ឧត្ដមស្នងការសិទ្ធិមនុស្សអង្គការសហប្រជាជាតិ (UNOHCHR) សម្ដែងក្ដីព្រួយបារម្ភ ចំពោះរឿងតុលាការកំពូលតម្កល់សាលក្រមផ្ដន្ទាទោសលើក្រុមកូដករណាហ្គាវើលដ៍ និងទាមទារឱ្យអាជ្ញាធរកម្ពុជាដោះលែងប្រធានសហជីពណាហ្គាវើលដ៍ (Nagaworld) កញ្ញា ឈឹម ស៊ីថរ វិញ ជាបន្ទាន់។
អ្នកនាំពាក្យឧត្ដមស្នងការសិទ្ធិមនុស្សអង្គការសហប្រជាជាតិ អ្នកស្រី ជេរេមី ឡរែនស៍ (Jeremy Laurence) លើកឡើងក្នុងសេចក្ដីថ្លែងការណ៍ កាលពីថ្ងៃទី៣ ឧសភាថា ក្រុមកូដករណាហ្គាវើលដ៍ត្រូវបានផ្ដន្ទាទោស ដោយគ្រាន់តែពួកគេអនុវត្តសិទ្ធិសេរីភាពខាងសមាគម និងការប្រមូលផ្ដុំដោយសន្តិវិធី ដែលការពារដោយច្បាប់កម្ពុជា និងកតិកាសញ្ញាស្ដីពីសិទ្ធិពលរដ្ឋ និងសិទ្ធិនយោបាយ។ អ្នកស្រីអំពាវនាវដល់អាជ្ញាធរកម្ពុជាឱ្យទម្លាក់ចោលរាល់ការចោទប្រកាន់លើក្រុមកូដករណាហ្គាវើលដ៍។
ជាមួយគ្នានេះ ឧត្ដមស្នងការសិទ្ធិមនុស្សអង្គការសហប្រជាជាតិជំរុញឱ្យរដ្ឋាភិបាលកម្ពុជាធានាឱ្យបានពេញលេញនូវកិច្ចការពារសិទ្ធិមនុស្សដែលខ្លួនបានទទួលស្គាល់ក្រោមច្បាប់អន្តរជាតិ ហើយនិងបង្កើតបរិយាកាសដែលមនុស្សគ្រប់គ្នាអាចអនុវត្តសិទ្ធិរបស់ខ្លួនបានដោយសេរី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments