 |
| អាវុធដែលជនសង្ស័យឃុបឃិតជាមួយជនជាតិថៃ ជួញដូរនៅប្រទេសថៃ។ រូបថតថ្ងៃទី២១ ខែកក្កដា ឆ្នាំ២០១៧។ Photo Provided |
ដោយ ហ៊ុំ ចំរើន RFA 2017-07-24
សមត្ថកិច្ចខេត្តបន្ទាយមានជ័យ បញ្ជូនជនសង្ស័យ ៣នាក់ដែលពាក់ព័ន្ធនឹងការជួញដូរអាវុធខុសច្បាប់ ទៅសាលាដំបូងខេត្តនេះកាលពីព្រឹកថ្ងៃទី២៤ កក្កដា។ ស្នងការរងនគរបាលខេត្តបន្ទាយមានជ័យ អះអាងថា ជនទាំង ៣នាក់នោះមានជាប់ពាក់ព័ន្ធជាមួយជនជាតិថៃ ពីការជួញដូរអាវុធនៅប្រទេសថៃ ដែលត្រូវសមត្ថកិច្ចឃាត់ខ្លួនកាលពីថ្ងៃទី២១ កក្កដា។
ស្នងការរងនគរបាលខេត្តបន្ទាយមានជ័យ ទទួលបន្ទុកផ្នែកព្រហ្មទណ្ឌ លោក សិទ្ធ ឡោះ ឲ្យដឹងនៅថ្ងៃទី២៤ កក្កដា ថា មុនពេលឃាត់ជនសង្ស័យទាំង ៣នាក់មកសាកសួរ សមត្ថកិច្ចបានចុះស៊ើបអង្កេតរយៈពេល ២ថ្ងៃនៅតំបន់ព្រំដែនស្រុកម៉ាឡៃ បន្ទាប់ពីទទួលដំណឹងតាមបណ្ដាញសារព័ត៌មានរបស់ថៃ ដែលអ្នកទាំងនោះមានជាប់ពាក់ព័ន្ធជាមួយជនជាតិថៃ ជួញដូរអាវុធខុសច្បាប់នៅប្រទេសថៃ។
លោកបន្តថា ជនទាំង ៣នាក់ត្រូវបានបញ្ជូនទៅដល់សាលាដំបូងខេត្តបន្ទាយមានជ័យ ហើយកាលពីព្រឹកថ្ងៃទី២៤ កក្កដា ដើម្បីបន្តនីតិវិធីតាមផ្លូវច្បាប់៖ «ដោយឮថាចេញតាមច្រកនេះនោះអ៊ីចឹងទៅ យើងសហការជាមួយសមត្ថកិច្ចថៃ ដើម្បីបញ្ជាក់តាមព័ត៌មានរបស់ថៃ ហើយយើងក៏ធ្វើការស្រាវជ្រាវតាមនោះ។ អាវុធអត់មានចាប់ តែចាប់បានតែមនុស្ស ៣នាក់»។
ទាក់ទងនឹងបញ្ហានេះ អ្នកនាំពាក្យ និងជាព្រះរាជអាជ្ញារងនៃសាលាដំបូងខេត្តបន្ទាយមានជ័យ លោក សុខ កែវបណ្ឌិត មានប្រសាសន៍យ៉ាងខ្លីថា ប៉ូលិសពិតជាបានបញ្ជូនជនសង្ស័យមកដល់សាលាដំបូងខេត្តប្រាកដមែន ហើយលោកក៏កំពុងសាកសួរអ្នកទាំង ៣នាក់ ពាក់ព័ន្ធនឹងករណីការជួញដូរអាវុធនេះ។
ជនសង្ស័យទាំង ៣នាក់រួមមាន ឈ្មោះ យឹម សាវី ភេទប្រុស អាយុ ៣៨ឆ្នាំ រស់នៅភូមិប្រាំពីរ ឃុំបួរ ស្រុកភ្នំព្រឹក ខេត្តបាត់ដំបង ឈ្មោះ ជឹម លីន អាយុ ៣៣ឆ្នាំ រស់នៅភូមិឈើទាល ឃុំសេរីមានជ័យ ស្រុកសំពៅលូន ខេត្តបាត់ដំបង និងឈ្មោះ អប់ វីរៈ ហៅ ឡេង អាយុ ៤៨ឆ្នាំ មុខរបរជាបុគ្គលិកស៊ីម៉ាក់ (CMAC) រស់នៅសង្កាត់អូរចារ ក្រុងបាត់ដំបង។ ក្នុងចំណោមនោះមានមនុស្ស ២នាក់ សមត្ថកិច្ចចាប់ខ្លួននៅស្រុកម៉ាឡៃ ខេត្តបន្ទាយមានជ័យ និងម្នាក់ទៀតចាប់ខ្លួននៅស្រុកសំពៅលូន ខេត្តបាត់ដំបង។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា ករណីជួញដូរអាវុធឆ្លងដែននេះ គឺជាអំពើខុសច្បាប់ ដែលសមត្ថកិច្ចត្រូវស្រាវជ្រាវចាប់ជនសង្ស័យពាក់ព័ន្ធយកមកផ្ដន្ទាទោសតាមផ្លូវច្បាប់៖ «ទាំងអស់នេះបញ្ជាក់ឲ្យឃើញថា មិនមែនជារឿងដែលកម្ពុជា គ្មាននោះទេ។ សមត្ថកិច្ចទប់ស្កាត់ការជួញដូរអាវុធខុសច្បាប់ ជាការប្រសើរមួយ ដែលកាត់បន្ថយនូវការបាញ់សម្លាប់ ការប្លន់ប្រដាប់អាវុធផ្សេងៗដែលនាំឲ្យប៉ះពាល់ដល់ការរស់នៅរបស់ប្រជាពលរដ្ឋ»។
ទោះជាយ៉ាងណា ស្នងការរងនគរបាលខេត្តបន្ទាយមានជ័យ លោក សិទ្ធ ឡោះ ពុំបានបញ្ជាក់អំពីអាវុធដែលជនសង្ស័យជួញដូរនៅក្នុងទឹកដីថៃ នោះទេ។ ប៉ុន្តែកាសែតក្នុងស្រុកមួយចំនួនឲ្យដឹងថា អាវុធទាំងនោះជាកាំភ្លើងធំប្រភេទដេកា (DK) ចំនួន ៣ដើម និងឧបករណ៍បង្កៃគ្រាប់បែកចំនួន ៣គ្រាប់។ លោក សិទ្ធ ឡោះ អះអាងថា សមត្ថកិច្ចបន្តស្រាវជ្រាវរកអ្នកពាក់ព័ន្ធក្នុងករណីនេះនៅតំបន់ព្រំដែនស្រុកម៉ាឡៃ ដើម្បីយកមកសាកសួរបន្តទៀត៕
From KI Media - Khmer Intelligence
via_IFTTT
0 Comments