អាជ្ញាធរក្រុងប៉ោយប៉ែត ខេត្តបន្ទាយមានជ័យ និងអាជ្ញាធរស្រុកអារញ្ញ ខេត្តស្រះកែវ របស់ថៃ បានព្រមព្រៀងគ្នា នឹងដាក់កម្លាំងម្ខាង ១០០នាក់ ដើម្បីរួមគ្នាសំអាតបរិស្ថាននៅជុំវិញស្ពានមិត្តភាពកម្ពុជា-ថៃ ជាប់ព្រំដែនច្រកទ្វារអន្តរជាតិប៉ោយប៉ែត នៅព្រឹកថ្ងៃទី២៣ មីនា ខាងមុខ។
ពលរដ្ឋ និងអង្គការសង្គមស៊ីវិលនៅខេត្តបន្ទាយមានជ័យ ស្នើឲ្យអាជ្ញាធរក្រុងប៉ោយប៉ែតត្រូវអនុវត្តការងារនេះឲ្យបានហ្មត់ចត់ និងឲ្យបានជាប្រចាំ ហើយមិនត្រូវធ្វើការដើម្បីទាញយកប្រជាប្រិយភាពពីប្រជាពលរដ្ឋនៅមុនពេលបោះឆ្នោតខិតជិតចូលមកដល់នោះឡើយ។
មន្ត្រីអង្គការសង្គមស៊ីវិល និងពលរដ្ឋនៅក្រុងប៉ោយប៉ែតលើកឡើងថា នៅច្រកទ្វារព្រំដែនអន្តរជាតិប៉ោយប៉ែត ជាតំបន់ដែលមានអ្នកទេសចរណ៍ឆ្លងកាត់ច្រើន ប៉ុន្តែនៅក្រោមស្ពានច្រកព្រំដែនមួយនេះបែរជាពោរពេញទៅដោយគំនរសំរាម និងក្លិនស្អុយជាច្រើនឆ្នាំមកហើយ ដោយពុំមានអាជ្ញាធរណាដោះស្រាយបាននោះទេ។
ប្រជាពលរដ្ឋនៅក្រុងប៉ោយប៉ែតលោក ឆេង ប៊ុនហាក់ ឲ្យដឹងនៅថ្ងៃទី២១ មីនាថា លោកស្វាគមន៍នឹងគំនិតផ្ដួចផ្ដើមរួមគ្នាដោយអាជ្ញាធរក្រុងប៉ោយប៉ែត និងអាជ្ញាធរស្រុកអារញ្ញ ដែលគ្រោងដាក់កម្លាំងធ្វើយុទ្ធនាការបោសសំអាតបរិស្ថាននៅជុំវិញស្ពានច្រកទ្វារព្រំដែននៃប្រទេសទាំង២នេះ។ពលរដ្ឋរូបនេះអះអាងទៀតថា កន្លងមកអាជ្ញាធរប្រចាំក្រុងមួយនេះជាច្រើនជំនាន់មកហើយ គឺគ្មានសមត្ថភាពសំអាតបរិស្ថាននៅច្រកទ្វារព្រំដែនក្រុងនេះឲ្យបានប្រសើរនៅឡើយទេ៖ «ដោយសារតែមានការកែតម្រូវខ្លះទៅ ដើម្បីល្អទាំងអស់គ្នា ព្រោះពីមុនយើងឃើញហើយសំរាមក្លិនស្អុយខ្លាំងណាស់ ហើយអាជ្ញាធរមិនយកចិត្តទុកដាក់ទេ។ អាជ្ញាធរគួរតែដឹងខ្លួនហើយព្រោះប្រជាពលរដ្ឋក៏គេស្វែងយល់ដែរ។ ខ្ញុំសូមឲ្យអាជ្ញាធរបំពេញការងារឲ្យប្រជាពលរដ្ឋសប្បាយផង»។
អភិបាលក្រុងប៉ោយប៉ែត លោក សាន ស៊ានហូ មានប្រសាសន៍ថា អភិបាលស្រុកអារញ្ញរបស់ថៃបានព្រមព្រៀងគ្នាជាមួយលោក ដោយដាក់កម្លាំងសមត្ថកិច្ចរួមមានមន្ត្រីប៉ូលិសទាហាន និងមន្ត្រីរាជការស៊ីវិលប្រមាណម្ខាង១០០នាក់ ដើម្បីកាប់ឆ្ការព្រៃ និងបោសសំអាតបរិស្ថាននៅក្រោមស្ពានមិត្តភាពកម្ពុជា-ថៃ នៅច្រកទ្វារព្រំដែនក្រោយប៉ោយប៉ែតឲ្យបានស្អាត ដោយចាប់ផ្ដើមនៅម៉ោង៨កន្លះ ព្រឹកថ្ងៃទី២៣ មីនា៖ «ព្រោះយើងមើលឃើញថា បញ្ហាបរិស្ថានវាជារឿងអនាម័យជាចម្បង ហើយយើងធ្វើដើម្បីថែរក្សាឲ្យទឹកអូរឲ្យបានស្អាត សម្រាប់ប្រជាពលរដ្ឋនៅតាមព្រំដែនយកទៅប្រើប្រាស់បាន។ ម្យ៉ាងវិញទៀត តំបន់នេះជាច្រកអន្តរជាតិ បានភ្ញៀវបរទេសចេញចូលច្រើន ដូច្នេះហើយ ជាយើងឈានទៅដល់មានការកំណត់ប្រជុំកាលពីថ្ងៃទី២០ មីនា កន្លងទៅនោះ»។
លោក សាន ស៊ានហូ បន្ថែមទៀតថា អាជ្ញាធរកម្ពុជា-ថៃនឹងរួមគ្នាសំអាតបរិស្ថាននៅច្រកទ្វារព្រំដែននៃប្រទេសទាំង២ មួយខែម្ដងជាបន្តបន្ទាប់ទៅមុខទៀត។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា សាទរនឹងការសំអាតបរិស្ថានដោយអាជ្ញាធរនៃប្រទេសទាំងនេះ ប៉ុន្តែមន្ត្រីសង្គមស៊ីវិលរូបនេះទទូចឲ្យអាជ្ញាធរក្រុងប៉ោយប៉ែត ត្រូវអនុវត្តន៍ការងារនេះឲ្យបានហ្មត់ចត់ និងមិនត្រូវធ្វើគ្រាន់តែគ្រប់កិច្ចដើម្បីផ្ដិតយករូបភាពបង្ហោះតាមហ្វេសប៊ុក (Facebook) បង្អួតសាធារណជនយកស្នាដៃដូចអភិបាលក្រុងជំនាន់មុនៗទៀត៖ «ត្រូវធ្វើដោយមានយុទ្ធសាស្ត្រមានគំរូច្បាស់លាស់ឲ្យទីក្រុងនឹងស្អាតជានិច្ច មិនមែនស្អាតតែថ្ងៃដែលលោកអភិបាលខេត្តចុះទៅ ឬក៏ថ្ងៃដែលលោកធំណាចុះទៅស្អាតតែថ្ងៃនឹង ហើយក្រៅពីថ្ងៃនឹងគគ្រិចដដែលវាអត់ល្អ ព្រោះគួរតែខ្មាសប្រទេសគេជិតខាងផង ប្រទេសគេស្អាតបែរជាប្រទេសយើងមិនស្អាតនោះ»។
លោក ស៊ុំ ច័ន្ទគា បន្ថែមទៀតថា អាជ្ញាធរពាក់ព័ន្ធក៏ត្រូវណែនាំប្រជាពលរដ្ឋឲ្យយល់ដឹងពីការទុកដាក់សំរាមឲ្យបានត្រឹមត្រូវ ដើម្បីរួមចំណែកថែរក្សាបរិស្ថាននៅក្រុងប៉ោយប៉ែត ឲ្យបានស្អាតដូចប្រទេសជិតខាង ព្រោះទីក្រុងជាប់ព្រំដែនមួយនេះ សព្វថ្ងៃពោរពេញទៅដោយក្លិនស្អុយគំនរសំរាម និងមានលំអងធូលីដីច្រើន ហើយបញ្ហានេះបានប៉ះពាល់យ៉ាងខ្លាំង ដល់មុខមាត់របស់ប្រទេសនៅលើឆាកអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments