អនុប្រធានគណបក្សឆន្ទៈខ្មែរ លោក សុន ឆ័យ ស្នើឱ្យអាជ្ញាធរជាតិអប្សរាបំភ្លឺ ករណីមានរថយន្ត និងគ្រឿងចក្រ កាយដីទ្រង់ទ្រាយធំ ចេញពីស្រះទឹកបុរាណមួយនៅជាប់នឹងប្រាសាទបាយ័ន ក្នុងខេត្តសៀមរាប ដោយមិនឃើញមានអ្នកជំនាញបុរាណវិទ្យាតាមដានពីការធ្វើកំណាយ ស្របតាមគន្លងបច្ចេកទេសឱ្យបានត្រឹមត្រូវក្នុងតំបន់បុរាណឋាននេះទេ។
លោក សុន ឆ័យ បារម្ភថា ប្រសិនបើសកម្មភាពកាយដីចេញពីស្រះបុរាណជាប់នឹងប្រាសាទបាយ័ន ធ្វើខុសបច្ចេកទេសនឹងបង្កឱ្យបែកបាក់ផ្នែកខ្លះនៃថ្មប្រាសាទ ប៉ះពាល់ដល់ប្រាង្គប្រាសាទបាយ័ន។ រីឯអាចម៍ដីដែលកាយដោយគ្រឿងចក្រប្រភេទអេស្កាវទ័រ (Excavator)ទ្រង់ទ្រាយធំបែបនេះ អាចនឹងនាំយកវត្ថុបុរាណទៅជាមួយរថយន្តដឹកដី។
អនុប្រធានគណបក្សឆន្ទៈខ្មែរ លោក សុន ឆ័យ ប្រាប់វិទ្យុអាស៊ីសេរី នៅថ្ងៃទី៦ ឧសភាថា លោកប្រទះឃើញ សកម្មភាពកាយដីចេញពីស្រះបុរាណនេះ ធ្វើឡើងកាលពីចុងសប្ដាហ៍មុន ដោយមិនឃើញមានអ្នកជំនាញបុរាណវិទ្យាតាមដាន និងពិនិត្យសកម្មភាពកាយនេះទេ។
លោកយល់ថា ទង្វើនេះធ្វើឡើងមិនត្រឹមត្រូវបានលក្ខណៈបច្ចេកទេសនោះទេ ហើយលោកនឹងពិគ្រោះយោបល់ជាមួយសមាជិកព្រឹទ្ធសភានៃគណបក្សឆន្ទៈ ដើម្បីសរសេរលិខិតដាក់ជូនក្រសួងវប្បធម៌ ឱ្យឆ្លើយបំភ្លឺ ជុំវិញរឿងនេះ។
លោក សុន ឆ័យ៖ «ឡានដឹកដូចយើងជីកស្រះនៅស្រែធម្មតា កាយដាក់ៗ ឡានបរឡើងមក មិនដឹងជាន់បែកថ្មអីខ្លះ? ឡានដឹកមិនដឹងចាក់ចោលនៅណា? ពេលកាយដូចអត់មានមនុស្សតាមមើលកំណាយហ្នឹងទេ ជូនកាលកាយប៉ះថ្មប្រាសាទ ក៏គ្មាននរណាតាមមើលដែរ អេស្កាវ៉ាទ័រ (Excavator) ចេះតែកាយ ដាក់ឡានដឹកចេញទៅ»។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះ ពីប្រធានក្រុមអ្នកនាំពាក្យក្រសួងវប្បធម៌លោក ស៊ុំ ម៉ាប់ បាននៅឡើយទេ នៅថ្ងៃទី៦ ឧសភា។
រីឯអ្នកនាំពាក្យអាជ្ញាធរជាតិអប្សរាលោក ឡុង កុសល ក៏មិនទាន់អាចទាក់ទងបានដែរ នៅថ្ងៃដដែលនេះ ដោយសារទូរស័ព្ទហៅចូល តែគ្មានអ្នកលើក។
កាលពីពេលកន្លងទៅ អ្នកជំនាញបុរាណវិទ្យានៃអាជ្ញាធរជាតិអប្សរា បានសិក្សាពីការធ្វើកំណាយ ដើម្បីជួសជុលរចនាសម្ព័ន្ធកសិណទឹកនៅផ្នែកខាងកើត និងផ្នែកខាងជើងនៃប្រាសាទបាយ័ន ដើម្បីឱ្យកសិណទឹកនៅព័ទ្ធជុំវិញប្រាសាទនេះត្រឡប់មកសភាពដើមវិញ ក្រោយពីកសិណក្នុងតំបន់នោះ គោករាក់ដោយអន្លើ មានដី និងថ្មលុបទម្រង់ដើមអស់រាប់រយឆ្នាំ។
ការធ្វើកំណាយនេះ មានការចូលពី អង្គការយូណេស្កូ (UNESCO) និងសមាជិកគណៈកម្មាធិការសម្របសម្រួលអន្តរជាតិហៅកាត់ថា ICC-Angkor (International Coordinating Committee-Angkor) ក្រោមជំនួយឧបត្ថម្ភពីរដ្ឋាភិបាលជប៉ុន។
អ្នកជំនាញបុរាណវិទ្យាម្នាក់ថ្លែងសុំមិនបញ្ចេញឈ្មោះ និងសំឡេង ព្រោះបារម្ភពីសុវត្ថិភាពពន្យល់ថា នៅគ្រាដែលកសិណទឹកជុំវិញប្រាសាទបាយ័នលុបបាត់ នឹងគំរាមកំហែងខ្លាំងដល់គ្រឹះប្រាសាទ នឹងធ្វើឱ្យប្រាសាទបាយ័នទ្រុឌទ្រោមកាន់តែខ្លាំង ព្រោះប្រាសាទនេះត្រូវមានទឹកព័ទ្ធជុំវិញ ដើម្បីឱ្យខ្សាច់គ្រឹះប្រាសាទហាប់ណែន រក្សាលំនឹងប្រាសាទបានយូរ។
ប្រការនេះហើយក្រុមអ្នកស្រាវជ្រាវបុរាណវិទ្យា បង្ខំចិត្តប្រើគ្រឿងចក្រកាយយកដីចេញពីស្រះបុរាណនេះ ព្រោះអាចម៍ដីក្នុងកសិណប៉ែកខាងជើង និងខាងកើតរឹងមានទម្ងន់ជាច្រើនតោនពិបាកកាយចេញ ដោយកម្លាំងមនុស្ស។ លោកបញ្ជាក់ថា សកម្មភាពកាយស្រះបុរាណនេះ ធ្វើឡើងតែបាតស្រះប៉ុណ្ណោះ ដោយមានអ្នកជំនាញបច្ចេកទេសតាមដាន និងពិនិត្យយ៉ាងប្រុងប្រយ័ត្ន។
ប្រាសាទបាយ័នស្ថិតនៅចំកណ្ដាលនៃរាជធានីអង្គរធំ ក្នុងតំបន់អង្គរខេត្តសៀមរាប កសាងនៅចុងសតវត្សរ៍ទី១២ និងទី ១៣ ដោយព្រះបាទជ័យវរ្ម័នទី៧។ ប្រាសាទនេះមានមានរូបចម្លាក់ព្រហ្មមុខបួន ៤៩កំពូល ហើយមកទល់ពេលនេះ រូបចម្លាក់ព្រហ្មមួយចំនួនបែកបាក់ និងផ្នែកខ្លះនៃតួប្រសាទបាក់ទ្រុឌទ្រោមខ្លាំង ធ្វើឱ្យផ្ទាំងថ្មជាច្រើនធ្លាក់រាយប៉ាយពេញដីគរលើគ្នាជុំវិញតំបន់នោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments