លោកនាយករដ្ឋមន្ត្រី ហ៊ុន ម៉ាណែត គំរាមដកហូតគម្រោងអភិវឌ្ឍន៍ផ្លូវដែកពីអ្នកឧកញ៉ា គិត ម៉េង បន្ទាប់ពីប្រធានព្រឹទ្ធសភា និងជាឪនាយករដ្ឋមន្ត្រីលោក ហ៊ុន សែន ធ្លាប់ព្រមានដកម្ដងកាលពីឆ្នាំ២០១៩។ អ្នកឃ្លាំមើល លើកឡើងថា ការព្រមានដដែលៗ តែគ្មានវិធានការដែលមានប្រសិទ្ធភាព គ្រាន់តែជាមធ្យោបាយបន្លំយករួចខ្លួន ពីអសមត្ថភាពនៃការដឹកនាំ ឬអាចមានអាថ៌កំបាំងដែលមើលនឹងភ្នែកមិនដឹង។
លោកនាយករដ្ឋមន្ត្រី ហ៊ុន ម៉ាណែត បានព្រមានថា ប្រសិនបើមិនសម្រេចបាននូវអនុស្សរណៈយោគយល់គ្នា រវាងក្រសួងសាធារណៈការ និងដឹកជញ្ជូនជាមួយអ្នកឧកញ៉ា គិត ម៉េង ដើម្បីដំណើរការគម្រោងអភិវឌ្ឍន៍ផ្លូវដែកនៅចុងឆ្នាំនេះទេ លោកនឹងដកគម្រោងផ្លូវដែកពីអ្នកឧកញ៉ា គិត ម៉េង។
នៅក្នុងពិធីអបអរសាទរខួប ២០ឆ្នាំ ដែលកម្ពុជាចូលជាសមាជិកអង្គការពាណិជ្ជកម្មពិភពលោក (WTO) កាលពីថ្ងៃទី១៤ ខែតុលា លោក ហ៊ុន ម៉ាណែត បានថ្លែងថា ទោះបីមិនបានល្អឥតខ្ចោះក៏ដោយ សំខាន់ឱ្យមានដំណើរការចាប់ផ្ដើម ហើយចាំពង្រីកបន្ថែមទៀតជាគោលការណ៍ ដោយលោកអះអាងថា ភាគីចិនក៏បានផ្ដល់ ជំនួយឥតសំណងចំនួន ៣០០លានយ័ន សម្រាប់ការជួសជុលផ្លូវដែកនេះដែរ។
លោក ហ៊ុន ម៉ាណែត៖ «អ៊ីចឹងសូមអ្នកឧកញ៉ា ហើយឯកឧត្ដម ប៉េង ពោធិ៍នា មកទេ ធ្វើម៉េចចរចាឱ្យចប់ (MOU) រឿងផ្លូវនេះ ឱ្យចប់ត្រឹមឆ្នាំនេះ ដើម្បីយើងចាប់ផ្ដើមធ្វើការងារពង្រឹងអាហ្នឹង ព្រោះបើអត់ចរចាចប់ ខ្ញុំដកហើយ»។
អ្នកជំនាញច្បាប់ និងអភិបាលកិច្ចបែបប្រជាធិបតេយ្យ លោក វ៉ន ចាន់ឡូត ប្រាប់ វិទ្យុអាស៊ីសេរី នៅថ្ងៃទី១៥ ខែតុលា ថា ការព្រមានដែលខ្វះឆន្ទៈ និងគ្មានការទទួល ខុសត្រូវក្នុងនាមជាអ្នកដឹកនាំ គ្រាន់តែជាមធ្យោបាយបន្លំយករួចខ្លួនពីអសមត្ថភាពនៃការដឹកនាំរបស់ខ្លួនប៉ុណ្ណោះ។ លោកថា ករណីបែបនេះ មិនមែនដោះស្រាយ ដោយត្រឹមតែជាការព្រមាននោះទេ តែត្រូវទាមទារឱ្យមានតម្លាភាពក្នុងការប្រកួតប្រជែងដេញថ្លៃរកក្រុមហ៊ុន ដែលមានសមត្ថភាពវិនិយោគជាក់ស្ដែង។
លោក វ៉ន ចាន់ឡូត៖ «របៀបនៃការគំរាមនេះ វាគ្រាន់តែទម្រង់មួយ ដើម្បីបង្ហាញថា អ្នកកាន់អំណាចបានយកចិត្តទុកដាក់ អ្នកកាន់អំណាចមិនមានកំហុសទៅបញ្ហាទាំងអស់ហ្នឹង គ្រាន់តែរូបភាពដោះខ្លួនឯងឱ្យមហាជនមើលឃើញថា ខ្លួននៅតែល្អខ្លួននៅតែត្រឹមត្រូវ ក៏ប៉ុន្តែជារឿយៗ យើងឃើញថា បន្ទាប់ពីមាននូវការព្រមានអីជាដើម អ្នកផ្សេងៗ អ្នកទទួលរងការព្រមានត្រង់កន្ទុយតែមួយភ្លេតអ៊ីចឹង បន្ទាប់មករឿងវានៅតែជាដដែល»។
ការព្រមានរបស់លោក ហ៊ុន ម៉ាណែត ដកគម្រោងវិនិយោគផ្លូវដែកពីក្រុមហ៊ុន រ៉ូយ៉ាល់ រេលវេ ខេមបូឌា (Royal Railway Cambodia) របស់អ្នកឧកញ៉ា គិត ម៉េង នេះ មិនមែនជាលើកទី១ នោះទេ។ កាលពីថ្ងៃទី២៩ ខែមីនា ឆ្នាំ២០១៩ លោក ហ៊ុន សែន ជាឪពុក ក៏ធ្លាប់បានប្រកាសសេចក្ដីសម្រេចម៉ឺងម៉ាត់របស់លោក ក្នុងការបញ្ចប់សិទ្ធិធ្វើអាជីវកម្មផ្លូវដែកពីអ្នកឧកញ៉ា គិត ម៉េង ដែរ។ កាលនោះ លោក ហ៊ុន សែន បានលើកហេតុផលថា ក្នុងរយៈពេលជិត ១០ឆ្នាំមកនេះ វិស័យដឹកជញ្ជូនតាមផ្លូវដែក មិនបានជោគជ័យឡើយ។
លោក ហ៊ុន សែន ក្នុងនាមជានាយករដ្ឋមន្ត្រីពេលនោះ បានថ្លែងខ្លាំងៗ ថា បើទុកឱ្យអ្នកឧកញ៉ា គិត ម៉េង បន្តវិនិយោគទៀត មានតែដួលរលំទាំងអស់គ្នា គឺផ្លូវដែក ក៏ដួលរលំ ហើយការដឹកជញ្ជូនតាមផ្លូវដែក ដើម្បីកាត់បន្ថយការកកស្ទះទំនិញ ក៏ទៅមិនរួចដែរ។ លោក ហ៊ុន សែន ថា អ្នកឧកញ៉ា គិត ម៉េង ទើបតែបានផ្គត់ផ្គង់ទូររថភ្លើង និងក្បាលម៉ាស៊ីនរថភ្លើង តែប៉ុន្មានគ្រឿងក្នុងការវិនិយោគជាច្រើនឆ្នាំរបស់ខ្លួន។
លោក ហ៊ុន សែន៖ «ក្រុមហ៊ុន Royal Railway Cambodia ជាទូទៅមិនបានពង្រីកសក្ដានុពលរបស់ខ្លួន និងបានដាក់ទុនលើក្បាលរថភ្លើងទូររថភ្លើងគ្រឿងបរិក្ខារនានា ដើម្បីបំពេញតម្រូវការរបស់អតិថិជន ដែលរួមមានដូចជា ក្រុមហ៊ុនដឹកជញ្ជូន ក្រុមហ៊ុននាំចេញ-ចូល ពាណិជ្ជករ កសិករ និងអ្នកដំណើរជាដើម។ ជារឿយៗ មានរថភ្លើងមួយចំនួនខូច គាំងមិនដំណើរការ»។
តែពីរថ្ងៃ បន្ទាប់ពីលោក ហ៊ុន សែន ថ្លែងអំពីអសមត្ថភាពរបស់ក្រុមហ៊ុន រ៉ូយ៉ាល់ រេលវេ របស់អ្នកឧកញ៉ា គិត ម៉េង និងប្រកាសបញ្ចប់សិទ្ធិវិនិយោគរបស់ក្រុមហ៊ុននេះ ក្រសួងសាធារណៈការនៃរដ្ឋាភិបាលលោក ហ៊ុន សែន នៅថ្ងៃទី៣១ ខែមីនា ឆ្នាំ២០១៩ បានប្រគល់សិទ្ធិវិនិយោគឱ្យអ្នកឧកញ៉ា គិត ម៉េង វិញដដែល។
គ្រានោះ ក្រសួងសាធារណៈនៃរដ្ឋាភិបាលលោក ហ៊ុន សែន បានលើកហេតុផល ថា ត្រូវការពេលគ្រប់គ្រាន់ ក្នុងការសិក្សាឱ្យបានគ្រប់ជ្រុងជ្រោយលើលក្ខខណ្ឌ គតិយុត្តិ និងបច្ចេកទេសពាក់ព័ន្ធ ក្នុងការគ្រប់គ្រងផ្លូវដែកនិងថាក្រសួងសហការ រួមជាមួយក្រុមហ៊ុន រ៉ូយ៉ាល់ រេលវេ ខេមបូឌា (Royal Railway Cambodia) រៀបចំនីតិវិធីជ្រើសរើសក្រុមហ៊ុនជំនាញ ដែលមានសមត្ថភាព ដើម្បីធ្វើទំនើបកម្មផ្លូវដែកកម្ពុជា។ ប៉ុន្តែចាប់តាំងពីពេលនោះមក វិស័យវិនិយោគផ្លូវដែករបស់កម្ពុជានៅតែស្ថិតនៅក្នុងដៃរបស់អ្នកឧកញ៉ា គិត ម៉េង។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវលោក សេក សុជាតិ លើកឡើងថា ការដកយកមកគ្រប់គ្រងខ្លួនឯង ឬប្រគល់ឱ្យក្រុមហ៊ុនណាមួយ ដែលសមត្ថភាពគ្រប់គ្រាន់ ដោយអនុលោមតាមកិច្ចព្រមព្រៀង និងច្បាប់វិនិយោគ គឺជា សិទ្ធិរបស់រដ្ឋាភិបាល បើក្រុមហ៊ុនដែលកំពុងទទួលសិទ្ធិវិនិយោគ មិនអាចធ្វើបាន តាមចក្ខុវិស័យរបស់រដ្ឋាភិបាល។
ទោះជាយ៉ាងណាក្ដី លោក សេក សុជាតិ ថា អាចមានបញ្ហាពីក្រោយនៃការរៀបចំ ដែលមើលនឹងភ្នែកមិនដឹង។
លោក សេក សុជាតិ ៖«បើសិនករណីក្រុមហ៊ុនឯកជនហ្នឹង ឱ្យស្របទៅនឹងចក្ខុវិស័យរបស់រដ្ឋាភិបាល។ អ៊ីចឹងរដ្ឋាភិបាលអាចពិចារណាថា គួរដកមកកាន់ខ្លួនឯង ឬអាចផ្ទេរទៅក្រុមហ៊ុនណាមួយ ដែលមានលទ្ធភាពជាងក្រុមហ៊ុនរបស់អ្នកឧកញ៉ា គិត ម៉េង នាពេលបច្ចុប្បន្នជាដើម។ ដូច្នេះ នេះសុទ្ធសឹងតែជាប្រធានបទដែលយើងមើលឃើញថា នៅពីក្រោយខ្នងមានភាពអាថ៌កំបាំងរវាងវិស័យឯកជននិងរាជរដ្ឋាភិបាល ដែលពិបាកក្នុងការវាយតម្លៃឱ្យឃើញនឹងភ្នែកធម្មតាបាន»។
អ្នកឧកញ៉ា គិត ម៉េង គឺជាប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សា ពិគ្រោះយោបល់ធុរកិច្ចអាស៊ានសម្រាប់កម្ពុជា ហើយជាអ្នកជំនួញសិ្នទនឹងគ្រួសារ ត្រកូលហ៊ុន ដែលកំពុងកាន់អំណាច។
អ្នកឃ្លាំមើល លើកឡើងថា ការព្រមានដកការវិនិយោគផ្លូវដែកដដែលៗពីលោក គិត ម៉េង តាំងពីនាយករដ្ឋមន្ត្រីឪដល់នាយករដ្ឋមន្ត្រីកូន ប៉ុន្តែនៅតែប្រគល់សិទ្ធិវិនិយោគឱ្យឧកញ៉ារូបនេះដដែល អាចមានហេតុផល ដែលរដ្ឋាភិបាលត្រកូលហ៊ុន កំពុងប្រឈមនឹងភាពស្មុកស្មាញ ក្នុងវិស័យដឹកជញ្ជូន ដែលធ្វើឱ្យទំនិញនាំចេញពីកម្ពុជា មានតម្លៃកាន់តែខ្ពស់ ពិបាកប្រកួតប្រជែងជាមួយប្រទេសជិតខាង។
ការព្រមានជាថ្មីរបស់លោក ហ៊ុន ម៉ាណែត នៅស្របពេលដែលប្រទេសកម្ពុជា ជួប ផលលំបាក ដោយសារតែបន្តបាត់បង់ប្រព័ន្ធអនុគ្រោះពន្ធពាណិជ្ជកម្មEBA របស់ អឺរ៉ុប ២០ភាគរយ និងខកខានទាំងស្រុង ក្នុងការបន្ដប្រព័ន្ធអនុគ្រោះពន្ធពាណិជ្ជ កម្មGSP របស់សហរដ្ឋអាមេរិក នៅស្របពេលដែលកម្ពុជា កំពុងដើរលើផ្លូវកាន់តែចង្អៀត ក្នុងវិស័យវិនិយោគអន្តរជាតិរបស់ខ្លួន ខណៈសហរដ្ឋអាមេរិកដាក់ទណ្ឌកម្ម លើអ្នកជំនួញជំនិតនៃក្រុមគ្រួសារត្រកូលហ៊ុន គឺលោកអ្នកឧកញ៉ា លី យ៉ុងផាត់។
ផ្លូវដែកប្រទេសកម្ពុជាមានចំនួន ២ខ្សែ មានប្រវែងសរុប ៦៥១ គីឡូម៉ែត្រ។ ខ្សែទី ១ ពីភ្នំពេញទៅប៉ោយប៉ែត ព្រំដែនកម្ពុជា-ថៃ មានប្រវែង ៣៨៥ គីឡូម៉ែត្រ ដោយឆ្លងកាត់ភ្នំពេញ ខេត្តកណ្ដាល កំពង់ស្ពឺ កំពង់ឆ្នាំង ខេត្តពោធិ៍សាត់ បាត់ដំបង និងបន្ទាយមានជ័យ ដែលសាងសង់កាលពីសម័យអាណានិគមនិយមបារាំង។
ខ្សែពីរ គឺភ្នំពេញទៅដល់កំពង់ផែខេត្តព្រះសីហនុ មានប្រវែង២៦៦ គីឡូម៉ែត្រ ដោយឆ្លងកាត់ភ្នំពេញ ខេត្តកណ្ដាល តាកែវ កំពត កែប និងខេត្តព្រះសីហនុ ដែលសាងសង់នៅសម័យសង្គមរាស្ត្រនិយម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments