លោក នាយករដ្ឋមន្ត្រី ហ៊ុន ម៉ាណែត បានប្រកាសថា ក្បាលម៉ាស៊ីនដឹកនាំពន្ធនាគារព្រៃស ឬមណ្ឌលអប់រំកែប្រែទី១ «ម១» នឹងត្រូវផ្លាស់ប្ដូរ ក្រោយបែកធ្លាយវីដេអូមានជនបរទេសរាំច្រៀងក្នុងពន្ធនាគារ។ មន្ត្រីសង្គមស៊ីវិល ស្នើដល់ស្ថាប័នពាក់ព័ន្ធឲ្យចាត់វិធានការរដ្ឋបាល និងវិធានការផ្លូវច្បាប់ បើរកឃើញការបំពានច្បាប់ក្នុងពន្ធនាគារ។
លោកនាយករដ្ឋមន្ត្រី ហ៊ុន ម៉ាណែត បានសម្រេចឯកភាពជាមួយនឹងរដ្ឋមន្ត្រីក្រសួងមហាផ្ទៃ លោក ស សុខា ក្នុងការផ្លាស់ប្ដូររចនាសម្ព័ន្ធដឹកនាំមណ្ឌលអប់រំកែប្រែទី១ «ម១» ឬហៅថា ពន្ធនាគារព្រៃស ដើម្បីពង្រឹងប្រសិទ្ធភាពការងារ។
លោក ហ៊ុន ម៉ាណែត៖ «ម្សិលមិញ ឯកឧត្តម ស សុខា បានរាយការណ៍មក ហើយខ្ញុំឯកភាព ទី១ គឺពង្រឹង «ម១» នេះតាមរយៈការផ្លាស់ប្ដូររចនាសម្ព័ន្ធ ក្បាលម៉ាស៊ីនដឹកនាំតែម្ដង ដើម្បីពង្រឹងស្ថាប័ននេះ ហើយយើងបានត្រៀម ធ្វើយ៉ាងណា ដើម្បីធានានូវការពង្រឹងសន្តិសុខ»។
លោក ហ៊ុន ម៉ាណែត ថ្លែងបែបនេះ នៅក្នុងពិធីរំលឹកខួបអនុស្សាវរីយ៍ លើកទី ៣០ឆ្នាំ នៃថ្ងៃបង្កើតកងពលតូចលេខ ៧០ នៅបញ្ជាការដ្ឋានកងពលតូចលេខ ៧០ ស្ថិតនៅក្នុងរាជធានីភ្នំពេញ នៅព្រឹកថ្ងៃទី១៥ ខែតុលា។
ការសម្រេចផ្លាស់ប្ដូររចនាសម្ព័ន្ធដឹកនាំពន្ធនាគារព្រៃសនេះ ធ្វើឡើងក្រោយពីមានវីដេអូបែកធ្លាយមួយ លើបណ្ដាញសង្គមហ្វេសប៊ុក (Facebook) កាលពីពេលថ្មីៗ នេះ បង្ហាញថា មានជនបរទេសមួយក្រុម ក្នុងនោះ ក៏មានជនជាតិបរទេសកំពុងប្រើប្រាស់គ្រឿងញៀន និងចាក់ភ្លេងច្រៀងរាំក្នុងពន្ធនាគារ។ វីដេអូមានរយៈពេល ១៥វិនាទីនោះបង្ហាញថា បន្ទប់មួយក្នុងពន្ធនាគារ ដែលមានបណ្ដោយ និងទទឹងប្រមាណ៤ម៉ែត្រ មានកន្ត្រកតូចធំសម្រាប់ដាក់សម្ភារៈប្រើប្រាស់ប្រចាំថ្ងៃ ទូរដាក់ខោអាវ ទូរដាក់សម្ភារៈ តុមូលសម្រាប់បរិភោគអាហារ ធុងស្នោដាក់ទឹកកក និងធុងបាសមានកម្ពស់ស្មើចង្កេះ សម្រាប់ចាក់ភ្លេងជាដើម។ វីដេអូដដែលនេះ បង្ហាញទៀតថា ក្នុងបន្ទប់នោះ មានជនជាប់ឃុំជាង១០នាក់ប៉ុណ្ណោះ ដែលក្នុងចំណោមពួកគេនោះ មានជនជាប់ឃុំម្នាក់កំពុងអង្គុយកិនម្សៅក្រាមពណ៌ស ជនជាប់ឃុំម្នាក់ទៀតកំពុងអង្គុយចុចទូរស័ព្ទ និងជនជាប់ឃុំផ្សេងទៀតកំពុងរាំឡកក្នុងបន្ទប់។
អ្វី ដែលគួរឲ្យកត់សម្គាល់នោះ អ្នកជាប់ឃុំមនសិការមួយចំនួនឲ្យដឹងថា បន្ទប់ឃុំឃាំងក្នុងពន្ធនាគាររបស់ជនជាតិចិនខាងលើ ខុសគ្នាទៅនឹងបន្ទប់ជនជាប់ឃុំទូទៅ ឬជនជាប់ឃុំមនសិការ ដូចជាបន្ទប់ទូទៅមានជនជាប់ឃុំច្រើន ចាប់ពី២០ ដល់ជាង៣០នាក់ មិនអាចដាក់ខ្សែស្នួហាលខោអាវតាមជញ្ជាំងបានឡើយ បន្ទប់ចង្អៀតណែន ខណៈបន្ទប់ជនជាតិចិនវិញ មានទាំងតុអង្គុយសម្រាប់ហូបចំណីអាហារ និងកៅអីសម្រាប់អង្គុយលេងជាច្រើន និងមានធុងបាសសម្រាប់ចាក់ភ្លេងរាំរែកនៅក្នុងបន្ទប់ថែមទៀតផង។
អ្នកនាំពាក្យរងក្រសួងមហាផ្ទៃ លោក ទូច សុឃៈ ប្រាប់វិទ្យុអាស៊ីសេរីនៅថ្ងៃទី១៥ ខែតុលាថា ក្រោយមានការបែកធ្លាយវីដេអូជនជាតិបរទេសរាំច្រៀងក្នុងពន្ធនាគារ រដ្ឋមន្ត្រីក្រសួងមហាផ្ទៃ លោក ស សុខា បានបញ្ជាឲ្យមន្ត្រីជំនាញ ឲ្យធ្វើអធិការកិច្ច និងស្រាវជ្រាវលើករណីនេះ ដើម្បីផ្ទៀងផ្ទាត់ថា ជាវីដេអូចាស់ ឬថ្មី ព្រោះកន្លងទៅក្រសួងមហាផ្ទៃ ធ្លាប់បោសសម្អាតករណីខាងលើនេះរួចហើយ តាមពន្ធនាគារមួយចំនួន។ អ្នកនាំពាក្យរូបនេះ អះអាងថា ផ្អែកតាមការសម្រេចរបស់លោកនាយករដ្ឋមន្ត្រី ហ៊ុន ម៉ាណែត ក្រសួងមហាផ្ទៃនឹងចាត់វិធានការរដ្ឋបាល និងវិធានការផ្លូវច្បាប់ ក្នុងករណីរកឃើញថា មន្ត្រីពន្ធនាគារ មានជាប់ពាក់ព័ន្ធ និងបង្កឱកាសឲ្យជនជាប់ឃុំ ប្រព្រឹត្តដូចឃើញក្នុងវីដេអូ ដែលបែកធ្លាយ។
លោក ទូច សុឃៈ៖ «ជាលទ្ធផលបឋម គឺយើងរកឃើញថា ក្នុងចំណោមនោះ គឺមានម្នាក់ដែលបានចេញពីពន្ធនាគាររួចស្រេចទៅហើយ បន្ទាប់ពីគាត់បានអនុវត្តទោសរយៈពេល ២ឆ្នាំចប់សព្វគ្រប់។ អីចឹងយើងបន្តស្រាវជ្រាវបន្តទៅទៀត ក្នុងការប្រមែប្រមូលនូវវីដេអូផ្សេងៗ និងអ្វីៗដែលពាក់ព័ន្ធដទៃទៀត»។
ក្រោយបែកធ្លាយវីដេអូនេះដែរ ពន្ធនាការតាមខេត្តមួយចំនួន ដូចជាតាកែវ និងពោធិ៍សាត់ ក៏បានប្រជុំពង្រឹងការចុះឆែកឆេរ ស្វែងរកវត្ថុហាមឃាត់ក្នុងពន្ធនាគារផងដែរ កាលពីថ្ងៃទី១៤ ខែតុលា។
ទាក់ទងនឹងបញ្ហានេះ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត ប្រាប់វិទ្យុអាស៊ីសេរី នៅថ្ងៃទី១៥ ខែតុលាថា ស្ថានភាពទូទៅនៃពន្ធនាគារទូទាំងប្រទេស មានជនជាប់ឃុំច្រើនក្នុងបន្ទប់នីមួយៗ ហើយរស់នៅក្នុងលក្ខខណ្ឌចង្អៀតណែនណាន់តាន់តាប់ ខុសពីរូបភាព ដែលបានបែកធ្លាយ ហើយមហាជនមើលឃើញថា ជនជាប់ឃុំទាំងនោះរស់នៅសប្បាយរាំច្រៀងនៅក្នុងពន្ធនាគារ។ លោកស្នើដល់ក្រសួងពាក់ព័ន្ធឲ្យចាត់វិធានការច្បាប់លើករណីនេះ និងវិធានការរដ្ឋបាល បើរកឃើញភាពមិនប្រក្រតីពាក់ព័ន្ធនឹងអំពើពុករលួយ និងស្នើដល់រដ្ឋាភិបាល ស្វែងរកវិធានការកាត់បន្ថយភាពចង្អៀតណែនក្នុងពន្ធនាគារ។
លោក អំ សំអាត៖ «ក្រៅពីហ្នឹងក៏ត្រូវពិនិត្យមើលទៅលើលទ្ធផលនៃការស្រាវជ្រាវ ការស៊ើបអង្កេតបើសិនជាមានភាពមិនប្រក្រតីផ្សេងៗ ពាក់ព័ន្ធនឹងអំពើពុករលួយ ទាក់ទងនឹងបទល្មើសផ្សេងទៀត ត្រូវអនុវត្តតាមវិធានការផ្លូវច្បាប់ គឺវិធានការព្រហ្មទណ្ឌ»។
ភាពមិនប្រក្រតី និងបញ្ហាពុករលួយ ត្រូវគេសង្កេតឃើញបន្តកើតមានក្នុងពន្ធនាគារ និងមណ្ឌលអប់រំកែប្រែមួយចំនួន ខណៈវិធានការដោះស្រាយ ហាក់នៅពុំទាន់ឆ្លើយតបនៅឡើយទេ ដែលបណ្ដាលឲ្យមន្ត្រីពន្ធនាគារមួយចំនួន ឆក់យកឱកាសនេះ ធ្វើជាមុខរបររកស៊ីថែមទៀតផង។ ជាក់ស្ដែង អគ្គនាយករង នៃអគ្គនាយកដ្ឋានពន្ធនាគារ លោក ព្រុំ ចាន់នី ដែលពាក់ផ្កាយបី ត្រូវបានអង្គភាពប្រឆាំងអំពើពុករលួយ បើកការស៊ើបអង្កេត ហើយត្រូវតុលាការសម្រេចឃុំខ្លួនលោកបណ្ដោះអាសន្ន នៅមណ្ឌលកែប្រែទី១ កាលពីថ្ងៃទី២៩ ខែកក្កដា ពីបទសមគំនិតក្នុងអំពើស៊ីសំណូក រំលោភអំណាច និងបទប្រកាសទ្រព្យសម្បត្តិ និងបំណុល ពុំត្រឹមត្រូវ ពាក់ព័ន្ធនឹងការក្លែងបន្លំឯកសារពេទ្យ ដើម្បីស្នើសុំការលើកលែងទោសឱ្យទណ្ឌិតមានជំងឺឱ្យបាននៅក្រៅឃុំជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments