របបក្រុងភ្នំពេញចាប់ខ្លួនសកម្មជនគណបក្សសង្គ្រោះជាតិ ២នាក់ និងពលរដ្ឋម្នាក់ទៀត នៅខេត្តកំពង់ស្ពឺ នៅព្រឹកថ្ងៃទី៩ តុលា ពាក់ព័ន្ធនឹងបទចោទធ្វើឱ្យបាត់ជំនឿលើសេចក្ដីសម្រេចរបស់តុលាការ និងបទញុះញង់។ ការចាប់ខ្លួននេះ គឺនៅស្របពេលដែលថ្ងៃកំណត់វិលចូលស្រុកវិញរបស់មេបក្សប្រឆាំងលោក សម រង្ស៊ី កាន់តែខិតជិតចូលមកដល់។ អ្នកវិភាគយល់ថា នេះជាចំណាត់ការបង្ក្រាបលើសមាជិកបក្សប្រឆាំង ជាងការអនុវត្តច្បាប់។
សកម្មជនបក្សប្រឆាំង ២នាក់ដែលត្រូវបានចាប់ខ្លួននោះ គឺជាសមាជិកប្រតិបត្តិគណបក្សសង្គ្រោះជាតិស្រុកបរសេដ្ឋ លោក ពុយ តាក់ អាយុ ៣៧ឆ្នាំ និងម្នាក់ទៀត ឈ្មោះ អ៊ុំ យ៉ុន អាយុ ៦១ឆ្នាំ។ អ្នកទាំងពីរត្រូវបានចៅក្រមស៊ើបសួរតុលាការខេត្តកំពង់ស្ពឺ លោក ទី សំណាង ចេញដីកាចាប់ខ្លួនកាលពីថ្ងៃទី៨ ដើម្បីយកមកសាកសួរយកព័ត៌មានទាក់ទងនឹងបទចោទ ២ករណី គឺបទធ្វើឱ្យបាត់ជំនឿលើការសម្រេចរបស់តុលាការ និងបទញុះញង់ឱ្យប្រព្រឹត្តិបទឧក្រិដ្ឋជាអាទិ៍។
ចំណែកពលរដ្ឋម្នាក់ទៀត គឺជាប្អូនប្រុសបង្កើតរបស់ លោក ពុយ តាក់ ឈ្មោះ ហ៊ុន ទីន អាយុជាង៣០ឆ្នាំ ត្រូវសមត្ថកិច្ចចាប់ខ្លួនដែរ ពីបទរារាំងសមត្ថកិច្ច ក្នុងការអនុវត្តសាលដីកាតុលាការ។
ភរិយារបស់ លោក ពុយ តាក់ គឺលោកស្រី ស ស្រីអូន ប្រាប់ថា ស្វាមីលោកស្រី ត្រូវបានសមត្ថកិច្ចចាប់ខ្លួន នៅព្រឹកថ្ងៃទី០៩ តុលា នៅពេលកំពុងដឹកសាច់ជ្រូក និងមាន់ តាមម៉ូតូ យកទៅលក់នៅផ្សារស្លាបលែង ស្ថិតនៅភូមិស្លាបលែង ឃុំស្វាយរំពា។ លោកស្រីរៀបរាប់ទៀតថា នៅពេលសមត្ថកិច្ចចូលទៅចាប់ខ្លួន លោក ពុយ តាក់ ប្អូនប្រុសបង្កើតម្នាក់របស់ លោក ពុយ តាក់ ឈ្មោះ ហ៊ុន ទីន ជាអ្នកលក់ទឹកកកនៅម្ដុំផ្សារស្លាបលែង បានទៅជួយបងប្រុស ហើយត្រូវប៉ូលិសចាប់ខ្លួន ទាំង២នាក់។ អ្នកទាំង២ ត្រូវបានបញ្ជូនទៅស្នងការនគរបាលខេត្តកំពង់ស្ពឺ៖ «និយាយអត់ដឹងអ្វីហ្មង អត់ដឹងខ្លួន គេមកចាប់យកតែម្ដង។ គេអត់មានឱ្យដំណឹងយើង ឱ្យអ្វី អត់មានសោះ។ ពេលគាត់ដឹកសាច់ជ្រូក ដាក់លើគ្រែហើយ គាត់ត្រលប់មកផ្ទះជិតផ្សារហ្នឹងដែរ។ គាត់មកយកសាច់ជ្រូក ដូចថា សាច់ជ្រូកដែលយើងលក់សល់តិចតួចយើងក្លាស្សេអ៊ីចឹងណា។ អ៊ីចឹងគាត់មកយក មកយកនៅផ្ទះចាស់អ៊ីចឹងទៅណា មិនទាន់បានយកផង គេមកចាប់តែម្ដង»។
ចំណែកសកម្មជនបក្សប្រឆាំងម្នាក់ទៀត គឺ លោក អ៊ុំ យ៉ុន អាយុ៦១ឆ្នាំ ក៏ត្រូវបានសមត្ថកិច្ចចាប់ខ្លួន នៅព្រឹកថ្ងៃទី៩ តុលា ដែរ។
អាស៊ីសេរី បានទូរស័ព្ទច្រើនដង ទៅស្នងការនគរបាលខេត្តកំពង់ស្ពឺ លោក សម សាមួន អ្នកនាំពាក្យតំណាងអយ្យការអមសាលាដំបូងខេត្តកំពង់ស្ពឺ លោក អ៊ូ ផាត និងអ្នកនាំពាក្យសាលាដំបូងខេត្តកំពង់ស្ពឺ លោក សីន វីរៈ ដើម្បីសួរព័ត៌មានពីការចាប់ខ្លួនពលរដ្ឋនេះ នៅថ្ងៃទី៩ តុលា តែទូរស័ព្ទរោទ៍គ្មានអ្នកទទួល។
ពាក់ព័ន្ធនឹងយុទ្ធនាការចាប់ខ្លួនសកម្មជនបក្សប្រឆាំងរាល់ថ្ងៃនេះ អ្នកវិភាគ យល់ថា សកម្មជនរបស់គណបក្សប្រឆាំង កំពុងស្ថិតក្នុងស្ថានភាពរងគ្រោះ ហើយការចោទប្រកាន់ និងចាប់ខ្លួនពួកគេ គឺជាការបំបាក់ស្មារតីផ្នែកនយោបាយ ជាជាងការអនុវត្តច្បាប់។
ប្រធានក្រុមអ្នកវិភាគវ័យក្មេង កញ្ញា លី ស្រីស្រស់ យល់ថា ការចោទសកម្មជនបក្សប្រឆាំងខេត្តកំពង់ស្ពឺ២នាក់ ពីបទធ្វើឱ្យបាត់ជំនឿលើសេចក្ដីសម្រេចរបស់តុលាការ និងបទញុះញង់ ហាក់មិនសមហេតុផលទេ។ កញ្ញាថា សាធារណជនទាំងជាតិ និងអន្តរជាតិ សុទ្ធតែដឹងថា ពលរដ្ឋ គ្មានជំនឿលើប្រព័ន្ធតុលាការទាំងមូល ដោយសារតែតុលាការខ្លួនឯង និងការជ្រៀតជ្រែកពីអំណាចនីតិប្រតិបត្តិលើអំណាចតុលាការ។ អ្នកវិភាគរូបនេះ យល់ថា ការអនុវត្តលាយឡំគ្នា រវាងនយោបាយ និងច្បាប់ ជាមូលហេតុធ្វើឱ្យពលរដ្ឋគ្មានជំនឿលើប្រព័ន្ធតុលាការ មិនមែនដោយសារសកម្មជន២នាក់ នៅខេត្តកំពង់ស្ពឺ អាចបញ្ចុះបញ្ចូលឱ្យពលរដ្ឋ បាត់ជំនឿលើតុលាការទេ៖ «បើយើងនិយាយឱ្យខ្លីទៅប្រព័ន្ធយុត្តិធម៌របស់យើងកំពុងតែមានបញ្ហាហើយបញ្ហាដែលជួបប្រទះហ្នឹង វាពាក់ព័ន្ធជាមួយនឹងការជ្រៀតចូលនៃការប្រើប្រាស់អំណាចនៅក្នុងនីតិប្រតិបត្តិទៅលើតុលាការ»។
ភរិយារបស់សកម្មជនបក្សប្រឆាំង លោក ពុយ តាក់ លោកស្រី ស ស្រីអូន ប្រាប់ថា នៅថ្ងៃទី១០តុលា លោកស្រី នឹងទៅមើលស្វាមីនៅទីរួមខេត្តកំពង់ស្ពឺ។ តែយ៉ាងណា លោកស្រី សង្ឃឹមថា សមត្ថកិច្ច នឹងដោះលែងស្វាមីនិងប្អូនថ្លៃ ឱ្យរួចខ្លួនវិញ ដោយសារអ្នកទាំងពីរ មិនបានប្រព្រឹត្តិកំហុសអ្វីទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments