ថ្នាក់ដឹកនាំសហជីពនៃក្រុមហ៊ុនកាស៊ីណូ ណាហ្គា វើលដ៏ (Naga World) ចំនួន៣រូបត្រូវបានក្រុមហ៊ុននេះ កោះហៅទៅប្រាប់ពីការបញ្ចប់កិច្ចសន្យាការងារ។ ការកោះហៅនេះ ធ្វើឡើងបន្ទាប់ពី សហជីពនេះ ស្នើឲ្យភាគីថៅកែបញ្ឈប់គម្រោងបញ្ចប់កិច្ចសន្យាកម្មករនិយោជិតជាង ១ ពាន់ ៣រយនាក់ (១.៣២៩) ពីការងារ ដែលក្រុមហ៊ុនសំអាងថា ដើម្បីទប់ស្កាត់ការឆ្លងរាលដាលជំងឺកូវីដ-១៩។ ថ្នាក់ដឹកនាំសហជីពនៃក្រុមហ៊ុនកាស៊ីណូ ណាហ្គា វើលដ៏ យល់ថា ការបញ្ចប់កិច្ចសន្យាការងារ គឺជាការរើសអើង និងចង់លុបបំបាត់សហជីពនៅក្នុងក្រុមហ៊ុន។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនកាស៊ីណូ ណាហ្គា វើលដ៍ (Naga world) កញ្ញា ឈឹម ស៊ីថរ ថ្លែងនៅយប់ថ្ងៃទី២៧ ឧសភា ថា ថ្នាក់ដឹកនាំសហជីពនៃក្រុមហ៊ុនកាស៊ីណូ ណាហ្គា វើលដ៏ ៣ នាក់ក្នុងនោះមានកញ្ញាផងត្រូវបានក្រុមហ៊ុនកោះហៅទៅបញ្ចប់កិច្ចសន្យាការងារ។ កញ្ញាបន្តថា ថ្នាក់ដឹកនាំទាំង ៣រូប រួមទាំងសកម្មជនសហជីពគ្រប់ផ្នែក មានឈ្មោះក្នុងបញ្ជីកាត់ចេញពីបុគ្គលិកក្រុមហ៊ុន និងត្រូវបញ្ចប់កិច្ចសន្យាការងារ។ កញ្ញាបញ្ជាក់ថា នេះបានធ្វើឲ្យឃើញរូបភាពកាន់តែច្បាស់លាស់ថា ក្រុមហ៊ុនមានចេតនាលុបបំបាត់សហជីព និងរើសអើងសហជីពយ៉ាងជាក់ច្បាស់ ដែលក្រុមហ៊ុនមិនគោរពតាមនីតិវិធីច្បាប់ឡើយ៖ «យើងឃើញថា ថ្នាក់ដឹកនាំសហជីព និងសកម្មជនសហជីពទាំងអស់គឺមានច្បាប់អនុញ្ញាតពីអធិការកិច្ចការងារសិនថា មានការយល់ព្រមពីរដ្ឋមន្ត្រីអីឲ្យបញ្ឈប់ក្រោមហេតុផលអីទៀត ហើយរដ្ឋមន្ត្រីនិងអធិការកិច្ចការងារហ្នឹងមិនមែនចេះតែយើងព្រមដោយគ្មានហេតុផលទៀត។ ប៉ុន្តែយើងអត់ឃើញមានលិខិតក្នុងការយល់ព្រមអីទេ ប៉ុន្តែភាគីក្រុមហ៊ុនចាត់ចែងជាឯកតោភាគីតែម្ដងក្នុងការលុបបំបាត់សហជីពតាមរយៈការបញ្ឈប់ទាំងក្រុមពីថ្នាក់ដឹកនាំសហជីពទាំងអស់ហ្នឹងតែម្ដង»។
ថ្នាក់ដឹកនាំសហជីពនៃក្រុមហ៊ុនកាស៊ីណូ ណាហ្គា វើលដ៏ ដែលត្រូវបានក្រុមហ៊ុននេះ ជូនដំណឹងកោះហៅទាំង៣ នាក់ នោះ គឺប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ កញ្ញា ឈឹម ស៊ីថរ អនុប្រធានសហជីព អ្នកស្រី ឈុន សុខា និងអគ្គលេខាធិការ កញ្ញា ឈឹម សុខន។ ពួកគេត្រូវក្រុមហ៊ុនចេញលិខិតជូនដំណឹងកោះហៅទៅជួបជាបន្តបន្ទាប់ នៅថ្ងៃទី២៧ និងថ្ងៃទី២៨ ឧសភា ក្រោមការសម្រេចរបស់ក្រុមហ៊ុនអំពីការអនុវត្តផែនការកាត់បន្ថយបុគ្គលិក តាមរយៈការបញ្ចប់កិច្ចសន្យាការងារដោយមានការព្រមព្រៀង។
អាស៊ីសេរី មិនអាចសុំការឆ្លើយតបរឿងនេះ ពីតំណាងក្រុមហ៊ុនណាហ្គា វើលដ៍ កញ្ញា ឌី សីហា និងអ្នកនាំពាក្យក្រសួងការងារ លោក ទេស រុក្ខាផល បាននៅឡើយទេ កាលពីថ្ងៃទី២៧ ឧសភា។
កញ្ញា ឈឹម ស៊ីថរ មានជំហរថា ពួកគាត់នឹងទៅជួបក្រុមហ៊ុនលុះណាតែអមជាមួយថ្នាក់ដឹកនាំចរចាក្នុងនាមសហជីពជាក្រុម មិនមែនទៅក្នុងនាមបុគ្គលម្នាក់ៗជាមួយក្រុមហ៊ុននោះឡើយ។ ចំណែកដំណើរការប្រមូលស្នាមមេដៃដាក់ពាក្យបណ្ដឹងទៅក្រសួងការងារក៏នឹងធ្វើឡើងស្របគ្នាដែរ៖ «មែនទែនទៅជួបជាលក្ខណៈបុគ្គលអ៊ីចឹងគឺយើងអត់អាចទៅជួបបានទេ គឺយើងទៅជួបក្នុងក្របខណ្ឌជាការចរចារវាងក្រុមហ៊ុន និងក្រុមសហជីពតំណាងបុគ្គលិក ហ្នឹងបានយើងទៅជួបចរចា ព្រោះយើងមិនមែនជាបុគ្គលិកធម្មតាទេ យើងជាថ្នាក់ដឹកនាំហើយមានច្បាប់ការពារពិសេស ច្បាប់ស្ដីពីការងារ ហើយច្បាប់សហជីពក៏មាននិយាយដែរ ហើយច្បាប់អន្តរជាតិក៏មានចែងដែរ ព្រោះយើងទាំងអស់គ្នាសុទ្ធតែមានតួនាទីនៅក្នុងថ្នាក់ដឹកនាំសហជីព»។
ថ្នាក់ដឹកនាំសហជីព និងកម្មករនិយោជិតជាង ១ ពាន់ ៣រយនាក់ (១.៣២៩) ក្នុងចំណោមជាង ៨ពាន់នាក់ ត្រូវបានក្រុមហ៊ុនកាស៊ីណូ ណាហ្គា វើលដ៍ មានគម្រោងបញ្ឈប់ពីការងារ ដោយក្រុមហ៊ុនសំអាងថា ដើម្បីទប់ស្កាត់ការឆ្លងរាលដាលជំងឺកូវីដ-១៩។
សហជីពស្នើសុំឲ្យក្រសួងការងារ ចុះធ្វើកិច្ចអន្តរាគមន៍ដល់ក្រុមហ៊ុននេះ រក្សាទុកពួកគេឲ្យនៅបន្តធ្វើការតាមផ្នែកដដែល គិតគូរផ្ដល់អត្ថប្រយោជន៍ការងារស្របតាមច្បាប់ស្ដីពីការងារ ហើយផ្ដល់ប្រាក់អតីតភាពការងារដែលបានពន្យារពេលកន្លងមក ឲ្យកម្មករនិយោជិតនៅពេលនេះ ដើម្បីដោះស្រាយបញ្ហាជីវភាពខ្វះខាតក្នុងអំឡុងវិបត្តិជំងឺកូវីដ-១៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments