សមត្ថកិច្ចបញ្ជូនមេដឹកនាំសហជីព លោក ម៉ម រិទ្ធី ទៅឃុំនៅស្នងការដ្ឋាននគរបាលរាជធានីភ្នំពេញ នៅយប់ថ្ងៃទី៧ ខែឧសភា ម្សិលម៉ិញ ដោយចោទប្រកាន់អំពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបទធ្វើឱ្យបាត់បង់ជំនឿលើសេចក្ដីសម្រេចរបស់តុលាការ។
សហជីពកម្មករចាត់ទុកការចាប់ខ្លួន លោក ម៉ម រិទ្ធី ប្រធានសហព័ន្ធសហជីពកម្មករនិយោជិតវិស័យទេសចរណ៍សេវាកម្មកម្ពុជា (CTSWF) និងជាអនុប្រធានទី២សហភាពការងារកម្ពុជា (CLC) នេះថា ជាការធ្វើទុក្ខបុកម្នេញសហជីព ដែលបំពេញការងារ ដើម្បីការពារប្រយោជន៍បុគ្គលិក និយោជិត។
សមត្ថកិច្ចនគរបាលសង្កាត់បឹងទំពុនទី២ បានបញ្ជូនខ្លួនលោក ម៉ម រិទ្ធី ទៅកាន់ស្នងការដ្ឋាននគរបាលរាជធានីភ្នំពេញ នៅប៉ុន្មានម៉ោងក្រោយពីបានចាប់ខ្លួនមេដឹកនាំសហជីពរូបនេះ នៅការិយាល័យរបស់សហភាពការងារកម្ពុជានៅក្នុងសង្កាត់បឹងទំពុន ខណ្ឌមានជ័យ រាជធានីភ្នំពេញ កាលពីល្ងាចថ្ងៃ ទី៧ ខែឧសភា។
ក្រៅពីចាប់ខ្លួន លោក ម៉ម រិទ្ធី ប្រធានសហព័ន្ធសហជីពកម្មករនិយោជិតវិស័យទេសចរណ៍សេវាកម្មកម្ពុជា (CTSWF) និងជាអនុប្រធានទី២ សហភាពការងារកម្ពុជា (CLC) អាជ្ញាធរក៏បានឃាត់ខ្លួនមន្ត្រីសហជីព ២នាក់ទៀត ប៉ុន្តែបានដោះលែងមកវិញ។
ប្រធានសហភាពការងារកម្ពុជា លោក អាត់ ធន ប្រាប់វិទ្យុអាស៊ីសេរីថា ការចាប់ខ្លួនសហការីរបស់លោកនេះថាជារឿងមិនអាចទទួលយកបានព្រោះសំណុំរឿងនេះធ្លាប់មានការចរចា និងដើមបណ្ដឹងបានដកបណ្ដឹងរួចហើយ លើសពីនេះ រឿងនេះជាការបំពេញការងាររបស់សហជីពមិនមែនជាបទល្មើស។
លោក អាត់ ធន៖ «ក្រសួងការងារកាលពី ២សប្ដាហ៍មុន កាលយើងទៅដោះស្រាយជាមួយគ្នាហ្នឹងគឺ គេថា ក្រុមហ៊ុនបានដកពាក្យអស់ហើយ។ យើងគិតថា វាចប់រឿងអស់ហើយ ស្រាប់តែវាមានរឿងហ្នឹងកើតឡើង។ វាជារឿងពាក់ព័ន្ធនឹងការងារ និងសហជីព ដែលមិនគួរត្រូវបានតុលាការចាប់។ វាជាសម្ពាធមួយមកលើចលនាសហជីព។ វាពិបាកក្នុងការទទួលយក ព្រោះវាគ្រាន់តែបំពេញការងារសហជីពត្រូវបានមានការគំរាមកំហែងបែបហ្នឹង»។
បើទោះជាយ៉ាងណា ដីកាបង្គាប់ឱ្យចូលខ្លួនចេញដោយ ចៅក្រមជំនុំជម្រះសាលាដំបូងរាជធានីភ្នំពេញ លោក ធន់ ដារិទ្ធ ចុះថ្ងៃទី៧ ខែឧសភានេះឱ្យដឹងថា តុលាការបញ្ជាឱ្យក្រុមកងកម្លាំងសាធារណៈចាប់ខ្លួន លោក ម៉ម រិទ្ធី ដាក់ពន្ធនាគារ ទៅតាមអំណាចសាលក្រមតុលាការ ដែលសម្រេចផ្ដន្ទាទោសដាក់ពន្ធនាគារ រយៈពេល ១ឆ្នាំកន្លះ និងពិន័យជាប្រាក់ចំនួន ២លានរៀល (២.០០០.០០០) ។
តុលាការចោទថា លោក ម៉ម រិទ្ធី បានប្រព្រឹត្តបទឧក្រិដ្ឋជាអាទិ៍ និងបទធ្វើឱ្យបាត់បង់ជំនឿលើសេចក្ដីសម្រេចរបស់តុលាការនេះតាមបណ្ដាញសង្គមហ្វេសប៊ុក កាលពីថ្ងៃទី២៤ ខែកុម្ភៈ ឆ្នាំ២០២២។
ទាក់ទងនឹងរឿងនេះ នៅក្នុងវីដេអូផ្សាយផ្ទាល់លើបណ្ដាញសង្គមហ្វេសប៊ុក កាលពីថ្ងៃទី២៤ ខែកុម្ភៈ កាលពីជាង ២ឆ្នាំមុននោះ លោក ម៉ម រិទ្ធី បានបញ្ចេញមតិ ទាក់ទងនឹងការចាប់ឃុំខ្លួនបុគ្គលិកជាស្ត្រីម្នាក់នៅ កាស៊ីណូ ជិនប៉ី ដែលលោកមើលឃើញថា ជារឿងអយុត្តិធម៌ ដែលមេដឹកនាំសហជីពត្រូវចេញមុខជួយការពារ និងទាមទារយុត្តិធម៌។ ក្នុងវីដេអូនោះ លោក ម៉ម រិទ្ធី អំពាវនាវឱ្យតុលាការខេត្តព្រះសីហនុដោះលែងបុគ្គលិករូបនោះឱ្យមានសេរីភាព ព្រោះនាងមិនបានប្រព្រឹត្តកំហុសដូចការចោទប្រកាន់របស់ក្រុមហ៊ុន ដែលថា នាងបានឃុបឃិតជាមួយភ្ញៀវ ដែលមកលេងល្បែងបន្លំឈ្នះលុយក្រុមហ៊ុន។
ក្រោយការអំពាវនាវនោះ និងការប្រឹងប្រែងតស៊ូមតិជាមួយក្រុមហ៊ុនអស់ជាច្រើនខែមក តុលាការខេត្តព្រះសីហនុ បានសម្រេចដោះលែងបុគ្គលិកស្ត្រីឱ្យនៅក្រៅឃុំ ប៉ុន្តែបែរជាមានពាក្យប្ដឹង លោក ម៉ម រិទ្ធី ទៅវិញ។
ការចាប់ខ្លួន លោក ម៉ម រិទ្ធិ ធ្វើឡើងនៅមួយសប្ដាហ៍ ក្រោយពីក្រុមអង្គការសង្គមស៊ីវិល និងសហជីព កម្មករ នាំគ្នាប្រារព្ធទិវាពលកម្មអន្តរជាតិ ដោយស្នើសុំឱ្យភាគីពាក់ព័ន្ធបញ្ឈប់ការប្រើប្រាស់ប្រព័ន្ធតុលាការគំរាមកំហែង ចាប់ថ្នាក់ដឹកនាំសហជីព និងឃុំខ្លួនតាមអំពើចិត្ត ព្រមទាំងបញ្ឈប់ចាត់ទុកការទាមទារសិទ្ធិសេរីភាពរបស់សហជីពជាបទឧក្រិដ្ឋ។ ពួកគេក៏បានរៀបរាប់ពីការរឹតត្បិតសិទ្ធិសេរីភាពសហជីពឯករាជ្យ និងអង្គការសង្គមស៊ីវិល ផ្នែកសិទ្ធិការងារនៅរយៈពេល ៣ឆ្នាំចុងក្រោយនេះ និងថា សហជីពឯករាជ្យមួយចំនួន បានក្លាយជាមុខសញ្ញាក្នុងការគំរាមកំហែងតាមគ្រប់រូបភាព។
មកដល់ពេលនេះ ក្រៅពីការចាប់ខ្លួនមេសហជីព លោក ម៉ម រិទ្ធី កាលពីម្សិលមិញហើយមានមេដឹកនាំសហជីពមួយចំនួនទៀតកំពុងជាប់បណ្ដឹងនៅតុលាការ ដោយសារបំពេញការងារការពារកម្មករ និងមួយចំនួនកំពុងជាប់ឃុំ ក្នុងនោះមានមេដឹកនាំសហជីពនៅបនល្បែងណាហ្គាវើលដ៍ (Nagar World) ដ៏ឆ្នើម គឺកញ្ញា ឈឹម ស៊ីថរ ម្នាក់ដែរ ដែលកំពុងជាប់ឃុំជាលើកទី២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments