ប្រធានគណបក្សសង្គ្រោះជាតិ លោក កឹម សុខា ថ្លែងក្នុងសវនាការថា លោកមិនបានធ្វើសកម្មភាពណាមួយក្បត់ជាតិខ្លួនឯង ដូចការចោទប្រកាន់នោះទេ ហើយលោកថា ខ្មែរគួរដល់ពេលរួបរួមគ្នា ដើម្បីប្រយោជន៍ជាតិ។ មន្ត្រីសង្គមស៊ីវិលយល់ស្របនឹងការលើកឡើងរបស់មេបក្សប្រឆាំងរូបនេះ ហើយថា អ្នកនយោបាយគួរងាកមកផ្សះផ្សាជាតិឡើងវិញ។
សាលាឧទ្ធរណ៍នៅថ្ងៃទី៩ ឧសភា បានបើកសវនាការជាលើកទី៨ លើបណ្ដឹងជំទាស់របស់មេដឹកនាំបក្សប្រឆាំងលោក កឹម សុខា ប្រឆាំងនឹងសេចក្ដីសម្រេចរបស់សាលាដំបូងរាជធានីភ្នំពេញដែលកាត់ឱ្យលោកមានទោសក្បត់ជាតិ ២៧ឆ្នាំ និងដាក់ឃុំក្នុងផ្ទះ បាត់បង់សិទ្ធិសេរីភាពរួមទាំងសិទ្ធិធ្វើនយោបាយ។
ក្រោយចេញពីបន្ទប់សវនាការ សហមេធាវីលោក កឹម សុខា គឺលោក ផែង ហេង លើកឡើងថា សវនាការលើកនេះមានចោទសួរទៅកាន់លោក កឹម សុខា ជុំវិញអំពើក្បត់ជាតិ និងការត្រូវរ៉ូវជាមួយបរទេស ឬអង្គការសង្គមស៊ីវិលមួយចំនួន ដូចជា វិទ្យាស្ថានជាតិប្រជាធិបតេយ្យ (NDI) និងវិទ្យាស្ថានសាធារណរដ្ឋអន្តរជាតិ (IRI) ជាដើម។ ទោះជាយ៉ាងណាក្ដី លោក កឹម សុខា ច្រានចោទលើបទចោទក្បត់ជាតិនេះ ហើយលោកថា មិនបានកាត់ដី ឬផ្ដល់ធនធានជាតិអ្វីមួយទៅឱ្យបរទេសនោះទេ។
លោក ផែង ហេង ឱ្យដឹងទៀតថា លោក កឹម សុខា ក៏បានសំណូមពរថា ខ្មែរគួរឈប់លាបពណ៌គ្នា និងគួរដល់ពេលរួបរួមគ្នាឡើងវិញ ខណៈដែលលោកមើលឃើញថា សង្គមខ្មែរឈានដល់ការបែកបាក់ផ្ទៃក្នុងកាន់តែខ្លាំង។
លោក ផែង ហេង៖ «គាត់ក៏បានបញ្ជាក់ដែរថា ក្នុងកាលៈទេសៈនេះខ្មែរគួររួបរួមគ្នាផ្សះផ្សាជាតិ ដើម្បីប្រយោជន៍ខ្មែរទាំងអស់គ្នា ជាជាងចោទគាត់ត្រូវរ៉ូវជាមួយបរទេស ត្រូវរ៉ូវជាមួយអាមេរិក ឬត្រូវរ៉ូវជាមួយជា IRI NDI USAID KAS ព្រោះអង្គការទាំងអស់នេះ គេសុទ្ធតែជួយខ្មែរ តាំងពីមានកិច្ចព្រមព្រៀងទីក្រុងប៉ារីស ហើយស្ថានទូតទាំងអស់នេះ ក៏មិនមែនជាសត្រូវរបស់កម្ពុជាដែរ»។
លោក ផែង ហេង ឱ្យដឹងដែរថា ប្រធានបក្សប្រឆាំងវ័យ ៧០ឆ្នាំរូបនេះ មានជំងឺប្រចាំកាយបន្តិចបន្តួច។
ប្រធានក្រុមប្រឹក្សាជំនុំជម្រះ លោក អ៊ឹម វណ្ណៈ កំណត់ថ្ងៃទី២៣ ខែឧសភា ដើម្បីបន្តសវនាការជាលើកទី៩ ហើយលោកថា សំណុំរឿងនេះ អាចនឹងបិទបញ្ចប់នៅពាក់កណ្ដាលឆ្នាំ២០២៤ ។
វិទ្យុអាស៊ីសេរីមិនអាចសុំការឆ្លើយតបរឿងនេះពីអ្នកនាំពាក្យសាលាឧទ្ធរណ៍ភ្នំពេញ លោក ឃុន លាងម៉េង បានទេ នៅថ្ងៃទី៩ ខែឧសភា។
ដូចសវនាការក្នុងពេលកន្លងមកដែរ មន្ត្រីអង្គការសហប្រជាជាតិ (UN) មន្ត្រីស្ថានទូតសហភាពអឺរ៉ុប អង្គការសិទ្ធិមនុស្ស និងអង្គការសង្គមស៊ីវិល ក៏បានចូលរួមតាមដានលើករណីនេះ ខណៈមានអ្នកគាំទ្រលោក កឹម សុខា ប្រមាណ ៤០នាក់មកពីបណ្ដាខេត្តមួយចំនួន ដូចជា រាជធានីភ្នំពេញ ខេត្តកណ្ដាល កំពត បន្ទាយមានជ័យ ត្បូងឃ្មុំ កំពង់ស្ពឺ ស្ទឹងត្រែង បាត់ដំបង និងខេត្តកំពង់ធំ ឃ្លាំមើលនៅខាងក្រៅសាលសវនាការ។ សាលាឧទ្ធរណ៍បដិសេធមិនឱ្យអ្នកសារព័ត៌មានចូលរួមស្ដាប់ទាំង ៨លើកមកហើយ ដោយលើកហេតុផលថា មិនមានកន្លែងគ្រប់គ្រាន់។
នាយកទទួលបន្ទុកកិច្ចការទូទៅ នៃអង្គការឃ្លាំមើលសិទ្ធិមនុស្សលីកាដូ (LICADHO) លោក អំ សំអាត ដែលបានចូលរួមសវនាការកត់សម្គាល់ថា លោក កឹម សុខា តែងលើកឡើងម្ដងហើយម្ដងទៀតឱ្យមានការសាមគ្គីជាតិ ជាពិសេស រវាងអ្នកនយោបាយ និងអ្នកនយោបាយ ហើយលោកថា ក្នុងនាមជាអង្គការសង្គមស៊ីវិល ក៏ចង់ឃើញគណបក្សកាន់អំណាចបើកចិត្តទូលាយ និងងាកមកផ្សះផ្សាជាតិឡើងវិញ។
លោក អំ សំអាត៖ «យើងចង់ឃើញអ្នកនយោបាយទាំងអស់តម្កល់ឧត្ដមប្រយោជន៍ជាតិ ឧត្ដមប្រយោជន៍ពលរដ្ឋជាធំ ដោយចរចាគ្នាដោយសន្តិវិធី ដើម្បីស្វែងរកដំណោះស្រាយប្រសិនជាមានបញ្ហាវិបត្តិនយោបាយណាកើតឡើង ដោយសំខាន់យើងធ្វើម៉េច យើងអនុវត្តតាមគោលការណ៍លទ្ធិប្រជាធិបតេយ្យសេរី ពហុបក្សដែលកម្ពុជាប្រកាន់យក ហើយមានចែងក្នុងរដ្ឋធម្មនុញ្ញ»។
បណ្ដាប្រទេសជាច្រើននៅលើពិភពលោក កាលពីថ្ងៃទី៨ ខែឧសភា បានលើកឡើងនៅកិច្ចប្រជុំដំណើរការពិនិត្យឡើងវិញជាសកលតាមកាលកំណត់របស់អង្គការសហប្រជាជាតិ (UNPR) ដោយបានស្នើទៅកាន់រដ្ឋាភិបាលកម្ពុជាឱ្យគោរពសិទ្ធិមនុស្ស ស្ដារលទ្ធិប្រជាធិបតេយ្យ និងដោះលែងអ្នកទោសមនសិការ ជាពិសេស មេដឹកនាំបក្សប្រឆាំងលោក កឹម សុខា។
សាលាដំបូងរាជធានីភ្នំពេញ កាលពីថ្ងៃទី៣ ខែកុម្ភៈ ឆ្នាំ២០២៣ បានផ្ដន្ទាទោសលោក កឹម សុខា ដាក់ពន្ធនាគាររយៈពេល ២៧ឆ្នាំ ពីបទសន្ទិដ្ឋភាពជាមួយបរទេស ឬឃុបឃិតត្រូវរ៉ូវគ្នាជាមួយបរទេស ដែលត្រូវបានចោទប្រកាន់តាំងពីឆ្នាំ២០១៧។ តុលាការបានដាក់បម្រាមមិនឱ្យលោក កឹម សុខា ធ្វើនយោបាយ មិនឱ្យចេញពីផ្ទះ មិនអនុញ្ញាតឱ្យជួបភ្ញៀវបរទេស លើកលែងតែមានការអនុញ្ញាតពីតុលាការ។ ទោះជាយ៉ាងណាសហគមន៍ជាតិ និងអន្តរជាតិចាត់ទុកថា សំណុំរឿងនេះ ជារឿងនយោបាយ និងទាមទារឱ្យលុបចោលការចោទប្រកាន់និងប្រគល់សេរីភាពពេញលេញជូនមេបក្សប្រឆាំងរូបនេះវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕
From ព័ត៌មានថ្មីៗ | RFA
via_IFTTT
0 Comments