ក្រុមពលករភាគច្រើនជាស្ត្រីដែលមួយចំនួនកំពុងរងការបង្ខាំងនៅប្រទេស អារ៉ាប៊ី សាអូឌីត (Saudi Arabia) កំពុងធ្លាក់ខ្លួនឈឺក្រោកលែងរួច និងខ្លះទៀតមានសភាពស្គមស្លេកស្លាំងជាបន្តបន្ទាប់ ដោយសារតែគ្មានទឹកផឹក និងអាហារហូបគ្រប់គ្រាន់។ ក្រុមពលករ និងមន្ត្រីសហជីព នៅតែបន្តទាមទារយ៉ាងទទូចឱ្យស្ថានទូតខ្មែរ និងរដ្ឋាភិបាលពន្លឿនការចាត់ចែងសំបុត្រយន្តហោះក្នុងការបញ្ជូនពលករមកខ្មែរវិញឱ្យបានឆាប់ ដើម្បីសុវត្ថិភាព និងអាយុជីវិតពួកគាត់។
ក្រុមពលករខ្មែរចំនួន ៣៥នាក់បន្ថែមនាក់ទៀតដែលថៅកែនៅប្រទេសអារ៉ាបបង្ខាំងបង្អត់អាហារ ត្រូវបានស្ថានទូតខ្មែរបានរកឃើញ និងបានជម្លៀសពួកគាត់មកស្នាក់នៅសណ្ឋាគារ (Hotel) បណ្ដោះអាសន្ន។ ក្រុមពលករបញ្ជាក់ថា នៅមានពលករជាច្រើននាក់ទៀតកំពុងជាប់ឃុំឃាំងក្នុងផ្ទះថៅកែ និងធ្លាក់ខ្លួនឈឺដោយសារតែគ្មានអាហារហូបចុកគ្រប់គ្រាន់។
ពលករកំពុងបម្រើការងារតាមផ្ទះនៅប្រទេសអារ៉ាបគឺលោកស្រី យ៉េ ធឿន ប្រាប់វិទ្យុអាស៊ីសេរីនៅថ្ងៃទី២៧ ខែមេសា លោកស្រី ដឿន ភាព ដែលត្រូវបានថៅកែបង្ខាំងក្នុងបន្ទប់ទាំងជាមួយលោកស្រីនាពេលនេះកំពុងឈឺធ្ងន់ និងជាប់សរសៃចង្កេះងើបលែងរួចហើយ។ ចំណែក លោកស្រីនៅតែវិលមុខខ្លាំង ព្រោះតែគ្មានទឹកផឹក និងអាហារហូបគ្រប់គ្រាន់ទេក្នុងរយៈពេលជិត មួយសប្ដាហ៍មកនេះ។
លោកស្រីបញ្ជាក់ថា ចំណែកស្ថានទូតខ្មែរប្រចាំប្រទេសអារ៉ាបនៅតែប្រាប់ឱ្យពួកលោកស្រីរង់ចាំពីមួយថ្ងៃទៅមួយថ្ងៃ ទាំងស្ថានភាពឈឺកាន់តែទ្រុឌទ្រោមខ្លាំង និងពិបាកទ្រាំក្នុងខ្លួន។
លោកស្រី យ៉េ ធឿន៖ «ពូស្ថានទូតគាត់និយាយជាមួយខ្ញុំច្បាស់លាស់ហើយ គាត់ថា នឹងមកយកខ្ញុំព្យាបាលហើយ នឹងបញ្ជូនខ្ញុំទៅខ្មែរវិញ គាត់ទើបខលមកខ្ញុំដែរថា គាត់នឹងព្យាយាមមកឱ្យលឿនបំផុត តែខ្ញុំអត់ស្រាកស្រាន្តទេ គាត់ [លោកស្រី ដឿន ភាព] កាន់តែឈឺ ហើយខ្ញុំកាន់តែទ្រុឌទ្រោម ដូចថា ខ្ញុំឈឺទាំង ២នាក់ ហើយនៅតែមួយកន្លែងវាពិបាកត្រង់ហ្នឹង»។
ចំណែក ពលករម្នាក់ទៀតគឺលោកស្រី ផល ចំរើន ឱ្យវិទ្យុអាស៊ីសេរីដឹងដែរថា ស្ថានទូតបានជម្លៀសលោកស្រីពីកន្លែងឃុំឃាំងមកស្នាក់នៅក្នុង អូតែលជាមួយក្រុមពលករចំនួន ៣៤នាក់ហើយ ប៉ុន្តែលោកស្រីបញ្ជាក់ថា គ្មានអាហារហូបចុកគ្រប់គ្រាន់ និងមិនដឹងថា ថ្ងៃណាស្ថានទូតរៀបចំនីតិវិធី ដើម្បីបានត្រឡប់ទៅខ្មែរវិញទេ។ លោកស្រីបានរៀបរាប់ពីការឈឺចាប់ពេលជាប់ឃុំឃាំងគឺត្រូវបានថៅកែវាយធ្វើបានចាក់សោកក្នុងបន្ទប់ចំនួន ៥ជាន់ បង្អត់អាហារ និងផឹកតែទឹកក្នុងបន្ទប់អស់រយៈពេលជាង ១ខែ។
លោកស្រី ផល ចំរើន៖ «ពេលខ្លះគេឱ្យបាយផ្អូមមកហូប ប៉ុន្តែទឹកគេអត់មានឱ្យយើងហូបទេ គេឱ្យយើងហូបទឹក ឡាបូលាងដៃ តែបើបាយផ្អូមញាំរាល់ថ្ងៃហ្មង គេអត់មានបាយល្អឱ្យយើងហូបទេ។ ពេលខ្លះគេអត់ឱ្យបាយយើងហូបតែម្ដង អាហ្នឹងគេឃុំខ្ញុំទេ ២នាក់មិនមែនក្នុងចំណោម ២៩នាក់ ឬ ៣០នាក់អត់មានទេ។ ធម្មតាយើងមកធ្វើការចង់បានលុយ ចង់បានប្រាក់ខែតែនេះចូល ២ទៅ ៣ខែគេអត់ទាន់បើកឱ្យយើងទេ ពេលអ៊ីចឹងខ្ញុំតវ៉ារឿងប្រាក់ខែ វាអត់បើកឱ្យវាចាប់ពួកខ្ញុំយកទៅឃុំ»។
វិទ្យុអាស៊ីសេរីមិនទាន់អាចទាក់ទងឯកអគ្គរាជទូតកម្ពុជាប្រចាំប្រទេស អារ៉ាប៊ី សាអូឌីត លោក អ៊ុក សារុន ដើម្បីសាកសួរជុំវិញបញ្ហានេះបាននៅថ្ងៃទី២៧ ខែមេសា។
ក្រុមពលករអះអាងថា មានពលករជាង ១០០នាក់បានដាក់ពាក្យមកធ្វើការនៅក្នុង ប្រទេស អារ៉ាប៊ី សាអូឌីត តាមរយៈក្រុមហ៊ុន ហ្វាទីម៉ា មេនផៅវើ (Fatina Manpower Co., Ltd)។ មុនពេលពលករដាក់ពាក្យមកធ្វើការនៅប្រទេសអារ៉ាប ក្រុមហ៊ុនមួយនេះបញ្ជាក់ថា ជាប្រភេទការងារផ្នែកអនាម័យ បានចំណូល ៤០០ដុល្លារក្នុងមួយខែ និងធ្វើការតែ៨ម៉ោងប៉ុណ្ណោះក្នុងមួយថ្ងៃ។ ប៉ុន្តែក្រុមពលករចាប់ផ្ដើមចេញទាមទាររកកិច្ចអន្តរាគមន៍តាមបណ្ដាញសង្គមកាលពីថ្ងៃទី១៨ ខែមេសា ដោយសារតែពួកគាត់មិនអាចទ្រាំទ្រនឹងការងារ ព្រោះថៅកែបង្ខំឱ្យពលករខ្មែរជាស្ត្រីធ្វើការច្រើនម៉ោង ដោយអ្នកខ្លះ ១៨ម៉ោង និងអ្នកខ្លះទៀតរហូត ២២ម៉ោងក្នុងមួយថ្ងៃ។
ប្រធានសហភាពការងារកម្ពុជាលោក អាត់ ធន់ ប្រាប់វិទ្យុអាស៊ីសេរីថា រដ្ឋាភិបាលមានតួនាទីក្នុងការជួយរកការងារជូនពលរដ្ឋ និងធានាអំពីសិទ្ធសុវត្ថិភាពជូនពលករដែលចំណាកស្រុកទៅធ្វើការនៅក្រៅប្រទេស។ ប៉ុន្តែលោកថា ក្រុមពលករ នៅប្រទេសអារ៉ាបរងការរំលោភបំពានសិទ្ធិជាច្រើន និងទាមទារឱ្យរដ្ឋាភិបាល និងក្រសួងការងារចាត់វិធានការជួយសង្គ្រោះពួកគេ។
លោក អាត់ ធន់៖ «ការងារក្រៅស្រុកក៏ដោយរដ្ឋក៏ត្រូវមានកាតព្វកិច្ចក្នុងការការពារប្រជាពលរដ្ឋរបស់ខ្លួននៅក្រៅដែរ។ ករណីនៅអារ៉ាបរួមនេះ តាមខ្ញុំមើលវាជាបញ្ហាមួយដែលកម្មករទៅតាមរយៈក្រុមហ៊ុនហើយ មានបញ្ហាច្រើនដូចជាអត់ឱ្យបាយទឹក ឬសិទ្ធអីហ្នឹងបានល្អទៅតាមច្បាប់ ហើយមានបញ្ហាច្រើនដូចអ្វីដែលពួកគេត្អូញត្អែរ។ ឥឡូវយើងដឹងថា ខាងក្រសួង និងជាមួយក្រុមហ៊ុនកំពុងធ្វើការងារហ្នឹង មិនដឹងថា វាបានមកតាមអ្វីដែរពួកគេចង់បាន ឬយ៉ាងណា យើងកំពុងតែតាមដាន»។
ក្រុមពលករចាញ់បោកមេខ្យល់ទៅធ្វើការនៅប្រទេសអារ៉ាប នៅតែមានអារម្មណ៍ភ័យខ្លាច និងបារម្ភពីបញ្ហាសុវត្ថិភាពដល់អាយុជីវិត បើទោះបីជា ពលករខ្លះត្រូវបានជម្លៀសចេញពីកន្លែងបង្ខាំងក៏ដោយដរាបណាពួកគេមិនទាន់ដល់កម្ពុជាវិញ។ ក្រុមពលករ និងមន្ត្រីសហជីព ទាមទារដល់ស្ថានទូតបន្តស្វែងរកពលករផ្សេងទៀតដែលបាត់ខ្លួន និងរងការបង្ខាំងពីសំណាក់ថៅកែ និងពន្លឿននីតិវិធីបញ្ជូនពលករខ្មែរមកកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments