទាំង ៣៦នាក់ដែលសមត្ថកិច្ចចាប់បញ្ជូនមកស្នងការដ្ឋាននគរបាលខេត្តនេះកាលពីវេលាម៉ោង ១ និង ៣០នាទី ព្រឹកថ្ងៃសៅរ៍ ទី១ ខែកក្កដា ទាក់ទងជម្លោះហិង្សាវ៉ៃតប់គ្នារវាងជនជាតិចិន មួយក្រុម និងខ្មែរមួយក្រុម នៅក្បែររង្វង់មូលតោពីរ។
លោកបន្តថា ក្នុងចំណោមជនជាតិចិនទាំង ៣៦នាក់ ដែលសមត្ថកិច្ចឃាត់ខ្លួននេះ មិនមែនជាជនដៃដល់ទាំងអស់នោះទេ គឺមានអ្នកខ្លះបានត្រឹមមកឈរមើលអំពើហិង្សានេះ ហើយសមត្ថកិច្ចក៏ឃាត់ខ្លួនដើម្បីរក្សាសណ្ដាប់ធ្នាប់នៅទីតាំងកើតហេតុ កុំឲ្យមានភាពរញ៉េរញ៉ៃ ឬឈានដល់ផ្ទុះអំពើហិង្សាធ្ងន់ធ្ងរថែមទៀត។
លោក ជួន ណារិន្ទ ឲ្យដឹងថា ជនជាតិចិន ទាំងនោះអាចនឹងត្រូវបញ្ជូនទៅតុលាការ បើសង្ស័យជាប់ពាក់ព័ន្ធករណីអំពើហិង្សានេះ ហើយអ្នកមិនជាប់ពាក់ព័ន្ធ នឹងត្រូវដោះលែងវិញ ព្រោះករណីប្រើអំពើហិង្សានេះ ដើមហេតុកើតឡើងដំបូងមិនធំដុំទេ ប៉ុន្តែនៅពេលមានអ្នកបំផុសថាមានជនជាតិចិន ដេញវ៉ៃខ្មែរ ក៏មានការឆោឡោផ្ទុះអំពើហិង្សានេះរីករាលដាលធំឡើង៖ «»។
យ៉ាងណាក៏ដោយ លោក ជួន ណារិន្ទ បញ្ជាក់ថា សមត្ថកិច្ចនឹងស្រាវជ្រាវករណីផ្ទុះអំពើហិង្សានេះឲ្យបានច្បាស់ ដើម្បីអនុវត្តច្បាប់ឲ្យបានត្រឹមត្រូវ ធានារក្សាសន្តិសុខសណ្ដាប់ធ្នាប់ជូនប្រជាពលរដ្ឋខ្មែរ ភ្ញៀវទេសចរជាតិ អន្តរជាតិ និងអ្នកវិនិយោគទុនឲ្យមានសុវត្ថិភាពល្អ ព្រោះខេត្តព្រះសីហនុ ត្រូវរាជរដ្ឋាភិបាលចាត់ទុកជាតំបន់សេដ្ឋកិច្ចដ៏សំខាន់សម្រាប់ប្រមូលថវិកាជាតិមកអភិវឌ្ឍសង្គមជាតិ៖ «»។
អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ អ្នកស្រី ជៀប សុធារី ស្នើឲ្យសមត្ថកិច្ចស្ថាប័នពាក់ព័ន្ធ ត្រូវអនុវត្តច្បាប់ឲ្យបានត្រឹមត្រូវដើម្បីជៀសវាងការរិះគន់ផ្សេងៗពីសាធារណជន ទៅលើសកម្មភាពរបស់ជនជាតិចិន ប្រើហិង្សាជាបន្តបន្ទាប់មកនេះ។ អ្នកស្រីបន្តថា ករណីវត្តមានជនជាតិចិន បង្ហាញវត្តមានច្រើននាមូលដ្ឋានខេត្តព្រះសីហនុ ប៉ុន្មានឆ្នាំចុងក្រោយនេះ បើសមត្ថកិច្ចគ្រប់គ្រងមិនបានដិតដល់ទេ អ្នកស្រីព្រួយបារម្ភថានៅថ្ងៃខាងមុខ នឹងអាចកើតមានបញ្ហាវឹកវរ ឬហិង្សារីករាលដាលធំធ្ងន់ធ្ងរថែមទៀត។
អ្នកស្រី សុធារី បានកត់សម្គាល់ឃើញថា វត្តមានជនជាតិចិន បង្ហាញខ្លួននាមូលដ្ឋានខេត្តព្រះសីហនុ រាល់ថ្ងៃនេះ ពួកគេបានបង្ហាញកាយវិការ ឬអត្តចរិតកាចសាហាវនៅពេលទទួលទានគ្រឿងស្រវឹង ហើយតែងបង្កអំពើហិង្សាជាបន្តបន្ទាប់ ជាពិសេសជាងនេះ ជនជាតិចិន ភាគច្រើនពួកគេមានសិទ្ធិបើកបររថយន្តដោយខ្លួនឯងក្នុងល្បឿនលឿន និងតែងបង្កគ្រោះថ្នាក់ចរាចរណ៍នៅតាមផ្លូវសាធារណៈជាបន្តបន្ទាប់៖ «»។
ចំណែកលោក យន្ត មីន អភិបាលខេត្តព្រះសីហនុ បានចុះទៅដល់ស្នងការដ្ឋាននគរបាលខេត្តព្រះសីហនុ ព្រឹកថ្ងៃសៅរ៍ ទី១ ខែកក្កដា ដើម្បីចង់ដឹងជុំវិញករណីសមត្ថកិច្ចឃាត់ខ្លួនជនជាតិចិន ចំនួន ៣៦នាក់នេះដែរ។ លោកក៏ស្នើដល់សមត្ថកិច្ចនគរបាល ត្រូវពន្លឿនការស៊ើបអង្កេត និងសម្របសម្រួលករណីហិង្សានេះឲ្យបានឆាប់ និងមិនត្រូវឲ្យទំនាស់កើតឡើងតូច បំផុសឲ្យរីករាលដាលធំនោះទេ។
លោក យន្ត មីន ស្នើដល់កម្លាំងសមត្ថកិច្ចគ្រប់ស្ថាប័ន ប្រជាពលរដ្ឋ និងផ្នែកពាក់ព័ន្ធ ត្រូវចូលរួមថែរក្សាសណ្ដាប់ធ្នាប់សាធារណៈឲ្យបានទាំងអស់គ្នា ជៀសវាងការលាបពណ៌គ្នាបង្កើតឲ្យមានជម្លោះជនជាតិមួយទៅជនជាតិផ្សេង នាំឲ្យជម្លោះបន្តិចបន្តួច បង្កឲ្យក្លាយទៅជាជម្លោះធំ នាំឲ្យប៉ះពាល់ដល់សុខសុវត្ថិភាពភ្ញៀវទេសចរ និងអ្នកវិនិយោគទុន៖ «»។
យ៉ាងនេះក្តី លោក ជួន ណារិន្ទ ស្នងការនគរបាលខេត្តព្រះសីហនុ បានឲ្យដឹងថា បុរសជនជាតិចិន ទាំង ៣៦នាក់នេះ គឺពួកគេស្នាក់នៅ និងធ្វើការងារនៅសណ្ឋាគារកាស៊ីណូ ជីងប៉ី មានទីតាំងនៅភូមិ៤ សង្កាត់៤ ក្រុងព្រះសីហនុ។ ក្នុងនោះ វត្ថុតាងដែលសមត្ថកិច្ចរឹបអូសបាន មានដំបងឈើ បំពង់ទីបដែក និងដែកទីបបួនជ្រុង ជាដើម។
លោកថា អំពើហិង្សានេះមានស្រីជនរងគ្រោះជនជាតិខ្មែរចំនួន ២នាក់ បានដាក់ពាក្យបណ្ដឹងមកកាន់ស្នងការដ្ឋាននគរបាលខេត្តព្រះសីហនុ ហើយសមត្ថកិច្ចកំពុងពិនិត្យមើលពាក្យបណ្ដឹងរបស់ស្ត្រីរងគ្រោះឲ្យបានត្រឹមត្រូវជាមុនសិន មុននឹងបញ្ជូនសំណុំរឿងនេះជូនតុលាការចាត់ការបន្តតាមនីតិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments