មន្ត្រីជាន់ខ្ពស់រដ្ឋាភិបាលអះអាងថា រដ្ឋាភិបាលកំពុងរៀបចំបង្កើតស្ថាប័នសិទ្ធិមនុស្សជាតិមួយ ដើម្បីលើកស្ទួយសិទ្ធិមនុស្ស ប៉ុន្តែមន្ត្រីសង្គមស៊ីវិល ជឿថាស្ថាប័នថ្មីនេះ នឹងមិនបានជួយឲ្យស្ថានភាពសិទ្ធិមនុស្សនៅកម្ពុជាប្រសើរឡើងនោះទេ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការ លីកាដូ (LICADHO) លោក អំ សំអាត ថ្លែងថា ស្ថាប័នសិទ្ធិមនុស្សជាតិ ត្រូវតែជាស្ថាប័នឯករាជ្យ ហើយជាយន្តការថ្នាក់ជាតិក្នុងដោះស្រាយ និងលើកកម្ពស់សិទ្ធិមនុស្សនៅកម្ពុជា។ លោកថា ក្នុងអំឡុងឆ្នាំ២០០៥ អង្គការសង្គមស៊ីវិលធ្លាប់បានជជែកជាមួយរដ្ឋាភិបាល ដើម្បីបង្កើតស្ថាប័នសិទ្ធិមនុស្សមួយនេះ ប៉ុន្តែត្រូវអាក់ខានទៅវិញនៅពេលដែលសង្គមស៊ីវិលមើលឃើញថា ឯករាជភាពរបស់ស្ថាប័នមួយនេះ មិនច្បាស់លាស់។ លោកយល់ ថា រដ្ឋាភិបាលគ្រោងបង្កើតស្ថាប័ននេះឡើង គ្រាន់តែដើម្បីឆ្លើយតបទៅនឹងរបាយការណ៍ របស់ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា និងឆ្លើយតបទៅកាន់សហភាពអឺរ៉ុប ដែលទាមទារឲ្យកម្ពុជាស្តារ ប្រជាធិបតេយ្យ និងការគោរពសិទ្ធិមនុស្សវិញប៉ុណ្ណោះ៖ «យើងគាំទ្របើសិនជាមានស្ថាប័នជាតិសិទ្ធិមនុស្សបង្កើតឡើងដោយឯករាជ្យ ធ្វើការក្នុងនាមឯករាជ្យ គឺជាការល្អ ប៉ុន្តែបើមិនមានភាពឯករាជ្យពិតប្រាកដទេ ខ្ញុំគិតថាវាឥតអាចជួយអីបានច្រើនទាក់ទង និងកិច្ចការសិទ្ធិមនុស្សបានទេបាទ»។
ប្រតិកម្មរបស់មន្ត្រីអង្គការសង្គមស៊ីវិលនេះ ធ្វើឡើងបន្ទាប់ពីគណៈកម្មាធិការសិទ្ធិមនុស្សកម្ពុជាបានអះអាងថា រដ្ឋាភិបាលនឹងបង្កើតស្ថាប័នសិទ្ធិមនុស្សជាតិមួយឱ្យបានឆាប់។
អនុប្រធានគណៈកម្មាធិការសិទ្ធិមនុស្សកម្ពុជា និងជារដ្ឋលេខាធិការក្រសួងយុត្តិធម៌ លោក ជិន ម៉ាលីន ថ្លែងប្រាប់ក្រុមអ្នកសារព័ត៌មានក្រោយជំនួបរវាងថ្នាក់ដឹកនាំគណៈកម្មាធិការសិទ្ធិមនុស្សកម្ពុជាជាមួយឯកអគ្គរាជទូតអូស្ត្រាលីប្រចាំនៅកម្ពុជា លោក ប៉ាប្លូ កង (Pablo Kang) កាលពីថ្ងៃទី១៩ មិថុនាថា សេចក្ដីព្រាងច្បាប់ស្ដីពីការបង្កើតស្ថាប័នសិទ្ធិមនុស្សជាតិនេះត្រូវបានតាក់តែងចប់សព្វគ្រប់ហើយ។ លោកអះអាងថា គណៈកម្មាធិការសិទ្ធិមនុស្សកម្ពុជានឹងប្រឹងប្រែងបង្កើតស្ថាប័ននេះឱ្យបាននៅក្នុងអាណត្តិទី៦ នេះ។ លោកបញ្ជាក់ថា ស្ថាប័ននេះមិនមែនជាសេនាធិការរបស់រដ្ឋាភិបាលនោះទេ តែជាស្ថាប័នជួយសម្រួលដល់រដ្ឋាភិបាលក្នុងការលើកស្ទួយសិទ្ធិមនុស្ស ដូចជាអង្គការសង្គមស៊ីវិលដែរ។
ទោះជាបែបនេះក្តី ប្រធានកម្មវិធីសមាគមបណ្ដាញយុវជនកម្ពុជា (CYN) លោក ស ម៉ូរី យល់ថា បើសមាសភាពនៃថ្នាក់ដឹកនាំ និងហិរញ្ញវត្ថុរបស់ស្ថាប័ននេះចេញមកពីរដ្ឋាភិបាល ស្ថាប័ននេះនឹងមិនឯករាជ្យឡើយ។ លោកបន្តថា សំពាធនយោបាយក៏អាចធ្វើឲ្យស្ថាប័នមួយនេះ មិនហ៊ាន រិះគន់ករណីរំលោភសិទ្ធិមនុស្សពីសំណាក់រដ្ឋាភិបាលបានដែរ។ លោកជឿថា ទោះជាស្ថាប័ននេះ ត្រូវបង្កើតឡើងក៏ដោយ ក៏មិនអាចឲ្យសហភាព អឺរ៉ុប លុបកម្ពុជាចេញពីការដកការអនុគ្រោះពន្ធ អ៊ីប៊ីអេ (EBA) បានទេ៖ « ព្រោះខ្ញុំមើលឃើញថា ស្ថានភាពសិទ្ធិមនុស្សរបស់កម្ពុជានៅតែសិ្ថតនៅក្រោមការរឹតត្បិត ជាពិសេសការរឹតត្បិតទៅលើសេរីភាពជាមូលដ្ឋាន រួមមាន សេរីភាពក្នុងការបញ្ចេញមតិ សេរីភាពក្នុងជួបប្រជុំដោយសន្តិវិធី សេរីភាពសមាគម ហើយយើងឃើញថា ស្ថានភាពសេរីភាពសារពត៌មាននៅក្នុងប្រទេសកម្ពុជាមិនទាន់បានល្អប្រសើរទេ»។
សហគមន៍អន្តរជាតិ វាយតម្លៃថា វិស័យសិទ្ធិមនុស្សនៅកម្ពុជាបានធ្លាក់ដុនដាបខ្លាំង ដោយសាររបបលោក ហ៊ុន សែន បានចាប់មេបក្សប្រឆាំងលោក កឹម សុខា ដាក់ពន្ធនាគារ ដោយចោទប្រកាន់ខ្វះមូលដ្ឋានពីបទក្បត់ជាតិ រំលាយគណបក្សសង្គ្រោះជាតិ ហើយយកអាសនៈសភា និងក្រុមប្រឹក្សាឃុំសង្កាត់របស់បក្សនេះ ទៅចែកគ្នាកាន់កាប់ និងការហាមប្រាមអ្នកនយោបាយបក្សនេះជាង ១១៨នាក់ មិនឱ្យធ្វើសកម្មភាពនយោបាយរយៈពេល ៥ឆ្នាំ ជាដើម។ ជាងនេះទៅទៀត របបនេះបានវាយបង្ក្រាបឥតស្រាកស្រាន្តលើសេរីភាពសារព័ត៌មាន និងការបញ្ចេញមតិ។ និន្នាការចុងក្រោយនេះ គឺការចោទប្រកាន់ និងចាបខ្លួនសកម្មជនគណបក្សសង្គ្រោះជាតិ ដោយចោទប្រកាន់ពីបទរួមគំនិតក្បត់ជាតិ និងបទញុះញង់ជាដើម។
ទង្វើរំលោភបំពានទាំងនេះបានធ្វើឱ្យគណៈកម្មការអឺរ៉ុបសម្រេចចិត្តដកហូតប្រព័ន្ធអនុគ្រោះពន្ធ EBA ចំនួន២០% ពីកម្ពុជា ហើយសេចក្តីសម្រេចនេះនឹងចូលជាធរមាននៅខែសីហាខាងមុខនេះ ប្រសិនបើគ្មានការជំទាស់ពីសភា និងក្រុមប្រឹក្សាអឺរ៉ុបទេនោះ។
គណៈកម្មការអឺរ៉ុបបានបញ្ជាក់ប្រាប់របបលោក ហ៊ុន សែន ជាច្រើនដងរួចមកហើយថា ដើម្បីរក្សាបានការអនុគ្រោះពន្ធ EBA ទាំងស្រុង គឺកម្ពុជាត្រូវតែកែលម្អស្ថានភាពនយោបាយ និងលើកកម្ពស់វិស័យសិទ្ធិមនុស្សឲ្យប្រសើរឡើងវិញ។
ទាក់ទងនឹងរឿងសិទ្ធិមនុស្សនេះដែរ រដ្ឋាភិបាលស៊ុយអែត បានប្រកាសបញ្ឈប់ការផ្ដល់ជំនួយអភិវឌ្ឍទ្វេភាគីដល់រដ្ឋាភិបាលកម្ពុជា យ៉ាងយូរបំផុតត្រឹមថ្ងៃទី១ ខែកក្កដា ឆ្នាំក្រោយ ហើយស៊ុយអែត នឹងងាកមកផ្ដោតលើសកម្មភាពសិទ្ធិមនុស្ស ប្រជាធិបតេយ្យ និងនីតិរដ្ឋវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments