សកម្មជននយោបាយនៅប្រទេសជប៉ុន លោក ហៃ វណ្ណា ដែលដឹកនាំធ្វើបាតុកម្មប្រឆាំងតំបន់ត្រីកោណអភិវឌ្ឍន៍ CLV-DTA កក្រើកប្រទេសជប៉ុន កាលពីខែសីហា រហូតត្រូវបានលោក ហ៊ុន សែន គំរាមកំហែងដល់សមាជិកគ្រួសារ និងចាប់ខ្លួនប្អូនប្រុសរបស់លោកដាក់ពន្ធនាគារ ពេលនេះ បានប្រកាសចូលរួមជីវភាពនយោបាយជាមួយគណបក្សប្រជាជនកម្ពុជាហើយ។ អ្នកឃ្លាំមើលសង្កេតឃើញថា ការសម្រេចចិត្តរបស់លោក ហៃ វណ្ណា គឺដោយសារកាលៈទេសៈបង្ខំ ខណៈប្អូនប្រុសរបស់លោក ត្រូវបានរដ្ឋាភិបាលបក្សកាន់អំណាច ចាប់យកធ្វើចំណាប់ខ្មាំងឃុំក្នុងពន្ធនាគា។
ក្រៅពីការប្រើប្រាស់វិធី យកសត្វលលក ទៅទាក់លលក និងការប្រើប្រាស់ខ្នោះដៃ ដើម្បីបង្ខំឱ្យអ្នកប្រឆាំង ឬសកម្មជនឱ្យចុះចូល ពេលនេះវិធីថ្មីមួយទៀត របស់លោក ហ៊ុន សែន ទទួលបានផលហើយ នោះគឺការចាប់ខ្លួនសមាជិកគ្រួសាររបស់អ្នកប្រឆាំង មកធ្វើជាចំណាប់ខ្មាំង។
វីដេអូរយៈពេល ២នាទីកន្លះ ដែលប្រធានព្រឹទ្ធសភាលោក ហ៊ុន សែន យកមកបង្ហោះលើបណ្ដាញសង្គមហ្វេសប៊ុក នៅថ្ងៃទី១៨ ខែតុលា សមាជិកក្រុមប្រឹក្សាចលនាខ្មែរដើម្បីប្រជាធិបតេយ្យ លោក ហៃ វណ្ណា បានសុំការលើកលែងទោសពីលោក ហ៊ុន សែន ដោយប្រកាសខ្លួនផ្ដាច់ចេញពីបក្សប្រឆាំង ហើយចូលរួមជីវភាពនយោបាយជាមួយគណបក្សប្រជាជនកម្ពុជា និងប្ដេជ្ញានាំយកចំណេះដឹងមកចូលរួមកសាងប្រទេស។
ភ្ជាប់ជាមួយវីដេអូ របស់លោក ហៃ វណ្ណា លោក ហ៊ុន សែន ដែលប្រើប្រាស់សមាសភាពជាប្រធានគណបក្សប្រជាជនកម្ពុជា បានប្រកាសស្វាគមន៍ លោក ហៃ វណ្ណា ដែលទទួលស្គាល់កំហុស ហើយផ្ដាច់ខ្លួនចេញពីលោក សម រង្ស៉ី និងស្នើដល់អ្នកស្អប់លោក ហៃ វណ្ណា ឱ្យឈប់ខឹងសំបារនឹងសកម្មជនប្រឆាំងរូបនេះតទៅទៀត។
ការចេញវីដេអូសុំទោសរបស់លោក ហៃ វណ្ណា នៅពេលនេះ ធ្វើឡើងបន្ទាប់ពីលោករងការចោទប្រកាន់ពីរដ្ឋាភិបាលរបស់បក្សកាន់អំណាចថា លោកជាអ្នកនៅពីក្រោយគម្រោងផ្ដួលរំលំរដ្ឋាភិបាល កាលពីថ្ងៃទី១៨ ខែសីហា ក្នុងរូបភាពធ្វើបាតុកម្មប្រឆាំងតំបន់ត្រីកោណអភិវឌ្ឍន៍ CLV-DTA។
សកម្មជននយោបាយដែលភៀសខ្លួននៅជប៉ុន លោក គង់ ជិ ប្រាប់វិទ្យុអាស៊ីសេរី នៅថ្ងៃទី១៨ ខែតុលាថា នៅមុនការចុះចូលរបស់លោក ហៃ វណ្ណា បេសកជនពិសេសរបស់លោក ហ៊ុន សែន គឺលោក យូ សិរីវុឌ្ឍ និងលោក ភឹន ផល្លា បានមកបញ្ចុះបញ្ចូលលោក ហៃ វណ្ណា ដល់ប្រទេសជប៉ុន ដើម្បីឱ្យចុះចូលជាមួយគណបក្សប្រជាជនកម្ពុជា ជាថ្នូរនឹងការដោះលែង ប្អូនប្រុសរបស់លោក ហៃ វណ្ណា គឺលោក ហៃ វណ្ណនិត។
លោក គង់ ជិ៖ «នរណាក៏គេដឹងដែរថា របបលោក ហ៊ុន សែន ធ្វើតែរឿងកំសាកបំផុត ដែលពិភពលោក គេស្អប់ខ្ពើម ហើយកន្លងមក គាត់តែងតែចាប់អ្នករិះគន់ដាក់ពន្ធនាគារ គាត់បង្ខំគេឱ្យចុះចូលជាថ្នូរនឹងការដោះលែងនេះ ជារឿងកំសាក ដែលមិនអាចយកបេះដូងគេបាន ប៉ុន្តែ បែរជាបង្ខំគេ ហើយយើងគ្រប់គ្នានៅជុំវិញពិភពលោក គឺនៅតែថ្កោលទោស លោក ហ៊ុន សែន»។
កាលពីថ្ងៃទី២៣ ខែកក្កដា លោក ហ៊ុន សែន បានបញ្ចេញប្រតិកម្មខ្លាំងៗ ចំពោះលោក ហៃ វណ្ណា ដែលចូលទៅបញ្ចេញមតិ នៅក្នុងហ្វេសប៊ុក (Facebook) របស់លោក ហ៊ុន សែន អំពីក្ដីបារម្ភរឿងដាក់បញ្ចូលខេត្តភាគឦសានរបស់ខ្មែរចំនួន៤ ដើម្បីអភិវឌ្ឍន៍រួមគ្នាជាមួយវៀតណាម (Vietnam) និងឡាវ (Lao)។ លោក ហ៊ុន សែន បានបញ្ជាឱ្យអាជ្ញាធរត្រូវស្វែងរកក្រុមគ្រួសាររបស់លោក ហៃ វណ្ណា និងអ្នករិះគន់នៅក្រៅប្រទេសផ្សេងទៀត។
ក្រោយពេលលោក ហ៊ុន សែន គំរាមកំហែងសមាជិកគ្រួសាររបស់លោក ហៃ វណ្ណា ត្រូវអាជ្ញាធរលោក ហ៊ុន សែន គំរាមកំហែងរហូតដល់ភៀសខ្លួនទៅប្រទេសជប៉ុន។ ក៏ប៉ុន្តែប្អូនប្រុសរបស់លោក ហៃ វណ្ណា គឺលោក ហៃ វណ្ណនិត ត្រូវបានអាជ្ញាធរលោក ហ៊ុន សែន ចាប់ខ្លួននៅច្រកព្រំដែនប៉ោយប៉ែត កាលពីថ្ងៃទី១៦ ខែសីហា និងបញ្ជូនទៅឃុំខ្លួននៅពន្ធនាគារ ម១ ដោយតុលាការក្រុងភ្នំពេញ ចោទពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
បន្ទាប់ពីប្អូនប្រុស ត្រូវជាប់ឃុំក្នុងពន្ធនាគារ លោក ហៃ វណ្ណា បានអំពាវនាវឱ្យពលរដ្ឋខ្មែរ ដែលមានបំណងចង់ផ្ដួលរំលំរដ្ឋាភិបាលកម្ពុជា ត្រូវបញ្ឈប់សកម្មភាពរបស់ខ្លួន និងងាកមកផ្លាស់ប្ដូរមេដឹកនាំ តាមរយៈការបោះឆ្នោតវិញ។
វិទ្យុអាស៊ីសេរី មិនអាចទាក់ទងអ្នកនាំពាក្យគណបក្សប្រជាជនកម្ពុជា លោក សុខ ឥសាន ដើម្បីសុំការបកស្រាយជុំវិញរឿងនេះបានទេ នៅថ្ងៃទី១៨ ខែតុលា។
ទាក់ទិនរឿងនេះ អ្នកធ្វើអត្ថាធិប្បាយនយោបាយ លោក គឹម សុខ យល់ឃើញថា ការចុះចូលរបស់លោក ហៃ វណ្ណា គឺដោយសារលោក ហ៊ុន សែន ចាប់ខ្លួនប្អូនប្រុសរបស់លោកមកគំរាម។ ទោះជាយ៉ាងណាក្ដី លោក គឹម សុខ លើកឡើងថា វិធីចាប់ឈ្លើយសឹកយកមកគំរាមឱ្យចុះចូលរបស់លោក ហ៊ុន សែន នេះ មិនចំណេញដល់បក្សកាន់អំណាចនោះទេ ផ្ទុយទៅវិញ វិធីនេះ នឹងធ្វើឱ្យមហាជនមើលឃើញកាន់តែច្បាស់អំពីឧបាយកលទុច្ចរិតរបស់មេបក្សកាន់អំណាច ដែលប្រើប្រាស់វិធីដូចគ្នាទៅនឹងឧក្រិដ្ឋជនចាប់ជំរិត មកបង្ក្រាបសំឡេងប្រឆាំង។
លោក គឹម សុខ៖ «ក៏ប៉ុន្តែស្ថានភាពពិត ឃើញអ្នកចុះចូលកាន់តែច្រើន គណបក្សប្រជាជនកម្ពុជា និងគ្រួសារលោក ហ៊ុន សែន កាន់តែមិនហ៊ានប្រកួតបោះឆ្នោត។ ដូច្នេះមានន័យថា នយោបាយលោក ហ៊ុន សែន បង្ខំឱ្យគេចុះចូលគណបក្សប្រជាជនកម្ពុជា មិនមានប្រសិទ្ធភាពទេ ក៏ប៉ុន្តែ បង្កើតទៅជាសំអប់របស់ប្រជាពលរដ្ឋខ្មែរ លើគ្រួសារត្រកូលហ៊ុន ទៅវិញ»។
បន្ទាប់ពីលោក ហ៊ុន សែន បង្ហោះវីដេអូរបស់លោក ហៃ វណ្ណា សុំចុះចូលជាមួយគណបក្សប្រជាជនកម្ពុជារួចមក ចលនាសង្គ្រោះជាតិនៅជប៉ុន បានចេញសេចក្ដីប្រកាសព័ត៌មាន ដោយតែងតាំងលោកស្រី មាស ភារ៉ា ជាប្រធានបណ្ដោះអាសន្ន លោកស្រី ម៉ូរី បូរ៉ា ជាអនុប្រធានបណ្ដោះអាសន្ន និងលោកស្រី វ៉ាន់ លក្ខិណា ជាអ្នកនាំពាក្យបណ្ដោះអាសន្ន។
អ្នកឃ្លាំមើលសង្កេតឃើញថា រដ្ឋាភិបាលរបស់ពីរនាក់ឪពុក និងកូនត្រកូល ហ៊ុន តែងតែប្រើប្រាស់ប្រព័ន្ធច្បាប់ និងតុលាការ ដើម្បីដាក់សម្ពាធបង្ខំឱ្យសកម្មជនសង្គម និងនយោបាយធ្វើការសុំទោស ឬបាននៅក្រៅឃុំបណ្ដោះអាសន្ន។ ប៉ុន្តែ សកម្មជននយោបាយមួយចំនួន នៅតែប្ដេជ្ញាចិត្តមិនព្រមចុះចូល ឬសុំទោសលោក ហ៊ុន សែន ឡើយ ដោយសុខចិត្តទទួលទោសគ្រប់ចំនួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments