អ្នកការពារសិទ្ធិមនុស្ស ស្នើសុំឲ្យរបបក្រុងភ្នំពេញ ពិនិត្យមើលប្រកាសអន្តរក្រសួងព័ត៌មាន ក្រសួងមហាផ្ទៃ និងក្រសួងប្រៃសណីយ៍ម្ដងទៀត ព្រោះការសម្រេចនឹងបានប៉ះពាល់ដល់សេរីភាពបញ្ចេញមតិរបស់ពលរដ្ឋដែលធានាដោយរដ្ឋធម្មនុញ្ញ ដែលអាចជាទិសដៅ សម្រាប់ដាក់ទោសអ្នកប្រើប្រាស់បណ្ដាញសង្គមក្នុងអំឡុងពេលបោះឆ្នោត។
អ្នកនាំពាក្យសមាគមសិទ្ធិមនុស្សអាដហុក (Adhoc) លោក ស៊ឹង សែនករុណា បារម្ភថា ពលរដ្ឋជាច្រើននឹងអាចត្រូវរងការចោទប្រកាន់ និងចាប់ខ្លួន ដោយសារតែប្រកាសអន្តរក្រសួងនេះ។ លោក ស៊ឹង សែនករុណា ស្នើឲ្យរបបក្រុងភ្នំពេញពិនិត្យមើលឡើងវិញ នូវប្រកាសអន្តរក្រសួងទាំង៣នេះ ដោយសារបានប៉ះពាល់ដល់សេរីភាពបញ្ចេញមតិធ្ងន់ធ្ងរ ដែលមានចែងក្នុងរដ្ឋធម្មនុញ្ញដែលជាច្បាប់កំពូលនៃប្រទេស។ «»
មន្ត្រីជាន់ខ្ពស់ក្នុងរបបក្រុងភ្នំពេញ៣នាក់ គឺ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធិ រដ្ឋមន្ត្រីក្រសួងមហាផ្ទៃ លោក ស ខេង និងរដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ត្រាំ អ៊ីវតឹក បាននាំគ្នាចេញសេចក្ដីប្រកាសអន្តរក្រសួងមួយ ស្ដីពីការគ្រប់គ្រងផ្សព្វផ្សាយតាមគេហទំព័រ និងបណ្ដាញទំនាក់ទំនងសង្គម ដែលដំណើរការតាមប្រព័ន្ធអ៊ីនធឺណិត ក្នុងគោលដៅប្រឆាំង ទប់ស្កាត់រាល់ការផ្សព្វផ្សាយ និងចែកចាយខ្លឹមសារព័ត៌មាន ឬសារជាអក្សរ សំឡេង រូបភាព វីដេអូ ឬ ទម្រង់ផ្សេងៗទៀត ដែលមានចេតនា បង្កជាចលាចលបណ្ដាលឲ្យមានការអន្តរាយដល់វិស័យការពារជាតិ សន្តិសុខជាតិ ទំនាក់ទំនងជាមួយប្រទេសដទៃ សេដ្ឋកិច្ចជាតិ សណ្ដាប់ធ្នាប់សាធារណៈ ការរើសអើង និងវប្បធម៌ ប្រពៃណីជាតិ។
ប្រកាសអន្តរក្រសួងចុះកាលបរិច្ឆេទថ្ងៃទី២៨ ឧសភា និងត្រូវបានផ្សព្វផ្សាយនៅថ្ងៃទី០៤ មិថុនា មន្ត្រីជាន់ខ្ពស់ទាំង៣ បានកំណត់តួនាទីគ្នាថា ក្រសួងព័ត៌មានជាអ្នកគ្រប់គ្រងការចេញផ្សាយតាមប្រព័ន្ធអេឡិចត្រូនិច ខ្លឹមសារទាំងស្រុង សារជាអក្សរ សំឡេង រូបភាព វីដេអូ ឬទម្រង់ផ្សេងៗ ជាដើម។ ចំណែកក្រសួងប្រៃសណីយ៍ ត្រូវតម្រូវឲ្យក្រុមហ៊ុនសេវាអ៊ីនធឺណិតទាំងអស់ មានកម្មវិធីសូហ្វវ៉ែ (Software) និងបំពាក់កម្មវិធីគ្រប់គ្រងអ៊ីនធឺណិត ដើម្បីងាយស្រួលក្នុងការច្រោះ (Filter) ឬរាំងខ្ទប់ (Block) គេហទំព័រ ឬគណនី (Account ) ឬ ទំព័រ (Page) របស់បណ្ដាញទំនាក់ទំនងសង្គម ដែលធ្វើអាជីវកម្ម ឬការផ្សាយណា ដែលពួកគេយល់ថា ល្មើសច្បាប់។ ក្រសួងទាំងពីរនេះ ក៏ត្រូវសហការជាមួយស្ថាប័នដទៃទៀត ដើម្បីរាំងខ្ទប់ ឬបិទគេហទំព័រ ឬបណ្ដាញសង្គមណា ដែលធ្វើអាជីវកម្មខុសច្បាប់ ឬផ្សាយល្មើសច្បាប់ ដែលមានលក្ខណៈញុះញង់ បំបែកបំបាក់សាមគ្គីភាព ការរើសអើង ចេតនាបង្កចលាចល ដែលបណ្ដាលឲ្យមានការអន្តរាយដល់សន្តិសុខជាតិ ប្រយោជន៍សាធារណៈ និងសណ្ដាប់ធ្នាប់សង្គម ជាដើម។ រីឯក្រសួងមហាផ្ទៃ ជាអ្នកបង្ក្រាប រាល់សកម្មភាពទាំងអស់នោះ។
មុនកាលប្រកាសអន្តរក្រសួងនេះ អាជ្ញាធរក្រុងភ្នំពេញ ធ្លាប់បានធ្វើសកម្មភាពបង្ក្រាបបែបនេះ ម្ដងរួចហើយ ទៅលើគេហទំព័រសារព័ត៌មានឯករាជ្យ ឌឹ ខេមបូឌា ដេលី (The Cambodia Daily) គឺក្រោយពេលអគ្គនាយកដ្ឋានពន្ធដារ បង្ខំឲ្យបិទកាសែតនេះ ក្រសួងប្រៃសណីយ៍ បានបង្គាប់ឲ្យក្រុមហ៊ុនអ៊ីនធឺណិតទាំងអស់នៅកម្ពុជា ត្រូវធ្វើការរាំងខ្ទប់ មិនឲ្យអ្នកប្រើប្រាស់អ៊ីនធឺណិត មើលឃើញគេហទំព័រ និងទំព័រហ្វេសប៊ុក របស់កាសែតឯករាជ្យមួយនេះ ខណៈដែលរបបក្រុងភ្នំពេញ បានប្ដឹងម្ចាស់កាសែត ទៅតុលាការក្នុងរបបក្រុងភ្នំពេញ។
អ្នកប្រើប្រាស់បណ្ដាញសង្គមហ្វេសប៊ុកមួយចំនួនបានសួរថា តើសិទ្ធិបញ្ចេញមតិរបស់ខ្ញុំដែលធានា ដោយរដ្ឋធម្មនុញ្ញនៅឯណា និងច្បាប់អន្តរជាតិដែលកម្ពុជាទទួលស្គាល់ជាច្បាប់ជាតិនោះ? អ្នកខ្លះថា បទឧក្រិដ្ឋ និងការបំផ្លាញព្រៃឈើ អត់ឃើញមានការទប់ស្កាត់សោះ។ បែរជាចេញបែបនេះ ទៅវិញ។ ពួកគេ ដាក់ជាសំណួរទៀតថា ឯណាទៅដែលហៅថា ប្រទេសគោរពសិទ្ធិមនុស្សនោះ…?
អ្នកនាំពាក្យសមាគមសិទ្ធិមនុស្សអាដហុក មើលឃើញថា ប្រកាសអន្តរក្រសួង ដែលប៉ះពាល់ដល់សេរីភាពបញ្ចេញមតិក្នុងរដ្ឋធម្មនុញ្ញនេះ នឹងបង្កឲ្យពលរដ្ឋជាច្រើនត្រូវរងគ្រោះ ព្រោះនៅក្នុងពេលបោះឆ្នោតម្ដងៗ ពលរដ្ឋតែងបានប្រើប្រាស់បណ្ដាញសង្គម ដើម្បីចែករំលែកព័ត៌មានឲ្យគ្នាទៅវិញទៅមក ហើយពលរដ្ឋខ្លះ អាចនឹងត្រូវរងការចោទប្រកាន់ទាំងមិនដឹងពីរបៀបប្រើប្រាស់ហ្វេសប៊ុកទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments