អង្គការលីកាដូ (LICADO) នៅថ្ងៃទី១៦ ខែកញ្ញា ចេញផ្សាយអត្ថបទមួយរកឃើញថា ចាប់តាំងពីថ្ងៃទី២៣ ខែកក្កដា មកមនុស្សយ៉ាងតិច១០០នាក់ ត្រូវបានរដ្ឋាភិបាលចាប់ខ្លួន ហើយជាង៦០នាក់ត្រូវបានចោទប្រកាន់ និងកំពុងឃុំខ្លួនបណ្ដោះអាសន្នជុំវិញការមិនគាំទ្រកិច្ចសហប្រតិបត្តិការតំបន់ត្រីកោណអភិវឌ្ឍន៍ កម្ពុជា ឡាវ និងវៀតណាម ដែលហៅកាត់ថា CLV-DTA ។
អង្គការលីកាដូលើកឡើងនៅក្នុងអត្ថបទរបស់ខ្លួនថា ក្នុងចំណោមជនជាប់ឃុំទាំងនោះមានអាយុចន្លោះពី១៦ឆ្នាំ ដល់អាយុ៧០ឆ្នាំ ហើយភាគច្រើនពួកគាត់រងការចោទប្រកាន់ពីបទ« រួមគំនិតក្បត់» និង«ញុះញង់ឱ្យប្រព្រឹត្តបទឧក្រិដ្ឋជាអាទិ៍» និងបទចោទប្រកាន់ផ្សេងៗទៀត។ លើសពីនេះមានជនជាប់ឃុំចំនួន៦នាក់ជាសមាជិកអង្គការសមាគម និង៤នាក់ជាសកម្មជនសង្គម ហើយមនុស្សចំនួន១២នាក់គឺជាសកម្មជនគណបក្សជំទាស់ ព្រមទាំងមួយចំនួនទៀតគឺជាពលរដ្ឋ។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត ប្រាប់វិទ្យុអាស៊ីសេរីនៅថ្ងៃទី១៦ ខែកញ្ញា ថា គោលបំណងនៃការចេញផ្សាយអត្ថបទគឺដើម្បីបង្ហាញពីចំនួនអ្នកជាប់ឃុំ ហើយលោកទទូចឱ្យតុលាការដោះលែងពួកគាត់ឱ្យមានសេរីភាពឡើងវិញ។
លោក អំ សំអាត៖ «ប្រសិនជាតុលាការរកឃើញថា មិនមានកំហុសទេអាហ្នឹងគួរតែមានការដោះលែងឱ្យពួកគាត់បន្តការសិក្សាឡើងវិញហើយបើថា តុលាការរកឃើញយ៉ាងម៉េចវាអាស្រ័យលើតុលាការ។ ប៉ុន្តែយើងក៏មានសោកស្ដាយដែលបើគាត់ជាអនីតិជន អាយុ១៦ឆ្នាំដែលកំពុងសិក្សា ហើយជានិស្សិតដែលបន្តការសិក្សាយើងស្ដាយការសិក្សារបស់ពួកគាត់ណាស់»។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងយុត្តិធម៌លោក ជិន ម៉ាលីន ដើម្បីសុំការបញ្ជាក់បន្ថែមជុំវិញរឿងនេះបានទេនៅថ្ងៃទី១៦ ខែកញ្ញា។
ទោះជាយ៉ាងណា អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) និងអង្គការលើកលែងទោសអន្តរជាតិ (Amnesty International) កាលពីថ្ងៃទី២៨ ខែសីហា ទាមទារឱ្យរដ្ឋាភិបាលដោះលែងសកម្មជនសង្គម និងពលរដ្ឋទាំងអស់ដែលរដ្ឋាភិបាលកម្ពុជាបានចាប់ឃុំខ្លួនតាមទំនើងចិត្តឱ្យមានសេរីភាពឡើងវិញ និងជំរុញឱ្យរដ្ឋាភិបាលបញ្ឈប់ការរំលោភបំពានទៅលើសេរីភាពបញ្ចេញមតិដែលផ្ទុយពីកតិកាសញ្ញាអន្តរជាតិ ស្ដីពីសិទ្ធិពលរដ្ឋ និងនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments