អ្នកឃ្លាំមើលសង្គម និងមន្ត្រីគណបក្សប្រឆាំងគ្មានជំនឿថា ការរៃអង្គាសប្រាក់ពីពលរដ្ឋដើម្បីយកទៅកសាងហេដ្ឋារចនាសម្ព័ន្ធតាមបណ្ដោយព្រំដែនរបស់លោក ហ៊ុន ម៉ាណែត មិនមានតម្លាភាពក្នុងចាយវាយថវិកាឡើយ ស្របពេលដែលមន្ត្រីក្នុងស្ថាប័នរដ្ឋមួយចំនួនគឺសុទ្ធសឹងតែជាបក្ខពួកក្រុមគ្រួសារត្រកូលហ៊ុន។ ការលើកឡើងបែបនេះគឺធ្វើឡើងបន្ទាប់ពី លោកនាយករដ្ឋមន្ត្រី ហ៊ុន ម៉ាណែត ប្រកាសថា ផែនការរៃអង្គាសប្រាក់កសាងផ្លូវក្រវាត់ព្រំដែននៅតែបន្ត ហើយបច្ចុប្បន្នរដ្ឋាភិបាលរបស់លោកប្រមូលលុយបាន ២១លានដុល្លារអាមេរិកហើយ។
ក្រោយពេលដែលប្រធានព្រឹទ្ធសភា និងជាឪនាយករដ្ឋមន្ត្រី លោក ហ៊ុន សែន បានប្រកាសដកកម្ពុជាចេញពីកិច្ចសហប្រតិបត្តិការតំបន់ត្រីកោណអភិវឌ្ឍន៍ (CLV-DTA) ជាមួយឡាវ និងវៀតណាម កាលពីថ្ងៃទី២០ ខែកញ្ញា មកកូនប្រុសរបស់លោកគឺ លោក ហ៊ុន ម៉ាណែត ប្ដេជ្ញាចិត្តយកលុយដែលបានមកពីការរៃអង្គាសប្រាក់យកទៅកសាងផ្លូវក្រវាត់ព្រំដែន។
អតីតអ្នកតំណាងរាស្ត្រគណបក្សសង្គ្រោះជាតិ លោក អ៊ំ សំអាន ប្រាប់វិទ្យុអាស៊ីសេរីនៅថ្ងៃទី២៣ ខែកញ្ញា ថា លោកគាំទ្រឱ្យមានការកសាងហេដ្ឋារចនាសម្ព័ន្ធនៅតាមបណ្ដោយព្រំដែន ប៉ុន្តែលោកមិនទុកចិត្តលើការប្រើប្រាស់ថវិកាដែលគ្មានតម្លាភាពឡើយ ពីព្រោះលោក ហ៊ុន ម៉ាណែត នៅមិនទាន់បង្ហាញពីផែនការចំណាយច្បាស់លាស់ក្នុងការកសាងនៅឡើយ។ លោកបន្តថា ការប្រកាសសាងសង់ផ្លូវក្រវាត់ព្រំដែនរបស់លោក ហ៊ុន ម៉ាណែត នេះគឺដើម្បីបញ្ចៀសការរិះគន់ពីពលរដ្ឋ ហើយការកសាងផ្លូវក្រវាត់ព្រំដែននេះគឺបម្រើផលប្រយោជន៍ឱ្យពលរដ្ឋវៀតណាមច្រើនជាង។
លោក អ៊ំ សំអាន៖ «ការអភិវឌ្ឍន៍នៅតាមព្រំដែនវាមិនខុសទេវាត្រូវហើយគ្រាន់តែការធ្វើផ្លូវមិនអាចការពារព្រំដែនរបស់យើងបាននោះទេការពារទឹកដីរបស់យើងបាននោះទេ។ ប្រសិនបើយើងមិនអភិវឌ្ឍន៍នៅតាមព្រំដែនហ្នឹងឱ្យប្រជាពលរដ្ឋមានការងារធ្វើ ឱ្យពលរដ្ឋនៅតាមព្រំដែនអាចរស់នៅបានមិនបានជួយឱ្យកម្មករនៅតាមព្រំដែនកសិផលរបស់ពួកគាត់មានទីផ្សារគាត់មិនអាចរស់នៅតាមព្រំដែនបានគឺអភិវឌ្ឍន៍ហ្នឹងគ្មានន័យនោះទេអភិវឌ្ឍន៍ហ្នឹងមិនអាចការពារបូរណភាពទឹកដីរបស់បាននោះទេ»។
កាលពីថ្ងៃទី២២ ខែកញ្ញា លោក ហ៊ុន ម៉ាណែត បានបង្ហោះសារជាសំឡេងនៅលើគណនីហ្វេសប៊ុករបស់លោកថា បើទោះជារដ្ឋាភិបាលកម្ពុជាបានដកខ្លួនចេញពីកិច្ចសហប្រតិបត្តិការតំបន់ត្រីកោណអភិវឌ្ឍន៍ (CLV-DTA) យ៉ាងណាក៏ដោយក្ដីក៏លោកលុយដែលលោកបានរៃអង្គាសពីពលរដ្ឋយកទៅកសាងហេដ្ឋារចនាសម្ព័ន្ធនៅតាមព្រំដែន នៅតែបន្តសាងសង់ដើម្បីថែរក្សាបូរណភាពទឹកដី។ លោក ហ៊ុន ម៉ាណែត បញ្ជាក់ថា លុយដែលលោកទទួលបានពីការរៃអង្គាសមានចំនួន ២១លានដុល្លារអាមេរិក (២១.០០០.០០០$) ដែលមានពលរដ្ឋចំនួន៧០ ម៉ឺននាក់ចូលរួមបរិច្ចាគ ហើយលោកនឹងឈប់ទទួលលុយត្រឹមថ្ងៃទី៣១ ខែតុលា។
លោក ហ៊ុន ម៉ាណែត៖ «ខ្ញុំសូមថ្លែងអំណរគុណដល់ពលរដ្ឋខ្មែរទាំងក្នុង និងក្រៅប្រទេសគ្រប់មជ្ឈដ្ឋានដែលបានចូលរួមបរិច្ចាគថវិកាដោយស្ម័គ្រចិត្តដល់មូលនិធិកសាងហេដ្ឋារចនាសម្ព័ន្ធតាមព្រំដែនដែលផ្ដោតលើការកសាងផ្លូវក្រវាត់ព្រំដែន។ គិតមកដល់ពេលនេះ មានប្រមាណ៧០ម៉ឺននាក់ដែលបានស្ម័គ្រចិត្តចូលរួម និងថវិកាប្រមាណ២១លានដុល្លារអាមេរិក វិភាគទានស្ម័គ្រចិត្តដែលទទួលបានទាំងអស់នេះនឹងត្រូវយកទៅប្រើប្រាស់នៅក្នុងការកសាងហេដ្ឋារចនាសម្ពន្ធនៅតាមព្រំដែនដែលផ្ដោតលើការកសាងផ្លូវក្រវាត់ព្រំដែន»។
វិទ្យុអាស៊ីសេរីមិនអាចទាក់ទង អ្នកនាំពាក្យនាយករដ្ឋមន្ត្រី លោក មាស សោភ័ណ្ឌ ដើម្បីសុំការបញ្ជាក់បន្ថែមជុំវិញរឿងនេះបាននៅឡើយទេនៅថ្ងៃទី២៣ ខែកញ្ញា។
ថ្វីត្បិតលោក ហ៊ុន ម៉ាណែត ចេញមុខអះអាងថា លោកនៅតែកសាងផ្លូវក្រវាត់ព្រំដែនបើទោះជារដ្ឋាភិបាលបិទបញ្ចប់កិច្ចសហប្រតិបត្តិការតំបន់ត្រីកោណអភិវឌ្ឍន៍ក្ដី ក៏អ្នកឃ្លាំមើលយល់ឃើញថា ការចេញមុខប្រកាសរបស់លោក ហ៊ុន ម៉ាណែត បែបនេះគឺដើម្បីបង្វែរស្ថានការណ៍នយោបាយ ហើយពួកគេថា ប្រសិនបើរដ្ឋាភិបាលពិតជាចង់ការពារបូរណភាពទឹកដី និងអធិបតេយ្យភាពពិតប្រាកដគឺ ត្រូវពង្រឹងការអនុវត្តច្បាប់អន្តោប្រវេសន៍ និងដកហូតដីសម្បទានសេដ្ឋកិច្ចទាំងអស់ពីក្រុមហ៊ុនវៀតណាម ព្រមទាំងលុបចោលសន្ធិសញ្ញាព្រំដែនទាំងឡាយណាដែលពួកគេចោទថា ធ្វើឱ្យកម្ពុជាបាត់បង់ទឹកដីទៅប្រទេសវៀតណាមកន្លងមក។
ជុំវិញរឿងនេះ ប្រធានក្រុមប្រឹក្សាឃ្លាំមើលកម្ពុជាលោក ម៉ែន ណាត មានប្រសាសន៍ថា ការកសាងហេដ្ឋារចនាសម្ព័ន្ធគឺជាកាតព្វកិច្ចរបស់រដ្ឋាភិបាលជាអ្នកទទួលខុសត្រូវពោលគឺមិនមែនពលរដ្ឋនោះឡើយ។ លោកបន្តថា ដើម្បីធ្វើឱ្យការចាយវាយថវិកាជាតិមានតម្លាភាពគឺទាល់តែមានការអនុម័តចេញពីស្ថាប័នរដ្ឋសភា និងព្រឹទ្ធសភាប៉ុន្តែបច្ចុប្បន្នស្ថាប័នទាំងពីរនោះស្ថិតក្រោមការបង្គាប់បញ្ជារបស់លោក ហ៊ុន សែន ដូច្នេះលោកគ្មានសង្ឃឹមថា ថវិកាដែលរៃអង្គាសមកពីពលរដ្ឋនោះនឹងប្រើប្រាស់ឱ្យមានតម្លាភាពនោះទេ។
លោក ម៉ែន ណាត៖«បើលោក ហ៊ុន ម៉ាណែត ជ្រុលជាធ្វើអ៊ីចឹងចេញសេចក្ដីប្រកាសអីតាមបណ្ដាញសង្គមហ្វេសប៊ុកអ៊ីចឹងក៏មិនអាចទាន់ឱ្យពលរដ្ឋជឿទុកចិត្តបានទេ ប៉ុន្តែយើងជំរុញមួយផ្នែកទៀតឱ្យលោក ហ៊ុន ម៉ាណែត យកទាំងចំនួនទឹកលុយ និងទាំងការអនុវត្តជាក់ស្ដែងហ្នឹងឱ្យរដ្ឋសភាដឹងទៅយ៉ាងហោចណាស់ក៏ វាជួយសម្រាលលើការស្ដីបន្ទោសមួយចំនួនឱ្យរដ្ឋសភាជួយអនុម័ត»។
អ្នកឃ្លាំមើលសង្គម និងមន្ត្រីបក្សប្រឆាំងទាមទារឱ្យលោក ហ៊ុន ម៉ាណែត បង្ហាញពីតម្លាភាពពីគម្រោងចាយវាយលុយក្នុងការកសាងហេដ្ឋារចនាសម្ព័ន្ធតាមបណ្ដោយព្រំដែនជាសាធារណៈពីព្រោះកន្លងទៅរាល់គម្រោងអភិវឌ្ឍន៍មួយចំនួនគឺក្រុមគ្រួសារត្រកូល«ហ៊ុន»តែងលាក់បាំង និងផ្ដល់សិទ្ធិឱ្យក្រុមហ៊ុនដែលជាប់ពាក់ព័ន្ធនឹងការរកស៊ីទុច្ចរិត និងការរំលោភយកដីធ្លីពលរដ្ឋជាអ្នកទទួលបានសិទ្ធិអភិវឌ្ឍន៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments