ក្រុមពលករដែលចាញ់បោកក្រុមហ៊ុន ហ្វាទីណា មេនផៅវើរ៍ (Fatina Manpower Co., Ltd.) អះអាងថា មន្ត្រីជាន់ខ្ពស់ក្រសួងការងារនៃប្រទេស អារ៉ាប៊ី សាអូឌីត (Saudi Arabia) គ្រោងជួបប្រជុំជាមួយក្រុមពលករ ដើម្បីឱ្យនិយាយរៀបរាប់ពីបញ្ហាដែលពួកគេរងការកេងប្រវ័ញ្ចកម្លាំងពលកម្ម និងជួយពន្លឿននីតិវិធីបញ្ជូនក្រុមពលករមកកម្ពុជាវិញ។
ក្រុមពលករអះអាងថា ពលករចំនួន ៣៩នាក់ ដែលស្នាក់នៅផ្ទះជួល កាលពីថ្ងៃទី៥ ខែឧសភា បាននាំគ្នាស្រែកតវ៉ាទាមទារ ស្នើឱ្យមន្ត្រីនៃប្រទេសអារ៉ាប៊ី សាអូឌីត ជួយអន្តរាគមន៍ពួកគេ ព្រោះភាគីក្រសួងការងារ និងស្ថានទូតយឺតយ៉ាវបញ្ជូនពួកគេមកកម្ពុជាវិញ និងនៅតែប្រាប់ឱ្យក្រុមពលកររង់ចាំពីមួយថ្ងៃទៅមួយថ្ងៃ។
ពលករបញ្ជាក់ថា មន្ត្រីក្រសួងការងារនៃប្រទេស អារ៉ាប៊ី សាអូឌីត បានដឹងពីបញ្ហារបស់ក្រុមពលករ និងគ្រោងជួបប្រជុំគ្នា ដើម្បីផ្ដល់ឱកាសឱ្យពលករខ្មែររៀបរាប់ពីការណ៍ដែលក្រុមហ៊ុន និងថៅកែធ្វើបាបអំឡុងពេលធ្វើការងារ។ ក្រុមពលកររំពឹងថា ក្រោយបានជួបមន្ត្រីនៃក្រសួងការងារប្រទេស អារ៉ាប៊ី សាអូឌីត ពួកគេអាចនឹងត្រឡប់មកកម្ពុជាវិញឆាប់ៗ នេះ។
ពលករ៖ «តវ៉ាបានលិខិតឆ្លងដែនឱ្យយើងកាន់រៀងៗ ខ្លួន រង់ចាំតែថ្ងៃតទល់ជាមួយក្រុមហ៊ុនគេ ដើម្បីទាមទារប្រាក់ខែ ដែលគាត់ធ្វើបាប ហើយនឹងបិទវីសា (VISA) ឱ្យត្រឡប់ទៅខ្មែរ។ ខាងក្រសួង អារ៉ាប៊ី សាអូឌីត គេនិយាយអ៊ីចឹង។ គាត់និយាយថា នឹងការពារប្រជាជនខ្មែរ នឹងការពារឱ្យបានត្រឡប់ទៅខ្មែរវិញ បាច់បារម្ភទេ គេធ្វើបាបម៉េច អត់បើកលុយពីមុនមកម៉េច គេសន្យាថា នឹងទាមទារឱ្យវិញ ហើយគេសន្យាថា គេនឹងជួយនៅខាងខ្មែរ គេអត់កាន់ជើងនៅខាងអារ៉ាប់គេទេ ដោយសារពលករពួកខ្ញុំសុទ្ធតែស្រី»។
ពាក់ព័ន្ធនឹងការបញ្ជូនក្រុមពលករមកកម្ពុជាវិញយឺតយ៉ាវនេះ ក្រុមពលករឱ្យដឹងថា ដោយសារក្រុមហ៊ុន ហ្វាទីណា មេនផៅវើ (Fatina Manpower Co., Ltd) បានលក់ពលករខ្មែរទៅក្រុមហ៊ុនដៃគូសហការក្នុងប្រទេសអារ៉ាប៊ី សាអូឌីតក្នុងតម្លៃខ្ពស់ ទើបក្រុមហ៊ុននៅប្រទេសនេះខ្លាចខាតបង់ និងព្យាយាមមិនឱ្យក្រុមពលករខ្លះវិលត្រឡប់មកកម្ពុជា។
ពលករកំពុងធ្លាក់ខ្លួនឈឺ និងកំពុងបម្រើការងារតាមផ្ទះ គឺលោកស្រី យ៉េ ធឿន រៀបរាប់ប្រាប់វិទ្យុអាស៊ីសេរីទាំងទឹកភ្នែកថា កាលពីខែមេសា លោកស្រីធ្វើការងារបានជាង ២០ថ្ងៃតែប៉ុណ្ណោះ ប៉ុន្តែ មកទល់ពេលនេះ ថៅកែពុំបានបើកលុយឱ្យទេ។ លោកស្រីឱ្យដឹងថា កុងត្រា បម្រើការងារក្នុងប្រទេសអារ៉ាប៊ី សាអូឌីតកំណត់តែ ៣ខែប៉ុណ្ណោះ គឺអាចត្រឡប់មកកម្ពុជាវិញ ប៉ុន្តែ ក្រុមហ៊ុនក្នុងប្រទេសអារ៉ាប់ប៊ី សាអូឌីតប្រាប់ថា លោកស្រីត្រូវធ្វើការរហូតដល់ ២ឆ្នាំបន្ថែមទៀត។ លោកស្រីបញ្ជាក់ថា មកទល់ពេលនេះ ស្ថានភាពសុខភាពលោកស្រីកាន់តែទ្រុឌទ្រោម ហើយថៅកែប្រាប់ថា បើគ្មានលុយ គឺឱ្យលោកស្រីបន្តដេកឈឺនៅក្នុងបន្ទប់។
លោកស្រី យ៉េ ធឿន៖ «គាត់ [ថៅកែ] និយាយភាសាអារ៉ាប់ថា ច្រើនតែខ្ញុំអត់ដឹងថា លុយប៉ុន្មានទេ ដឹងថា ច្រើនណាស់ ដូច្នេះគាត់មិនអាចបញ្ជូនខ្ញុំមកកម្ពុជាបានទេ។ បើគាត់ចង់ឱ្យខ្ញុំទៅ [កម្ពុជា] គឺគាត់ [ថៅកែ] ត្រូវតែទាមទារលុយខ្ញុំ ១ពាន់ ៥រយដុល្លារ (១.៥០០ដុល្លារ)។ ខ្ញុំមានលុយឯណា? បើខ្ញុំមានលុយខ្ញុំទៅកម្ពុជាវិញតាំងពីខ្ញុំមកបាន ៤ខែ។ ខ្ញុំមានតែទ្រាំដេកយំ ខ្ញុំអស់សង្ឃឹម ខ្ញុំរត់ទៅផ្លូវណាក៏អត់ចេញដែរ ខ្ញុំនៅអង្គុយអស់សង្ឃឹម។ ខ្ញុំមិនធ្វើម៉េច? រកផ្លូវទៅណាក៏មិនរួច»។
ទាក់ទងនឹងរឿងនេះ ឯកអគ្គរាជទូតកម្ពុជាប្រចាំប្រទេស អារ៉ាប៊ី សាអូឌីត លោក អ៊ុក សារុន នៅតែប្រាប់ឱ្យក្រុមពលកររង់ចាំដំណោះស្រាយពីមួយថ្ងៃទៅមួយថ្ងៃ និងព្រមានដល់ក្រុមពលកររក្សាភាពស្ងៀមស្ងាត់ កុំបញ្ចេញព័ត៌មាននានា ទៅក្រៅ ក្នុងអំឡុងពេលភាគីពាក់ព័ន្ធសម្របសម្រួល និងដោះស្រាយ។
វិទ្យុអាស៊ីសេរីមិនអាចទាក់ទង លោក អ៊ុក សារុន និងអ្នកនាំពាក្យក្រសួងការងារ លោក កត្តា អ៊ន ដើម្បីសាកសួរជុំវិញរឿងនេះបន្ថែមបានទេ នៅថ្ងៃទី៦ ខែឧសភា។
អំឡុងពេលក្រុមពលករកំពុងជាប់ក្នុងប្រទេសអារ៉ាប៊ី សាអូឌីត ហើយពលករខ្លះ មិនត្រូវបានថៅកែបើកប្រាក់ខែឱ្យផងនោះ ពលករមួយចំនួន ដែលជំពាក់បំណុលធនាគារនៅកម្ពុជា ពួកគេបានសុំពន្យារពេលម្ចាស់បំណុលជាបន្តបន្ទាប់ ប៉ុន្តែភាគីខាងមន្ត្រីធនាគារនៅតែរឹបអូសទ្រព្យសម្បត្តិរបស់ពួកគេ។
ពលករកំពុងជាប់ក្នុងប្រទេសអារ៉ាប៊ី សាអូឌីត លោកស្រី ជឹម សារ៉ន ឱ្យដឹងថា លោកស្រីគ្មានលុយបង់ធនាគារជាង ៣ខែមកនេះ ដោយសារតែថៅកែពុំបានបើកប្រាក់ខែឱ្យលោកស្រី ដែលធ្វើឱ្យគ្រឹះស្ថានមីក្រូហិរញ្ញវត្ថុអម្រឹតនៅកម្ពុជារឹបអូសយកម៉ូតូលោកស្រី។ ទោះជាយ៉ាងណាក្ដី លោកស្រីបញ្ជាក់ថា លោកស្រីបានពឹងសាច់ញាតិនៅកម្ពុជាឱ្យខ្ចីលុយគេបង់ធនាគារ ដើម្បីយកម៉ូតូមកវិញហើយ កាលពីល្ងាចថ្ងៃទី៦ ខែឧសភា។ លោកស្រីនិយាយថា បើស្ថានទូត និងក្រសួងការងារ នៅតែយឺតយ៉ាវក្នុងការបញ្ជូនលោកស្រីត្រឡប់ទៅកម្ពុជា លោកស្រីអាចប្រឈមជំងឺបញ្ហាផ្លូវចិត្ត។
លោកស្រី ជឹម សារ៉ន៖ «វាហួសចិត្តនឹងនិយាយណាមួយទៅយើងបាក់ទឹកចិត្ត គ្រប់យ៉ាងទាំងអស់មកធ្វើការចង់បានលុយផ្ញើទៅគ្រួសារបង់ធនាគារ ឱ្យកូនចាយ ម៉ែឪចាយ ពេលមកជួបបញ្ហាមុខក្រោយថៅកែគេមិនបើកលុយឱ្យ បាយទឹកហូបមិនគ្រប់គ្រាន់ នៅផ្ទះថៅកែឃុំឃាំងបង្អត់បាយទឹក។ បើយើងមិនធ្វើការឱ្យគេ គំរាមយើងរហូត មកដល់ក្រុមហ៊ុនក៏អ៊ីចឹង បញ្ហាជំពាក់នៅផ្ទះថៅកែផង មកក្រុមហ៊ុនជំពាក់នៅក្រុមហ៊ុនទៀត»។
របាយការណ៍របស់ការិយាល័យក្រសួងការងារឱ្យដឹងថា មានពលករ ១៣៣នាក់ បានទៅធ្វើការងារនៅប្រទេសអារ៉ាប៊ី សាអូឌីត។ ក្រសួងទទួលស្គាល់ថា ក្រុមពលករទាំងនោះ មានពលករខ្លះ ធ្វើការហួសម៉ោង និងកម្លាំង ប្រឈមបញ្ហាសុខភាព និងគ្មានសិទ្ធសេរីភាពជាដើម។ ចាប់តាំងពីពាក់កណ្ដាលខែមីនា រហូតមកដល់ពេលនេះ ក្រសួងការងារអះអាងថា មានពលករចំនួន ២៨នាក់ត្រូវបានជួយអន្តរាគមន៍វិលត្រឡប់មកកម្ពុជាវិញ។
ទោះជាយ៉ាងណាក្ដី ក្រុមមន្ត្រីសិទ្ធិមនុស្ស និងក្រុមពលករនៅតែទទូចដល់ក្រសួងការងារ និងភាគីពាក់ព័ន្ធឱ្យជួយធ្វើអន្តរាគមន៍ស្វែងរកក្រុមពលករផ្សេងទៀត ដែលរងការកេងប្រវ័ញ្ចកម្លាំងពលករ រំលោភសិទ្ធិពលករ ពីសំណាក់ក្រុមហ៊ុន និងថៅកែ ដើម្បីបញ្ជូនពួកគាត់មកកម្ពុជាវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments