ពលរដ្ឋខ្មែរមកពីបណ្ដាប្រទេសនានា ចូលរួមបាតុកម្មនៅមុខអង្គការសហប្រជាជាតិ នាប្រទេសប្រទេសស្វីស ទាមទាររដ្ឋាភិបាលវៀតណាមឱ្យដោះលែងព្រះសង្ឃ និងពលរដ្ឋខ្មែរក្រោម ដែលកំពុងជាប់ឃុំឃាំងនៅពន្ធនាគារវៀតណាម។ ការចូលរួមធ្វើបាតុកម្មនេះ គឺចំពេល ដែលតំណាងប្រទេសវៀតណាមធ្វើដំណើរមកចូលរួម ប្រជុំនៅក្នុងអង្គការសហប្រជាជាតិ ស្តីពីការពិនិត្យឡើងវិញ តាមកាលកំណត់ (Universal Periodic Review) ឆ្នាំទី៤ ដើម្បីឆ្លើយបំភ្លឺ ចំពោះអង្គការសហប្រជាជាតិ (UN) អំពីការសន្យារបស់វៀតណាម ក្នុងការអនុវត្តអនុសាសន៍ ដែលដាក់ជូនដោយប្រទេសសមាជិកអង្គការសហប្រជាជាតិក្នុងកិច្ចប្រជុំត្រួតពិនិត្យជុំទី៣ កាលពីឆ្នាំ២០១៩។
បាតុករដឹកនាំដោយសហព័ន្ធខ្មែរកម្ពុជាក្រោម មកពីប្រទេសបារាំង (France) អ៊ីតាលី (Italy) និងសហរដ្ឋអាមេរិក (United States) ជាដើម ដែលមានអ្នកចូលរួមជាង ១រយអង្គនាក់មកធ្វើបាតុកម្មនៅមុខទីស្នាក់ការអង្គការសហប្រជាជាតិនាទីក្រុងហ្សឺណែវ (Geneva) ប្រទេសស្វីស (Switzerland) ដើម្បីទាមទារឱ្យរដ្ឋាភិបាលប្រទេសវៀតណាមដោះលែងព្រះសង្ឃ ៥អង្គ និងពលរដ្ឋខ្មែរក្រោមទាំង ៨នាក់។
ប្រធានគណៈកម្មការព័ត៌មាន នៃសហព័ន្ធខ្មែរកម្ពុជាក្រោម ព្រះតេជព្រះគុណ សឺង យ៉ឹងរតនា មានថេរដីកាថា មូលហេតុ ដែលព្រះសង្ឃ និងពលរដ្ឋខ្មែរមកពីបណ្ដាប្រទេសណាបានធ្វើដំណើរឆ្លងទ្វីប និងឆ្លងប្រទេសមកចូលរួមបាតុកម្មនេះ គឺដើម្បីទាមទារឱ្យអង្គការសហប្រជាជាតិ សហគមន៍អន្តរជាតិ និងអង្គការសិទ្ធិមនុស្សអន្តរជាតិអន្តរាគមន៍ជាបន្ទាន់ទៅលើរដ្ឋាភិបាលវៀតណាម ដែលបានចាប់ខ្លួនព្រះសង្ឃ និងពលរដ្ឋខ្មែរក្រោមតាមអំពើចិត្ត។
ព្រះភិក្ខុ សឺង យ៉ឹង រតនា បន្តថា ការចូលរួមធ្វើបាតុកម្មនេះ ក៏ដើម្បីបង្ហាញទៅសហគមន៍អន្តរជាតិថា របាយការណ៍សិទ្ធិមនុស្សរបស់ប្រទេសវៀតណាមលើកឡើងនៅអង្គការសហប្រជាជាតិនេះ គឺផ្ទុយពីការពិត ហើយរដ្ឋាភិបាលវៀតណាមនៅតែបន្តធ្វើទុក្ខបុកម្នេញលើជនជាតិខ្មែរក្រោម។
ពលរដ្ឋខ្មែរមកពីប្រទេសបារាំង លោក គឹម គើ បានឱ្យដឹងថា លោកមកចូលរួមបាតុកម្មនេះ ដោយសារតែលោកមិនអាចទទួលយកបាន ចំពោះការធ្វើទុក្ខបុកម្នេញរបស់អាជ្ញាធរវៀតណាមព្រះសង្ឃ និងពលរដ្ឋខ្មែរក្រោម ដែលហ៊ានចេញមុខការពារសិទ្ធិជនជាតិដើម និងការពារវប្បធម៌របស់ខ្លួន។
រហូតមកដល់ពេលនេះ មានព្រះសង្ឃ និងពលរដ្ឋខ្មែរក្រោមចំនួន ១៣អង្គ/នាក់ហើយ ដែលត្រូវបានអាជ្ញាធរវៀតណាមនៅខេត្តព្រះត្រពាំង ខេត្តឃ្លាំង និងខេត្តលង់ហោរ ចាប់ឃុំខ្លួនក្នុងពន្ធនាគារ។ ក្រៅពីនោះ អាជ្ញាធរវៀតណាម ក៏បានបណ្ដេញសកម្មជនសង្ឃខ្មែរក្រោមព្រះភិក្ខុ គឹម សំរិន្ទ ចេញពីវត្ត និងវាយកម្ទេចសាលាឆទានពុទ្ធសាសនាខ្មែរក្រោមនៅភូមិកន្រែង ខេត្តលង់ហោររាបដល់ដី។
វិទ្យុអាស៊ីសេរីមិនទាន់អាចសុំការឆ្លើយតបរឿងនេះ ពីស្ថានទូតវៀតណាមប្រចាំនៅកម្ពុជា និងអ្នកតំណាងរដ្ឋាភិបាលវៀតណាម នៅអង្គការសហប្រជាជាតិបានទេ នៅថ្ងៃទី៧ ខែឧសភា។
ប៉ុន្តែសន្និសីទលើកទី២៣ នៃវេទិកាអចិន្ត្រៃយ៍របស់អង្គការសហប្រជាជាតិស្ដីពីបញ្ហាជនជាតិដើម កាលពីថ្ងៃទី១៥ ដល់ថ្ងៃទី២៦ មេសា នៅបុរីញូវយ៉ក (New York) អ្នកតំណាងឱ្យរដ្ឋាភិបាលវៀតណាមបានបដិសេធថា មិនបានធ្វើទុក្ខបុកម្នេញពលរដ្ឋខ្មែរកម្ពុជាក្រោម និងចាត់ទុកថា សកម្មភាពរបស់សហព័ន្ធខ្មែរក្រោមកន្លងមក គឺជាការបំបែកបំបាក់សាមគ្គីជាតិរបស់វៀតណាម។
សហព័ន្ធខ្មែរកម្ពុជាក្រោមគ្រោងនឹងដឹកនាំបាតុកម្មនៅបណ្ដាប្រទេសផ្សេងទៀត រួមមាន ការធ្វើបាតុកម្ម នៅថ្ងៃទី១១ ខែឧសភា នៅមុខស្ថានទូតវៀតណាម នៅទីក្រុងប៉ារីស (Paris) ប្រទេសបារាំង និងនៅមុខស្ថានទូតវៀតណាមនៅទីក្រុងអូតាវ៉ា (Ottawa) ប្រទេសកាណាដា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments