វត្តមានយោធារបស់ចិនជាអចិន្ត្រៃយ៍នៅកំពង់ផែកងទ័ពជើងទឹករាម បាន«ចាប់ផ្ដើម»ហើយ។ នេះបើយោងតាមការវាយតម្លៃចុងក្រោយរបស់អ្នកជំនាញនៃស្ថាប័នស្រាវជ្រាវដ៏មានឥទ្ធិពលរបស់អាមេរិក។
ប្រធានកម្មវិធីអាស៊ីអាគ្នេយ៍ និងគំនិតផ្ដួចផ្ដើមតម្លាភាពលម្ហសមុទ្រអាស៊ី (AMTI) នៃមជ្ឈមណ្ឌលសិក្សាអំពីយុទ្ធសាស្ត្រ និងកិច្ចការអន្តរជាតិ (CSIS) របស់អាមេរិក លោក ក្រិកហ្គោរី ផលីង (Gregory Poling) ត្រូវបានទស្សនាវដ្ដី Newsweek ដកស្រង់ប្រសាសន៍យកមកចុះផ្សាយកាលពីថ្ងៃទី២៦ ខែមេសា ថា វត្តមានយោធាជាអចិន្ត្រៃយ៍នៅកំពង់ផែរាមបានចាប់ផ្ដើមហើយ ហើយយើងទំនងជានឹងបន្តឃើញនាវាចម្បាំងនានារបស់ចិននឹងត្រូវបានគេបញ្ជូនមកកាន់កំពង់ផែរាមឆ្លាស់វេនគ្នា សម្រាប់រយៈពេលយូរ។
មជ្ឈមណ្ឌលសិក្សាអំពីយុទ្ធសាស្ត្រ និងកិច្ចការអន្តរជាតិ CSIS កាលពីថ្ងៃទី១៨ ខែមេសា បានវាយតម្លៃថា ផ្អែកតាមរូបភាពតាមផ្កាយរណបពាណិជ្ជកម្ម នាវាចម្បាំងពីរគ្រឿងរបស់ចិនបានចូលចតនៅកំពង់ផែរាមអស់រយៈពេលជាង៤ខែមកហើយចាប់តាំងពីថ្ងៃទី០៣ ខែធ្នូ ឆ្នាំ២០២៣ មក ដោយពុំទាន់ចាកចេញវិញនៅឡើយទេ។ មជ្ឈមណ្ឌលនេះ ថានាវាចម្បាំងរបស់ចិនទាំងពីរគ្រឿងនេះ មានវត្តមាននៅកំពង់ផែរាមស្ទើរតែជាប្រចាំចាប់តាំងដើមថ្ងៃទី០៣ ខែធ្នូ ឆ្នាំ២០២៣រហូតមក ហើយបាត់វត្តមានតែក្នុងចន្លោះថ្ងៃទី១៥ ដល់ថ្ងៃទី១៨ ខែមករា និងថ្ងៃទី២៩ ដល់ថ្ងៃទី៣០ ខែមីនា ប៉ុណ្ណោះ។ អ្នកជំនាញអាមេរិករូបនេះ ពន្យល់ថា រូបភាពតាមផ្កាយរណបបញ្ជាក់យ៉ាងច្បាស់ថា នាវាចម្បាំងទាំងពីរគ្រឿងរបស់ចិននេះ មិនដែលបានចាកចេញពីកំពង់ផែរាមឡើយ។ លោកថា ចន្លោះពេលខ្លីដែលនាវាចម្បាំងទាំងនេះ មិនមានវត្តមាននៅផែសំចត គឺទំនងជាដោយសារតែនាវាទាំងនេះធ្វើសមយុទ្ធរយៈពេលខ្លីនៅសមុទ្រ។
កម្ពុជាធ្លាប់អះអាងថាការអនុញ្ញាតឱ្យនាវាចម្បាំងរបស់ចិនចូលចតនេះ គឺដើម្បីត្រៀម«ហ្វឹកហ្វឺន»នាយនាវិកកងទ័ពជើងទឹកកម្ពុជា។ ក៏ប៉ុន្តែ ពុំបានបញ្ជាក់ពីរយៈពេលជាក់លាក់នៃការ«ហ្វឹកហ្វឺន»នេះទេ។
សហរដ្ឋអាមេរិក និងក្រុមប្រទេសបស្ចិមលោកមួយចំនួន តែងលើកឡើងពីកង្វល់របស់ខ្លួនជាប្រចាំថា ចិនអាចប្រើប្រាស់មួយផ្នែកនៃកំពង់ផែរាម ធ្វើជាមូលដ្ឋានទ័ព«ផ្ដាច់មុខ»របស់ខ្លួន។ ក៍ប៉ុន្តែ ព័ត៌មាននេះ ត្រូវបានភាគីកម្ពុជាបដិសេធយ៉ាងដាច់អហង្ការ។ កាលពីពាក់កណ្ដាលខែមេសា លោកនាយករដ្ឋមន្ត្រី ហ៊ុន ម៉ាណែត បានគូសបញ្ជាក់ថា កម្ពុជាគ្មានមហិច្ឆតា និងភាពក្លាហានក្នុងការប្រឆាំងរដ្ឋធម្មនុញ្ញខ្លួនឯង ដើម្បីអនុញ្ញាតឱ្យប្រទេសណាដាក់មូលដ្ឋានទ័ពនៅលើទឹកដីខ្លួនឡើយ។
ការិយាល័យប្រធានកិច្ចការសម្ងាត់អាមេរិកាំង (ODNI) ដែលជាបណ្ដុំភ្នាក់ងារកិច្ចការសម្ងាត់អាមេរិកាំងចំនួន១៧ស្ថាប័ន ក្នុងនោះរួមទាំងភ្នាក់ងារ ស៊ី.អាយ.អេ (CIA) ផង បន្តលើកឡើងក្នុងរបាយការណ៍វាយតម្លៃពីហានិភ័យប្រចាំឆ្នាំ២០២៤របស់ខ្លួន កាលពីដើមខែកុម្ភៈ ថា ចិនបានបង្កើនមហិច្ឆតាយោធារបស់ខ្លួន រួមទាំងការសាងសង់មូលដ្ឋានទ័ពថ្មីៗ ដើម្បីគាំទ្រដល់វត្តមានកាន់តែកើនឡើងរបស់ក្រុងប៉េកាំង (Beijing) នៅលើលម្ហសមុទ្រ។ បណ្ដុំភ្នាក់ងារកិច្ចការសម្ងាត់អាមេរិកាំងដដែលនេះ សរសេរថា ក្រៅតែពីអភិវឌ្ឍមូលដ្ឋានទ័ពនៅប្រទេសជីបូទី (Djibouti) និងការសាងសង់មូលដ្ឋានរបស់ខ្លួននៅកំពង់ផែរាមរបស់កម្ពុជាហើយនោះ ក្រុងប៉េកាំងត្រូវគេរាយការណ៍ថាក៏កំពុងពិចារណាសាងសង់មូលដ្ឋានទ័ពនៅតាមទីតាំងជាច្រើនទៀត រួមទាំងនៅប្រទេសមីយ៉ាន់ម៉ា (Myanmar) ឬភូមា (Burma) គុយបា (Cuba) ប៉ាគីស្ថាន (Pakistan) និងស្រីលង្កា (Sri Lanka) ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments