ភរិយារបស់លោកបណ្ឌិត កែម ឡី គឺលោកស្រី ប៊ូ រចនា ឲ្យដឹងថា នៅមុនពេលមានករណីឃាតកម្មស្វាមីរបស់លោកស្រី គឺមានមន្ត្រីនគរបាលជិះម៉ូតូនៅឆ្វែលក្បែរផ្ទះរបស់គាត់ជាច្រើនលើករហូតមានព្រឹត្តិការណ៍បាញ់លោកបណ្ឌិត កែម ឡី នៅថ្ងៃទី១០ កក្កដា ឆ្នាំ២០១៦។
លោកស្រី ប៊ូ រចនា រៀបរាប់ថា លោកបណ្ឌិត កែម ឡី បានប្រាប់លោកស្រីថា មានអ្នកគំរាមកំហែងចង់ចាប់ខ្លួនស្វាមីរបស់លោកស្រី ដែលលោកស្រីមិននឹកស្មានថា លោកបណ្ឌិត កែម ឡី ត្រូវឃាតកបាញ់សម្លាប់ឡើយ។ តើឃាតកម្មលើលោកបណ្ឌិត កែម ឡី មានភាពមិនប្រក្រតីអ្វីខ្លះ?
នៅក្នុងបទសម្ភាសន៍ជាលើកដំបូងរបស់លោកស្រី ប៊ូ រចនា ពីប្រទេសអូស្ត្រាលី ក្រោយពីលោកស្រីបានសម្ងំលាក់ខ្លួននៅទីក្រុងបាងកក ជិតពីរឆ្នាំដើម្បីសុវត្ថិភាពនោះ លោកស្រី ប៊ួ រចនា បានរៀបរាប់ថា អាជ្ញាធរ និងតុលាការបានបំផ្លើសព័ត៌មានដែលថា បានកោះហៅលោកស្រីទៅមើលខ្សែវីដេអូឃ្លីបនៅក្នុងស្តារម៉ាត កាល់តិច ស្ដុបបូកគោ ជាទីកន្លែងដែលឃាតកបាញ់លោកបណ្ឌិត កែម ឡី នោះ ថាមិនមែនជាការពិត។
លោកស្រី ប៊ួ រចនា បញ្ជាក់ថា លោកស្រីមិនបានពឹងពាក់មេធាវី ហើយក៏មិនដែលត្រូវបានតុលាកោះហៅសួរនាំអ្វីជុំវិញសំណុំរឿងឃាតកម្មរបស់លោក កែម ឡី នៅមុនពេលចាកចេញពីប្រទេសកម្ពុជា ដែរ៖ «អត់មានទំនាក់ទំនាក់មកខ្ញុំទេ គឺគេបំផ្លើសទាំងអស់ ហើយមួយទៀតរឿងថា ហៅខ្ញុំទៅមើលកាមេរ៉ាសុវត្ថិភាពនៅម៉ាត កាល់តិច តាមពិតមិនមានទេ»។
ភរិយារបស់លោកបណ្ឌិត កែម ឡី លោកស្រី ប៊ូ រចនា បានភៀសខ្លួនភ្លាមៗទៅកាន់ទីក្រុងបាងកក ទាំងពរពោះក្នុងផ្ទៃ ដើម្បីទទួលសិទ្ធិជ្រកកោណជាជនភៀសខ្លួនពីឧត្ដមស្នងការអង្គការសហប្រជាជាតិទទួលបន្ទុកផ្នែកសិទ្ធិមនុស្សប្រចាំទីក្រុងបាងកក។ ការភៀសខ្លួននេះ នៅក្រោយពេលលោកស្រី និងក្រុមគ្រួសារបានដង្ហែសាកសពលោកបណ្ឌិត កែម ឡី យកតម្កល់នៅខែត្រតាកែវ ជាទីកន្លែងកំណើតរបស់លោកកាលពីថ្ងៃទី២៤ ខែកក្កដា ឆ្នាំ២០១៦ ដែលមានមនុស្សចូលរួមរាប់លាននាក់។ លោកស្រីបានទៅដល់ប្រទេសអូស្ត្រាលី កាលពីថ្ងៃទី១៧ ខែកុម្ភៈ ឆ្នាំ២០១៨ ក្រោយពីសម្ងំលាក់ខ្លួនដើម្បីសុវត្ថិភាពនៅប្រទេសថៃ ជិត ២ឆ្នាំ។
ក្រុមអ្នកប្រើប្រាស់បណ្ដាញសង្គម ទាំងក្នុង និងក្រៅប្រទេសកម្ពុជា ស្វាគមន៍ក្រុមគ្រួសារបណ្ឌិត កែម ឡី បានទៅដល់ប្រទេសអូស្ត្រាលី ទីដែលមានសុវត្ថិភាពដើម្បីកសាងជីវិតថ្មី។ អ្នកខ្លះសរសេររៀបរាប់ថា ពួកគាត់មានអារម្មណ៍រំភើប ត្រេកអរក្រៃលែង ពេលបានដំណឹងថា នៅមានឈាមបណ្ឌិតខ្មែរដែលស្មោះត្រង់នឹងជាតិ បានទទួលការយកចិត្តទុកដាក់រួចផុតដំណាក់កាលដ៏សាហាវឃោរឃៅនេះ។ ក្នុងនាមពួកគាត់ជាពលរដ្ឋខ្មែរសូមអរគុណអស់លោកអ្នកដែលបានជួយក្រុមគ្រួសារអ្នកវិភាគនយោបាយ និងសង្គម ដែលហ៊ានពលីជីវិតដើម្បីប្រទេសជាតិនេះ ពិសេសគ្រួសារលោក ហុង លីម។
អ្នកខ្លះទៀតអះអាងថា មហាជនដឹងថា ឃាតកពិតជានរណាពិតប្រាកដ ក្រោយពីលោកបណ្ឌិត កែម ឡី បានវិភាគរបាយការណ៍របស់អង្គការ Global Witness ពីអាណាចក្រជំនួញត្រកូល "ហ៊ុន"។ លោកបានឃ្លាតកាយឆ្ងាយមែន តែមនសិការជាតិរបស់លោកបានជ្រាបពេញបេះដូងកូនខ្មែរអស់ហើយ។ ជាចុងក្រោយ សូមបារមីបុព្វបុរសខ្មែរតាមថែរក្សាភរិយា និងកូនៗរបស់លោកបណ្ឌិត កែម ឡី បានសាងជីវិតថ្មីប្រកបដោយជោគជ័យ។
ក្រុមសមាគមខ្មែរនៅប្រទេសអូស្ត្រាលី ព្រមទាំងលោកតំណាងរាស្ត្រអូស្ត្រាលី ដើមកំណើតខ្មែរ បានប្ដេជ្ញាចិត្តយ៉ាងមុតមាំថា ពួកគាត់នឹងជួយជ្រោមជ្រែងផ្គត់ផ្គង់ក្រុមគ្រួសារ ប្រពន្ធកូនលោកបណ្ឌិត កែម ឡី ឲ្យរស់នៅលើទឹកដីដែលមានសុវត្ថិភាពឲ្យមានសេចក្ដីសុខមិនខុសពីប្រជាពលរដ្ឋខ្មែរដទៃទៀតឡើយ។
លោក ហុង លីម ដែលជាមនុស្សម្នាក់ចំណោមមនុស្សជាច្រើនទៀត បានជួយជ្រោមជ្រែងខ្នះខ្នែងជួយក្រុមគ្រួសារ លោកបណ្ឌិត កែម ឡី ឲ្យបានទៅតាំងទីលំនៅថ្មីនេះ មានប្រសាសន៍ថា ជំហានដំបូងពួកលោកត្រូវរៀបចំបញ្ជូនកូនប្រុសលោកបណ្ឌិត កែម ឡី ទាំង ៥នាក់ ឲ្យចូលរៀនដោយមិនបង្អង់យូរឡើយ៖ «យើងសប្បាយចិត្តទាំងអស់គ្នានៅពេលពួកគាត់បានមកដល់ទីនេះ ហើយនៅថ្ងៃសៅរ៍ ទី២៤ កុម្ភៈនេះ យើងនឹងធ្វើបុណ្យផង ពិធីស្វាគមន៍ផង សូមបងប្អូនមកជួបជុំទាំងអស់គ្នា»។
មកទល់ពេលនេះ សមត្ថកិច្ចចាប់ខ្លួនបានលោក អឿត អាង ហៅ ជួប សម្លាប់ តែម្នាក់គត់ ដែលជាឃាតកសម្លាប់លោកបណ្ឌិត កែម ឡី ក្រោយពីឃាតកម្មភ្លាមៗកាលពីថ្ងៃទី១០ ខែកក្កដា ឆ្នាំ២០១៦ នោះ។ ៨ខែក្រោយមក តុលាការបានកាត់ទោសលោក អឿត អាង ឬ ជួប សម្លាប់ ឲ្យជាប់ពន្ធនាគារអស់មួយជីវិត ពីបទឃាតកម្មគិតទុកជាមុន។ ការកាត់ទោសនេះ ដោយតុលាការយោងលើចម្លើយសារភាពរបស់ ជួប សម្លាប់ ដែលថា គេបានបាញ់សម្លាប់លោកបណ្ឌិត កែម ឡី ដោយសារតែលោកបណ្ឌិត កែម ឡី ជំពាក់លុយចំនួន ៣ពាន់ដុល្លារ។
ការកាត់សេចក្ដីដោយយោងលើចម្លើយសារភាពរបស់ ជួប សម្លាប់ តែមួយបែបនេះ សហគមន៍ជាតិ និងអន្តរជាតិ ចាត់ទុកថា ជួប សម្លាប់ ជាឃាតកសិប្បនិម្មិត ហើយថា ករណីឃាតកម្មលើលោកបណ្ឌិត កែម ឡី នេះ មិនខុសពីឃាតកម្មលោក ជា វិជ្ជា ប្រធានសហជីពសេរីកម្មករនៃព្រះរាជាណាចក្រកម្ពុជា ដែលសមត្ថកិច្ចបង្កើតឃាតកសិប្បនិម្មិត ឈ្មោះ ប៊ន សំណាង និង សុខ សំអឿន នោះឡើយ។
ភរិយាលោកបណ្ឌិត កែម ឡី លោកស្រី ប៊ូ រចនា អះអាងថា ស្វាមីរបស់លោកស្រីមិនបានជំពាក់លុយ ជួប សម្លាប់ ចំនួន ៣ពាន់ដុល្លារឡើយ ហើយលោកបណ្ឌិត កែម ឡី ក៏មិនដែលស្គាល់ ជួប សម្លាប់ ដែរ។ លោកស្រីអះអាងថា គ្រួសាររបស់លោកស្រីរស់នៅក្នុងជីវភាពសមរម្យដែលលោកបណ្ឌិត កែម ឡី រកចំណូលបានច្រើនគួរសមក្នុងអាជីពជាអ្នកស្រាវជ្រាវលើគម្រោងផ្សេងៗឲ្យអង្គការក្រៅរដ្ឋាភិបាលនោះ៖ «គ្រួសារខ្ញុំមិនបានខ្ចីទេ ហើយក៏មិនមានរឿងហ្នឹងកើតឡើងដែរ ព្រោះអីគ្រួសារខ្ញុំគាត់រកលុយបានក្នុងមួយអាទិត្យពី ៥ពាន់ ទៅ ៦ពាន់ដុល្លារ គាត់ធ្វើការ Research»។
ក្រុមគ្រួសាររបស់ ជួប សម្លាប់ ធ្លាប់ឲ្យអាស៊ីសេរី ដឹងកន្លងមកថា ជួប សម្លាប់ គ្មានមុខរបរច្បាស់លាស់ ហើយក៏មិនដែលមានលុយដែរ។ ជួប សម្លាប់ ជាមនុស្សចូលចិត្តលេងល្បែង ហើយថែមទាំងបានយកម៉ូតូកញ្ចាស់របស់ប្រពន្ធយកទៅលក់ទៀតផង។ នេះបើតាមការអះអាងរបស់ប្រពន្ធ ជួប សម្លាប់ គឺលោកស្រី ហឿម ហ៊ត់ រស់នៅភូមិនគរភាស២ ឃុំនគរភាស ស្រុកអង្គរជុំ ខេត្តសៀមរាប។
សំណុំរឿងឃាតកម្មលោកបណ្ឌិត កែម ឡី នេះ មានភាពមិនប្រក្រតីជាច្រើន។ ក្រៅពីសមត្ថកិច្ច និងតុលាការមិនបានបង្ហាញឃាតកពិត និងអ្នកនៅពីក្រោយខ្នងនោះ បែរជាតុលាការបានចាត់ការបណ្ដឹងរបស់ប្រធានគណបក្សថ្មីថ្មោងមួយទើបបង្កើតឡើង ដែលគេដឹងថា ជាឧបករណ៍របស់គណបក្សកាន់អំណាចនោះ បានប្ដឹងអតីតគណៈកម្មការរៀបចំបុណ្យសពលោកបណ្ឌិត កែម ឡី ចំនួន ៣រូប គឺព្រះតេជព្រះគុណ ប៊ុត ប៊ុនតិញ លោក មឿន តុលា នាយកប្រតិបត្តិអង្គការសង់ត្រាល់ និងលោក ប៉ា ងួនទៀង នាយកប្រតិបត្តិមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ ពីរឿងពាក់ព័ន្ធនឹងបច្ច័យបុណ្យសពលោកបណ្ឌិត កែម ឡី និងបទរំលោភលើទំនុកចិត្ត ហើយតុលាការបានចេញដីកាបង្គាប់ឲ្យសមត្ថកិច្ចនាំខ្លួនអ្នកទាំងបី។
ឆ្លើយតបនឹងការចោទប្រកាន់នេះ ទាំងប្អូនប្រុសបង្កើតលោកបណ្ឌិត កែម ឡី ទាំងលោកស្រី ប៊ូ រចនា អះអាងថា ព្រះតេជព្រះគុណ ប៊ុត ប៊ុនតិញ លោក មឿន តុលា និងលោក ប៉ា ងួនទៀង មិនបានកិបកេងបច្ច័យបុណ្យសពឡើយ។ លោកស្រី ប៊ូ រចនា បញ្ជាក់ជាថ្មីថា ថវិកាដែលប្រមូលបានគឺលោកស្រីជាអ្នកគ្រប់គ្រង និងក្រុមគ្រួសារស្វាមីរបស់លោកស្រីជាអ្នកគ្រប់គ្រង គឺមិនជាប់ពាក់ព័ន្ធនឹងអតីតគណៈកម្មការបុណ្យសពឡើយ៖ «ពួកគាត់មិនបានកិបកេងលុយបុណ្យហ្នឹងទេ ពាក្យបណ្ដឹងហ្នឹងវាអយុត្តិធម៌ពេកហើយ ខ្ញុំកោតតែតុលាការគាត់ធ្វើទៅរួច ខ្ញុំមិននឹកស្មានថា តុលាការគេធ្វើរឿងនេះ ពួកគាត់ទាំងបីរងនូវភាពអយុត្តិធម៌ណាស់ សូមឲ្យតុលាការទម្លាក់រឿងហ្នឹងចោលទៅ»។
សំណុំរឿងឃាតកម្មលោកបណ្ឌិត កែម ឡី គឺជាសំណុំរឿងដ៏ចម្រូងចម្រាស ដែលក្រុមអ្នកការពារសិទ្ធិមនុស្សលើកឡើងថា ឃាតកម្មលោកបណ្ឌិត កែម ឡី មិនខុសពីឃាតកម្មសកម្មជនសង្គម និងសកម្មជននយោបាយជាង ១០០នាក់ផ្សេងទៀតដែលត្រូវបានគេធ្វើឃាតចាប់ពីឆ្នាំ១៩៩៣ មកទល់បច្ចុប្បន្ននេះទេ ដោយឃាតកពិតមិនត្រូវបាននាំខ្លួនមកកាត់ទោសនៅឡើយទេ។ សំណុំរឿងទាំងជាង ១០០ករណីនេះ គ្មានសំណុំរឿងណាដែលជនរងគ្រោះទទួលបានយុត្តិធម៌ឡើយ។
តំណាងរាស្ត្រអូស្ត្រាលី ដើមកំណើតខ្មែរ លោក ហុង លីម អះអាងថា សមាគមខ្មែរនៅអូស្ត្រាលី នឹងពិភាក្សាជាមួយអ្នកច្បាប់បន្ថែមទៀត ដើម្បីដាក់ពាក្យប្ដឹងទៅតុលាការព្រហ្មទណ្ឌអន្តរជាតិ ប្ដឹងរបបលោក ហ៊ុន សែន ពីករណីឃាតកម្មលើអ្នកវិភាគសង្គម និងនយោបាយឥតសំចៃមាត់ លោកបណ្ឌិត កែម ឡី នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments