លោក ហ៊ុន ម៉ាណែត បានចេញមុខការពារព្រែកជីកហ្វូណន ជាថ្មីម្ដងទៀត ក្រោយប្រធានស្ដីទីគណបក្សសង្គ្រោះជាតិ លោក សម រង្ស៊ី សរសេរនៅលើបណ្ដាញសង្គមហ្វេសប៊ុក ថាគម្រោងព្រែកជីកហ្វូណន គឺជាឈ្នាន់បម្រើនយោបាយរបស់ចិន។
លោកនាយករដ្ឋមន្រ្តី ហ៊ុន ម៉ាណែត ច្រានចោលចំពោះការលើកឡើងរបស់ប្រធានស្ដីទីគណបក្សសង្គ្រោះជាតិ លោក សម រង្ស៊ី ទាក់ទងនឹងគម្រោងព្រែកជីកហ្វូណនតេជោ។ លោក ហ៊ុន ម៉ាណែត បានសរសេរនៅលើបណ្ដាញហ្វេសប៊ុក នៅថ្ងៃទី២៦ ខែមេសា ថា កម្ពុជា បានយល់អំពីអត្ថប្រយោជន៍ចំពោះសេដ្ឋកិច្ច និងសង្គមជាតិកម្ពុជា ដែលគម្រោងព្រែកជីកហ្វូណនតេជោ នឹងផ្ដល់ឱ្យសម្រាប់ប្រទេស និងពលរដ្ឋខ្មែរ ក៏ប៉ុន្តែលោកថា បែរជា លោក សម រង្សី មិនមានសមត្ថភាពក្នុងការមើលឃើញ ឬទទួលស្គាល់នូវអ្វីដែលល្អសម្រាប់ខ្មែរទៅវិញ។
ប្រតិកម្មរបស់លោក ហ៊ុន ម៉ាណែត នេះ ជាការឆ្លើយតបទៅនឹងសំណេរដើមរបស់ លោក សម រង្ស៊ី ដែលបានបង្ហោះនៅលើបណ្ដាញសង្គមហ្វេសប៊ុក កាលពីថ្ងៃទី២៤ ខែមេសា ដែលលោកលើកឡើងថា គម្រោងព្រែកជីកហ្វូណនតេជោ អាចនាំមកនូវគ្រោះថ្នាក់ធ្ងន់ធ្ងរដល់បរិស្ថាន និងជីវភាពរស់នៅ របស់ប្រជាពលរដ្ឋខ្មែរ។ សំណេររបស់លោក សម រង្ស៊ី បន្តថា រដ្ឋាភិបាល បានសម្រេចធ្វើតាមសំណើចិនកុម្មុយនិស្ត យ៉ាងតក់ក្រហល់ និងគ្មានស្មារតីទទួលខុសត្រូវ ឱ្យជីកព្រែកបែបនេះ ដោយមិនទាន់បានធ្វើការសិក្សា គ្រប់ជ្រុងជ្រោយនៅឡើយទេ។ មេដឹកនាំគណបក្សប្រឆាំងរូបនេះ លើកឡើងទៀតថា បំណងធំ នៃព្រែកនេះ មិនមែនបម្រើផលប្រយោជន៍សេដ្ឋកិច្ច ប្រទេសកម្ពុជាទេ ក៏ប៉ុន្តែបម្រើផលប្រយោជន៍យុទ្ធសាស្ត្ររបស់ចិនកុម្មុយនិស្ត ដែលត្រូវការពង្រឹងឥទ្ធិពលរបស់ខ្លួន ទៅដល់ឈូងសមុទ្រថៃ(Thai) ដោយឆ្លងកាត់ប្រទេសឡាវ (Lao) និងកម្ពុជា ដែលស្ថិតក្រោមឥទ្ធិពលប្រទេសចិន រួចទៅហើយ។
ទាក់ទិននឹងរឿងនេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់វិទ្យុអាស៊ីសេរី នៅថ្ងៃទី២៦ ខែមេសា ថា គម្រោងព្រែកជីកហ្វូណន នឹងផ្ដល់ផលប្រយោជន៍ផ្នែកសេដ្ឋកិច្ច ខាងដឹកជញ្ជូនសម្រាប់កម្ពុជា ហើយព្រែកជីកនេះ ក៏នឹងធ្វើឱ្យកម្ពុជា មានឱកាសដណ្ដើមចំណូលពីវៀតណាម តាមរយៈកប៉ាល់ ដែលនៅជាប់ព្រំដែនកម្ពុជា។ ក៏ប៉ុន្តែ លោក ម៉ែន ណាត ថ្លែងថា ការលើកឡើងរបស់លោក សម រង្ស៊ី ក៏ជាសារដាស់តឿនមួយ សម្រាប់រដ្ឋាភិបាល ឱ្យសិក្សាឱ្យគ្រប់ជ្រុងជ្រោយលើផលប៉ះពាល់បរិស្ថាន និងប្រជាពលរដ្ឋ និងមានការប្រយ័ត្នប្រយែង អំពីឥទ្ធិពលខ្លាំងហួសហេតុ របស់ចិន នៅលើទឹកដីកម្ពុជា ផងដែរ។
លោក ម៉ែន ណាត៖ «ចំណុចមួយទៀត ដែលយើងរម្លឹកជូនដល់អ្នកនយោបាយកម្ពុជា កុំឱ្យយកបញ្ហាជុំវិញព្រែកជីកហ្វូណនហ្នឹង ទៅដាក់បន្ទុកឱ្យគ្នាទៅវិញទៅមក។ កាលណាយើងយករឿងហ្នឹងមកដាក់បន្ទុកឱ្យគ្នាទៅវិញទៅមក ដំណោះស្រាយនយោបាយ គឺវាអត់មាន។ ខ្ញុំយល់ថាអ៊ីចេះ! អ្នកនយោបាយ គួរតែគិតឱ្យវែងឆ្ងាយ បើដឹងថាលោក ហ៊ុន សែន ងាកទៅរកចិនហើយ អ្នកនយោបាយខាងប្រជាធិបតេយ្យហ្នឹង គួរតែមានទំនាក់ទំនងនយោបាយការទូតល្អដែរ ជាមួយប្រទេសមហាអំណាចក្នុងតំបន់ហ្នឹង ឱ្យវាមានតុល្យភាពដែរ»។
នេះមិនមែនជាលើកទីមួយឡើយ ដែលរដ្ឋាភិបាលពីរនាក់ ឪពុក និងកូននាយករដ្ឋមន្ត្រី គឺលោក ហ៊ុន សែន និង លោក ហ៊ុន ម៉ាណែត បានចេញមុខធានា ពីគម្រោងព្រែកជីកហ្វូណនតេជោ ដោយអះអាងថា កសាងឡើងដើម្បីបង្កើនសេដ្ឋកិច្ចជាតិ និងធ្វើឱ្យជីវភាពរបស់ប្រជាពលរដ្ឋកាន់តែប្រសើរឡើង តាមរយៈការដឹកជញ្ជូនទំនិញតាមផ្លូវទឹក និងថាកម្ពុជា មិនអនុញ្ញាតឱ្យប្រទេសណាមួយ យកកម្លាំងទ័ពមកដាក់ ដើម្បីប្រឆាំងនឹងប្រទេសមួយទៀតឡើយ។
ទាក់ទងនឹងគម្រោងព្រែកជីកដ៏ចម្រូងចម្រាសនេះ រដ្ឋាភិបាលវៀតណាម និងសហរដ្ឋអាមេរិក បានលើកឡើងពីកង្វល់ដែលថា ព្រែកជីកនេះអាចជួយសម្រួលឱ្យមានវត្តមានយោធាចិន ចូលក្នុងទឹកដីកម្ពុជា កាន់តែជ្រៅតាមឈូងសមុទ្រថៃ។ កាលពីដំណើរទស្សនកិច្ចរបស់ លោក ហ៊ុន ម៉ាណែត ទៅកាន់ប្រទេសវៀតណាម កាលពីចុងឆ្នាំ២០២៣ នាយករដ្ឋមន្ត្រីវៀតណាម លោក ផាំ ម៉ិញជីញ (Pham Minh Chinh) បានប្រាប់កម្ពុជា ដោយចំៗ អំពីក្ដីបារម្ភចំពោះគម្រោងព្រែកជីកហ្វូណននេះ ថា នឹងជះឥទ្ធិពលអវិជ្ជមានដល់បរិស្ថាន និងប្រព័ន្ធទឹកទន្លេមេគង្គ ជាពិសេសទឹកទន្លេខាងក្រោម ដែលហូរពីកម្ពុជា ទៅវៀតណាម។
ទាំងវៀតណាម និងទាំងសហរដ្ឋអាមេរិក បានជំរុញឱ្យកម្ពុជាបង្ហាញតម្លាភាព និងធ្វើការឱ្យបានដិតដល់ ជាមួយគណៈកម្មការទន្លេមេគង្គ ជុំវិញរឿងរ៉ាវសាងសង់ព្រែកជីកហ្វូណនតេជោ នេះ។
កម្ពុជាគ្រោងនឹងដំណើរការសាងសង់ព្រែកជីកហ្វូណនតេជោប្រវែង ១៨០គីឡូម៉ែត្រ នៅចុងឆ្នាំ២០២៤ នេះ ហើយគ្រោងនឹងបញ្ចប់នៅឆ្នាំ២០២៨ ដោយគ្រោងនឹងចំណាយថវិកាប្រមាណ ១ពាន់៧រយលានដុល្លារ។ រដ្ឋាភិបាលក៏គ្រោងថានឹងប្រគល់សិទ្ធិឱ្យក្រុមហ៊ុនគ្រប់គ្រងដោយរដ្ឋអំណាចចិន ឈ្មោះ China Road and Bridge Corporation (CRBC) សាងសង់គម្រោងព្រែកជីកហ្វូណននេះ ក្រោមកិច្ចព្រមព្រៀង សាងសង់ ប្រតិបត្តិ និងផ្ទេរ ដែលមានរយៈពេលសរុប ៥០ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments