លោក កើត សារ៉ាយ គឺជាយុវជនឈានមុខមួយរូបក្នុងការតស៊ូមតិដើម្បីបុព្វហេតុសិទ្ធិមនុស្ស បរិស្ថាន និងកសាងធនធានយុវជន ក្នុងបរិបទដែលកម្ពុជាកំពុងត្រួតត្រាដោយអំណាចផ្ដាច់ការរបស់ក្រុមគ្រួសារត្រកូលហ៊ុន។ អាជ្ញាធរបានចាប់ខ្លួនលោកជាលើកទីពីរ កាលថ្ងៃទី៥ មេសា ដោយចោទប្រកាន់ពីបទញុះញង់។ តើលោក កើត សារ៉ាយ មានប្រវត្តិយ៉ាងណា?
លោក កើត សារ៉ាយ គឺជាយុវជនមួយរូបដែលមានទឹកចិត្តមោះមុត ជំហររឹងមាំ និងមានឆន្ទៈខ្ពស់ក្នុងការលះបង់ដើម្បីផលប្រយោជន៍ជាតិ។ ក្ដីបំណងធំបំផុតនៃជីវិតរបស់លោក គឺចង់ឃើញកម្ពុជាមានការឯកភាពជាតិ និងពោរពេញដោយមេត្តាធម៌។
លោក កើត សារ៉ាយ៖ «យើងកសាងសង្គមជាតិដោយក្ដីស្រឡាញ់ ដោយការអត់ឱន ដោយការផ្សះផ្សា ដោយការឯកភាពគ្នា ដោយការស្រឡាញ់គ្នា ក្នុងគោលដៅតម្កល់ផលប្រយោជន៍ជាតិជាសំខាន់លើសអ្វីទាំងអស់»។
លោក កើត សារ៉ាយ មានអាយុ ៣២ ឆ្នាំ។ លោកកើតនៅឆ្នាំ ១៩៩២ នៅភូមិសំរោង ឃុំសំរោង ស្រុកសូទ្រនិគម ខេត្តសៀមរាប។ លោកមានបងប្អូនបង្កើតចំនួន ៦ នាក់ ស្រី៣ ប្រុស ៣ ហើយលោកជាកូនពៅនៅក្នុងគ្រួសារ ដែលមានឪពុកម្ដាយជាកសិករនិងលក់ដូរនំចំណីបន្តិចបន្តួច។ ឪពុករបស់លោកបានចែកឋានទៅហើយ នៅសល់តែម្ដាយគឺលោកស្រី ចាប យ៉ែម ដែលបច្ចុប្បន្នមានព្រះជន្មជិត ៨០ វស្សា។
លោក កើត សារ៉ាយ ធ្លាប់បួសជាព្រះសង្ឃចំនួន ១៥ ព្រះវស្សា មុនពេលអាជ្ញាធរ និងមន្ត្រីសង្ឃជាន់ខ្ពស់ចាប់ផ្សឹកដោយបង្ខំ នៅពេលលោកចេញតវ៉ាដោយសន្តិវិធីប្រឆាំងនឹងការចាប់ខ្លួនលោក រ៉ុង ឈុន កាលពីឆ្នាំ២០២០។ ពេលនោះ តុលាការបានផ្ដន្ទាទោសលោកឱ្យជាប់ពន្ធនាគារចំនួន ២០ ខែ ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។ តុលាការបានឃុំខ្លួនលោកក្នុងពន្ធនាគារចំនួន ១៤ ខែ ហើយទោសនៅសល់ត្រូវព្យួររយៈពេល ២ឆ្នាំ។
សកម្មជនចលនាមាតាធម្មជាតិលោក ថុន រដ្ឋា ចាត់ទុកលោក កើត សារ៉ាយ ថា ជាជនគំរូមួយរូប ដែលមានទឹកចិត្តមោះមុត និងមិនខ្លាចសូម្បីតែលះបង់ជីវិត ដើម្បីបុព្វហេតុសិទ្ធិមនុស្ស និងយុត្តិធម៌សង្គម។
លោក ថុន រដ្ឋា ៖ «ពេលដែលខ្ញុំជាប់ពន្ធនាគារជាមួយគាត់ជាងមួយឆ្នាំនៅពន្ធនាគារព្រៃសជាមួយគ្នាហ្នឹង គាត់ជាមនុស្សដែលមានទឹកចិត្តរឹងមាំមែនទែន តែងតែញញឹមគ្រប់ពេលវេលានៅក្នុងគុក។ យើងកម្រឃើញបង សារ៉ាយ បាក់ទឹកចិត្ត ឬក៏ផ្ដល់ក្ដីអស់សង្ឃឹមមកកាន់យើងណាស់ មានតែស្នាមញញឹម ហើយនិងលើកទឹកចិត្តសម្រាប់ពួកយើង»។
លោក កើត សារ៉ាយ បានចូលប្រឡូកក្នុងការងារលើកកម្ពស់សិទ្ធិមនុស្ស បរិស្ថាន និងយុត្តិធម៌សង្គម កាន់តែខ្លាំង ក្រោយចេញពីពន្ធនាគារ។ នៅខែមីនា ឆ្នាំ ២០២៣ លោកបានក្លាយជាប្រធានសមាគមសម្ពន្ធនិស្សិតបញ្ញវន្តខ្មែរ ដែលជាអង្គការយុវជនមួយផ្ដួចផ្ដើមបង្កើតឡើងដោយលោកបណ្ឌិត កែម ឡី។
គឺក្នុងតួនាទីជាអ្នកដឹកនាំអង្គការយុវជននេះហើយ ដែលលោក កើត សារ៉ាយ បានធ្វើសកម្មភាពលេចធ្លោជាច្រើនដូចជា ការបណ្ដុះបណ្ដាលយុវជន ការធ្វើធម្មយាត្រាផ្សាយមេត្តាធម៌ និងសិទ្ធិមនុស្ស យុទ្ធនាការប្រឆាំងការនាំចេញឈើទៅបរទេសរបស់ក្រុមហ៊ុនដែលមានរឿងអាស្រូវបំផ្លាញធនធានធម្មជាតិ ការផ្ដល់បទសម្ភាសន៍ដល់អ្នកសារព័ត៌មាន និងយុទ្ធនាការទាមទារឱ្យរដ្ឋាភិបាលលុបបំបាត់អំពើនិទ្ទណ្ឌភាព ជាដើម។
ថ្មីៗ លោកបានចុះទៅជួបពលរដ្ឋមួយចំនួនដែលកំពុងរស់នៅលាក់ខ្លួនក្នុងព្រៃ ក្រោយពីអាជ្ញាធរខេត្តព្រះវិហារបានបង្ក្រាបដោយហិង្សា និងបណ្ដេញពួកគាត់ចេញពីលំនៅឋានដោយបង្ខំ។ លោក កើត សារ៉ាយ បានបង្ហោះរឿងនេះលើទំព័រហ្វេសប៊ុកផង និងផ្ដល់ព័ត៌មានដល់អ្នកសារព័ត៌មានផង។
ផ្ដើមចេញពីរឿងនេះឯង ដែលអាជ្ញាធរចោទលោកថា បានបំភ្លៃព័ត៌មានក្នុងចេតនាប្រឆាំងរដ្ឋាភិបាល។ អាជ្ញាធរបានចាប់ខ្លួនលោកជាលើកទីពីរនៅថ្ងៃទី៥ មេសា ២០២៤ ដោយចោទប្រកាន់ដដែលពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងបទ «មិនរាងចាលក្នុងបទមជ្ឈិម»។
ប៉ុន្តែការចោទប្រកាន់ និងការចាប់ខ្លួនលោក កើត សារ៉ាយ នេះ បាននាំមកនូវការរិះគន់ថ្កោលទោសព្រោងព្រាតពីសំណាក់ពលរដ្ឋ និងក្រុមសង្គមស៊ីវិល។ ចំណុចសំខាន់ស្ថិតនៅត្រង់ថា អាជ្ញាធរមិនទាន់អាចរកដំណោះស្រាយសមរម្យក្នុងរឿងជម្លោះដីធ្លីនេះជូនពលរដ្ឋដែលផ្ទះរបស់ពួកគាត់ត្រូវបានអាជ្ញាធរដុតបំផ្លាញ និងបណ្ដេញចេញដោយហិង្សានៅឡើយទេ តែបែរជាទៅប្រឌិតរឿងចោទប្រកាន់ និងបំបិទមាត់អ្នកលាតត្រដាងការពិតទៅវិញ។
ពលរដ្ឋមួយរូបដែលកំពុងរស់នៅលាក់ខ្លួនក្នុងព្រៃ លោកស្រី លូត សាឡា ថ្លែងថា លោក កើត សារ៉ាយ មិនបានញុះញង់ពលរដ្ឋនោះទេ។ លោកស្រីបញ្ជាក់ថា លោកគ្រាន់តែចុះជួបពលរដ្ឋដែលកំពុងរងទុក្ខវេទនានៅក្នុងព្រៃ គេចពីការធ្វើបាបរបស់អាជ្ញាធរប៉ុណ្ណោះ។
លោកស្រី លូត សាឡា៖ «ពួកខ្ញុំសំណូមពរទៅរាជរដ្ឋាភិបាល និងអាជ្ញាធរខេត្តព្រះវិហារ សូមបញ្ចប់រឿងនេះទៅ ហើយឈប់មានការតាមចាប់ ហើយដោះលែងបងប្អូនពួកខ្ញុំដែលនៅក្នុងឃុំ និងបង សារ៉ាយ មកវិញ ឱ្យមានសេរីភាព។ ខ្ញុំសុំតែប៉ុណ្ណឹងឯង»។
យ៉ាងណាក៏ដោយចុះ លោក កើត សារ៉ាយ មិនដែលភ័យខ្លាចនឹងរឿងគុកច្រវាក់នេះទេ។ លោកបានត្រៀមខ្លួនរួចជាស្រេចក្នុងការប្រឈមនឹងទង្វើយាយីតាមគ្រប់រូបភាពពីសំណាក់អាជ្ញាធរ។ លោកបានប្រាប់អាស៊ីសេរីនៅមុនពេលអាជ្ញាធរចាប់ខ្លួនថា អ្វីដែលលោកបានធ្វើគឺជារឿងត្រឹមត្រូវ ដើម្បីផលប្រយោជន៍សង្គម។
លោក កើត សារ៉ាយ៖ «អ្វីដែលខ្ញុំនិយាយចេញពីមាត់ខ្ញុំ ខ្ញុំមានការទទួលខុសត្រូវ ហើយការទទួលខុសត្រូវ ហើយការទទួលខុសត្រូវរបស់ខ្ញុំមានតម្លៃស្មើជីវិតរបស់ខ្ញុំ។ ខ្ញុំមិនដែលរាថយជាមួយអ្វីដែលខ្ញុំចង់ធ្វើទេ ពីព្រោះវាប្រាកដនិយម វាបម្រើផលប្រយោជន៍ជាតិ វាជាអំពើល្អ។ ខ្ញុំច្បាស់ណាស់ថា អ្វីដែលខ្ញុំធ្វើ គឺជាការបម្រើដល់ផលប្រយោជន៍ប្រជាពលរដ្ឋ ដូច្នេះខ្ញុំគ្មានអ្វីដែលត្រូវបារម្ភទេ។ អ្វីដែលខ្ញុំបារម្ភនៅពេលនេះ គឺតើយើងអាចជជែកគ្នារកមធ្យោបាយដោះស្រាយជូនប្រជាពលរដ្ឋបានដែរ ឬអត់? តែប៉ុណ្ណឹងទេ»។
លោក កើត សារ៉ាយ ធ្លាប់អះអាងទៀតថា លោកនឹងបន្តការងារសង្គមដោយមិនរួញរាឡើយ ដរាបណាលោកនៅមានសេរីភាព។ លោកមានបំណងប្រាថ្នាធំមួយទៀត គឺចង់ឃើញអ្នកដឹកនាំខ្មែរចេះស្រឡាញ់ពលរដ្ឋ និងគិតគូរអំពីអនាគតយុវជនជំនាន់ក្រោយ ជាជាងគិតតែពីប្រយោជន៍ក្រុមបក្ខពួករបស់ខ្លួន។ ជាមួយគ្នានេះ លោកចង់ឱ្យយុវជនមានជំហររឹងមាំក្នុងការតស៊ូដោយសន្តិវិធី ដើម្បីបុព្វហេតុសិទ្ធិមនុស្ស លទ្ធិប្រជាធិបតេយ្យ និងយុត្តិធម៌សង្គម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments