ពិធីបុណ្យអុំទូកនៅខេត្តបាត់ដំបង កាន់តែខិតជិតចូលមកដល់ ឯទូកងគ្រប់ខ្នាត មកពីតំបន់ផ្សេងៗគ្នា បានត្រៀមខ្លួនរួចជាស្រេច រង់ចាំការប្រណាំងប្រជែងដណ្ដើមជយលាភី។ ទោះយ៉ាងណា កីឡាករអុំទូកចាត់ទុកការប្រណាំងទូកង លើសពីប្រជែងយកពានរង្វាន់ ដោយសារពិធីកម្មទាក់ទិននឹងពិធីបុណ្យអុំទូកនេះ បានផ្សារភ្ជាប់នឹងវប្បធម៌ប្រពៃណី សិល្បៈ ជំនឿ និងកម្លាំងសាមគ្គី ដែលមានលក្ខណៈប្លែកគ្នាទៅតាមតំបន់នីមួយៗ។
បាំងតែ ១ថ្ងៃទៀតប៉ុណ្ណោះ ពិធីបុណ្យអុំទូក បណ្ដែតប្រទីប និងចេញព្រះវស្សាចុងខែភទ្របទ នៅខេត្តបាត់ដំបង នឹងឈានចូលមកដល់។ ទូកងចំណុះវែងខ្លីតាមបណ្ដាស្រុក បានលូនចេញពីវត្តអារាម ដឹកតាមគោយន្ត និងធ្វើពិធីសែនព្រេនទម្លាក់ចូលក្នុងស្ទឹងសង្កែ បណ្ដើរៗហើយ ខណៈកីឡាករអុំទូកស្រីប្រុស បានបោះរោងរៀបចំកន្លែងដេក ដើម្បីត្រៀមកម្លាំងដៃសម្រាប់ថ្ងៃប្រកួត។
ប្រធានក្រុមទូកងឈ្មោះ “កញ្ញាកន្ត្រប់មានជ័យ” របស់វត្តនទីសេដ្ឋា ស្រុកកណ្ដៀង ខេត្តពោធិ៍សាត់
លោក សុខ ប៉ក់ ប្រាប់វិទ្យុអាស៊ីសេរី ថា ក្រុមទូកបានធ្វើដំណើរមកដល់ទឹកដីខេត្តបាត់ដំបង តាំងពី
ថ្ងៃទី១៣ ខែតុលា ព្រោះផ្លូវឆ្ងាយ និងដើម្បីទុកឱកាសឱ្យកីឡាករ បានសម្រាកគ្រប់គ្រាន់។ លោកបន្តថា នេះជាលើកទីមួយហើយ ដែលទូក “កញ្ញាកន្ត្រប់មានជ័យ” បានចុះឈ្មោះមកចូលរួមប្រណាំងនៅលើដងស្ទឹងសង្កែ នាខេត្តបាត់ដំបង ក្រោយចៅអធិការវត្ត ដឹកនាំធ្វើទូកថ្មី ដោយយកឈ្មោះទូកពីសម័យបុរាណមកដាក់ ដើម្បីបន្តកេរ្តិ៍ឈ្មោះទូកចាស់។
លោក សុខ ប៉ក់៖ «នឹកឃើញចង់មក ចៅអធិការលោកដាក់ពាក្យមកខេត្តបាត់ដំបង ហ្នឹងមកប្រណាំងលេងនៅខេត្តបាត់ដំបង»។
នៅមុនការប្រកួត ទូកងចម្រុះពណ៌ និងក្បូរក្បាច់រចនា មកពីតាមបណ្ដាខេត្តមួយចំនួន បានបណ្ដែតខ្លួននៅលើផ្ទៃទឹកជាមួយនឹងបាយសី ធូបទៀន ដែលគ្រូអាចារ្យសែនព្រេននៅលើក្បាលទូក ដើម្បីសុំពរជ័យ និងបញ្ចៀសភាពចង្រៃ។ ចំពោះកីឡាករអុំទូក អត្ថន័យ នៃការប្រណាំងទូកនេះ មិនមែនដើម្បីការសប្បាយ ឬទទួលរង្វាន់នោះទេ ក៏ប៉ុន្តែ ការប្រជែង គឺដើម្បីបង្ហាញសម្រស់រចនាបថ ប្រវត្តិកេរដំណែល និងឈ្មោះរបស់ទូកង ដែលរំលេចជាមួយឈ្មោះវត្តអារាម និងនិគមស្រុករបស់ពួកគេ។
ខុសពីទូកតំបន់ឆ្ងាយ ដែលត្រូវធ្វើដំណើរទៅដល់ទីតាំងយ៉ាងហោចណាស់ ១ថ្ងៃ មុនការប្រកួត ទូកង “នរិន្ទរង្សី ពិជ័យចិត្របុត្រ” នៅឃុំព្រែកនរិន្ទ ស្រុកឯកភ្នំ នៅតែនាំគ្នាហ្វឹកហាត់ បន្ទាប់ពីរៀបចំរណ្ដាប់សែនព្រេន និងធ្វើពិធីទម្លាក់បង្គងរួចរាល់ហើយ។
កីឡាករទូកង នរិន្ទរង្សី ពិជ័យចិត្របុត្រ លោក សំបឿន សេដ្ឋា ឱ្យដឹងថា គណៈគ្រប់គ្រងនឹងហែទូកទៅប្រកួតនៅព្រឹកថ្ងៃទី១៦ ដើម្បីទុកពេលឱ្យចំណុះទូកបានហាត់សមផង និងដើម្បីសុវត្ថិភាពទូកផង។ លោកបន្តថា ទោះបីការប្រណាំងទូកគឺដើម្បីទទួលបានជ័យជំនះ តែសម្រាប់លោក ពិធីបុណ្យនេះ មានតម្លៃដែលបង្កប់ទៅដោយការជំរុញឱ្យយុវជនចូលរួមថែរក្សាទំនៀមទម្លាប់ប្រពៃណីរបស់ដូនតាជំនាន់មុន។
លោក សំបឿន សេដ្ឋា៖ «ដំបូងក្នុងការដែលយើងជាចំណុះថ្មីៗ ភាគច្រើនគឺភ័យ។ ប៉ុន្តែនៅពេលដែលយើងអុំបានមួយឆ្នាំពីរឆ្នាំ យើងមានអារម្មណ៍ថា នឹងនជាងមុនហើយនិងប្រមូលបានស្មារតីក្នុងការប្រណាំងទូក»។
យ៉ាងណាមិញ ការអុំទូក ដែលមានបណ្ដោយវែងដូចខ្លួនសត្វនាគ នៅលើផ្ទៃទឹកនេះ មិនមែនជាការងាយស្រួលនោះទេ ដោយអ្នកអុំ បានរៀបចំក្បួនដូចយុទ្ធសាស្ត្រកងទ័ពដែរ មានដូចជា អ្នករាំដៀវនៅក្បាលទូក ដែលមានតួនាទីកាច់ចង្វាក់ ក្រុមអ្នកអុំសម្រុកនៅខាងមុខ អ្នកអុំជំរុញនៅខាងក្រោយ រីឯខាងក្រោយគេបង្អស់ គឺជាអ្នកកាច់ចង្កូតតម្រង់ទិសដៅទូក។
យ៉ាងណាក៏ដោយចុះ ជាងធ្វើទូកង នៅស្រុកមង្គលបុរី ខេត្តបន្ទាយមានជ័យ លោក ម៉ា ផុង កត់សម្គាល់ឃើញថា នៅឆ្នាំនេះ ហាក់មិនសូវឃើញវត្តមានប្រភេទទូកចែវនោះឡើយ ដោយភាគច្រើនជាប្រភេទទូកអុំ ខណៈ ទូកអុំចាស់ៗ ដែលធ្លាប់មានឈ្មោះក្នុងការប្រកួតពីមុនមក បានអវត្តមាន ដោយជំនួសមកវិញនូវទូកថ្មីៗ មកវិញ។ ទោះយ៉ាងណា លោកថា គ្រប់ទូកទាំងអស់នៅតែមានតម្លៃខាងផ្នែកសិល្បៈ ជំនឿ ទំនៀមទម្លាប់ និងសាមគ្គីភាព ដែលមិនអាចកាត់ថ្លៃបាន។
លោក ម៉ា ផុង៖ «ពីសីមានជ័យបារមីស្រីស្អាត នោះឯង! មកអុំពីរដងបីដងហើយ មកអុំនៅនេះ ទើបខានឆ្នាំទៅមិញ និងឆ្នាំនេះនោះឯង។ ឆ្នាំទៅមិញយកមកឱ្យពួកអាជាប់គុក ពួកញៀនថ្នាំញៀននោះអុំ។ អុំនោះមិនមែនថាអុំយកចាញ់យកឈ្នះអីទេ គ្រាន់តែថាអុំលេងសប្បាយ»។
ពិធីរៀបចំបុណ្យអុំទូក បណ្ដែតប្រទីប និងថ្ងៃចេញព្រះវស្សា នៅចុងខែភទ្របទ នៅឆ្នាំនេះ ខេត្តបាត់ដំបង មានទូកង ចូលរួមប្រកួតសរុបចំនួន ៤២ទូក ដោយបែងចែកចំណុះខ្នាតវែងខ្លី ៥ប្រភេទផ្សេងៗគ្នា មានដូចជា ទូកមួង ឬទូកផ្កាចារចំនួន ៦ទូក ទូកខ្នាតអន្តរជាតិនារី ចំនួន២ទូក ទូកខ្នាតអន្តរជាតិបុរស ចំនួន ៦ទូក ទូកខ្នាតខ្លីប្រពៃណីជាតិ ចំនួន ២៣ទូក និងប្រភេទទូកង ខ្នាតវែងប្រពៃណីជាតិ ចំនួន ៥ទូក និងដោយមានកីឡាករ កីឡាការិនី ត្រៀមចូលរួមសរុបជាង ១ពាន់ ៤រយនាក់ (១.៤៩០នាក់)។ នេះបើតាមសេចក្ដីប្រកាសរបស់រដ្ឋបាលខេត្តបាត់ដំបង។
ពិធីបុណ្យអុំទូក មានដើមកំណើតតាំងពីរជ្ជកាលព្រះបាទជ័យវរ្ម័នទី៧ ក្នុងអំឡុងឆ្នាំ ១១៧៧ នៅគ្រាដែលព្រះអង្គបានរំដោះទឹកដីឱ្យរួចផុតពីការឈ្លានពានរបស់ពួកចាម ដែលបានគ្រប់គ្រងអាណាចក្រខ្មែរ អស់រយៈពេល ៤ឆ្នាំរហូតទទួលបានជ័យជម្នះ ហើយព្រះអង្គបានឡើងគ្រងរាជសម្បត្តិដឹកនាំប្រទេសជាតិ នៅឆ្នាំ១១៨១ និងបានធ្វើឱ្យប្រទេសជាតិមានការរីកចម្រើន រុងរឿងដល់កម្រិតកំពូល។
ប្រវត្តិសាស្ត្រត្រង់នេះហើយ ដែលនាំឱ្យប្រជាពលរដ្ឋខ្មែរ ប្រារព្ធពិធីបុណ្យអុំទូកនេះឡើង ដើម្បីរម្លឹកដល់គំរូវីរភាពដ៏អង់អាចក្លាហានរបស់កងទ័ពជើងទឹករបស់ខ្មែរ ដែលបានរំដោះទឹកដី ពីការជិះជាន់របស់ពួកចាម។ ក៏ប៉ុន្តែ ចំណេរក្រោយមក ដូនតាខ្មែរបានផ្សារភ្ជាប់ពិធីបុណ្យអុំទូកនេះ ទៅនឹងពិធីកម្មព្រះពុទ្ធសាសនា ដោយប្រជាពលរដ្ឋខ្មែរ តែងធ្វើពិធីបណ្ដែតប្រទីប នៅយប់ពេញបូណ៌មីខែអស្សុជ ដើម្បីបូជាចំពោះព្រះចង្កូមកែវពិភពនាគ នៅស្ទឹងនម្មទា ដោយពុទ្ធសាសនិក ជឿថា នឹងទទួលបានកុសលផលបុណ្យ និងសេចក្ដីសុខចម្រើន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments