មេធាវីការពារក្តី ដាក់បណ្ដឹងស្នើសុំឲ្យតុលាការក្រុងភ្នំពេញ ដោះលែងកូនប្រុសរបស់សកម្មជនបក្សប្រឆាំង គឺយុវជន កាក់ សុវណ្ណច្ឆ័យ និងយុវជនបរិស្ថានទាំង ៣នាក់ផ្សេងទៀត ឱ្យនៅក្រៅឃុំបណ្ដោះអាសន្ន។ មន្ត្រីសិទ្ធិមនុស្សជឿថា ប្រសិនបើតុលាការ អនុវត្តតាមនីតិវិធីច្បាប់ប្រកបដោយឯករាជ្យ និងវិជ្ជាជីវៈត្រឹមត្រូវ យុវជនទាំងនេះនឹងទទួលបានសេរីភាពឡើងវិញ ព្រោះពួកគាត់ មិនពាក់ព័ន្ធនឹងអំពើល្មើសច្បាប់ឡើយ។
មេធាវីការពារក្ដី កំពុងព្យាយាមធ្វើតាមផ្លូវច្បាប់ ដើម្បីឲ្យយុវជន កាក់ សុវណ្ណច្ឆ័យ និង សកម្មជនបរិស្ថានវ័យក្មេងទាំង ៣នាក់ បាននៅក្រៅឃុំបណ្ដោះអាសន្ន ទោះបីជាសំណុំរឿងនេះ ហាក់មានចរិតនយោបាយក្តី។
មេធាវីការពារក្ដីឱ្យយុវជនទាំង ៤នាក់ គឺលោក សំ សុគង់ ថ្លែងថា លោក បានដាក់បណ្ដឹងទៅសាលាដំបូងរាជធានី ភ្នំពេញរួចហើយ នៅរសៀលថ្ងៃទី៨ ខែកក្កដា ដើម្បីស្នើសុំឲ្យតុលាការដោះលែងយុវជន កាក់ សុវណ្ណច្ឆ័យ ដែលសព្វថ្ងៃ កំពុងជាប់ឃុំនៅក្នុងពន្ធនាគារព្រៃស (ម២)។ លោក បញ្ជាក់ថា មូលហេតុនៃការដាក់បណ្ដឹងស្នើសុំនៅក្រៅឃុំបណ្ដោះអាសន្ននេះ ព្រោះយុវជន កាក់ សុវណ្ណច្ឆ័យ ជាអនីតិជន អាយុ ១៦ឆ្នាំ និងមានជំងឺអូទីស៊ឹម (Autism) តាំងពីកំណើត ដែលជាប្រភេទជំងឺប៉ះពាល់ផ្នែកខួរក្បាល ហើយដែលត្រូវការយកចិត្តទុកដាក់មើលថែរក្សាពីអាណាព្យាបាល។ មេធាវីការពារក្តីរូបនេះ យល់ថា ផ្អែកតាមមាត្រា៣៩ និង ៤០ នៃក្រមព្រហ្មទណ្ឌ ព្រមទាំងច្បាប់យុត្តិធម៌កុមារ ឆ្នាំ២០១៦ តុលាការ គួរតែប្រគល់យុវជន កាក់ សុវណ្ណច្ឆ័យ ឲ្យស្ថិតក្រោមការគ្រប់គ្រងរបស់ម្ដាយវិញ ព្រោះការឃុំខ្លួនក្នុងពន្ធនាគារបែបនេះ ពុំមែនជាជម្រើសល្អឡើយ៖ «សុំឲ្យតុលាការ ពិចារណាអំពីការដាក់លក្ខខណ្ឌ និងនីតិវិធីបង្វែរដែលបានបញ្ញត្តិនៅក្នុងមាត្រា៣៩ និង ៤០ នៃក្រមព្រហ្មទណ្ឌ និងច្បាប់ស្ដីពីយុត្តិធម៌កុមារ ហើយដោយសារយើងជាមេធាវី ដាក់ស្នើសុំគាត់នៅក្នុងនីតិវិធីបង្វែរគាត់ស្ថិតនៅក្រោមការគ្រប់គ្រង ឬការថែទាំពីម្ដាយ ឬអាណាព្យាបាល»។
ទន្ទឹមគ្នានេះ លោកមេធាវី សំ សុគង់ ឲ្យដឹងថា លោកក៏បានដាក់បណ្ដឹងទៅចៅក្រមស៊ើបសួរសាលាដំបូងរាជធានីភ្នំពេញ លោក អ៊ឹម វណ្ណៈ កាលពីថ្ងៃទី៥ ខែកក្កដា ដើម្បីស្នើសុំឲ្យដោះលែងសកម្មជនបរិស្ថានទាំង ៣នាក់ឲ្យនៅក្រៅឃុំបណ្ដោះអាសន្នដែរ ប៉ុន្តែមិនទាន់ទទួលបានការឆ្លើយតបនៅឡើយទេ គិតត្រឹមថ្ងៃទី៨ ខែកក្កដា។លោក បញ្ជាក់ថា សកម្មជនបរិស្ថានទាំង៣នាក់ រួមមាន លោក យីម លាងហ៊ី លោក លី ចាន់ដារ៉ាវុធ និងកញ្ញា ស៊ុន រដ្ឋា សុទ្ធតែមានលក្ខខណ្ឌគ្រប់គ្រាន់ដើម្បីបាននៅក្រៅឃុំបណ្ដោះអាសន្ន ដូចជាមានទីលំនៅច្បាស់លាស់ និងមិនគេចវេះពីតុលាការ ព្រមទាំងជានិស្សិត កំពុងបន្តការសិក្សាជាដើម។ ម្យ៉ាងវិញទៀត មេធាវីរូបនេះយល់ថា កូនក្តីរបស់លោកទាំង ៣នាក់ គ្រាន់តែប្រើប្រាស់សិទ្ធិស្របតាមច្បាប់ដើម្បីចូលរួមការពារកិច្ចការពារបរិស្ថាន ដូច្នេះពុំមានចំណុចណាមួយល្មើសច្បាប់ឡើយ៖ «កូវីដកំពុងតែផ្ទុះរាលដាលនៅក្នុងប្រទេសកម្ពុជា ហើយបញ្ហាសុខភាព និងភាពណែនណាន់តាន់តាប់ក្នុងពន្ធនាគារ ក៏ជាចំណុចមួយដែលតុលាការ គួរតែពិចារណាចំពោះការស្នើសុំឲ្យកូនក្តីនៅក្រៅឃុំជាបណ្ដោះអាសន្ន។ បើសិនជាតុលាការបានឲ្យកូនក្ដីទាំងអស់បាននៅក្រៅឃុំ ខ្ញុំគិតថា បញ្ហាផ្សេងៗ វាមិនអាចនឹងកើតឡើងទេ ជាពិសេសពាក់ព័ន្ធនឹងបញ្ហាសណ្ដាប់ធ្នាប់សាធារណៈ ដោយសារពួកគាត់មិនមានអំណាច មិនមានកម្លាំង មិនមានឥទ្ធិពលអី ដែលធ្វើឲ្យមានវឹកវរដល់សណ្ដាប់ធ្នាប់សាធារណៈទេ បើសិនជាគាត់បាននៅក្រៅឃុំ។ យើងឃើញហើយថា សកម្មភាពរបស់គាត់ គ្រាន់តែជួយសង្គម ហើយគាត់ជាយុវជន»។
អាជ្ញាធររបបលោក ហ៊ុន សែន បានចាប់ខ្លួនសកម្មជនបរិស្ថាន ៣នាក់នៃចលនាមាតាធម្មជាតិ រួមមាន កញ្ញា ស៊ុន រដ្ឋា លោក យីម លាងហ៊ី យុវជន លី ចាន់ដារ៉ាវុធ កាលពីថ្ងៃទី១៦ មិថុនា ដោយសារសកម្មភាពការពារបរិស្ថានរបស់ពួកគេ។ តុលាការបានចោទប្រកាន់កញ្ញា ស៊ុន រដ្ឋា និងលោក យីម លាងហ៊ី ចំនួនពីរបទល្មើស គឺបទ «ប្រមាថព្រះមហាក្សត្រ» និង«រួមគំនិតក្បត់» រីឯយុវជន លី ចាន់ដារ៉ាវុធ តុលាការចោទប្រកាន់តែមួយបទល្មើស គឺបទ «រួមគំនិតក្បត់» ហើយបញ្ជូនពួកគាត់ទៅឃុំខ្លួនក្នុងពន្ធនាគារព្រៃស កាលពីព្រលប់ថ្ងៃទី២១ ខែមិថុនា។
មួយសប្ដាហ៍ក្រោយមក អាជ្ញាធររបបក្រុងភ្នំពេញ មានគ្នាជាង២០នាក់ បានសម្រុកចូលចាប់ខ្លួនយុវជន កាក់ សុវណ្ណច្ឆ័យ ដល់ក្នុងផ្ទះនៅសង្កាត់បឹងទំពុន២ ខណ្ឌមានជ័យ កាលពីម៉ោង ៨យប់ថ្ងៃទី២៤ ខែមិថុនា ដោយចោទថា គាត់ប្រព្រឹត្តបទល្មើសជាក់ស្ដែង ពាក់ព័ន្ធនឹងការប្រើពាក្យសម្តីញុះញង់និងការជេរប្រមាថថ្នាក់ដឹកនាំ ក្នុងពេលជជែកគ្នាជាក្រុមតាមបណ្ដាញសង្គមតេឡេក្រាម (Telegram)។ តុលាការក្រុងភ្នំពេញ បានចោទប្រកាន់អនីតិជនរូបនេះ ចំនួនពីរបទល្មើស គឺបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងបទប្រមាថអ្នករាជការសាធារណៈ ហើយបញ្ជូនទៅឃុំខ្លួននៅពន្ធនាគារព្រៃស (ម២) កាលពីព្រលប់ថ្ងៃទី២៥ ខែមិថុនា។ មុនពេលចាប់ខ្លួន គឺយុវជន កាក់ សុវណ្ណច្ឆ័យ និងម្ដាយ តែងតែចេញតវ៉ាយ៉ាងសកម្ម ដើម្បីទាមទារឲ្យតុលាការដោះលែងឪពុករបស់ខ្លួនឈ្មោះ កាក់ កុម្ភារ ជាសកម្មជនគណបក្សសង្គ្រោះជាតិ ដែលកំពុងជាប់ឃុំក្នុងពន្ធនាគារព្រៃស ក្រោមបទចោទញុះញង់ និងរួមគំនិតក្បត់។
ទាក់ទងករណីបណ្ដឹងសុំនៅក្រៅឃុំនេះ អាស៊ីសេរី មិនអាចសុំការឆ្លើយតបពីប្រធានសាលាដំបូងរាជធានីភ្នំពេញ លោក តាំង ស៊ុនឡាយ បានទេ ដោយទូរស័ព្ទចូលពុំមានអ្នកទទួល។
ប្រធានសមាគមការពារសិទ្ធិមនុស្សអាដហុក (ADHOC) លោក នី សុខា មានប្រសាសន៍ថា តុលាការ មិនគួរជ្រើសរើសយកវិធីឃុំខ្លួនបណ្ដោះអាសន្នលើយុវជនបរិស្ថានទាំង ៣នាក់ និងកូនប្រុសរបស់សកម្មជនបក្សប្រឆាំងបែបនេះនោះទេ ព្រោះពួកគាត់ សុទ្ធតែជាមនុស្សស្លូតបូត ស្អាតស្អំ និងបានចូលរួមចំណែកធ្វើកិច្ចការងារបម្រើផលប្រយោជន៍សាធារណៈជាច្រើន៖ «ខ្ញុំមើលឃើញថា បើសិនជាតុលាការ ប្រកាន់នូវភាពយុត្តិធម៌ត្រឹមត្រូវ និងមានភាពឯករាជ្យត្រឹមត្រូវ ខ្ញុំគិតថា ពួកគាត់ មិនត្រូវបានចាប់យកទៅ ឃុំខ្លួនបែបហ្នឹងទេ ហើយពួកសកម្មជនបរិស្ថានទាំងអស់នេះ មិនត្រឹមតែមិនត្រូវចាប់យកទៅឃុំខ្លួនទេ ថែមទាំងលើកសរសើរគាត់ទៅវិញទៀតផង បើសិនជានៅក្នុងសង្គម មួយដែលយើងគិតថា គោរពនៅសិទ្ធិមនុស្ស គោរពនៅយុត្តិធម៌ ហើយពិតជាសង្គម មួយចង់លើកកម្ពស់ការការពារបរិស្ថានពិតប្រាកដ»។
មកទល់ពេលនេះ អាជ្ញាធររបបក្រុងភ្នំពេញ បានចាប់ខ្លួនសកម្មជនសកម្មជន នយោបាយ សកម្មជនសង្គម និងសកម្មជនបរិស្ថានប្រមាណ៨០នាក់ហើយដាក់ក្នុងពន្ធនាគារ ដោយភាគច្រើនអាជ្ញាធរចោទប្រកាន់ពីបទញុះញង់ និងរួមគំនិតក្បត់ ដោយសារការអនុវត្តសិទ្ធិជាមូលដ្ឋានរបស់ពួកគាត់។ក្រុមអង្គការជាតិ-អន្តរជាតិ រួមទាំងក្រុមប្រទេសប្រជាធិបតេយ្យធំៗ តែងតែថ្កោលទោសជាបន្តបន្ទាប់ថា ការចាប់ឃុំខ្លួនទាំងនេះ ធ្វើឡើងដោយគ្មានមូលដ្ឋានច្បាប់ និងទាមទារឲ្យដោះលែងពួកគេវិញជាបន្ទាន់ បើពុំនោះទេ ប្រទេសកម្ពុជានឹងទទួលរងទណ្ឌកម្មបន្ថែមទៀតពីសហគមន៍អន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments