ក្រុមហ៊ុនចិន ឡេត ចេង ម៉ាញនីង ឌីវេឡុបមិន (LATE CHENG MINING DEVELOPMENT CO.,LTD) កំពុងធ្វើអាជីវកម្មរ៉ែមាសនៅខេត្តកំពង់ធំ ធ្វើឲ្យប៉ះពាល់ដីស្រែចំការរបស់ពលរដ្ឋប្រមាណជិត២០០គ្រួសារ។ មន្ត្រីសង្គមស៊ីវិលលើកឡើងថា រដ្ឋមុននឹងសម្បទានអ្វីមួយគួរសិក្សាផលប៉ះពាល់ឲ្យបានច្បាស់លាស់ជាមុនសិន។
ប្រជាពលរដ្ឋរស់នៅឃុំសុចិត្រ ស្រុកសណ្ដាន់ ខេត្តកំពង់ធំ ជិត២រយគ្រួសារ កំពុងមានវិវាទដីធ្លីជាមួយក្រុមហ៊ុន ឡេត ចេង ម៉ាញនីង ឌីវេឡុបមិន (LATE CHENG MINING DEVELOPMENT CO.,LTD) ដែលកំពុងធ្វើអាជីវកម្មរ៉ែមាស នៅជុំវិញតំបន់នោះ ។ ក្រុមហ៊ុនបានខួងរណ្ដៅយករ៉ែ៥កន្លែងផ្សេងគ្នា ក្នុងនោះរួមមាន អូវផ្អាវ អូរប្រហ៊ូត អូរខ្វាវ ស្រែព្រីង និងភូមិស្នងអន ដោយដាក់គ្រឿងចក្រ ជីកនិងខួងរណ្ដៅធ្វើឲ្យប៉ះពាល់លើដីចំការដាំដំណាំដំឡូង ស្វាយចន្ទី និងស្វាយជាដើម។ លើសពីនោះពលរដ្ឋ និងអាជ្ញាធរមូលដ្ឋាន ក៏អះអាងថា មានមនុស្សស្លាប់ជាច្រើននាក់ នៅក្នុងរណ្ដៅ ជីកយករ៉ែមាសនោះ ប៉ុន្តែក្រុមហ៊ុនចិនលាក់បាំង។
ពលរដ្ឋរស់នៅភូមិស្រែព្រីង ដែលត្រូវក្រុមហ៊ុនកំពុងខួងរណ្ដៅចំកណ្ដាលដីចំការ សុំមិនបញ្ចេញឈ្មោះ បានរៀបរាប់ថា ដីចំការរបស់លោកចំនួន៥ហិកតារ ដែលបានដាំដំឡូងរួចរាល់ហើយនោះ ត្រូវក្រុមហ៊ុនខួងរណ្ដៅធំៗស្វែងរករ៉ែមាសទាំងយប់ទាំងថ្ងៃ ធ្វើឲ្យខូចខាតដំឡូងរបស់លោកមួយចំនួនធំ។ លោកបន្តថា ដីចំការនិងដីផ្ទះរបស់ប្រជាពលរដ្ឋចំនួនពីរភូមិគឺភូមិស្រែព្រីង និងភូមិស្នងអន មិនទាន់មានដំណោះស្រាយ ឬសំណងសមរម្យនោះទេ លើសពីនោះក្រុមហ៊ុននេះបង្ហូរទឹកកខ្វក់ចូលក្នុងអូរធម្មជាតិ ធ្វើឲ្យពលរដ្ឋ នៅជុំវិញតំបន់នោះមិនអាចប្រើប្រាស់ទឹកអូរមួយនោះបានទេ។
«ពីមុនបោះឆ្នោតមានក្រុមហ៊ុនចិនប៉ះពាល់ដីធ្លីអីឲ្យដឹងដល់គាត់ ដល់ពេលប៉ះពាល់ទៅប្រាប់គេចអស់បាត់ប៉ូលិសមេឃុំ មុនបោះឆ្នោតបញ្ឆោតយើង ព្រួយបារម្ភអត់ដីអត់ទឹកប្រើប្រាស់រាល់ថ្ងៃអត់មានទឹកហូប»។
រីឯមេភូមិស្រែព្រីង លោក វង ហឿន បានត្អូញត្អែរថា ក្រុមហ៊ុនបានបង្ហូរទឹកកខ្វក់ចូលក្នុងអូរធម្មជាតិ បង្កឲ្យពលរដ្ឋនៅក្នុងឃុំមានជំងឺផ្សេងៗ។ លោកក៏ធ្លាប់ស្នើទៅអាជ្ញាធរពាក់ព័ន្ធឲ្យជួបដោះស្រាយនិងទប់ស្កាត់ ប៉ុន្តែនៅមិនមានដំណោះស្រាយនោះទេ ។ ក្រៅពីបង្ហូរទឹកកខ្វក់លោកថា ការជីកយករ៉ែនេះ ក៏បង្កឲ្យមានមនុស្សស្លាប់នៅក្នុងរណ្ដៅជាច្រើននាក់ថែមទៀត។
លោក វង ហឿន៖ «មានតែទិន្នន័យខ្ញុំក្ដោបអត់បាន គ្រាន់តែដឹងថា មានមនុស្សស្លាប់ក្នុងរណ្ដៅខាងស្ទឹងមាន៤នាក់ហើយនៅក្នុងរណ្ដៅចិនវាអត់ប្រាប់យើងទេ ដឹងថាមានស្លាប់ប៉ុន្តែស្លាប់ប៉ុន្មាននាក់វាអត់ប្រាប់យើង»។
ពលរដ្ឋនៅឃុំសុចិត្រអះអាងថា ក្រុមហ៊ុន ឡេត ចេង ម៉ាញនីង ឌីវេឡុបមិន (LATE CHENG MINING DEVELOPMENT CO.,LTD) បានធ្វើអាជីវកម្មរ៉ែចាប់តាំងពីចុងឆ្នាំ២០២២មកម្ល៉េះ ។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងរ៉ែនិងថាមពល លោក អ៊ឹង ឌីប៉ូឡា និងអ្នកនាំពាក្យសាលាខេត្តកំពង់ធំ លោក សុខ ហៃ បានទេនៅថ្ងៃទី២៦ ខែសីហា ដោយទូរស័ព្ទចូលច្រើនដងគ្មានអ្នកទទួល។ រីឯតំណាងក្រុមហ៊ុនឡេត ចេង ម៉ាញនីង ឌីវេឡុបមិន (LATE CHENG MINING DEVELOPMENT CO.,LTD) ក៏មិនអាចទាក់ទងបានដែរ។
កាលពីខែកញ្ញាឆ្នាំ២០២២ កាសែតក្នុងស្រុកបានចុះផ្សាយដោយដកស្រងសម្ដី របស់អ្នកនាំពាក្យក្រសួងរ៉ែ និងថាមពល លោក អ៊ឹង ឌីប៉ូឡា ថា ក្រុមហ៊ុនចិន ឡេត ចេង ម៉ាញនីង ឌីវេឡុបមិន (LATE CHENG MINING DEVELOPMENT CO.,LTD)នឹងធ្វើអាជីវកម្មរ៉ែមាសជាផ្លូវការនៅចុងឆ្នាំ២០២៣ ដោយមានអាជ្ញាប័ណ្ណពីរដ្ឋ។
ជុំវិញរឿងនេះ នាយករងកិច្ចការទូទៅនៃអង្គការសិទ្ធិមនុស្សលីកាដូ (Licadho) លោក អំ សំអាត យល់ឃើញថា រាល់ការផ្ដល់សម្បទានណាមួយរដ្ឋត្រូវសិក្សា និងវាយតម្លៃផលប៉ះពាល់ដីធ្លីប្រជាពលរដ្ឋ និងបរិស្ថានឲ្យបានត្រឹមត្រូវ ជៀសវាងមានគ្រោះថ្នាក់ដល់ប្រជាពលរដ្ឋរស់នៅតំបន់នោះ និងត្រូវដោះស្រាយសំណងសមរម្យដល់ពលរដ្ឋជាមុនសិន មុនធ្វើអាជីវកម្មរ៉ែនេះ។ លើសពីនោះលោកថា ប្រសិនមានករណីមនុស្សស្លាប់ក្នុងរណ្ដៅមែននោះ អាជ្ញាធរត្រូវចុះពិនិត្យស្រាវជ្រាវឲ្យបានច្បាស់លាស់។
លោក អំ សំអាត៖ «ព្រោះនេះជាទឹកដីខ្មែរបើទោះបីជាក្រុមហ៊ុនរ៉ុករករ៉ែជាក្រុមហ៊ុនបរទេសក៏ដោយប៉ុន្តែ នៅលើទឹកដីខ្មែរ អ៊ីចឹងអនុវត្តទៅលើច្បាប់ខ្មែរ បើសិនជាមានមនុស្សស្លាប់ក្នុងទីតាំងក្រុមហ៊ុន ហើយមិនមានការបញ្ជាក់ហេតុផលណាមួយច្បាស់លាស់ទេ វាស្ថិតក្នុងការសង្ស័យដែលអាជ្ញាធរត្រូវតែបើកការស៊ើបអង្កេតឲ្យបានដិតដល់ ដើម្បីស្វែងរកយុត្តិធម៌ដល់ជនដែលស្លាប់»។
ក្រុមហ៊ុន ឡេត ចេង ម៉ាញនីង ឌីវេឡុបមិន (LATE CHENG MINING DEVELOPMENT CO.,LTD) ទទួលបានលិខិតអនុញ្ញាតរុករករ៉ែ លោហធាតុ ពីរដ្ឋាភិបាល កាលពីចុងខែមីនាឆ្នាំ២០២០ ដែលមានផ្ទៃដីប្រមាណជាង១ម៉ឺន ៥ពាន់ហិកតារ ( ១៥.១០០)ហិកតារ ស្ថិតនៅឃុំសុចិត្រ ស្រុកសណ្ដាន់ ខេត្តកំពង់ធំ ខាងត្បូងនៃដែនជម្រកសត្វព្រៃ-ព្រៃឡង់ជាប់តំបន់ទេសចរណ៍ភ្នំជី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments