ក្រសួងទេសចរណ៍បានរៀបចំព្រឹត្តិការណ៍ពិព័រណ៍វប្បធម៌ទេសចរណ៍ និងការសម្ដែងសិល្បៈក្បាច់គុនល្បុក្កតោកម្ពុជា និងក្បាច់គុនសៅលីងរបស់ចិន នៅខេត្តសៀមរាប ដើម្បីបង្កើនទំនាក់ទំនងវប្បធម៌ កិច្ចសហប្រតិបត្តិការ និងវិស័យទេសចរណ៍ប្រទេសទាំងពីរ។
មនុស្សជាច្រើនពាន់នាក់ កំពុងទស្សនាការសម្ដែងក្បាច់គុនល្បុក្កតោរបស់កម្ពុជា និងក្បាច់គុនសៅលីងរបស់ចិន នៅបរិវេណប្រាសាទបាយ័ន ក្នុងក្រុងសៀមរាប កាលពីព្រឹកថ្ងៃទី២៤ ខែមេសា។
ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី យល់ថា ព្រឹត្តិការណ៍នេះបង្ហាញពីនិមិត្តរូបវិស័យទេសចរណ៍ចិន និងកម្ពុជា ប្រសិនបើមានភ្ញៀវទេសចរចិន មកទស្សនាកម្ពុជាច្រើន នឹងផ្តល់ប្រយោជន៍ច្រើនដល់កម្ពុជា។
តែយ៉ាងណាលោកថា អាជ្ញាធរគួរតែផ្ដោតលើ ការទាក់ទាញភ្ញៀវទេសចរទូទៅ នឹងកាន់តែប្រសើរ ដោយរៀបចំសណ្ដាប់ធ្នាប់សន្តិសុខល្អ ផ្តល់សេវាកម្មល្អជូនភ្ញៀវទេសចរចៀសវាងកេងប្រវ័ញ្ចភ្ញៀវ រៀបចំកុំឱ្យមានសំរាមតាមទីសាធារណៈ និងបង្កើតសួនឧទ្យានបន្ថែមទៀត ជាដើម៖
លោក ខឿវ ធី៖ «ចិនមកលេងច្រើន ការងារយើងច្រើនដែរ មានប្រយោជន៍ចំពោះមិត្តភាពកម្ពុជាចិន។ យើងគិតទេសចរទូទៅ ទេសចរយើងគិតពីភាពមនោរម្យ កាលណាទេសចរអត់មានចោរ និងបទល្មើសឧក្រិដ្ឋកើតឡើង គេលើកលែង។ យើងអាចលើកលែងវីហ្សាបាន (Visa) បានកាន់តែល្អទៀត ដើម្បីទាក់ទាញភ្ញៀវទេសចរ»។
ក្រសួងទេសចរណ៍បង្កើតព្រឹត្តិការណ៍នេះ ក្នុងបំណងផ្សព្វផ្សាយគោលដៅទេសចរណ៍រួមគ្នា រវាងខេត្តហឺណាន (Henan) ប្រទេសចិន និងរដ្ឋបាលខេត្តសៀមរាប ដើម្បីគាំទ្រដល់យុទ្ធនាការ «ទស្សនាសៀមរាប ឆ្នាំ២០២៤» និង «ឆ្នាំនៃការផ្លាស់ប្ដូរប្រជាជន និងប្រជាជនកម្ពុជា-ចិន ២០២៤» ក្នុងគោលដៅ ទាក់ទាញចំណាប់អារម្មណ៍ភ្ញៀវទេសចរ និងទាក់ទាញវិនិយោគិនចិនកាន់តែច្រើន។
រដ្ឋមន្ត្រីក្រសួងទេសចរណ៍ លោក សុខ សូកេន ថ្លែងក្នុងពិធីនោះថា ចំណងមិត្តភាពកម្ពុជាចិនកាន់តែស្អិតល្មួតបន្ថែមទៀត ពីមួយជំនាន់ទៅមួយជំនាន់រហូតដល់បច្ចុប្បន្ន ។ លោកថា ព្រឹត្តិការណ៍នេះឆ្លុះបញ្ចាំងពីការយកចិត្តទុកដាក់រវាងរដ្ឋាភិបាលប្រទេសទាំងពីរជាពិសេសកិច្ចសហការប្រតិបត្តិការល្អ រវាងក្រសួងទេសចរណ៍ និងរដ្ឋបាលខេត្តហឺណាន (Henan) ប្រទេសចិន ក្នុងការពង្រីកចំណងមិត្តភាពកម្ពុជា-ចិន ស្របតាមស្មារតីមិត្តដែកខែប និងសហគមន៍វាសនារួមគ្នា រវាងកម្ពុជា-ចិន ប្រកបដោយភាពស៊ីជម្រៅ។
លោក សុខ សូកេន៖ «អនាគតវិស័យទេសចរកម្ពុជាមិនអាចកាត់ផ្តាច់បាន ពីការស្រូបទាញកំណើន នៃលំហូរទេសចរ និងវិនិយោគិនចិនបានឡើយ។ កម្ពុជាត្រៀមលក្ខណៈសម្បត្តិគ្រប់គ្រាន់ ទទួលភ្ញៀវទេសចរ និងវិនិយោគចិន តាមរយៈការទទួលបដិសណ្ឋារៈភ្ញៀវទេសចរ និងវិនិយោគិនចិន នៅកម្ពុជា»។
របាយការណ៍ក្រសួងទេសចរណ៍បង្ហាញថា ក្នុងឆ្នាំ ២០២៣ កម្ពុជាទទួលបានភ្ញៀវទេសចរចំនួន ៥លាន ៤សែននាក់ (៥.៤០០.០០០)ក្នុងនោះមានភ្ញៀវទេសចរចិនចំនួន ៥៤ម៉ឺននាក់ (៥៤០.០០០)។ រីឯត្រីមាសទី១ ក្នុងឆ្នាំ២០២៤ កម្ពុជាទទួលភ្ញៀវទេសចរអន្តរជាតិ ១លាន ៥សែននាក់ (១.៥០០.០០០) កើនឡើង ២២ភាគរយ ក្នុងនោះភ្ញៀវទេសចរចិន ១៩ម៉ឺននាក់ (១៩០.០០០) កើនឡើង ៤៣ ភាគរយ ធៀបរយៈពេលដូចគ្នាកាលពីឆ្នាំ២០២៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments