គ្រួសារជនរងគ្រោះ និងមន្ត្រីសង្គមស៊ីវិលជំរុញឱ្យតុលាការបើកការស៊ើបអង្កេត ដោយឈរលើគោលការណ៍យុត្តិធម៌ ពាក់ព័ន្ធកូនអ្នកឧកញ៉ា សុះ កំរី ដែលជាមេដឹកនាំសាសនាឥស្លាមកម្ពុជា ដែលមានកូនប្រុសឈ្មោះ កាមារ៉ូទីន ស៊ូហៃមី បានជាប់ពាក់ព័ន្ធ ករណីបៀតបៀនផ្លូវភេទកុមារីជនជាតិចាម ១៨នាក់ និងផ្ដល់សំណង់ ជំងឺចិត្តដល់ជនរងគ្រោះ។
ការស្នើសុំនេះ ធ្វើឡើងក្រោយពីនាយកដ្ឋានប្រឆាំងការជួញដូរមនុស្ស និងការពារអនីតិជននៃក្រសួងមហាផ្ទៃ បើកការស្រាវជ្រាវ និងបញ្ជាឱ្យសមត្ថកិច្ចចាប់ឃុំខ្លួន លោក កាម៉ារូទីន ស៊ូហៃមី ជាបណ្ដោះអាសន្ន ដើម្បីកសាងសំណុំរឿង បញ្ជូនទៅសាលាដំបូងរាជធានីភ្នំពេញ។
គ្រួសារកុមារីរងគ្រោះ អំពាវនាវឱ្យតុលាការស្វែងរកយុត្តិធម៌ជូនកុមាររងគ្រោះ ពីការរំលោភ និងបៀតបៀនកេរខ្មាសឱ្យបានគ្រប់គ្នា។
ស្ត្រីម្នាក់សុំមិនបញ្ចេញឈ្មោះ ដោយគិតអំពីសុវត្ថិភាព បានឱ្យវិទ្យុអាស៊ីសេរីដឹង កាលពីយប់ថ្ងៃទី១៦ តុលាថា ក្មួយស្រីរបស់លោកស្រីបានរៀបរាប់ប្រាប់អ្នកស្រីថា ជនសង្ស័យឈ្មោះ កាម៉ារូទីន ស៊ូហៃមី បានបៀតបៀនក្មួយអ្នកស្រី និងសិស្សដទៃទៀត ដែលស្នាក់នៅក្នុងអន្តេវាសិកដ្ឋាន នៅក្នុងសង្កាត់ឫស្សីកែវ រាជធានីភ្នំពេញ។
ការលើកឡើងរបស់ម្ដាយមីងជនរងគ្រោះនេះ ធ្វើឡើងនៅក្រោយពេលជនសង្ស័យមិនទាន់សារភាព ក្នុងពេលសមត្ថកិច្ចសួរចម្លើយ កាលពីថ្ងៃទី១៥ តុលា។ ក្រោយពីសួរចម្លើយ ព្រះរាជអាជ្ញាបានចេញដីកាឱ្យឃុំខ្លួនបណ្ដោះអាសន្ត ដើម្បីបន្តនីតិវិធីតាមផ្លួវច្បាប់។
មកទល់ពេលសមត្ថកិច្ចបានរកឃើញជនរងគ្រោះ ៤នាក់ ជាអនីតិជន ដែលមានអាយុពី ១៣ឆ្នាំ ទៅ ១៥ឆ្នាំ។ រីឯជនសង្ស័យ ពាក់ព័ន្ធនឹងការប្រព្រឹត្តបទល្មើសប្រទូស្តកេរខ្មាស និងរំលោភសេពសន្ថវៈ ឈ្មោះ សូហ៊ៃមី នេះ អាយុ ៣៣ឆ្នាំ។
វិទ្យុអាស៊ីសេរីមិនអាចទាក់ទងអគ្គស្នងការនគរបាលជាតិ លោក ស ថេត និងលោកឧត្ដមសេនីយ៍ឯក មួង សុធា អគ្គស្នងការរងនគរបាលជាតិ ដើម្បីសុំសួរអំពីបញ្ហានេះបន្ថែមបាននៅឡើយទេ។ រីឯអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ ក៏វិទ្យុអាស៊ីសេរីមិនទាន់ទាក់ទង ដើម្បីសុំសួរអំពីបញ្ហានេះបាននៅឡើយដែរ កាលពីថ្ងៃទី១៦ តុលា។
សមត្ថកិច្ចបានឃាត់ខ្លួនជនសង្ស័យ ស៊ូហៃមី យកមកសួរចម្លើយ កាលពីថ្ងៃទី១៥ តុលានេះ ក្រោយពេលសាធារណជន និងពលរដ្ឋជាច្រើន បានបង្ហោះសាររិះគន់លើបណ្ដាញសង្គមហ្វេសប៊ុក (Facebook) អំពីបៀតបៀនកេរខ្មាស និងរំលោភកុមារី ដែលរឿងនេះ បានបែកធ្លាយ និងគេចែករំលែកពាសពេញបណ្ដាញសង្គមហ្វេសប៊ុកកាលពីពេលថ្មីៗ នេះ។
ជនសង្ស័យ ស៊ូហៃមី ជាកូនប្រុសរបស់អ្នកឧកញ៉ា សុះ កំរី (Sos Kamry) ចាងហ្វាងនៃគណៈដឹកនាំជាន់ខ្ពស់នៃសាសនាឥស្លាមកម្ពុជា លោក សុះ កំរី ។
ម្ដាយមីងជនរងគ្រោះដដែលអះអាងថា ក្រោយពីផ្ទុះរឿងអាស្រូវនេះ ថ្នាក់ដឹកនាំសាលា អាន់នៀកម៉ះ ភ្នំពេញ (Madrasah-An-ni’man-Al-Islamiyah-Al-Thanawiyah) ឈ្មោះ អារ៉ាហ្វាត (Arafat) និង កូនប្រសារបស់អ្នកឧញ៉ា សុះ កំរី ឈ្មោះម៉ូត យូសុះ ជាអ៊ីម៉ាំខែត្រ ឬមេគណខែត្រ បានទៅបញ្ចុះបញ្ចូលឱ្យក្មួយរបស់អ្នកស្រី វិលទៅរៀនវិញ។
ក្រុមអ្នកលេងបណ្ដេញសង្គម និងប្រភពអ្នករស់នៅក្បែរសាលាបង្រៀនមួយនេះរិះគន់ថា ថ្នាក់ដឹកនាំសាលា និងក្រុមគ្រួសារ អ្នកឧកញ៉ា សុះ កំរី មិនសហការជាមួយសមត្ថកិច្ច ដើម្បីនាំខ្លួនជនសង្ស័យមកសួរចម្លើយ ដើម្បីឱ្យតុលាការចាត់នីតិវិធីតាមផ្លូវច្បាប់ បែរជាអ្នកនាំគ្នាការពារជនសង្ស័យទៅវិញ។
ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា ដែលបានតាមដានលើរឿងនេះដែរ ប្រាប់វិទ្យុអាស៊ីសេរី កាលពីថ្ងៃទី១៦ ខែតុលាថា ការចាប់ខ្លួន លោក កាមារ៉ូទីន ស៊ូហៃមី ដែលជាជនសង្ស័យនេះ គឺជាការល្អ ដើម្បីស៊ើបអង្កេតរកយុត្តិធម៌ពិតប្រាកដ។ ក៏ប៉ុន្តែ លោកថា ករណីសំណុំរឿងបៀតបៀនផ្លូវភេទនេះ តុលាការ ឬសមត្ថកិច្ច ត្រូវឈរលើគោលការណ៍ផ្ដល់យុត្តិធម៌ទាំងសងខាង ទទួលបានអយុត្តិធម៌ ។
លោកបន្ថែមថា ករណីបៀតបៀនផ្លូវភេទសិស្សសាលានេះ ពុំមែនទើបតែកើតមាននោះទេ លោកថា បើមើលតាមសាវតាររឿង ករណីនេះ បានកើតមានជាយូរមកហើយ ប៉ុន្តែ ជនរងគ្រោះ មិនហ៊ានប្ដឹង ព្រោះតែខ្លាចអំណាចជនបង្ក។ លោកសង្ឃឹមថា តុលាការនឹងកាត់ក្ដីឈរលើភាពយុត្តិធម៌ ដោយពុំស្ថិតក្រោមអំណាចបុគ្គលណាមួយនោះឡើយ។
ជំនួយការរបស់ចាងហ្វាងនៃគណៈដឹកនាំជាន់ខ្ពស់នៃសាសនាឥស្លាម មិនបានបកស្រាយរឿងនេះទេ កាលពីថ្ងៃទី១៦ តុលា។
កាលពីថ្ងៃទី១១ ខែតុលា ថា លោក សុះ កំរី បានបង្ហោះសារនៅលើទំព័រហ្វេសប៊ុកថា ក្រោយពីឃើញពាក្យចចាមអារ៉ាមនៅតាមបណ្ដាញសង្គម អំពីករណីសិស្សនារី ត្រូវបានរំលោភបំពាន នៅសាលារៀន អាន់នៀកម៉ះ ភ្នំពេញ (An-Nikmah Al-Islamiyah Phnom Penh) ដែលមានពាក់ព័ន្ធដល់កូនប្រុសរបស់លោក ឈ្មោះ ស៊ូហៃមី។ ក្រោយមក លោកក៏បានហៅលោក ស៊ូហៃមី មកសាកសួរជាច្រើនលើក ដើម្បីរកការពិត ប៉ុន្តែ លោក ស៊ូហៃមី បានបដិសេធថា ពុំបានប្រព្រឹត្ត ដូចពាក្យចចាមអារ៉ាមនោះឡើយ។
រីឯពលរដ្ឋជនជាតិចាម ម្នាក់សុំមិនបញ្ចេញឈ្មោះ ព្រោះបារម្ភអំពីសុវត្ថិភាពប្រាប់វិទ្យុអាស៊ីសេរីថា បើទោះជាលោក ស៊ូហៃមី ត្រូវបានសមត្ថកិច្ចចាប់ខ្លួន និងបញ្ជូនសំណុំរឿងទៅតុលាការហើយក្ដី ប៉ុន្តែ ករណីនេះ នៅមិនទាន់រកយុត្តិធម៌ជូនជនរងគ្រោះ នៅឡើយទេ។ កញ្ញា សង្ឃឹមថា តុលាការនឹងមានភស្តុតាង រឹងមាំ ដើម្បីរកការពិត ហើយ ជនបង្កត្រូវទទួលខុសត្រូវ ផ្ដល់សំណងជំងឺចិត្តជូនជនរងគ្រោះ
ប្រភពសុំមិនបញ្ចេញឈ្មោះ អះអាងថា នៅមានជនរងគ្រោះជាច្រើនទៀត ដែលក្រុមគ្រួសាររបស់ពួកគេខ្មាសគេផង និងខ្លាចអំណាចក្រុមគ្រួសារអ្នកឧកញ៉ា សុះ កំរី និងបក្ខពួកផង ពួកគេទាំងនោះ មិនចេញមុខប្ដឹងជនសង្ស័យនោះទេ។
ប្រធានអង្គការ អាហ្វេស៊ីប (AFESIP Cambodia)) អ្នកស្រី ម៉ម សុម៉ាលី ដែលឥឡូវនេះ មានជនរងគ្រោះកុមារីជាជនជាតិចាមម្នាក់ បានទៅស្នាក់នៅក្នុងមណ្ឌលរបស់អ្នកស្រី បានបង្ហោះសារ លើទំព័រហ្វេសប៊ុក នៅថ្ងៃទី១៦ខែ តុលា នៅតែអំពាវនាវឱ្យកុមារីរងគ្រោះទាំងអស់ ដែលចង់បានយុត្តិធម៌ឱ្យខ្លួនឯង និងគ្រួសារ ត្រូវតែងើបឈរ និយាយការពិត ប្រាប់ទៅសមត្ថកិច្ច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments