ព្រះតេជព្រះគុណ សំ គឹមសាធ និងសកម្មជនសង្គមលោក អ៊ុក ពេជ្រសំណាង កំពុងធ្វើធម្មយាត្រាជាថ្មីទៀត ដើម្បីផ្សព្វផ្សាយអំពីមេត្តាធម៌ និងលើកកម្ពស់សីលធម៌ជាលើកទី៤ ក្នុងចម្ងាយផ្លូវជាង ៨រយគីឡូម៉ែត្រក្នុងទិសដៅពីខេត្តព្រះសីហនុ ឆ្ពោះទៅខេត្តរតនគិរី។ ធម្មយាត្រានេះ ក៏ជំរុញទៅរដ្ឋាភិបាលឱ្យងាកមកគោរពសិទ្ធិមនុស្ស និងស្ដារប្រជាធិបតេយ្យឡើងវិញ។
ធម្មយាត្រាផ្សព្វផ្សាយធម៌មេត្តាចិត្ត អប់រំអំពីសិទ្ធិមនុស្ស និងលើកកម្ពស់សីលធម៌សង្គមរបស់ព្រះតេជព្រះគុណ សំ គឹមសាធ និងសកម្មជនសង្គម លោក អ៊ុក ពេជ្រសំណាង គិតត្រឹមថ្ងៃទី២២ ខែមីនា គឺមានរយៈពេល១សប្តាហ៍និងធ្វើដំណើរបានចម្ងាយជាង២រយគីឡូម៉ែត្រហើយ ដោយចាប់ផ្តើមចេញពីខេត្តព្រះសីហនុឆ្លងកាត់រាជធានីភ្នំពេញឆ្ពោះទៅកាន់ខេត្តរតនគិរី។ ដំណើរធម្មយាត្រានេះបានទៅដល់ផ្លូវជាតិលេខ១ក្នុងភូមិសាស្ត្រស្រុកកៀនស្វាយ ខេត្តកណ្តាល បន្តឆ្ពោះទៅខេត្តព្រៃវែង ដោយពុំមានអាជ្ញាធរតាមរារាំងដូចលើកមុនៗនោះឡើយ។
ក្រោមកម្តៅថ្ងៃខ្លាំងនៅរដូវប្រាំង ព្រះអង្គ សំ គឹមសាធ និមន្តបណ្តើរសូត្រធម៌ផ្សព្វផ្សាយមេត្តាធម៌បណ្តើរ ចំណែកលោក អ៊ុក ពេជ្រសំណាង ដែលអមដំណើរជាមួយព្រះអង្គកាន់ទង់ជាតិ ទង់សាសនា និងបដាហាក់អស់កម្លាំងបន្តិច។ ប៉ុន្តែធម្មយាត្រាផ្សព្វផ្សាយបញ្ហាសង្គមបានទទួលការគាំទ្រពីប្រជាពលរដ្ឋរស់នៅតាមដងផ្លូវដែលមានទឹកចិត្តជ្រះថ្លាជួយឧបត្ថម្ភជាទឹក និងប្រគេនគ្រឿងឧបភោគបរិភោគជាហូរហែ។
ព្រះតេជព្រះគុណ សំ គឹមសាធ មានថេរដីកាឱ្យវិទ្យុអាស៊ីសេរីដឹងថា មូលហេតុដែលព្រះអង្គនិមន្តធ្វើធម្មយាត្រាបន្តទៀតដោយសារព្រះអង្គឈឺចាប់ពេលទតឃើញបញ្ហារំលោភសិទ្ធិ រឿងអយុត្តិធម៌ ការគំរាមកំហែង និងបណ្តេញពលរដ្ឋខ្មែរទន់ខ្សោយចេញពីផ្ទះសម្បែង ដីស្រែចំការពីអ្នកមានអំណាចនៅតែកើតឡើងច្រើននៅក្នុងសង្គម។ ព្រះអង្គបិណ្ឌបាត្រដល់រដ្ឋាភិបាលទម្លាក់ចោលនូវអំពើបាប ការចងគំនុំគ្នា ដោយងាកមកកសាងបុណ្យកុសល គោរពសិទ្ធិមនុស្ស និងបើកឱ្យពលរដ្ឋទាំងអ្នកនយោបាយ អង្គការសង្គមស៊ីវិលទាំងអស់មានសិទ្ធិសេរីភាពបញ្ចេញមតិដោយគ្មានការគំរាមកំហែង ឬចាប់ដាក់គុកដើម្បីកសាងសង្គមឱ្យមានសុខសន្តិភាពពិតប្រាកដ។
ព្រះតេជព្រះគុណ សំ គឹមសាធ៖ «ធម្មយាត្រាដីរាប់រយគីឡូម៉ែត្រមិនឆ្ងាយនោះទេ ប៉ុន្តែអ្នកដឹកនាំនយោបាយដើរឆ្ងាយពីបន្ទាត់ប្រជាធិបតេយ្យ ឆ្ងាយពីការគោរពសិទ្ធិមនុស្ស អាត្មាយល់ថា អស់លោកជាមន្ត្រី អ្នកមាន ល្មមកែតម្រូវខ្លួនហើយ ដល់ពេលវិលត្រឡប់ទៅរកភាពដើមហើយគឺជរា ព្យាធិ និងមរណៈតាមផ្ដន្ទាញោមហើយ ដូច្នេះអំពើអយុត្តិធម៌សូមកុំឱ្យកើតមាននៅក្នុងប្រទេសកម្ពុជាបន្តទៀត»។
ធម្មយាត្រាមេត្តាធម៌ និងលើកកម្ពស់សីលធម៌សង្គមដើរថ្មើរជើងលើកនេះគ្រោងចំណាយរយៈពេល ១ខែ ក្នុងចម្ងាយផ្លូវជាង៨រយគីឡូម៉ែតដែលត្រូវឆ្លងកាត់ខេត្តចំនួន៨ ដោយផ្តើមចេញពីខេត្តព្រះសីហនុ កាលពីថ្ងៃទី១៥ ខែមីនា ឆ្លងកាត់ខេត្តកំពង់ស្ពឺ កណ្ដាល ព្រៃវែង ត្បូងឃ្មុំ ក្រចេះ មណ្ឌលគិរី និងបញ្ចប់នៅខេត្តរតនគិរីនៅពាក់កណ្តាលខែមេសាខាងមុខ។
វិទ្យុអាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាលលោក ប៉ែន បូណា ដើម្បីសាកសួររឿងនេះបានទេនៅថ្ងៃទី២២ ខែមីនា។
ជុំវិញរឿងនេះ ប្រធានសមាគមសម្ព័ន្ធនិស្សិតបញ្ញវន្តខ្មែរ លោក កើត សារ៉ាយ មានប្រសាសន៍ថា នៅពេលដែលសិទ្ធិសេរីភាព និងប្រជាធិបតេយ្យនៅកម្ពុជាកំពុងធ្លាក់ចុះខ្លាំង គឺអ្នកបួសគ្រប់និកាយសាសនាមានតួនាទីសំខាន់ក្នុងការផ្សព្វផ្សាយមេត្តាចិត្ត អប់រំអំពីគុណធម៌ក្នុងទិសដៅជួយឱ្យមនុស្សចេះអត់ឱនឱ្យគ្នាទៅវិញទៅមក និងជំរុញឱ្យមានដំណោះស្រាយបញ្ហាសង្គមជាដើម។ លោកយល់ថារដ្ឋាភិបាលគួរលើកទឹកចិត្ត ហើយទទួលយកសំណើទាំងនោះទៅពិនិត្យដោះស្រាយ ដោយផ្តើមចេញពីការគោរពសិទ្ធិមនុស្ស និងស្ដារលទ្ធិប្រជាធិបតេយ្យឡើងវិញសម្រាប់ផលប្រយោជន៍ជាតិរួម។
លោក កើត សារ៉ាយ៖ «អ្វីដែលព្រះសង្ឃបិណ្ឌបាត្រសុទ្ធតែមានចែងនៅក្នុងរដ្ឋធម្មនុញ្ញរបស់កម្ពុជា បើសិនព្រះសង្ឃមិនបិណ្ឌបាត្រក៏ដោយ ក៏រដ្ឋាភិបាលខ្លួនឯងត្រូវមានឆន្ទៈក្នុងការធានា និងការពារស្មារតីនៃលទ្ធិប្រជាធិបតេយ្យដែលអនុលោមតាមរដ្ឋធម្មនុញ្ញ ដូច្នេះព្រះសង្ឃ បរិស័ទ តាជី យាយជីដែលមានឆន្ទៈចង់ឱ្យរដ្ឋាភិបាលកែលម្អ គឺរដ្ឋាភិបាលត្រូវយកចិត្តទុកដាក់លើរឿងហ្នឹង»។
ព្រះតេជព្រះគុណ សំ គឹមសាធ តែងតែនិមន្តធ្វើធម្មយាត្រាដើម្បីអប់រំអំពីសីលធម៌សង្គម និងការលើកកម្ពស់ការគោរពសិទ្ធិមនុស្ស។ ជាក់ស្ដែងកាលពីឆ្នាំ២០២៣ កន្លងទៅព្រះតេជព្រះគុណ សំ គឹមសាធ ធ្លាប់ធ្វើធម្មយាត្រាទៅខេត្តពោធិ៍សាត់ និងទៅព្រំដែនថៃ ដែលកាលណោះព្រះអង្គរងការធ្វើទុក្ខបុកម្នេញគ្រប់រូបភាព ការរារាំង ការគំរាមចាប់ផ្សឹកពីសំណាក់អាជ្ញាធរ និងការបណ្ដេញចេញពីវត្តជាដើម ។ ទោះយ៉ាងណាព្រះអង្គមិនរាថយនោះទេ កាលពីពេលថ្មីៗនេះព្រះអង្គបន្តធ្វើធម្មយាត្រាចម្ងាយផ្លូវជិត៧រយគីឡូម៉ែត្រ ដែលឆ្លងកាត់ខេត្តចំនួន៨ រួមមានខេត្តកំពង់ចាម កំពង់ធំ សៀមរាប បន្ទាយមានជ័យ បាត់ដំបង ពោធិ៍សាត់ កំពង់ឆ្នាំង និងខេត្តកំពង់ស្ពឺ។
ព្រះតេជព្រះគុណ សំ គឹមសាធ ព្រះជន្ម ៧២ព្រះវស្សា ជាព្រះសង្ឃខ្មែរមួយអង្គដែលមិនខ្លាចការធ្វើទុក្ខបុកម្នេញពីអាជ្ញាធរ ដោយព្រះអង្គហ៊ានចេញមកធ្វើធម្មយាត្រានិមន្តដោយថ្មើរជើងស្នើបញ្ឈប់ការធ្វើទុក្ខបុកម្នេញលើអ្នកធ្វើការងារសង្គម និងទាមទារលើកកម្ពស់សីលធម៌សង្គម។ ព្រះអង្គ សំ គឹមសាធ មានថេរដីកាថា បើទោះបីព្រះអង្គជួបឧបសគ្គក្នុងផ្សព្វផ្សាយមេត្តាធម៌យ៉ាងណាក្តី ក៏ព្រះអង្គនៅតែបន្តធ្វើសកម្មភាពរហូតសង្គមមានសន្តិភាព ស្ថិរភាព និងដើរតាមគន្លងប្រជាធិបតេយ្យពិតប្រាកដឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments