រយៈពេលជិតមួយឆ្នាំនេះ ការនាំចេញអង្ករ ចេញទៅលក់នៅក្រៅប្រទេស បានធ្លាក់ចុះ ១៣ភាគរយ។ របាយការណ៍ ស្ដីពីការនាំចេញអង្ករ បង្ហាញថា រយៈពេល១១ខែ កម្ពុជានាំចេញអង្ករសរុប បានជិត ៥សែនតោន។ អ្នកជំនាញផ្នែកកសិកម្ម បារម្ភថា ការនាំចេញអង្ករអាចបន្តធ្លាក់ចុះខ្លាំងជាងនេះ ដោយសារតែ សហភាពអឺរ៉ុបកំពុងរឹតបន្តឹងវិធានការទារពន្ធនាំចូលអង្ករ ពីរបបក្រុងភ្នំពេញ។
ប្រធានសម្ព័ន្ធសមាគមកសិករកម្ពុជា លោក ថេង សាវឿន យល់ថា កត្តាដែលនាំឲ្យការនាំចេញអង្ករធ្លាក់ចុះជាង១០ភាគរយ ដោយសារតែ កំណើននៃការប្រកួតប្រជែងក្រុមប្រទេសផលិតអង្ករ នៅទូទាំងពិភពលោក កត្តាបច្ចេកទេសផលិតរបស់កសិករ ការវេចខ្ចប់ផលិតផលនាំចេញ និងកត្តានយោបាយការទូត នៃរបបក្រុងភ្នំពេញ ជាមួយបណ្ដាប្រទេសនាំចូលអង្ករពីកម្ពុជា។ លោក ថេង សាវឿន បារម្ភថា ការនាំចេញអង្ករ អាចធ្លាក់ចុះ ច្រើនជាង១០ភាគរយ៖ «យើងមិនទាន់អាចសន្និដ្ឋានបានទេ ពីព្រោះថា ឥឡូវនេះ គ្រប់គ្នា មិនអាចសន្និដ្ឋានបានទេ ថា ធ្លាក់ចុះត្រឹម១០ភាគរយ ឬយ៉ាងណា? អ្វីត្រឹម១០ (១១) ខែនេះ មើលទៅយើងមិនអាចសន្និដ្ឋានថា វានឹងអាចប៉ះពាល់ដល់កសិករកម្រិតណាទេ។ តែយើងរង់ចាំ នៅពេលដែលសហភាពអឺរ៉ុបធ្វើការឆ្លើយតបទៅនឹងការសម្រេចចុងក្រោយ តើពួកគេ (EU) ទទួលឲ្យកម្ពុជានាំអង្ករចូលដោយឥតគិតពន្ធ ឬគិតពន្ធ? អ៊ីចឹងបើគិតពន្ធ យើង (កម្ពុជា) នឹងអាចប្រឈមនឹងបញ្ហាធំ»។
របាយការណ៍ស្ដីពីស្ថានភាពនៃការនាំចេញអង្ករកម្ពុជា ប្រចាំខែវិច្ឆិកា របស់លេខាធិការដ្ឋានច្រកចេញចូលតែមួយសម្រាប់បែបបទនាំចេញអង្ករ បង្ហាញថា ក្នុងខែវិច្ឆិកា កម្ពុជាបាននាំអង្ករចេញចំនួនជាង៦ម៉ឺន (៦២.៤៣៣) តោន ធ្លាក់ចុះជាង ១២ភាគរយ បើធៀបនឹងការនាំចេញ សម្រាប់ខែវិច្ឆិកា ឆ្នាំ២០១៧។
ចំណែកការនាំចេញអង្ករ រយៈពេល១១ខែ នៃឆ្នាំ២០១៨ បានចំនួនជាង ៤សែនតោន (៤៩៧.២៤០) តោន ថយចុះជាង១៣ (១៣.១០%) ភាគរយ បើធៀបនឹងរយៈពេល១១ខែ ឆ្នាំ២០១៧។
ប្រភេទអង្ករនាំចេញ រយៈពេល១១ខែ មានអង្ករក្រអូបចម្រុះ នាំចេញច្រើនជាងគេ ចំនួនជាង១សែនតោន (១៨២.៦៧១) គិតជាភាគរយនាំចេញ ចំនួនជាង៣៦ (៣៦.៧៤%)ភាគរយ នៃចំនួនអង្ករនាំចេញទាំងអស់។ ក្រៅពីនេះ មានប្រភេទអង្ករក្រអូបនាងម្លិះ ក្រអូបសុមាលី ផ្ការំដួល ផ្កាម្លិះ អង្ករក្រអូបសរីរាង្គ និងអង្ករក្រអូបភ្លឺ (PEARL) ។ ប្រភេទអង្ករសគ្រាប់វែង នាំចេញ បានចំនួនជាង ៧ម៉ឺន (៧៨.១២០) តោន និងប្រភេទអង្ករចំហុយគ្រាប់វែង នាំចេញចំនួន ជាង ២ម៉ឺន (២៥.៥២៩)តោន។
ទីផ្សារនាំចេញអង្ករ រយៈពេល១១ខែ បាននាំចេញទៅឲ្យសមាជិកសហភាពអឺរ៉ុប បានចំនួន២៦ប្រទេស សរុបចំនួនជាង ២សែន (២៣៦.១៩៧) តោន។ ប្រទេសសមាជិកអាស៊ានចំនួន៥ គឺ ម៉ាឡេស៊ី ប្រ៊ុយណេ សិង្ហបុរី ថៃ និងវៀតណាម បាននាំចេញសរុប ចំនួនជាង ៥ម៉ឺន (៥២.០៧៩)តោន និងក្រុមប្រទេស ៣០ផ្សេងទៀត ដូចជា ចិន សហរដ្ឋអាមេរិក អូស្ត្រាលី កូរ៉េខាងត្បូង ជាដើម សរុបបានចំនួនជាង ២សែន (២០៨.៩៦៤)តោន។ ចិន ជាទីផ្សារអង្ករនាំចូលច្រើនជាងគេ គឺ ជាង១សែន (១៣៧.៨៦៦)តោន បន្ទាប់មក គឺប្រទេសបារាំង ចំនួនជាង ៧ម៉ឺន (៧៣.៦៦៩) តោន និងទី៣ គឺប្រទេសម៉ាឡេស៊ី ចំនួនជាង ៣ម៉ឺន (៣៧.២៨៩) តោន។
ក្រុមហ៊ុននាំអង្ករចេញពីកម្ពុជា មានចំនួន ៧៨ក្រុមហ៊ុន។ អគ្គនាយកក្រុមហ៊ុននាំចេញអង្ករ ឈ្មោះ អែមរ៉ូ រ៉ាយ (Amru Rice (cambodia) Co.ltd) លោក សុង សារ៉ន ជាតំណាងក្រុមហ៊ុននាំចេញអង្ករមួយ ក្នុងចំណោមក្រុមហ៊ុនផ្សេងទៀត ប្រាប់សារព័ត៌មានក្នុងស្រុកថា ថ្វីត្បិតការនាំចេញអង្ករមានការថយចុះក្តី ក៏ទឹកប្រាក់ដែលបានមកពីការនាំចេញអង្ករកើនឡើង ព្រោះអង្ករនាំចេញភាគច្រើនជាប្រភេទអង្ករក្រអូប មានតម្លៃថ្លៃជាងអង្ករសធម្មតា។
បើទោះមានការអះអាងបែបនេះ ប៉ុន្តែ កាសែតគាំទ្ររបបក្រុងភ្នំពេញ ចុះផ្សាយកាលពីថ្ងៃទី២៩ ខែវិច្ឆិកា ថា ប្រធានក្រុមប្រឹក្សាភិបាល នៃសហព័ន្ធស្រូវអង្ករកម្ពុជា និងត្រូវជាកូនប្រសា លោក ហ៊ុន សែន គឺ លោក សុខ ពុទ្ធិវុធ បានដឹកនាំគណៈប្រតិភូស្រូវអង្ករកម្ពុជា ទៅសុំជួបពិភាក្សាជាមួយតំណាងសហគមន៍អឺរ៉ុប នៅទីស្នាក់កណ្ដាលសហគមន៍អឺរ៉ុប នៅក្រុងប្រ៊ុចសែល (Brussel) ប្រទេសប៊ែលហ្សិក (Belgium) ជុំវិញការយកពន្ធលើអង្ករ នាំចេញពីកម្ពុជា។
លោក សុខ ពុទ្ធិវុធ ស្នើសុំឲ្យមានសវនាការផ្ទាល់មាត់ ទល់មុខគ្នា ដើម្បីឲ្យមេធាវីរបស់របបក្រុងភ្នំពេញ បានបកស្រាយពន្យល់ដោយផ្ទាល់ និងធ្វើបទបង្ហាញ ដល់ភាគីគណៈកម្មការអឺរ៉ុប ឲ្យយល់ច្បាស់ ពីផលវិបាកនានា នៃការយកពន្ធអង្ករ ពីរបបក្រុងភ្នំពេញ។ គម្រោងដកការលើកលែងពន្ធចំពោះអង្ករនេះ ធ្វើឡើងក្រោយពី ប្រទេសអ៊ីតាលី និងប្រទេសអេស្ប៉ាញ ដែលជាសមាជិកនៃសហភាពអឺរ៉ុប បានតវ៉ាថា អង្ករកម្ពុជាដែលនាំចូលដោយមិនមានយកពន្ធពីសហគមន៍អឺរ៉ុប បានធ្វើឲ្យប៉ះពាល់ទៅដល់ទីផ្សារ និងផលិតកម្មស្រូវ នៅប្រទេសរបស់ពួកគេ។
អាស៊ីសេរី បានព្យាយាមទូរស័ព្ទ សុំការបញ្ជាក់ ពីប្រធានក្រុមប្រឹក្សាភិបាលនៃសហព័ន្ធស្រូវអង្ករកម្ពុជា លោក សុខ ពុទ្ធិវុធ និងក្រុមអ្នកនាំពាក្យក្រសួងពាណិជ្ជកម្ម លោក ស៊ាង ថៃ លោក ឡុង កែមវិចិត្រ និងកញ្ញា សឹង សុភារី ប៉ុន្តែ មិនទទួលទូរស័ព្ទ និងខ្លះទៀតទូរស័ព្ទមិនចូល។
ប្រធានសម្ព័ន្ធសមាគមកសិករកម្ពុជា លោក ថេង សាវឿន យល់ថា ការនាំចេញអង្ករធ្លាក់ចុះ តែចំណេញបានប្រាក់ច្រើនជាងមុន ជាចំណូលភាគច្រើនបានតែលើក្រុមហ៊ុនឯកជន មិនបានផ្ដល់ផលចំណេញ ដល់កសិករតូចតាចទេ។ សង្គមស៊ីវិលរូបនេះ បារម្ភថា ប្រសិនបើការនាំចេញអង្ករនៅតែបន្តធ្លាក់ចុះ អាចធ្វើឲ្យកសិករខ្នាតតូចជាច្រើន រងផលប៉ះពាល់ខ្លាំង ដោយផ្ទាល់ និងអាចប្រឈមការបោះបង់ចោលមុខរបរធ្វើស្រែ ព្រោះតែតម្លៃកសិផលមិនអាចឡើងថ្លៃ និងគ្មានប្រាក់សងបំណុលធនាគារ ជាដើម។ លោក ថេង សាវឿន យល់ថា បើទោះចិនធ្លាប់ប្រកាសបង្កើនការទិញអង្ករពីកម្ពុជា ប៉ុន្តែ ទីផ្សារចិនមិនអាចជំនួសទីផ្សារសហភាពអឺរ៉ុបបានទេ ហើយទីផ្សារនាំចេញអង្កររបស់កម្ពុជាគួរតែពង្រីក មិនមែនបោះបង់ចោលទីផ្សារចាស់ ចាប់យកទីផ្សារថ្មីទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments