សកម្មជនគណបក្សសង្គ្រោះជាតិមួយគ្រួសារដែលកំពុងភៀសខ្លួននៅប្រទេសថៃ មានជីវភាពលំបាកខ្លាំង ក្រោយពេលពួកគេបានឆ្លងជំងឺកូវីដ១៩ទាំងអស់គ្នារយៈពេលជិត១០ថ្ងៃហើយ។ សព្វថ្ងៃពួកគេស្នាក់នៅក្នុងតង់កៅស៊ូតូចមួយនៅជាយទីក្រុងបាងកក តាមយថាកម្មដោយពុំមានគ្រូពេទ្យព្យាបាលជំងឺឡើយ។
សកម្មជនគណបក្សប្រឆាំងដែលឆ្លងជំងឺកូវីដ១៩មួយគ្រួសារនេះ មានសមាជិកចំនួន៣នាក់ ក្នុងនោះមានកូនអាយុ១២ខែម្នាក់ផង ក៏ឆ្លងជំងឺកាចសាហាវនេះដូចឪពុកម្ដាយដែរ។ នោះគឺជាគ្រួសាររបស់ក្រុមប្រឹក្សាឃុំដូនតី ស្រុកពញាក្រែក ខេត្តត្បូងឃ្មុំ ជាប់ឆ្នោតគណបក្សសង្គ្រោះជាតិ លោកស្រី មាន ឡា។ ពួកគេរស់នៅលំបាកជាងជនភៀសខ្លួន និងពលករខ្មែរដទៃទៀតដោយសារពួកគេរស់នៅប្រទេសថៃដោយខុសច្បាប់ និងមិនទាន់ទទួលបានសិទ្ធិជាជនភៀសខ្លួន។ ពលករខ្មែរនៅប្រទេសថៃបានអាណិតអាសូរគ្រួសាររបស់គាត់ និងបានជម្លៀសពួកគាត់ឱ្យនៅទៅក្នុងតង់កៅស៊ូតូចមួយនៅជាយទីក្រុងបាងកក ដើម្បីគេចចេញពីការចាប់ខ្លួនរបស់សមត្ថកិច្ចថៃ។
លោកស្រី មាន ឡា រៀបរាប់ប្រាប់អាស៊ីសេរីថា ចាប់តាំងពីពួកលោកស្រីបានឆ្លងជំងឺកូវីដ១៩មកកាលពីថ្ងៃទី១ កក្កដាមក ធ្វើឱ្យគ្រួសារមានជីវភាពយ៉ាប់យ៉ឺនខ្លាំង ដោយសារមិនអាចចេញទៅធ្វើការងារបានឡើយ។ ស្ត្រីវ័យ៣១ឆ្នាំរូបនេះ បញ្ជាក់ថា សព្វថ្ងៃនេះពួកលោកស្រីហូបចុកអាហារក្រៀមក្រោះ រួមមានត្រីខកំប៉ុង និងពងមាន់ជាមួយទឹកត្រី ដែលពលករខ្មែរនៅទីនោះផ្ដល់ជូនពួកគាត់ចែកគ្នារស់ប៉ុណ្ណោះ។ លោកស្រី ព្រួយបារម្ភខ្លាចការហូបចុកបែបនេះធ្វើឱ្យប៉ះពាល់ដល់សុខភាព ជាពិសេសកូនរបស់លោកស្រីអាយុ១២ខែ ដែលជាវ័យកំពុងលូតលាស់ ប៉ុន្តែគ្មានអាហារបំប៉ន៖ «ខ្ញុំអាណិតកូនខ្លោចចិត្ត ខ្ញុំមានបញ្ហាសុខភាពក៏អាណិតកូន កើតមករត់ជាមួយខ្ញុំរហូត កូនតូចគាត់ត្រូវការដែលមានបរិយាកាសល្អ ដល់ពេលកន្លែងខ្ញុំនៅក្នុងតង់ហប់ជិតចេញដើរក៏អត់ហ៊ានចេញដើរ ខ្លាចប៉ូលិសចាប់។ អាហារក៏គ្មានហូបដែរ ពេលខ្លះក៏បន្ទោសខ្លួនឯង ដោយសារតែខ្ញុំបានកូនមកអីចឹង តែពេលខ្លះអ្វីដែលយើងធ្វើគឺដើម្បីជាតិ និងប្រយោជន៍រួម។ គាត់អត់ដឹងអីសោះជាប់គុកក៏ជាប់គុកជាមួយខ្ញុំ ដល់ពេលរត់ក៏រត់មកជាមួយខ្ញុំ»។
លោកស្រីបន្តទៀតថា កូនរបស់លោកស្រីចាប់តាំងពីកើតមក មិនទាន់បានចាក់វ៉ាក់សាំងការពារជំងឺឆ្លងរបស់កុមារនៅឡើយទេ ដោយសារគ្មានឯកសារស្របច្បាប់ ដើម្បីនាំកូនទៅចាក់ថ្នាំ។
អ្នកភៀសខ្លួននយោបាយមួយគ្រួសារនេះបានស្នើសុំទៅការិយាល័យឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន(UNHCR) ប្រចាំនៅទីក្រុងបាងកក ឱ្យជួយការពារសិទ្ធិរស់នៅរបស់ពួកគាត់ប្រហែល១០ខែហើយ ប៉ុន្តែរហូតមកទល់ពេលនេះពួកគាត់មិនទាន់ទទួលបានឋានៈជាជនភៀសខ្លួននៅឡើយទេ។ បញ្ហានេះធ្វើឱ្យពួកគាត់មិនអាចរកសេវាផ្នែកសង្គមផ្សេងៗនៅក្នុងប្រទេសថៃបានឡើយ ហើយអំឡុងពេលអាជ្ញាធរថៃបិទខ្ទប់ការដ្ឋានសំណង់នៅទីក្រុងបាងកក ដើម្បីទប់ស្កាត់ការរាតត្បាតជំងឺកូវីដ១៩ ធ្វើឱ្យពួកគាត់កាន់តែលំបាកខ្លាំង។
ប្រធានគណបក្សសង្គ្រោះជាតិស្រុកពញាក្រែក ខេត្តត្បូងឃ្មុំ និងជាប្ដីរបស់លោកស្រី មាន ឡាន គឺលោក ចក់ ហួរ ប្រាប់ថា កាលពីមិនទាន់បិទខ្ទប់ទីក្រុងបាងកក ពួកលោកមានជីវភាពខ្វះខាតរួចទៅហើយ ប៉ុន្តែនៅពេលនេះគ្រួសាររបស់លោកលំបាកជាងមុនទ្វេដង ពីព្រោះត្រូវស្នាក់នៅក្នុងតង់តូចមួយ ដាច់ពីគេឯង ដោយគ្មានស្ថាប័នណាជួយពួកលោកនោះទេ។ បុរសវ័យ៣៩ឆ្នាំរូបនេះ បន្តដោយសំដីមួយៗថា នៅពេលជំងឺកូវីដ១៩ធ្វើទុក្ខម្ដងៗ ធ្វើឱ្យលោកក្ដៅខ្លួនខ្លាំង ឈឺដើមទ្រូង និងពិបាកដកដង្ហើមខ្លាំង៖ «ខ្ញុំនៅក្អកនៅហួលបំពងក ប៉ុន្តែវារាងធូរកម្ដៅជាមុន។ ពីមុនដេកអត់លក់ទេ យប់ឡើងនៅពេលដែលខ្ញុំរងាខ្លាំង ប្រពន្ធខ្ញុំគាត់ក្រោកជូតខ្លួន ទម្រាំតែខ្ញុំបានធូរបានអាចសំងំដេកបាន។ដល់ពេលរំលងពីរបីថ្ងៃមកកម្ដៅហ្នឹងស្រក ប៉ុន្តែវានៅក្អកនៅអួលដើមក យើងអត់មានកម្លាំងទេ ហើយការហូបអីអត់ដឹងរសជាតិទេ ប៉ុន្តែខ្ញុំព្យាយាមហូប ព្យាយាមព្យាបាលខ្លួនឯងតាមបែបបូរាណ»។
ពលករខ្មែរម្នាក់ដែលតែងតែផ្ដល់ស្បៀងអាហារផ្គត់ផ្គង់គ្រួសារមួយនេះ គឺលោក ម៉ិច សំណាង ថ្លែងថា ជនភៀសខ្លួនខ្មែរមួយគ្រួសារនេះមានជីវភាពរស់នៅកំសត់ជាងគេ ដោយសារពួកគាត់មានកូនតូច ហើយរស់នៅប្រទេសថៃដោយខុសច្បាប់។ លោកបន្តថា ពួកគាត់ប្រឈមនឹងអាជ្ញាធរថៃចាប់ខ្លួនដាក់ពន្ធនាគារ និងបញ្ជូនត្រឡប់ទៅកម្ពុជាវិញ ប្រសិនបើធ្វើការងារ ឬចេញដើរអំឡុងពេលនេះ៖ «អាណិតណាស់គឺនៅលើដែលគាត់មានកូនតូច ពេលមានបញ្ហាអីឪពុកម្ដាយអត់មានឯកសារដល់ពេលអីចឹងនៅពេលម្ដងៗលំបាក។ខ្ញុំឃើញមើលទៅវាវេទនាណាស់ បើនិយាយរួមទៅស្រណោះគាត់ គាត់ស្នេហាជាតិហើយរហូតដល់ធ្លាក់ខ្លួនមកដល់ស្រុកគេមានបញ្ហាគ្រប់កន្លែង»។
សកម្មជនគណបក្សប្រឆាំងមួយគ្រួសារនេះបានភៀសខ្លួនទៅដល់ប្រទេសថៃកាលពីខែកញ្ញាឆ្នាំ២០២០ ដោយលោកស្រី មាន ឡា បាននាំកូនស្រីតូចចាកពីកម្ពុជាទៅជាមួយប្ដីរបស់គាត់។ កូនរបស់គាត់ពេលនោះ មានអាយុទើបតែ២ខែកន្លះ ហើយពួកគាត់បានរត់លាក់ខ្លួននៅក្នុងព្រៃនៅតំបន់ព្រំដែនថៃ អស់រយៈពេល១០ថ្ងៃ ដើម្បីគេចចេញពីការតាមប្រមាញ់របស់អាជ្ញាធររបបក្រុងភ្នំពេញ។ ការភៀសខ្លួននេះ គឺដោយសារអាជ្ញាធររបបក្រុងភ្នំពេញ បានផ្ដន្ទាទោស និងតាមចាប់ខ្លួនលោកស្រីជាលើកទី២ ពាក់ព័ន្ធនឹងការបញ្ចេញមតិតាមបណ្ដាញសង្គមហ្វេសប៊ុក (Facebook ) គាំទ្រដំណើរមាតុភូមិនិវត្តន៍របស់ប្រធានស្តីទីគណបក្សសង្គ្រោះជាតិ លោក សម រង្សី កាលពីថ្ងៃទី៩ ខែវិច្ឆិកា ឆ្នាំ២០១៩។
កាលពីថ្ងៃទី២២ ខែកញ្ញា ឆ្នាំ២០២០ តុលាការខេត្តត្បូងឃ្មុំ បានប្រកាសសាលក្រមផ្ដន្ទាទោសសកម្មជនបក្សប្រឆាំង ៧នាក់ឲ្យជាប់ពន្ធនាគារពី ៥ឆ្នាំទៅ ៧ឆ្នាំ ពីបទរួមគំនិតក្បត់ ដែលជាសំណុំរឿងចាស់ កាលពីឆ្នាំ២០១៩។ ក្នុងចំណោម ៧នាក់នោះ គឺមាន ៥នាក់ ត្រូវបានតុលាការជាន់ទាបមួយនេះសម្រេចផ្ដន្ទាទោសឲ្យជាប់ពន្ធនាគារ ៧ឆ្នាំ និងចេញដីកាតាមចាប់ខ្លួនឡើងវិញ ហើយសកម្មជនទាំង៥នាក់ ដែលត្រូវបានផ្ដន្ទាទោស ៧ឆ្នាំនោះ មានម្នាក់កំពុងជាប់ឃុំនៅ ពន្ធនាគារព្រៃស ហើយ៤នាក់បានភៀសខ្លួននៅក្រៅប្រទេស ក្នុងនោះក៏មានលោកស្រី មាន ឡា និងប្ដីរបស់គាត់ផងដែរ។
ទាក់ទងនឹងបញ្ហានេះ អ្នកនាំពាក្យគណបក្សកាន់អំណាច លោក សុខ ឥសាន ប្រាប់អាស៊ីសេរីថា លោកមិនចាប់អារម្មណ៍ចំពោះសកម្មជនបក្សប្រឆាំងដែលឆ្លងជំងឺកូវីដ១៩នៅក្នុងប្រទេសថៃនោះទេ។ លោកបញ្ជាក់ថា ក្រុមបក្សប្រឆាំងទាំងនោះរត់ភៀសខ្លួនរកកន្លែងលំបាកដោយខ្លួន ពីព្រោះលោកថា រដ្ឋាភិបាលដឹកនាំដោយគណបក្សប្រជាជនកម្ពុជា មិនបានតាមធ្វើទុក្ខបុកម្នេញពួកគេឡើយ៖ «អ៊ីចឹងបើគាត់កុំប្រព្រឹត្តល្មើសច្បាប់ទៅ គេនៅគគោកមិនមានអីផងហ្នឹង។ គាត់ថា រិះគន់ហ្នឹងមិនមែនរិះគន់ទេ គឺវាយប្រហារ។ អាហ្នឹងគាត់រអៀសខ្លួនឯងតើមានអ្នកធ្វើអីគាត់ ម្យ៉ាងទៀត ការរត់ភៀសខ្លួននោះវាជាជម្រើសជំនួញ ដើម្បីបានទៅរស់នៅប្រទេសទី៣ ហើយប្រទេសទី៣សុំឱ្យយកគាត់ទៅនៅផង»។
ទោះជាយ៉ាងណា ប្រធានសមាគមការពារសិទ្ធិមនុស្សអាដហុក(Adhoc) លោក នី សុខា មើលឃើញថា ការដែលសកម្មជនគណបក្សប្រឆាំងរត់ភៀសខ្លួនទៅក្រៅប្រទេសនេះ គឺដោយសារពួកគាត់មិនអាចរស់នៅក្នុងស្រុកបាន បណ្ដាលពីអាជ្ញាធររបបក្រុងភ្នំពេញធ្វើទុក្ខបុកម្នេញពួកគាត់។ លោកបន្តថា ប្រជាពលរដ្ឋជ្រើសរើសគណបក្សនយោបាយណាមួយជាសិទ្ធិសេរីភាពរបស់ពួកគាត់ស្របតាមរដ្ឋធម្មនុញ្ញ៖ «យុទ្ធសាស្ត្រការធ្វើនយោបាយវាជារឿងមួយក្នុងការជ្រើសរបស់មនុស្សម្នាក់ៗ ដែលគេជ្រើសយករបៀបធ្វើនយោបាយផ្សេងៗគ្នា ។ពីព្រោះថា មនុស្សទាំងអស់មិនអាចយល់ដូចគ្នាថា ទាល់តែធ្វើនយោបាយបែបនេះបែបនោះតាមការចង្អុលបង្ហាញរបស់បុគ្គលនេះបុគ្គលនោះ បាននយោបាយហ្នឹងត្រឹមត្រូវនោះទេ។ វាជាសេរីភាពរបស់អ្នកដែលគេសម្រេចចិត្តថាគេប្រើយុទ្ធសាស្ត្រណាដើម្បីឱ្យមានភាពជោគជ័យ»។
សកម្មជនគណបក្សប្រឆាំងបានភៀសខ្លួនទៅប្រទេសថៃជាបន្តបន្ទាប់ តាំងពីតុលាការកំពូលរំលាយគណបក្សសង្គ្រោះជាតិកាលពីខែវិច្ឆិកាឆ្នាំ២០១៧ ដែលអ្នកសង្កេតការណ៍មើលឃើញថា គណបក្សប្រជាជនកម្ពុជាខ្លាចចាញ់ការបោះឆ្នោតជ្រើសរើសសមាជិកសភាតំណាងរាស្ត្រនៅឆ្នាំ២០១៨។ រហូតមកដល់ពេលនេះសកម្មជនបក្សនេះប្រមាណ១០០នាក់កំពុងភៀសខ្លួននៅប្រទេសថៃ ។
លោកស្រី មា ឡា និងប្ដី ប្រកាន់ជំហរថា បើទោះបីជាគ្រួសាររបស់លោកស្រីមានសុខភាពទ្រុឌទ្រោមដោយសារតែជំងឺកាចសាហាវយ៉ាងនេះក្ដី ក៏ពួកលោកស្រីនៅតែបន្តជីវភាពនយោបាយជាមួយមន្ត្រីគណបក្សប្រឆាំងទៅមុខទៀត ដោយមិនក្បត់ឆន្ទៈម្ចាស់ឆ្នោតឡើយ ដោយសារគ្រួសារលោកស្រីមិនពេញចិត្តនឹងរបបឯកបក្ស ដែលបំផ្លាញប្រជាធិបតេយ្យ និងចាប់ប្រជាពលរដ្ឋដាក់គុកតាមអំពើចិត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments