អាជីវករមួយចំនួននៅខេត្តបាត់ដំបងត្អូញត្អែរថា ពួកគេលក់មិនសូវដាច់ក្នុងពិធីបុណ្យអុំទូក បណ្ដែតប្រទីប និងបុណ្យចេញព្រះវស្សា នៅដងស្ទឹងសង្កែ ក្រុងបាត់ដំបង នៅថ្ងៃប្រកួតដំបូង ដោយសារអ្នកមកដើរលេងត្បិតត្បៀតមិនសូវហ៊ានចំណាយ និងអាកាសធាតុមិនអំណោយផល។
ពិធីបុណ្យអុំទូក នៅខេត្តបាត់ដំបង ក្នុងថ្ងៃប្រកួតថ្ងៃដំបូង កាលពីម្សិលមិញ មានទូកងចំណុះវែងខ្លីតាមបណ្ដាស្រុក បានអុំមកជុំគ្នា នៅក្បែរសួនវិមានឯករាជ្យ ដើម្បីចាប់គូប្រណាំង ខណៈប្រជាពលរដ្ឋ នាំគ្នាអង្គុយសងខាងស្ទឹងសង្កែ ចាប់ពីទីចាប់ផ្ដើមប្រណាំង នៅស្ពាន ស ខេង រហូតដល់ស្ពានថ្មថ្មី ដែលជាកងព័ន្ធចុងក្រោយ ដើម្បីទស្សនាការប្រកួត ចំណែកខ្លះទៀត ដើរកម្សាន្តតាមសួន ខ្លះទិញនំចំណី និងសម្ភារៈជាដើម។
យុវជនម្នាក់មកពីខេត្តបន្ទាយមានជ័យ លោក ម៉ាន់ រាហ៊ូ ប្រាប់វិទ្យុអាស៊ីសេរី ថា លោកមកលេងបុណ្យអុំទូកនៅក្រុងបាត់ដំបង ដើម្បីគាំទ្រដល់ទូកង ឈ្មោះ “មង្គលបុរីមានជ័យ បារមីស្ដេចកនសន្តិភាព” ស្ថិតក្នុងស្រុកមង្គលបុរី ខេត្តបន្ទាយមានជ័យ។ ទោះយ៉ាងណា យុវជនរូបនេះ ប្រាប់ថា ភាពសប្បាយរីករាយក្នុងបុណ្យអុំទូកនេះ មិនមែនស្ថិតលើការប្រណាំងទូកងនោះទេ ប៉ុន្តែគឺដោយសារមានមនុស្សអ៊ូអរ និងកន្លែងលក់ទំនិញចម្រុះទៅវិញ។
លោក ម៉ាន់ រាហ៊ូ៖ «ចង់និយាយថា នៅបាត់ដំបងសប្បាយណាស់។ បើចង់មកលេង មកលេងបាន ពិធីបុណ្យអុំទូករបស់ខ្មែរយើង សប្បាយ ហើយល្អមើល»។
យ៉ាងណាមិញ ប្រជាពលរដ្ឋ ដែលមកទស្សនាបុណ្យអុំទូក នៅខេត្តបាត់ដំបង ឆ្នាំនេះ ហាក់មិនសូវមានសំឡេងស្រែកហ៊ោកញ្ជ្រៀវខ្ញៀវខ្ញារ ដូចកាលពីមុននោះទេ ទាល់តែយូរៗម្ដង នៅពេលដល់គូទូកចំណុះវែង ដូចជា ទូកង “នរិន្ទរង្សី ពីជ័យចិត្របុត្រ” របស់ឃុំព្រែកនរិន្ទ ស្រុកឯកភ្នំ និងទូកង ឈ្មោះ “សុវណ្ណភេត្រា បាត់ដំបងសជ័យ” ជាដើម ដែលមានការប្រណាំងមានល្បឿនប្រដេញប្រកិតគ្នា ទើបមានបន្លឺសំឡេងហ៊ោអបអរសាទរ។
ក្រឡេកមើលការលក់ដូររបស់អាជីវករវិញ ទោះបីមានអ្នកមកលេងបុណ្យអុំទូកច្រើនក៏ដោយ ប៉ុន្តែ កន្លែងលក់ចំណីអាហារ ដូចជាប្រហិត ពោតស្ងោរ ម្ជូរ វត្ថុអនុស្សាវរីយ៍ និងរបស់ក្មេងលេងជាដើម មិនសូវមានអ្នកទិញនោះទេ ដោយអ្នកមកទស្សនាភាគច្រើន ទិញតែទឹកបរិសុទ្ធ និងភេសជ្ជៈបន្តិចបន្តួចប៉ុណ្ណោះ។
ក្នុងនោះ លោកស្រី សាន ស្ដើង ជាអ្នកលក់មួកស្លឹកត្នោត មកពីខេត្តកណ្ដាល បានត្អូញត្អែរថា លោកស្រីមកលក់មួកនៅកន្លែងបុណ្យអុំទូកចំនួន ៣ថ្ងៃជាប់គ្នាមកហើយ ប៉ុន្តែលោកស្រីលក់មិនបាន ១០០មួកឡើយ ទោះបីមេឃបើកថ្ងៃក្ដៅយ៉ាងណាក្ដី។
លោកស្រី សាន ស្ដើង៖ «ឆ្នាំមុនគ្រាន់លក់ដាច់បានខ្លះ ឥឡូវអត់។ បើសិនជាយើងលក់មួយថ្ងៃដល់ល្ងាច បើសិនជាដាច់ យើងចំណេញបាន ១៥ម៉ឺន ទៅជាង ២០ម៉ឺន នេះបើសិនជាយើងលក់ដាច់។ ប្រសិនបើលក់អត់ដាច់ រកតែ ៥ម៉ឺន មិនបានផង»។
មិនខុសពីអ្នកលក់មួកស្លឹកត្នោតឡើយ អ្នកលក់នំពុម្ព នៅខាងក្រោយរូបសំណាក ព្រះគណេស លោកស្រី កៅ ចន្ថា រៀបរាប់ថា លោកស្រីលក់នំពុម្ពមិនសូវដាច់នោះទេ ដោយអ្នកមកដើរលេង ច្រើនតែដើរហួស ទោះបីលោកស្រី ខំពពាយនាយយ៉ាងណាក្ដី។
លោកស្រី កៅ ចន្ថា៖ «វាមិនដឹង ដាច់ឬមិនដាច់ មិនទាន់ដឹងទេ ព្រោះមិនសូវមានមនុស្ស។ ប៉ុន្តែមិនទាន់ដល់ម៉ោងអ្នកមកលេង ក៏មិនដឹង»។
អភិបាលខេត្តបាត់ដំបង លោក សុខ លូ ថ្លែងនៅក្នុងវេទិកាពិធីបុណ្យអុំទូកថា ពិធីបុណ្យអុំទូក បានផ្ដល់អត្ថប្រយោជន៍ជាច្រើន ក្នុងការទាក់ទាញភ្ញៀវទេសចរ និងបង្កើនចំណូលសេដ្ឋកិច្ចដល់ពលរដ្ឋ។ លោក សុខ លូ បន្តថា ការរៀបចំពិធីបុណ្យអុំទូកឆ្នាំនេះមានលក្ខណៈប្លែកជាងឆ្នាំមុនៗ ដោយមានការតុបតែងលម្អភ្លើងពណ៌តាមទីសាធារណៈ និងការតាំងបង្ហាញប្រទីបខ្នាតធំចំនួន៧ នៅតាមបណ្ដោយដងស្ទឹងសង្កែ។
ពិធីបុណ្យអុំទូក បណ្ដែតប្រទីប និងថ្ងៃចេញព្រះវស្សា នៅចុងខែភទ្របទ នៅឆ្នាំនេះ រដ្ឋបាលខេត្តបាត់ដំបង បានរៀបចំផ្គូផ្គងទូកង ចូលរួមប្រកួតសរុបចំនួន ៤២ទូក ដោយបែងចែកចំណុះខ្នាតវែងខ្លី ៥ប្រភេទផ្សេងៗគ្នា មានដូចជា ទូកមួង ឬទូកផ្កាចារចំនួន ៦ទូក ទូកខ្នាតអន្តរជាតិនារី ចំនួន២ទូក ទូកខ្នាតអន្តរជាតិបុរស ចំនួន ៦ទូក ទូកខ្នាតខ្លីប្រពៃណីជាតិ ចំនួន ២៣ទូក និងប្រភេទទូកង ខ្នាតវែងប្រពៃណីជាតិ ចំនួន ៥ទូក និងមានកីឡាករ កីឡាការិនី ត្រៀមចូលរួមសរុបជាង ១ពាន់ ៤រយនាក់(១.៤៩០នាក់)។
ទោះជាបែបនេះក្ដី ពលរដ្ឋមួយចំនួន សង្កេតឃើញថា ទូកងដែលចូលរួមប្រណាំងមួយចំនួន បានបាត់បង់នូវប្រពៃណីទំនៀមទម្លាប់ចាស់ និងការតាំងលម្អសំខាន់ៗ មានដូចជា អ្នករាំដៀវនៅក្បាលទូក ត្រៃ អ្នកកាន់កន្សៃទូក និងកន្សែងបំពាក់ក្បាលទូក ដែលធ្វើឱ្យទូកង បាត់បង់សម្រស់ ភាពទាក់ទាញ និងឫទ្ធានុភាព។ ជាមួយគ្នានេះ ពួកគាត់ចង់ឱ្យមានការប្រណាំងទូកចែវឡើងវិញ ដែលជាទូកតំណាងឱ្យព្រះទីន័ងរបស់ព្រះរាជាសម័យបុរាណ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments