មេធាវី និងអ្នកវិភាគថា ប្រធានគណៈមេធាវីទើបជាប់ឆ្នោតថ្មី លោក សាំង វណ្ណៈ ដែលជាសមាជិកគណបក្សកាន់អំណាចនឹងបន្តរឹតត្បិតសិទ្ធិសេរីភាពមេធាវី។ ការលើកឡើងនេះ គឺដោយសារពួកគេកត់សម្គាល់ឃើញថា អតីតប្រធានគណៈមេធាវីមុនៗ ដែលជាសមាជិកបក្សប្រជាជនកម្ពុជាកន្លងមកតែងរឹតត្បិតមិនឱ្យមេធាវីមានសិទ្ធិក្នុងការបញ្ចេញមតិ ឬរិះគន់ទៅលើសំណុំរឿងនយោបាយនោះឡើយ។
ការលើកឡើងរបស់ មេធាវី និងអ្នកវិភាគ ធ្វើឡើងក្រោយពេល លោក សាំង វណ្ណៈ កាលពីថ្ងៃទី១៦ ខែតុលា បានត្រូវបានសមាជិកគណៈមេធាវីបោះឆ្នោតជ្រើសរើសឱ្យធ្វើជាប្រធានគណៈមេធាវី សម្រាប់អាណត្តិទី១៥ ជំនួសឱ្យលោក លី ច័ន្ទតុលា ដែលផុតអាណត្តិ។
មេធាវីម្នាក់ដែលសុំមិនបញ្ចេញឈ្មោះបានឱ្យដឹងថា ថ្វីត្បិតតែមេធាវីនីមួយៗ មានឯករាជ្យភាពក្នុងការជ្រើសរើសគណបក្សនយោបាយ ឬការពារក្ដីឱ្យបុគ្គលណា ក៏បានពិតមែន ប៉ុន្តែលោកថា សម្រាប់តួនាទីជាប្រធានគណៈមេធាវីគួរតែជាបុគ្គលឯករាជ្យ និងមិនបម្រើដល់គណបក្សនយោបាយណាមួយនោះទេ។ លោកបារម្ភថា ប្រធានគណៈមេធាវីថ្មីគឺ លោក សាំង វណ្ណៈ អាចនឹងបន្តរឹតត្បិតសិទ្ធិមេធាវី ដែលការពារឱ្យមន្ត្រីគណបក្សប្រឆាំង ឬសកម្មជនមិនឱ្យពួកគាត់បញ្ចេញមតិបាន។ លោកថាការរឹតត្បិតលើករណីបែបនេះបានកើតឡើងក្នុងមួយរយៈពេលចុងក្រោយនេះ ជាពិសេស ក្នុងអាណត្តិរបស់អតីតប្រធានគណៈមេធាវី លោក លី ច័ន្ទតុលា។
ចំណែកអ្នកឃ្លាំមើលបញ្ហាសិទ្ធិមនុស្ស និងសង្គម លោក ស៊ឹង សែនករុណា មានប្រសាសន៍ថា សម្រាប់តួនាទីជាប្រធានគណៈមេធាវីគួរប្រកាន់ជំហរឱ្យស្ថាប័ននេះមានភាពឯករាជ្យ ហើយត្រូវធានាឱ្យបានថា គ្មានការរើសអើងទៅលើមេធាវីរូបណា ដែលកាន់សំណុំរឿងបក្សប្រឆាំង ឬសកម្មជនសង្គម និងនយោបាយនោះទេ។
លោក ស៊ឹង សែនករុណា កត់សម្គាល់ថា កន្លងមក ក្រុមមេធាវីដែលកាន់សំណុំរឿងឱ្យគណបក្សកាន់អំណាចតែងឈ្នះក្ដីទៅលើមេធាវីដែលកាន់សំណុំរឿងរបស់មន្ត្រី ឬសកម្មជនបក្សប្រឆាំង។ លោកថា ប្រធានគណៈមេធាវីក៏គួរតែពង្រឹងស្ថាប័ននេះឡើងវិញ ដើម្បីឱ្យសាធារណជនអាចជឿជាក់បាន ព្រោះតែកន្លងមកលោកកត់សម្គាល់ឃើញថាមានមេធាវីមួយចំនួនបានសូកប៉ាន់ចៅក្រម ដើម្បីឈ្នះក្ដី។
លោក ស៊ឹង សែនករុណា៖ «ប្រសិនជាគណៈមេធាវី ទោះបីថា គាត់នៅក្នុងអំណាចតួនាទីបក្សណាមួយក៏ដោយ ក៏ប៉ុន្តែ នៅពេលដែលខ្លួនប្រកាន់នូវវិជ្ជាជីវៈរបស់ខ្លួនត្រូវតែធ្វើកិច្ចការងារដោយអព្យាក្រឹត្យ ដោយឯករាជ្យ ដោយមិនលុះអគតិទាំង ៤ដែរ ហើយយើងប្រើប្រាស់វិជ្ជាជីវៈតាមផ្លូវច្បាប់របស់យើងឱ្យបានត្រឹមត្រូវទៅ អាហ្នឹងជាផ្នែកមួយក្នុងការជួយក្នុងការទម្រង់ប្រព័ន្ធយុត្តិធម៌ឱ្យបានល្អប្រសើរដែរ»។
លោក សាំង វណ្ណៈ មានអាយុ ៤៩ឆ្នាំ។ លោកជាប់ជាមេធាវីពេញសិទ្ធិក្នុងឆ្នាំ២០០៦។ លោក គឺជាអនុប្រធានក្រុមការងារគណបក្សប្រជាជនកម្ពុជាចុះជួយស្រុកគងពិសី ខេត្តកំពង់ស្ពឺ ហើយលោកក៏ជាមេធាវីម្នាក់ក្នុងចំណោមមេធាវីផ្សេងទៀតដែលបានដាក់ពាក្យបណ្ដឹងប្រឆាំងប្រធានបក្សប្រឆាំង លោក សម រង្ស៊ី និងមន្ត្រីបក្សប្រឆាំងផ្សេងទៀត ហើយទីបំផុតតុលាការបានសម្រេចដកសិទ្ធិឈរឈ្មោះបោះឆ្នោតរបស់ លោក សម រង្ស៊ី និងមន្ត្រីបក្សប្រឆាំងទាំងនោះ ចន្លោះពី ២០ ទៅ ២៥ឆ្នាំ កាលពីខែកក្កដា ឆ្នាំមុនដែរ។ លោក សាំង វណ្ណៈ ជាសមាជិកក្រុមមេធាវីនីតិរដ្ឋ និងជាប្រធានសារការីអង្គរផងដែរ។
វិទ្យុអាស៊ីសេរីមិនអាចសុំការឆ្លើយតបពីប្រធានគណៈមេធាវី លោក សាំង វណ្ណៈ បានទេ នៅថ្ងៃទី១៧ ខែតុលា។
នៅមុនអាណត្តិរបស់លោក សាំង វណ្ណៈ អតីតប្រធានគណៈមេធាវីដែលទើបនឹងចប់អាណត្តិ គឺ លោក លី ច័ន្ទតុលា គឺជាមេធាវីមានឥទ្ធិពលម្នាក់ក្នុងចំណោមក្រុមមេធាវីរបស់លោក គី តិច ដែលជាមេធាវីរដ្ឋាភិបាលនិងអតីតប្រធានគណៈមេធាវីផងដែរ។ លោក លោក លី ច័ន្ទតុលា ក៏ជាមេធាវីម្នាក់បានចូលរួមយ៉ាងសកម្មក្នុងសំណុំរឿងក្ដីរំលាយគណបក្សសង្គ្រោះជាតិ កាលពីចុងឆ្នាំ២០១៧ និងបានរៀបចំឯកសារស្នើសុំតុលាការកំពូលបំបិទសិទ្ធិធ្វើនយោបាយរបស់មន្ត្រីបក្សប្រឆាំងចំនួន ១១៨នាក់រយៈពេល ៥ឆ្នាំ។ ក្រោយពេលប្ដឹងរំលាយគណបក្សសង្គ្រោះជាតិបានជោគជ័យលោក លី ច័ន្ទតុលា ក៏ជាមេធាវីម្នាក់ ដែលកំពុងប្ដឹងប្រធានគណបក្សសង្គ្រោះជាតិ លោក កឹម សុខា ពីបទក្បត់ជាតិនៅតុលាការផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments