សិស្សជាង ១សែននាក់ប្រឡងជាប់សញ្ញាបត្រមធ្យមសិក្សាទុតិយភូមិក្នុងឆ្នាំ២០២៤នេះ។ សេចក្ដីប្រកាសព័ត៌មានរបស់ក្រសួងអប់រំ យុវជន និងកីឡា នៅថ្ងៃទី៣០ ខែតុលា នេះ ឱ្យដឹងថាសិស្សជាង ១សែន (១០៦.៣៥១) នាក់បានប្រឡងជាប់សញ្ញាបត្រមធ្យមសិក្សាទុតិយភូមិ ដែលស្មើនឹង ៧៩ភាគរយ នៃបេក្ខជនដែលមកប្រឡង។
ក្នុងចំណោមសិស្សជាង ១សែននាក់នោះ មានបេក្ខជនជាប់និទ្ទេស អា (A) មានចំនួនជាង២ពាន់ (២.២១៦) នាក់ និទ្ទេសបេ (B) ចំនួនជិត ១ម៉ឺន (៩.៧០១) នាក់ និទ្ទេសសេ (C) ចំនួនជាង ២ម៉ឺន (២២.៦៧៥) នាក់ និទ្ទេសដេ (D) ចំនួនជិត ៤ម៉ឺន (៣៦.៦៨៣) នាក់ និងនិទ្ទេសអឺ (E) ចំនួនជាង៣ ម៉ឺន (៣៥.០៧៦) នាក់។
ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបបានប្រព្រឹត្តទៅចាប់ពីថ្ងៃទី៨ ដល់ទី៩ ខែតុលា ខណៈដំណើរការកំណែបានប្រព្រឹត្តទៅ ចាប់ពីថ្ងៃទី១១ ដល់ទី១៧ ខែតុលា។ នៅឆ្នាំ២០២៤ នេះ មានបេក្ខជនចុះឈ្មោះប្រឡងសរុបជាង ១សែន ៣ម៉ឺននាក់ (១៣៧.០៤០) ក្នុងនោះមានសិស្សស្រីជាង ៧ម៉ឺននាក់ (៧៤.៨៨២)។ នៅឆ្នាំនេះដែរ មានបេក្ខជនប្រឡងថ្នាក់វិទ្យាសាស្ត្រសង្គមច្រើនជាងឆ្នាំមុនៗ ដោយមានចំនួនជាង ៩ម៉ឺន ៧ពាន់នាក់ (៩៧.៦៨២) ខណៈថ្នាក់វិទ្យាសាស្ត្រ មានចំនួនជិត ៤ម៉ឺននាក់ (៣៩.៣៥៨)។
រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន កាលពីថ្ងៃទី២៧ ខែកញ្ញា លើកឡើងថា បេក្ខជនប្រឡងជ្រើសរើសថ្នាក់វិទ្យាសាស្ត្រសង្គមច្រើនជាងឆ្នាំមុនៗ ដោយសារតែសិស្សមួយចំនួនពុំមានចំណេះដឹងគ្រប់គ្រាន់ ដើម្បីជ្រើសរើសយកថ្នាក់វិទ្យាសាស្ត្រ។
ក្រសួងកំណត់យកថ្ងៃទី៣០ ខែតុលា សម្រាប់ការប្រកាសលទ្ធផលប្រឡងនៅរាជធានីភ្នំពេញ និងខេត្តកណ្តាល និងនៅថ្ងៃទី៣១ ខែតុលា សម្រាប់ខេត្តផ្សេងៗ នៅទូទាំងប្រទេស។
កាលពីឆ្នាំមុន សិស្សប្រឡងជាប់បាក់ឌុបមានចំនួនជិត ១ សែន (៩៨.៤៦០) នាក់ ស្មើនឹង ៧២.៨៩ភាគរយ នៃអ្នកប្រឡងសរុប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments